ന്യൂഡൽഹി  /  2026  / ഒക്ടോബർ 26  

ബംഗാൾ ഉൾക്കടലിൽ രൂപപ്പെട്ട അർണബ് ചുഴലിക്കാറ്റിനെ നേരിടാനുള്ള മുന്നൊരുക്കങ്ങൾ ദേശീയ പ്രതിസന്ധി നിവാരണ സമിതി വിലയിരുത്തി. കാബിനറ്റ് സെക്രട്ടറി ഡോ. ടി. വി. സോമനാഥന്റെ അധ്യക്ഷതയിൽ ഇന്ന് ചേർന്ന യോഗത്തിലാണ് കേന്ദ്ര ഏജൻസികളും സംസ്ഥാനങ്ങളും സ്വീകരിച്ച നടപടികൾ പരിശോധിച്ചത്. ഒക്ടോബർ 28ന് ഉച്ചയ്ക്കുമുമ്പ് ചുഴലിക്കാറ്റ് ആന്ധ്രപ്രദേശ് തീരം കടക്കുമെന്നാണ് പ്രവചനം. ജീവഹാനി ഒഴിവാക്കാനും നാശനഷ്ടങ്ങൾ പരമാവധി കുറയ്ക്കാനും രക്ഷാപ്രവർത്തന സംവിധാനങ്ങളും ഒഴിപ്പിക്കൽ നടപടികളും സജ്ജമാക്കിയതായി അധികൃതർ അറിയിച്ചു.

അർണബായി ശക്തിപ്രാപിച്ച് ന്യൂനമർദം

കിഴക്കൻ മധ്യ ബംഗാൾ ഉൾക്കടലിലും അതിനോടുചേർന്ന തെക്കുകിഴക്കൻ മേഖലയിലുമുണ്ടായിരുന്ന തീവ്ര ന്യൂനമർദം ഏതാണ്ട് പടിഞ്ഞാറോട്ട് നീങ്ങി അർണബ് ചുഴലിക്കാറ്റായി ശക്തിപ്രാപിച്ചതായി കേന്ദ്ര കാലാവസ്ഥാ വകുപ്പ് ഡയറക്ടർ ജനറൽ യോഗത്തിൽ വിശദീകരിച്ചു. ഇന്ന് പുലർച്ചെ അഞ്ചരയ്ക്ക് കിഴക്കൻ മധ്യ ബംഗാൾ ഉൾക്കടലിലും അതിനോടുചേർന്ന പടിഞ്ഞാറൻ മധ്യ മേഖലയിലുമായിരുന്നു ചുഴലിക്കാറ്റിന്റെ സ്ഥാനം.

ആൻഡമാൻ ദ്വീപുകളിലെ ശ്രീ വിജയപുരത്തിന് വടക്കുപടിഞ്ഞാറായി ഏകദേശം 590 കിലോമീറ്റർ അകലെയായിരുന്നു ചുഴലിക്കാറ്റ്. ആന്ധ്രപ്രദേശിലെ വിശാഖപട്ടണത്തിന് കിഴക്ക് തെക്കുകിഴക്കായി 650 കിലോമീറ്ററും കാക്കിനാഡയ്ക്ക് കിഴക്ക് തെക്കുകിഴക്കായി 730 കിലോമീറ്ററും അകലെയാണിത്. മച്ചിലിപട്ടണത്തിന് കിഴക്കായി 830 കിലോമീറ്ററും ബാപട്‌ലയ്ക്ക് കിഴക്കായി 910 കിലോമീറ്ററുമാണ് അകലം.

ഇരുപത്തെട്ടിന് തീരം കടക്കും; കാറ്റിന്റെ വേഗം കൂടും

ഒക്ടോബർ 27 വരെ ചുഴലിക്കാറ്റ് പടിഞ്ഞാറ് വടക്കുപടിഞ്ഞാറ് ദിശയിൽ നീങ്ങുമെന്നാണ് പ്രവചനം. തുടർന്ന് വടക്കുപടിഞ്ഞാറോട്ട് തിരിഞ്ഞ് ആന്ധ്രപ്രദേശ് തീരത്തേക്ക് നീങ്ങും. ഒക്ടോബർ 28ന് ഉച്ചയ്ക്കുമുമ്പ് ബാപട്‌ലയ്ക്കും വിശാഖപട്ടണത്തിനുമിടയിൽ ആന്ധ്രപ്രദേശ്, യാനം തീരങ്ങൾ അതിതീവ്ര ചുഴലിക്കാറ്റായി കടക്കാനാണ് സാധ്യത.

