ന്യൂഡൽഹി  / 2026  / ഒക്ടോബർ 26 

ഇന്ത്യയുടെ സാംസ്കാരിക പൈതൃകം പ്രതിഫലിപ്പിക്കുന്ന സമ്മാനങ്ങളും സമ്മാനപ്പൊതികളും സർക്കാർ സ്ഥാപനങ്ങൾക്ക് എളുപ്പത്തിൽ വാങ്ങാൻ വഴിയൊരുക്കി ഗവൺമെന്റ് ഇ മാർക്കറ്റ്‌പ്ലേസ് ആയ ജെം. ഇതിനായി ഒരുക്കിയ ‘ആഭാർ കളക്ഷൻ’ എന്ന പ്രത്യേക ഡിജിറ്റൽ വിൽപ്പനവിഭാഗത്തിന്റെ പ്രചാരണം ശക്തമാക്കുകയാണ്. പത്ത് കേന്ദ്ര, സംസ്ഥാന കൈത്തറി–കരകൗശല എംപോറിയങ്ങളിൽ നിന്നുള്ള 294 ഉൽപ്പന്ന കാറ്റലോഗ് എൻട്രികളാണ് ശേഖരത്തിലുള്ളത്. പ്രാദേശിക ഉൽപ്പന്നങ്ങൾക്ക് വിപണി കണ്ടെത്തുന്നതിനൊപ്പം കരകൗശല തൊഴിലാളികൾക്കും നെയ്ത്തുകാർക്കും ഗ്രാമീണ സംരംഭകർക്കും വനിതകൾ നയിക്കുന്ന സംരംഭങ്ങൾക്കും പിന്തുണ നൽകുകയാണ് ലക്ഷ്യം.

പത്ത് എംപോറിയങ്ങളുടെ ഉൽപ്പന്നങ്ങൾ ഒരിടത്ത്

ഒരു ജില്ല, ഒരു ഉൽപ്പന്നം പദ്ധതിയുമായി ബന്ധപ്പെട്ട ഉൽപ്പന്നങ്ങളും ഭൗമസൂചിക പദവി ലഭിച്ച ഉൽപ്പന്നങ്ങളും ആഭാർ ശേഖരത്തിലുണ്ട്. ഓരോ പ്രദേശത്തിന്റെയും തനിമയുള്ള ഉൽപ്പന്നങ്ങൾ സർക്കാർ വാങ്ങലുകാർക്ക് എളുപ്പത്തിൽ ലഭ്യമാക്കുന്ന രീതിയിലാണ് ഈ ഡിജിറ്റൽ വിൽപ്പനവിഭാഗം ഒരുക്കിയിരിക്കുന്നത്.

സെൻട്രൽ കോട്ടേജ് ഇൻഡസ്ട്രീസ് എംപോറിയത്തിന്റെ കോട്ടേജ്, ഖാദി ഗ്രാമവ്യവസായ കമ്മീഷന്റെ ഖാദി ഇന്ത്യ എന്നിവ ശേഖരത്തിലുണ്ട്. ഗുജറാത്തിലെ ഗർവി ഗുർജരി, ഹിമാചൽ പ്രദേശിലെ ഹിംക്രാഫ്റ്റ്സ്, ഝാർഖണ്ഡിലെ ഝാർക്രാഫ്റ്റ്, കർണാടകത്തിലെ കാവേരി, മധ്യപ്രദേശിലെ മൃഗനയനി, മഹാരാഷ്ട്രയിലെ മറാഠി, വടക്കുകിഴക്കൻ മേഖലയിലെ പൂർബശ്രീ, തമിഴ്‌നാട്ടിലെ പൂംപുഹാർ എന്നിവയാണ് മറ്റ് എംപോറിയങ്ങൾ.

ഏഴ് സ്ഥാപനങ്ങൾകൂടി എത്തുന്നു

ഏഴ് സർക്കാർ എംപോറിയങ്ങളും സ്ഥാപനങ്ങളും വിൽപ്പനക്കാരായി ചേരുന്നതിനുള്ള നടപടികളുടെ അവസാനഘട്ടത്തിലാണ്. കോഫി ബോർഡ്, പശ്ചിമബംഗാളിലെ മഞ്ജുഷയും ബിശ്വ ബംഗ്ലയും, ജമ്മു കശ്മീർ ഹാൻഡ്‌ലൂം ആൻഡ് ഹാൻഡിക്രാഫ്റ്റ്സ് മാർക്കറ്റിങ് കോർപ്പറേഷൻ ലിമിറ്റഡ്, നാഗാലാൻഡിലെ മെറാകൈ, ഒഡിഷയിലെ ഉത്കളിക, മണിപ്പൂരിലെ പാന്തോയ്ബി എന്നിവയാണ് ഇവ.

നടപടികൾ പൂർത്തിയാകുന്നതോടെ ഈ സ്ഥാപനങ്ങൾക്കും തിരഞ്ഞെടുത്ത ഉൽപ്പന്നങ്ങൾ ആഭാർ ശേഖരത്തിലൂടെ വിൽക്കാനാകും. ഇവയുടെ ഉൽപ്പന്ന കാറ്റലോഗുകൾകൂടി ഉൾപ്പെടുത്തുമ്പോൾ കൂടുതൽ പ്രദേശങ്ങളുടെ പ്രാതിനിധ്യം ഉറപ്പാക്കാനും ഉൽപ്പന്നവൈവിധ്യം വർധിപ്പിക്കാനും കഴിയുമെന്നാണ് പ്രതീക്ഷ.

