ശ്രീനഗര്: ജമ്മു കശ്മീര് മുന് മുഖ്യമന്ത്രിയും പി.ഡി.പി നേതാവുമായി മെഹബൂബ മുഫ്തിയെ വീട്ടുതടങ്കലില് നിന്ന് മോചിപ്പിച്ചു. ഒരു വര്ഷത്തിലേറെയാണ് മുഫ്തി തടങ്കലില് കഴിഞ്ഞത്.
ജമ്മുകശ്മീര് സര്ക്കാര് വക്താവ് രോഹിത് കന്സാല് ആണ് ട്വിറ്ററിലൂടെ ഇക്കാര്യം ഔദ്യോഗികമായി അറിയിച്ചത്. മെഹബൂബ മുഫ്തിയെ ഉടന് മോചിതയാക്കും- എന്നായിരുന്നു ട്വീറ്റ്.
‘ ഈ ദുഷ്കരമായ സമയങ്ങളില് എന്നെ പിന്തുണച്ച എല്ലാവരോടും നന്ദി പറയുന്നു. എല്ലാവരോടും ഞാന് കടപ്പെട്ടിരിക്കുന്നു- എന്നായിരുന്നു വാര്ത്ത സ്ഥിരീകരിച്ച് മെഹബൂബയുടെ ട്വീറ്റ്.
ജമ്മുകശ്മീരിന്റെ പ്രത്യേക പദവിയെടുത്തുമാറ്റിയതുമായി ബന്ധപ്പെട്ടാണ് മുഫ്തിയടക്കമുള്ള നേതാക്കളെ തടങ്കലിലാക്കാന് കേന്ദ്രസര്ക്കാര് ഉത്തരവിട്ടത്. ഇക്കഴിഞ്ഞ ജൂലൈയില് മുഫ്തിയുടെ തടങ്കല് മൂന്ന് മാസം കൂടി നീട്ടിയിരുന്നു. 2019 ആഗസ്റ്റ് 5 മുതല് മെഹബൂബ മുഫ്തി തടവിലാണ്. ആദ്യം സര്ക്കാര് ഗസ്റ്റ് ഹൗസിലും പിന്നീട് സ്വന്തം വീട്ടിലുമായാണ് മെഹ്ബൂബയെ തടവിലാക്കിയത്.
ജമ്മുകശ്മീരിലെ പ്രമുഖ രാഷ്ട്രീയ നേതാക്കളായ ഒമര് അബ്ദുള്ള, ഫാറൂഖ് അബ്ദുള്ള എന്നിവരെയും തടങ്കലിലാക്കിയിരുന്നു.