തീരം കടക്കുമ്പോൾ മണിക്കൂറിൽ 115 മുതൽ 125 കിലോമീറ്റർ വരെ വേഗത്തിൽ തുടർച്ചയായി കാറ്റുവീശാം. ഇടയ്ക്കുള്ള ശക്തമായ കാറ്റിന്റെ വേഗം മണിക്കൂറിൽ 140 കിലോമീറ്റർ വരെയാകാം. തുടർന്ന് തെലങ്കാന, തെക്കൻ ഒഡിഷ, തെക്കൻ ഛത്തീസ്ഗഢ്, മധ്യ ഛത്തീസ്ഗഢ് എന്നിവിടങ്ങളിലെ ജില്ലകളെയും കിഴക്കൻ ഉത്തർപ്രദേശിനെയും ബിഹാറിനെയും ചുഴലിക്കാറ്റ് ബാധിച്ചേക്കും.

അഭയകേന്ദ്രങ്ങളും ഒഴിപ്പിക്കൽ സംവിധാനങ്ങളും സജ്ജം

ആന്ധ്രപ്രദേശ്, ഒഡിഷ, തെലങ്കാന, ഛത്തീസ്ഗഢ്, കേന്ദ്രഭരണപ്രദേശമായ പുതുച്ചേരി എന്നിവിടങ്ങളിലെ ചീഫ് സെക്രട്ടറിമാരും മുതിർന്ന ഉദ്യോഗസ്ഥരും മുന്നൊരുക്കങ്ങൾ യോഗത്തിൽ വിശദീകരിച്ചു. സംസ്ഥാന സർക്കാരുകളും പ്രാദേശിക ഭരണകൂടങ്ങളും ആവശ്യത്തിന് അഭയകേന്ദ്രങ്ങളും ആളുകളെ സുരക്ഷിതസ്ഥാനങ്ങളിലേക്ക് മാറ്റാനുള്ള സംവിധാനങ്ങളും ഒരുക്കിയിട്ടുണ്ട്. ദേശീയ, സംസ്ഥാന ദുരന്തനിവാരണ സേനകളുടെ ആവശ്യമായ സംഘങ്ങളെ സജ്ജമാക്കി നിർത്തിയിട്ടുണ്ട്. ജില്ലാ കൺട്രോൾ റൂമുകളും പ്രവർത്തനം തുടങ്ങി സ്ഥിതിഗതികൾ നിരീക്ഷിക്കുന്നുണ്ട്.

ഒക്ടോബർ 26 മുതൽ 29 വരെ തെക്കുപടിഞ്ഞാറൻ ബംഗാൾ ഉൾക്കടലിലും അതിനോടുചേർന്ന മധ്യ മേഖലയിലും മത്സ്യബന്ധനത്തിന് പോകരുതെന്ന് നിർദേശിച്ചിട്ടുണ്ട്. ആന്ധ്രപ്രദേശ്, ഒഡിഷ, പുതുച്ചേരിയിലെ യാനം എന്നിവയുടെ തീരങ്ങളിലും തീരത്തോടുചേർന്ന കടൽമേഖലകളിലും ഈ നിർദേശം ബാധകമാണ്. നേരത്തേ കടലിൽ പോയ മത്സ്യത്തൊഴിലാളികൾ തിരിച്ചെത്തിയിട്ടുണ്ട്.

സേനകളും തീരരക്ഷാസേനയും രക്ഷാപ്രവർത്തനത്തിന് തയ്യാർ

ചുഴലിക്കാറ്റിന്റെ ആഘാതത്തിൽ നാശനഷ്ടങ്ങൾ കുറയ്ക്കാനുള്ള മുൻകരുതലുകൾ സ്വീകരിക്കുന്നതായി യോഗത്തിൽ പങ്കെടുത്ത കേന്ദ്ര മന്ത്രാലയങ്ങളും വകുപ്പുകളും അറിയിച്ചു. നിശ്ചിത പ്രവർത്തന നടപടിക്രമങ്ങളെല്ലാം ഒരുക്കിയിട്ടുണ്ട്. ആവശ്യമായ മാർഗനിർദേശങ്ങളും നൽകിയിട്ടുണ്ട്. ദേശീയ ദുരന്തനിവാരണ സേന സംഘങ്ങളെ വിന്യസിച്ചതായും അധിക സംഘങ്ങളെ സജ്ജമാക്കി നിർത്തിയതായും അറിയിച്ചു.

