അരിസോണ, 2026 ഒക്ടോബർ 16 –

അർബുദത്തിന് മികച്ച ചികിത്സ കണ്ടെത്താൻ വർഷങ്ങളോളം ഗവേഷണം നടത്തിയ ഇന്ത്യൻ വംശജയായ അമേരിക്കൻ ഡോക്ടർ രചന ഷ്രോഫ് അതേ രോഗം ബാധിച്ച് മരിച്ചു. 47 വയസ്സായിരുന്നു. അമേരിക്കയിലെ അരിസോണ സർവകലാശാല കാൻസർ സെന്ററിലെ അസോസിയേറ്റ് ഡയറക്ടറും പ്രമുഖ അർബുദ ഗവേഷകയുമായിരുന്നു രചന. പാൻക്രിയാസ്, പിത്തനാളി എന്നിവയെ ബാധിക്കുന്ന അർബുദങ്ങളുടെ ചികിത്സാരംഗത്ത് അന്താരാഷ്ട്ര അംഗീകാരം നേടിയ ഡോക്ടറായിരുന്നു അവർ. 2026 ഒക്ടോബർ 12നാണ് അരിസോണ സർവകലാശാല മരണവിവരം അറിയിച്ചത്. അമേരിക്കൻ സൊസൈറ്റി ഓഫ് ക്ലിനിക്കൽ ഓങ്കോളജിയും അവരുടെ ഗവേഷണ സംഭാവനകളെ അനുസ്മരിച്ചു.

മേയിൽ കഴുത്തിലെ ലിംഫ് ഗ്രന്ഥിയിൽ വീക്കം; പരിശോധനയിൽ ഗുരുതരമായ അർബുദം കണ്ടെത്തി

2026 മേയിലാണ് രചന ഷ്രോഫ് രോഗലക്ഷണങ്ങൾ ശ്രദ്ധിച്ചത്. ലിംഫ് ഗ്രന്ഥികളിലൊന്നിൽ വീക്കം കണ്ടെത്തിയതിനെ തുടർന്ന് നടത്തിയ പരിശോധനയിലാണ് അർബുദം സ്ഥിരീകരിച്ചത്. തുടർന്നുള്ള പരിശോധനകളിൽ രോഗം ശരീരത്തിന്റെ മറ്റ് ഭാഗങ്ങളിലേക്കും വ്യാപിച്ചതായി കണ്ടെത്തി. ദഹനവ്യവസ്ഥയിൽ ആരംഭിച്ചതാകാമെന്ന് കരുതുന്ന അഡിനോകാർസിനോമ എന്ന അർബുദമാണ് സ്ഥിരീകരിച്ചത്. ആന്തരിക അവയവങ്ങളിലെ ഗ്രന്ഥികോശങ്ങളെ ബാധിക്കുന്ന അർബുദമാണിത്. രോഗം ഗുരുതരമായ ഘട്ടത്തിലാണെന്ന് കണ്ടെത്തിയെങ്കിലും രചന ഗവേഷണ പ്രവർത്തനങ്ങളിൽനിന്ന് പിന്മാറിയില്ല. പിത്തനാളിയിലെ അർബുദരോഗികളുടെ ചികിത്സ മെച്ചപ്പെടുത്താനുള്ള പദ്ധതികൾക്ക് അവർ തുടർന്നും പിന്തുണ നൽകി.

യുവ ഗവേഷകർക്കായി 13.5 ലക്ഷം ഡോളറിന്റെ പദ്ധതി; അർബുദ ഗവേഷണത്തിന് ജീവിതം സമർപ്പിച്ച ഡോക്ടർ

പിത്തനാളിയിലെ അർബുദമായ കൊളാഞ്ചിയോകാർസിനോമയുടെ ചികിത്സാരംഗത്താണ് രചന ഷ്രോഫ് ശ്രദ്ധേയമായ ഗവേഷണം നടത്തിയത്. പാൻക്രിയാസിനെയും കരളിനെയും പിത്തനാളിയെയും ബാധിക്കുന്ന അർബുദങ്ങൾക്ക് പുതിയ ചികിത്സാരീതികൾ വികസിപ്പിക്കുന്നതിലും അവർ പങ്കുവഹിച്ചു. അർബുദരോഗികൾക്ക് പുതിയ ചികിത്സാ പരീക്ഷണങ്ങളിൽ പങ്കെടുക്കാൻ കൂടുതൽ അവസരങ്ങൾ ലഭിക്കണമെന്നായിരുന്നു അവരുടെ നിലപാട്. രോഗം സ്ഥിരീകരിച്ച ശേഷവും യുവ ഗവേഷകരെ സഹായിക്കാൻ സ്വന്തം പേരിൽ ഗവേഷണ പുരസ്കാരം സ്ഥാപിച്ചു. ഈ പദ്ധതിയിലൂടെ 13.5 ലക്ഷം അമേരിക്കൻ ഡോളറിലധികം സമാഹരിച്ചു. ഭർത്താവ് ഡോക്ടർ പുനീത് ഷ്രോഫ്, മക്കളായ സിമ്രാൻ, സച്ചിൻ, മാതാപിതാക്കളായ ദേവേന്ദർ ത്രിവേദി, ഡോക്ടർ അമിത ത്രിവേദി, സഹോദരി നീമ സാഹ്നി എന്നിവരാണ് കുടുംബാംഗങ്ങൾ.