ന്യൂഡൽഹി  / 2026  / ഒക്ടോബർ 24

ആഗോളതലത്തിലെയും മേഖലയിലെയും സംഭവവികാസങ്ങൾ സൂക്ഷ്മമായി നിരീക്ഷിച്ച് ഭാവിയിലെ വെല്ലുവിളികൾ നേരിടാൻ സജ്ജരാകണമെന്ന് കരസേനാ കമാൻഡർമാരോട് പ്രതിരോധമന്ത്രി രാജ്‌നാഥ് സിങ്. ഒക്ടോബർ 23ന് ന്യൂഡൽഹിയിൽ നടന്ന കരസേനാ കമാൻഡർമാരുടെ സമ്മേളനത്തിൽ സംസാരിക്കുകയായിരുന്നു അദ്ദേഹം. അടുത്ത ഇരുപത് മുതൽ മുപ്പത് വർഷം വരെയുള്ള ദീർഘകാല തന്ത്രപരമായ കാഴ്ചപ്പാടോടെ പ്രവർത്തിക്കണം. അതോടൊപ്പം അടിയന്തരമായും പുതുതായും ഉയരുന്ന വെല്ലുവിളികളെ നേരിടാനും ഒരുപോലെ തയ്യാറാകണം. സാഹചര്യങ്ങൾ മാറുന്നതിനനുസരിച്ച് സമയബന്ധിതമായി മാറ്റം വരുത്താൻ കഴിയുന്നവിധം തന്ത്രങ്ങൾ ചലനാത്മകവും വഴക്കമുള്ളതുമാകണമെന്നും അദ്ദേഹം പറഞ്ഞു.

ഓപ്പറേഷൻ സിന്ദൂരിന്റെ വിജയത്തിന് പിന്നിൽ പുതുമയും ഏകോപനവും

മാറിവരുന്ന സൈനിക നടപടികളുടെ സാഹചര്യങ്ങളോട് പൊരുത്തപ്പെടുന്ന സായുധസേനകളെ രാജ്‌നാഥ് സിങ് അഭിനന്ദിച്ചു. പുതുമയുള്ള ചിന്തയും കൂടുതൽ ഒത്തൊരുമയും മികച്ച ഏകോപനവും ആധുനിക ആയുധങ്ങളും ഓപ്പറേഷൻ സിന്ദൂരിന്റെ വിജയത്തിന് സഹായിച്ചെന്ന് അദ്ദേഹം പറഞ്ഞു. ദേശീയ താൽപ്പര്യങ്ങൾ സംരക്ഷിക്കാൻ ആവശ്യമായ നടപടികൾ സ്വീകരിക്കാൻ ഇന്ത്യ മടിക്കില്ലെന്ന വ്യക്തമായ സന്ദേശമാണ് ഈ സൈനിക നടപടി നൽകിയത്. ഡ്രോണുകളുടെയും ആധുനിക സാങ്കേതികവിദ്യയുടെയും ഉപയോഗത്തിന് പ്രത്യേക പ്രാധാന്യം നൽകിക്കൊണ്ടുള്ള സേനയുടെ പുനഃസംഘടനാ ശ്രമങ്ങളെയും മന്ത്രി പ്രശംസിച്ചു. ശേഷി വർധിപ്പിക്കണം. പ്രവർത്തനമികവ് തുടർച്ചയായി വിലയിരുത്തണം. മാറുന്ന സാഹചര്യങ്ങൾക്ക് അനുസരിച്ച് ആവശ്യമായ മെച്ചപ്പെടുത്തലുകൾ നടപ്പാക്കണം. നിർമിതബുദ്ധി, സ്വയം പ്രവർത്തിക്കുന്ന സംവിധാനങ്ങൾ, ഡാറ്റാ വിശകലനം, സൈബർ സുരക്ഷ, സുരക്ഷിത ആശയവിനിമയ ശൃംഖലകൾ തുടങ്ങിയ മേഖലകളിലെ ശ്രമങ്ങൾക്ക് വേഗം കൂട്ടണമെന്നും അദ്ദേഹം ആവശ്യപ്പെട്ടു.