കരസേന, നാവികസേന, വ്യോമസേന, ഇന്ത്യൻ തീരരക്ഷാസേന എന്നിവയുടെ രക്ഷാ-ദുരിതാശ്വാസ സംഘങ്ങളും കപ്പലുകളും വിമാനങ്ങളും തയ്യാറാണ്. നിരവധി കപ്പലുകളെയും ബോട്ടുകളെയും തീരരക്ഷാസേന ഇതിനകം ജെട്ടികളിലേക്കും കരയിലേക്കും സുരക്ഷിതമായി എത്തിച്ചു. ശേഷിക്കുന്ന കപ്പലുകൾക്കും തീരത്തേക്ക് മടങ്ങാൻ മുന്നറിയിപ്പ് നൽകിയിട്ടുണ്ട്. കേന്ദ്ര ആഭ്യന്തര മന്ത്രാലയവും ദേശീയ ദുരന്തനിവാരണ അതോറിറ്റിയും കേന്ദ്ര കാലാവസ്ഥാ വകുപ്പും തുടർച്ചയായി സ്ഥിതിഗതികൾ നിരീക്ഷിക്കുന്നതായി കേന്ദ്ര ആഭ്യന്തര സെക്രട്ടറി അറിയിച്ചു. മന്ത്രാലയങ്ങൾ, വകുപ്പുകൾ, സംസ്ഥാന സർക്കാരുകൾ, മറ്റ് ഏജൻസികൾ എന്നിവയുമായി ഏകോപനവും നടക്കുന്നുണ്ട്.

ജീവഹാനി ഒഴിവാക്കണം; അവശ്യസേവനങ്ങൾ വേഗം പുനഃസ്ഥാപിക്കണം

ജീവഹാനി പൂർണമായി ഒഴിവാക്കുകയും സ്വത്തിനും അടിസ്ഥാനസൗകര്യങ്ങൾക്കുമുള്ള നാശനഷ്ടങ്ങൾ പരമാവധി കുറയ്ക്കുകയും വേണമെന്ന് കാബിനറ്റ് സെക്രട്ടറി നിർദേശിച്ചു. നാശനഷ്ടമുണ്ടായാൽ അവശ്യസേവനങ്ങൾ ഏറ്റവും കുറഞ്ഞ സമയത്തിനുള്ളിൽ പുനഃസ്ഥാപിക്കണം. ആന്ധ്രപ്രദേശ്, ഒഡിഷ, തെലങ്കാന, ഛത്തീസ്ഗഢ്, പുതുച്ചേരി എന്നിവയ്ക്കുപുറമേ കിഴക്കൻ ഉത്തർപ്രദേശിലും ബിഹാറിലും കനത്ത മഴ പ്രതീക്ഷിക്കുന്നതിനാൽ അവിടങ്ങളിലും ആഭ്യന്തര മന്ത്രാലയവും കാലാവസ്ഥാ വകുപ്പും ഉചിതമായ മുന്നറിയിപ്പ് നൽകണമെന്നും അദ്ദേഹം നിർദേശിച്ചു.

യോഗത്തിൽ കേന്ദ്ര ആഭ്യന്തര സെക്രട്ടറിയും ബന്ധപ്പെട്ട സംസ്ഥാനങ്ങളിലെയും പുതുച്ചേരിയിലെയും ചീഫ് സെക്രട്ടറിമാരും മുതിർന്ന ഉദ്യോഗസ്ഥരും പങ്കെടുത്തു. പെട്രോളിയം-പ്രകൃതിവാതക മന്ത്രാലയം, ഫിഷറീസ് വകുപ്പ്, തുറമുഖ-കപ്പൽഗതാഗത-ജലപാത മന്ത്രാലയം, വൈദ്യുതി മന്ത്രാലയം എന്നിവയിലെ സെക്രട്ടറിമാരും പങ്കെടുത്തു. ദേശീയ ദുരന്തനിവാരണ അതോറിറ്റിയിലെ അംഗവും വകുപ്പ് മേധാവിയും സെക്രട്ടറിയും, സേനാമേധാവികളുടെ സമിതി അധ്യക്ഷനെ സഹായിക്കുന്ന സംയോജിത പ്രതിരോധ സ്റ്റാഫ് മേധാവിയും യോഗത്തിലുണ്ടായിരുന്നു. ദേശീയ ദുരന്തനിവാരണ സേന, കേന്ദ്ര കാലാവസ്ഥാ വകുപ്പ്, ഇന്ത്യൻ തീരരക്ഷാസേന എന്നിവയുടെ ഡയറക്ടർ ജനറൽമാർ, ആഭ്യന്തര മന്ത്രാലയത്തിലെ മാധ്യമ-ആശയവിനിമയ ഡയറക്ടർ ജനറൽ, കാലാവസ്ഥാ വകുപ്പിലെയും ആഭ്യന്തര മന്ത്രാലയത്തിലെയും മുതിർന്ന ഉദ്യോഗസ്ഥർ എന്നിവരും പങ്കെടുത്തു.

.