ഔദ്യോഗിക ചടങ്ങുകൾ മുതൽ ഉത്സവങ്ങൾ വരെ

കരകൗശല വസ്തുക്കൾ, കൈത്തറി ഉൽപ്പന്നങ്ങൾ, പരമ്പരാഗത രീതിയിൽ തയ്യാറാക്കുന്ന ഭക്ഷ്യവിഭവങ്ങൾ, അടുക്കളയിൽ സൂക്ഷിച്ചുപയോഗിക്കുന്ന ഭക്ഷ്യസാധനങ്ങൾ, വ്യക്തിപരിചരണ ഉൽപ്പന്നങ്ങൾ എന്നിവ ശേഖരത്തിലുണ്ട്. ഔദ്യോഗിക ചടങ്ങുകൾ, സമ്മേളനങ്ങൾ, സംസ്ഥാനതല പരിപാടികൾ, വിദേശ പ്രതിനിധിസംഘങ്ങളുടെ സന്ദർശനങ്ങൾ എന്നിവയ്ക്കുള്ള സമ്മാനങ്ങൾ സർക്കാർ വാങ്ങലുകാർക്ക് ഇതിൽനിന്ന് തിരഞ്ഞെടുക്കാം.

ജീവനക്കാരെ ആദരിക്കുന്ന പരിപാടികൾക്കും വിരമിക്കൽ ചടങ്ങുകൾക്കും ഉത്സവാവസരങ്ങൾക്കും ആവശ്യമായ സമ്മാനങ്ങളും ലഭ്യമാണ്. മന്ത്രാലയങ്ങൾക്കും വകുപ്പുകൾക്കും പൊതുമേഖലാ സ്ഥാപനങ്ങൾക്കും മറ്റ് സർക്കാർ വാങ്ങലുകാർക്കും സ്വന്തം സമ്മാനാവശ്യങ്ങൾ നിറവേറ്റുന്നതിനൊപ്പം തദ്ദേശീയ ഉൽപ്പന്നങ്ങളെയും പ്രാദേശിക ഉപജീവനമാർഗങ്ങളെയും പിന്തുണയ്ക്കാനും ഇതിലൂടെ കഴിയും.

നാടൻ ഉൽപ്പന്നങ്ങളെ സർക്കാർ വിപണിയുമായി ബന്ധിപ്പിക്കുന്നു

തദ്ദേശീയ കലകൾക്കും കരകൗശല ഉൽപ്പന്നങ്ങൾക്കും കൂടുതൽ ശ്രദ്ധ ലഭ്യമാക്കുന്നതിൽ ആഭാർ ശേഖരം സുപ്രധാന ചുവടുവയ്പാണെന്ന് ജെം ചീഫ് എക്സിക്യൂട്ടീവ് ഓഫീസർ മിഹിർ കുമാർ പറഞ്ഞു. ആഭാർ കളക്ഷൻ 2026 സംരംഭത്തിന്റെ തുടക്കത്തെക്കുറിച്ച് സംസാരിക്കുകയായിരുന്നു അദ്ദേഹം. ഇന്ത്യയുടെ സമ്പന്നമായ പൈതൃകവും സംസ്കാരവും അവതരിപ്പിക്കുന്നതിനൊപ്പം കേന്ദ്ര, സംസ്ഥാന കൈത്തറി–കരകൗശല എംപോറിയങ്ങളുടെ ശൃംഖലയിലൂടെ വേണ്ടത്ര അവസരങ്ങൾ ലഭിക്കാത്ത വിൽപ്പനക്കാരെ ശക്തിപ്പെടുത്താനും ഇത് സഹായിക്കുമെന്ന് അദ്ദേഹം വ്യക്തമാക്കി.

രാജ്യത്തെ കരകൗശല മേഖലയ്ക്ക് ഫലപ്രദമായ വിപണിബന്ധം ഒരുക്കാനാണ് 2024 ജൂലൈയിൽ ആഭാർ ശേഖരം ആരംഭിച്ചതെന്ന് ജെം അഡീഷണൽ ചീഫ് എക്സിക്യൂട്ടീവ് ഓഫീസറും സാമൂഹിക ഉൾച്ചേർക്കലിന്റെ ചുമതലക്കാരനുമായ അജിത് ബി. ചവാൻ വിശദീകരിച്ചു. ഇപ്പോഴത്തെ പ്രചാരണത്തിന്റെയും ലക്ഷ്യം ഇതുതന്നെയാണ്. പ്രാദേശിക ഉൽപ്പന്നങ്ങൾക്ക് പിന്തുണ നൽകുന്ന ഈ വിൽപ്പനവിഭാഗത്തിലൂടെ കരകൗശല മേഖലയെ സർക്കാർ സംഭരണ സംവിധാനവുമായി ബന്ധിപ്പിക്കുകയാണ് ചെയ്യുന്നത്. സർക്കാർ വാങ്ങലുകാർക്ക് ജെം പോർട്ടലിലെ ആഭാർ വിഭാഗം സന്ദർശിച്ച് പ്രാദേശിക ഉൽപ്പന്നങ്ങളുടെ സമ്മാനപ്പൊതികൾ വാങ്ങാം. അതുവഴി ഇന്ത്യയുടെ സാംസ്കാരിക പൈതൃകത്തെയും പ്രാദേശിക സംരംഭങ്ങളെയും പ്രോത്സാഹിപ്പിക്കാം.

.