ആധുനിക യുദ്ധത്തിൽ കരസേനയുടെ പ്രാധാന്യം തുടരും

വ്യോമം, സമുദ്രം, ബഹിരാകാശം, സൈബർ മേഖലകളിലെ വെല്ലുവിളികൾക്ക് പ്രാധാന്യം വർധിക്കുമ്പോഴും കരയുദ്ധവും കരസേനയും ഒഴിച്ചുകൂടാനാകാത്ത ഘടകങ്ങളായി തുടരുമെന്ന് രാജ്‌നാഥ് സിങ് വ്യക്തമാക്കി. ആധുനിക യുദ്ധത്തിന് സംയോജിത സമീപനം അനിവാര്യമാണ്. വിവിധ മേഖലകളിൽ പ്രവർത്തിക്കാനുള്ള ശേഷിയും സംയുക്ത സൈനിക നടപടികളിലെ തടസ്സമില്ലാത്ത ഏകോപനവുമാണ് വിജയത്തെ നിർണയിക്കുക. ഈ പശ്ചാത്തലത്തിൽ കരസേനയുടെ ഭാവി സജ്ജത ശക്തിപ്പെടുത്താനുള്ള കരയുദ്ധ സിദ്ധാന്തരേഖ അദ്ദേഹം പ്രകാശനം ചെയ്തു. യുദ്ധത്തിന്റെ മാറുന്ന സ്വഭാവവും ഭാവിയിലെ സംഘർഷങ്ങളും ഉയർത്തുന്ന വെല്ലുവിളികൾ നേരിടാൻ ഇന്ത്യൻ കരസേനയെ തയ്യാറാക്കുന്നതിനുള്ള സമഗ്ര ചട്ടക്കൂടാണ് ഈ രേഖ നൽകുന്നത്.

പ്രതിരോധ ഉൽപ്പാദനം ഒരു ലക്ഷത്തി എഴുപത്തെട്ടായിരം കോടി രൂപയിൽ

പ്രതിരോധമേഖലയിൽ സ്വയംപര്യാപ്തത കൈവരിക്കാനുള്ള സായുധസേനകളുടെ ശ്രമങ്ങളെ മന്ത്രി അഭിനന്ദിച്ചു. ബന്ധപ്പെട്ട എല്ലാ വിഭാഗങ്ങളുടെയും കൂട്ടായ പരിശ്രമമാണ് ഇന്ത്യയുടെ പ്രതിരോധ ഉൽപ്പാദനശേഷി വർധിക്കാൻ കാരണമെന്ന് അദ്ദേഹം പറഞ്ഞു. മാറുന്ന ആഗോള സാഹചര്യത്തിൽ പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള സർക്കാർ പ്രതിരോധ സ്വയംപര്യാപ്തതയ്ക്കാണ് മുൻഗണന നൽകുന്നത്. 2025–26 സാമ്പത്തിക വർഷത്തിൽ പ്രതിരോധ ഉൽപ്പാദനം റെക്കോർഡ് തുകയായ ഒരു ലക്ഷത്തി എഴുപത്തെട്ടായിരം കോടി രൂപയിലെത്തി. പ്രതിരോധ കയറ്റുമതി ഏകദേശം മുപ്പത്തെട്ടായിരം കോടി രൂപയെന്ന എക്കാലത്തെയും ഉയർന്ന നിലയിലും എത്തിയതായി രാജ്‌നാഥ് സിങ് പറഞ്ഞു.

