പുണെ  / 2026  / നവംബർ 03

പുണെയിലെ ഹിഞ്ചവഡി–ശിവാജിനഗർ മെട്രോ പാത പ്രധാനമന്ത്രി നരേന്ദ്ര മോദി നവംബർ മൂന്നിന് ഉദ്ഘാടനം ചെയ്തു. നഗരത്തിലെ മെട്രോ വികസനത്തിനുള്ള പുതിയ പാതയുടെ നിർമാണത്തിനും തുടക്കമിട്ടു. പ്രധാന വിവരസാങ്കേതിക കേന്ദ്രമായ ഹിഞ്ചവഡിയിലേക്കുള്ള യാത്ര എളുപ്പമാക്കുന്നതാണ് തുറന്ന പാത. പുതിയ വികസനപദ്ധതി പുണെയിലെ പഴയതും പുതിയതുമായ പ്രദേശങ്ങൾ തമ്മിലുള്ള യാത്രാസൗകര്യം മെച്ചപ്പെടുത്തും.

യാത്രാസമയം കുറയും; നഗരവികസനത്തിന് വേഗമേറും

ജനങ്ങളുടെ യാത്രാസമയം കുറയ്ക്കാനും നഗരത്തിലെ സാമ്പത്തിക പ്രവർത്തനങ്ങൾക്ക് വേഗം നൽകാനുമാണ് മെട്രോ വികസനമെന്ന് പ്രധാനമന്ത്രി പറഞ്ഞു. സർക്കാർ–സ്വകാര്യ പങ്കാളിത്തത്തിലാണ് ഉദ്ഘാടനം ചെയ്ത പാത നിർമിച്ചത്. യാത്ര കൂടുതൽ സൗകര്യപ്രദമാകുന്നതിലൂടെ സാധാരണക്കാർക്കും ഇടത്തരക്കാർക്കും നേട്ടമുണ്ടാകുമെന്നും അദ്ദേഹം പറഞ്ഞു. മഹാരാഷ്ട്ര ഗവർണർ ജിഷ്ണു ദേവ് വർമ, മുഖ്യമന്ത്രി ദേവേന്ദ്ര ഫഡ്നവിസ്, കേന്ദ്രമന്ത്രി മനോഹർ ലാൽ, ഉപമുഖ്യമന്ത്രിമാരായ ഏകനാഥ് ഷിൻഡെ, സുനേത്ര അജിത് പവാർ എന്നിവർ ചടങ്ങിൽ പങ്കെടുത്തു.

പത്തുവർഷം മുമ്പ് തുടങ്ങിയ യാത്രയ്ക്ക് കൂടുതൽ ദൂരം

പത്തുവർഷം മുമ്പ് പുണെ മെട്രോയുടെ ആദ്യഘട്ടത്തിന് തറക്കല്ലിടാൻ എത്തിയ കാര്യം മോദി അനുസ്മരിച്ചു. വിവരസാങ്കേതികവിദ്യ, വാഹനനിർമാണം, മരുന്നുനിർമാണം തുടങ്ങിയ മേഖലകളിൽ വളരുന്ന പുണെയ്ക്ക് മികച്ച പൊതുഗതാഗതം ആവശ്യമാണെന്ന് അദ്ദേഹം പറഞ്ഞു. ചെറുനഗരങ്ങളെയും വളർച്ചാകേന്ദ്രങ്ങളാക്കുകയാണ് ലക്ഷ്യം. നഗരവികസനത്തിനുള്ള അർബൻ ചലഞ്ച് ഫണ്ടിന് കേന്ദ്രം ഒരുലക്ഷം കോടി രൂപയുടെ സഹായം നൽകുമെന്നും അദ്ദേഹം വ്യക്തമാക്കി.

മെട്രോ വികസനത്തിൽ വൻ നിക്ഷേപമെന്ന് പ്രധാനമന്ത്രി

രാജ്യത്തെ മെട്രോ ശൃംഖല 2014ലെ 248 കിലോമീറ്ററിൽനിന്ന് ഏകദേശം 1,200 കിലോമീറ്ററായി വർധിച്ചതായി പ്രധാനമന്ത്രി പറഞ്ഞു. മെട്രോ സർവീസുള്ള നഗരങ്ങളുടെ എണ്ണം അഞ്ചിൽനിന്ന് 26 ആയെന്നും ദിവസവും ഒരുകോടിയിലധികം പേർ യാത്ര ചെയ്യുന്നുണ്ടെന്നും അദ്ദേഹം വ്യക്തമാക്കി. മഹാരാഷ്ട്രയിൽ ഏകദേശം 175 കിലോമീറ്ററിൽ മെട്രോ സർവീസുണ്ടെന്നും 680 കിലോമീറ്ററിലധികം പാതകളിൽ പ്രവൃത്തി നടക്കുകയാണെന്നും മോദി പറഞ്ഞു. സംസ്ഥാനത്തെ മെട്രോ അടിസ്ഥാനസൗകര്യങ്ങളിൽ രണ്ടരലക്ഷം കോടി രൂപയിലധികം നിക്ഷേപിക്കുന്നതായും അദ്ദേഹം അറിയിച്ചു.

പ്രതികൂല കാലാവസ്ഥയിൽ ദുരിതമനുഭവിക്കുന്ന മഹാരാഷ്ട്രയിലെ കർഷകർക്ക് സർക്കാരിന്റെ പിന്തുണയും പ്രധാനമന്ത്രി ഉറപ്പുനൽകി. ഉത്സവകാലത്ത് ദുരിതബാധിത കുടുംബങ്ങളെ സമൂഹം ചേർത്തുപിടിക്കണമെന്നും അദ്ദേഹം അഭ്യർഥിച്ചു.