ന്യൂഡൽഹി: കേന്ദ്ര സർക്കാർ കര്‍ശനമായി നടപ്പിലാക്കിയ ലോക് ഡൗൺ ഇന്ത്യന്‍ സമ്പദ് വ്യവസ്ഥയെ ഗുരുതരമായി ബാധിച്ചുവെന്ന് സുപ്രീംകോടതി. റിസർവ് ബാങ്ക് തീരുമാനിച്ചു എന്ന നാട്യത്തിൽ ഒഴിഞ്ഞു മാറുകയാണ് കേന്ദ്ര സർക്കാർ എന്നും സുപ്രീം കോടതി കുറ്റപ്പെടുത്തി.
റിസര്‍വ് ബാങ്ക് തീരുമാനമെടുത്തുന്നുവെന്ന് പറയുന്ന കേന്ദ്ര സര്‍ക്കാര്‍ സ്വന്തം നിലപാട് വ്യക്തമാക്കണമെന്നും സുപ്രീം കോടതി ആവശ്യപ്പെട്ടു. സര്‍ക്കാര്‍ റിസര്‍വ് ബാങ്കിന്‍റെ പിന്നില്‍ ഒളിക്കുകയാണ് എന്നും റിസര്‍വ് ബാങ്കിന്‍റെ മറുപടിയുമായി മുന്നോട്ട് പോകുകയാണെന്നും കോടതി കുറ്റപ്പെടുത്തി.
മൊറോട്ടോറിയം സമയത്ത് വായ്പ തിരിച്ചടവിന് പലിശ ഈടാക്കുന്നതിനെ ചോദ്യം ചെയ്ത് സമര്‍പ്പിച്ച ഹര്‍ജിയില്‍ വാദം കേള്‍ക്കവേയാണ് ജസ്റ്റീസ് അശോക് ഭൂഷണ്‍, ജസ്റ്റീസ് എം.ആര്‍. ഷാ എന്നിവരടങ്ങിയ ബഞ്ച് കേന്ദ്ര സര്‍ക്കാരിനെ വിമര്‍ശിച്ചത്.
കല്‍ക്കരി കുടിശികയെ കുറിച്ചും സത്യവാങ് മൂലം സമര്‍പ്പിക്കുന്നതിന് വരുത്തിയ കാലതാമസത്തെക്കുറിച്ചും നിലപാട് വ്യക്തമാക്കണമെന്നും കോടതി കേന്ദ്രത്തോട് ആവശ്യപ്പെട്ടു. കൂടാതെ സോളിസിറ്റര്‍ ജനറല്‍ തുഷാര്‍ മേത്തയോട് വായ്പ മൊറോട്ടോറിയം കേസില്‍ സത്യവാങ് മൂലം സമര്‍പ്പിക്കാനുള്ള സമയപരിധി അറിയിക്കണമെന്ന് സുപ്രീംകോടതി ആവശ്യപ്പെട്ടു. ഇതിനായി ഒരാഴ്ചത്തെ കാലാവധി നൽകണമെന്ന് തുഷാര്‍ മേത്ത സുപ്രീംകോടതിയോട് ആവശ്യപ്പെട്ടു