പരിഷ്‌കാരങ്ങൾ സൈനിക പ്രവർത്തനശേഷിയിൽ ഫലം കാണണം

‘പരിഷ്‌കാരങ്ങളുടെ വർഷം — 2025’ പരാമർശിച്ച മന്ത്രി, പരിഷ്‌കരണം തുടർച്ചയായ പ്രക്രിയയാണെന്ന് പറഞ്ഞു. അത് ഫലപ്രദമായി നടപ്പാക്കുന്നതിലാണ് വിജയം. കമാൻഡർമാർ തങ്ങളുടെ കമാൻഡുകളിലും വിവിധ സൈനിക തലങ്ങളിലും പരിഷ്‌കാരങ്ങൾ മുന്നോട്ടുകൊണ്ടുപോകണം. സൈനിക പ്രവർത്തനശേഷിയിൽ വ്യക്തമായ നേട്ടങ്ങളായി അവ മാറുന്നുവെന്ന് ഉറപ്പാക്കണമെന്നും അദ്ദേഹം ആവശ്യപ്പെട്ടു. സായുധസേനകളുടെ ധീരതയും അച്ചടക്കവും സജ്ജതയും സംയമനവും ഇന്ത്യയുടെ ആഗോള നില ശക്തിപ്പെടുത്തിയെന്ന് മന്ത്രി പറഞ്ഞു. പ്രധാനമന്ത്രി നരേന്ദ്ര മോദിയുടെ ഊർജസ്വലമായ നേതൃത്വവും നയതന്ത്ര ശ്രമങ്ങളും ഇതിന് സഹായിച്ചു. സ്വയംപര്യാപ്തത, പരിഷ്‌കാരങ്ങളുടെ ഫലപ്രദമായ നടപ്പാക്കൽ, മെച്ചപ്പെട്ട സൈനിക മനുഷ്യവിഭവശേഷി കൈകാര്യം ചെയ്യൽ, സ്ത്രീകളുടെ കൂടുതൽ പങ്കാളിത്തം, ദേശീയ സുരക്ഷയിൽ സംയോജിത സമീപനം എന്നിവയിൽ ശ്രദ്ധ തുടരണമെന്നും അദ്ദേഹം സായുധസേനകളോട് ആവശ്യപ്പെട്ടു.

സമാധാനസേനാംഗങ്ങൾക്ക് ആദരം; ഭാവി കരസേനയ്ക്കായി ചർച്ച

ചടങ്ങിൽ ഐക്യരാഷ്ട്രസഭയുമായി ബന്ധപ്പെട്ട വാർഷിക ജേണലും രാജ്‌നാഥ് സിങ് പ്രകാശനം ചെയ്തു. ഐക്യരാഷ്ട്രസഭയുടെ സമാധാനസേനയിൽ സേവനമനുഷ്ഠിക്കുമ്പോൾ ശ്രദ്ധേയമായ സംഭാവനകൾ നൽകിയ ഇന്ത്യൻ കരസേനാംഗങ്ങളെ അദ്ദേഹം ആദരിച്ചു. അവരുടെ മാതൃകാപരമായ സേവനവും തൊഴിൽമികവും അന്താരാഷ്ട്ര സമാധാനത്തിനും സുരക്ഷയ്ക്കും നൽകിയ സംഭാവനകളും പരിഗണിച്ചായിരുന്നു ആദരം. പ്രതിരോധ സഹമന്ത്രി സഞ്ജയ് സേത്ത്, സംയുക്ത സേനാമേധാവി ജനറൽ എൻ.എസ്. രാജ സുബ്രഹ്മണി, കരസേനാ മേധാവി ജനറൽ ധീരജ് സേത്ത്, പ്രതിരോധ സെക്രട്ടറി രാജേഷ് കുമാർ സിങ് തുടങ്ങിയ മുതിർന്ന ഉദ്യോഗസ്ഥർ പങ്കെടുത്തു. പുരോഗമനപരവും സാഹചര്യങ്ങളോട് പൊരുത്തപ്പെടുന്നതും സാങ്കേതികവിദ്യയുടെ കരുത്തുള്ളതും ഭാവിക്കായി സജ്ജവുമായ കരസേനയെ രൂപപ്പെടുത്തുകയാണ് സമ്മേളനത്തിന്റെ ലക്ഷ്യം. നിലവിലുള്ള സംരംഭങ്ങൾ വിലയിരുത്താനും ഭാവിയിൽ ഊന്നൽ നൽകേണ്ട മേഖലകൾ കണ്ടെത്താനും ഉചിതമായ നയദിശകൾ രൂപപ്പെടുത്താനും മുതിർന്ന കരസേനാ നേതൃത്വത്തിന് വേദിയൊരുക്കുന്ന സമഗ്ര അജൻഡയാണ് സമ്മേളനത്തിനുള്ളത്.