ഡൽഹി  / 2026 / നവംബർ 10

ഡൽഹിയിൽ യമുന നദിയിലൂടെ ആദ്യ വിനോദസഞ്ചാര ക്രൂസ് സർവീസ് ആരംഭിക്കുന്നു. കേന്ദ്ര തുറമുഖ, ഷിപ്പിങ്, ജലപാത മന്ത്രി സർബാനന്ദ സോനോവാൾ നവംബർ 10 ചൊവ്വാഴ്ച സോണിയ വിഹാറിൽ സർവീസ് ഉദ്ഘാടനം ചെയ്യും. ഡൽഹി ലെഫ്റ്റനന്റ് ഗവർണർ സർദാർ തരൺജിത് സിങ് സന്ധുവും മുഖ്യമന്ത്രി രേഖ ഗുപ്തയും പങ്കെടുക്കും. സോണിയ വിഹാർ മുതൽ ജഗത്പുർ വരെയുള്ള നദീഭാഗത്താണ് സർവീസ് ഒരുക്കിയിരിക്കുന്നത്. നദിയെ അടിസ്ഥാനമാക്കിയുള്ള വിനോദസഞ്ചാരം പ്രോത്സാഹിപ്പിക്കാനും തലസ്ഥാനത്തെത്തുന്നവർക്ക് പുതിയൊരു വിനോദാനുഭവം നൽകാനുമാണ് പദ്ധതി.

കേന്ദ്രമന്ത്രിമാരും ഡൽഹി മന്ത്രിമാരും പങ്കെടുക്കും

കേന്ദ്ര തുറമുഖ, ഷിപ്പിങ്, ജലപാത സഹമന്ത്രി ശന്തനു ഠാക്കൂർ, കേന്ദ്ര റോഡ് ഗതാഗത, ദേശീയപാത സഹമന്ത്രി ഹർഷ് മൽഹോത്ര എന്നിവരും ഉദ്ഘാടനച്ചടങ്ങിൽ പങ്കെടുക്കും. ഡൽഹി പൊതുമരാമത്ത്, ജലസേചന, പ്രളയനിയന്ത്രണ മന്ത്രി പർവേശ് സാഹിബ് സിങ്, ടൂറിസം മന്ത്രി കപിൽ മിശ്ര, പാർലമെന്റ് അംഗം മനോജ് തിവാരി എന്നിവരും ചടങ്ങിനെത്തും. കേന്ദ്ര, ഡൽഹി സർക്കാരുകളിലെ മുതിർന്ന ഉദ്യോഗസ്ഥരും പങ്കെടുക്കും.

ദേശീയ ജലപാതയിൽ പരീക്ഷണയാത്ര പൂർത്തിയായി

ദേശീയ ജലപാത നിയമം 2016 പ്രകാരം യമുന നദിയെ ദേശീയ ജലപാത 110 ആയി പ്രഖ്യാപിച്ചിട്ടുണ്ട്. ഈ ജലപാതയുടെ വിനോദയാത്രാ സാധ്യതകൾ പ്രയോജനപ്പെടുത്തുന്നതിലും നദീ വിനോദസഞ്ചാരം വികസിപ്പിക്കുന്നതിലും സോണിയ വിഹാർ മുതൽ ജഗത്പുർ വരെയുള്ള ക്രൂസ് സർവീസ് സുപ്രധാന ചുവടുവെപ്പാണ്. ഉദ്ഘാടനത്തിന് മുന്നോടിയായി കഴിഞ്ഞ മാസം ക്രൂസ് യാനത്തിന്റെ പരീക്ഷണയാത്രകൾ വിജയകരമായി നടത്തി. ഇന്ത്യൻ ഉൾനാടൻ ജലപാത അതോറിറ്റിയിലെയും ഡൽഹി സർക്കാരിലെയും മുതിർന്ന ഉദ്യോഗസ്ഥരുടെ സാന്നിധ്യത്തിലായിരുന്നു പരീക്ഷണയാത്രകൾ.

വൈദ്യുത ക്രൂസിലൂടെ പരിസ്ഥിതിസൗഹൃദ യാത്ര

കേന്ദ്ര തുറമുഖ, ഷിപ്പിങ്, ജലപാത മന്ത്രാലയത്തിന് കീഴിലുള്ള ഇന്ത്യൻ ഉൾനാടൻ ജലപാത അതോറിറ്റിയാണ് പദ്ധതിക്ക് നേതൃത്വം നൽകുന്നത്. സുസ്ഥിര ഉൾനാടൻ ജലഗതാഗതം പ്രോത്സാഹിപ്പിക്കാനും നഗരഗതാഗതത്തിന്റെയും വിനോദസഞ്ചാര അടിസ്ഥാനസൗകര്യങ്ങളുടെയും അവിഭാജ്യ ഘടകമായി ജലപാതകളെ വികസിപ്പിക്കാനുമുള്ള അതോറിറ്റിയുടെ പ്രതിബദ്ധതയാണ് പദ്ധതി വ്യക്തമാക്കുന്നത്. ഡൽഹി നിവാസികൾക്കും വിനോദസഞ്ചാരികൾക്കും വേറിട്ട അനുഭവം നൽകുന്നതിനൊപ്പം യമുനയുമായുള്ള പൊതുജനങ്ങളുടെ ബന്ധം കൂടുതൽ ശക്തമാക്കാനും പദ്ധതി സഹായിക്കുമെന്നാണ് പ്രതീക്ഷ. വൈദ്യുതിയിൽ പ്രവർത്തിക്കുന്ന ക്രൂസ് യാനങ്ങൾ ഉപയോഗിക്കുന്നത് ശുദ്ധവും സുസ്ഥിരവുമായ ഗതാഗതത്തിൽ ഉൾനാടൻ ജലപാതകൾക്കുള്ള സാധ്യതയും തെളിയിക്കും. ദേശീയ തലസ്ഥാന മേഖലയ്ക്ക് പുതിയൊരു വിനോദസഞ്ചാര ആകർഷണവും ഇതിലൂടെ ലഭിക്കും.

പദ്ധതിക്കായി കൈകോർക്കുന്നത് വിവിധ വകുപ്പുകൾ

ഡൽഹി വികസന അതോറിറ്റി, ഡൽഹി ടൂറിസം ആൻഡ് ട്രാൻസ്പോർട്ടേഷൻ ഡെവലപ്മെന്റ് കോർപ്പറേഷൻ, ഡൽഹി ജൽ ബോർഡ്, ഡൽഹി സർക്കാരിന്റെ ജലസേചന, പ്രളയനിയന്ത്രണ വകുപ്പ് എന്നിവയുമായി സഹകരിച്ചാണ് ഇന്ത്യൻ ഉൾനാടൻ ജലപാത അതോറിറ്റി യമുന വിനോദസഞ്ചാര ക്രൂസ് സർവീസ് വികസിപ്പിക്കുന്നത്. കേന്ദ്ര തുറമുഖ, ഷിപ്പിങ്, ജലപാത മന്ത്രാലയത്തിന് കീഴിലാണ് പദ്ധതി നടപ്പാക്കുന്നത്.

.