ന്യൂഡൽഹി  /  2026  /  സെപ്റ്റംബർ 27

വോട്ടർപട്ടികയുടെ പ്രത്യേക തീവ്ര പരിഷ്കരണത്തിനിടെ നോട്ടീസ് ലഭിച്ചവരുടെ രേഖകൾ ബൂത്ത് ലെവൽ ഉദ്യോഗസ്ഥർ വീട്ടിലെത്തി ശേഖരിക്കുമെന്ന് തിരഞ്ഞെടുപ്പ് കമ്മീഷൻ അറിയിച്ചു. പട്ടികയിലെ വിവരങ്ങളുമായി ബന്ധിപ്പിക്കാനാകാത്തവർക്കും വിവരങ്ങളിൽ പൊരുത്തക്കേടുള്ളവർക്കുമാണ് ഈ നടപടി ബാധകം. സെപ്റ്റംബർ 26ന് ഉച്ചകഴിഞ്ഞ് മൂന്നിന് ന്യൂഡൽഹിയിലെ നിർവാചൻ സദനിൽ ചേർന്ന യോഗത്തിലാണ് തീരുമാനം. മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറും തിരഞ്ഞെടുപ്പ് കമ്മീഷണർമാരായ ഡോ. എസ്. എസ്. സന്ധുവും ഡോ. വിവേക് ജോഷിയും യോഗത്തിൽ പങ്കെടുത്തു. ഡൽഹിയിലും മഹാരാഷ്ട്രയിലും അവകാശവാദങ്ങളും എതിർപ്പുകളും സമർപ്പിക്കാനുള്ള സമയപരിധിയും നീട്ടി.

ഹിയറിങ്ങിനായി ഓഫീസിൽ എത്തേണ്ടതില്ല

ബൂത്ത് ലെവൽ ഉദ്യോഗസ്ഥർ വീടുകളിലെത്തി രേഖകൾ ശേഖരിച്ച് തിരഞ്ഞെടുപ്പ് കമ്മീഷന്റെ ഇസിനെറ്റ് സംവിധാനത്തിൽ അപ്‌ലോഡ് ചെയ്യും. തുടർന്ന് വോട്ടർ രജിസ്ട്രേഷൻ ഉദ്യോഗസ്ഥൻ തീരുമാനമെടുക്കും. നോട്ടീസ് ലഭിച്ചവരെ രജിസ്ട്രേഷൻ ഉദ്യോഗസ്ഥന്റെയോ അസിസ്റ്റന്റ് രജിസ്ട്രേഷൻ ഉദ്യോഗസ്ഥന്റെയോ ഓഫീസിൽ ഹിയറിങ്ങിന് വിളിക്കേണ്ടതില്ല. അസാധാരണ സാഹചര്യത്തിൽ രജിസ്ട്രേഷൻ ഉദ്യോഗസ്ഥൻ തീരുമാനിച്ചാൽ മാത്രം ഹിയറിങ് നടത്തും. അതും കഴിയുന്നത്ര ഓൺലൈനിലായിരിക്കും. ആവശ്യമെങ്കിൽ, വോട്ടർക്ക് പകരം ഹിയറിങ്ങിൽ പങ്കെടുക്കാൻ കുടുംബത്തിലെ പ്രായപൂർത്തിയായ ഒരാളെ ചുമതലപ്പെടുത്താം. ഓൺലൈൻ ഹിയറിങ്ങിനുള്ള സൗകര്യങ്ങൾ ശക്തിപ്പെടുത്തും.

രാത്രി അഭയകേന്ദ്രങ്ങളിൽ കഴിയുന്നവർ, തൊഴിലാളികൾ, ദരിദ്രർ, വീടില്ലാത്തവർ എന്നിവർക്കായി ആവശ്യത്തിന് സഹായകേന്ദ്രങ്ങളും പ്രത്യേക ക്യാമ്പുകളും ജില്ലാ തിരഞ്ഞെടുപ്പ് ഉദ്യോഗസ്ഥർ ഒരുക്കും. പ്രത്യേക തീവ്ര പരിഷ്കരണത്തിനായി ഫോം ആറിനൊപ്പം ചേർത്തിട്ടുള്ള സത്യവാങ്മൂലം സുപ്രീം കോടതി ശരിവച്ചതായി കമ്മീഷൻ അറിയിച്ചു. ഈ പരിഷ്കരണം നടക്കാത്ത കാലയളവിൽ, 1960ലെ വോട്ടർ രജിസ്ട്രേഷൻ ചട്ടങ്ങൾ പ്രകാരമുള്ള ഫോമുകളാണ് ഉപയോഗിക്കുക.

ഡൽഹിക്കും മഹാരാഷ്ട്രക്കും പുതിയ തീയതികൾ

ഡൽഹിയിലെ മുഖ്യ തിരഞ്ഞെടുപ്പ് ഉദ്യോഗസ്ഥന്റെ അഭ്യർഥന പ്രകാരം അവകാശവാദങ്ങളും എതിർപ്പുകളും സമർപ്പിക്കാനുള്ള സമയം 2026 ഒക്ടോബർ 30 വരെ നീട്ടി. നോട്ടീസുകളും അവകാശവാദങ്ങളും എതിർപ്പുകളും തീർപ്പാക്കാനുള്ള സമയം നവംബർ 30 വരെയാക്കി.

മഹാരാഷ്ട്രയിലെ മുഖ്യ തിരഞ്ഞെടുപ്പ് ഉദ്യോഗസ്ഥന്റെ അഭ്യർഥന പ്രകാരം അവകാശവാദങ്ങളും എതിർപ്പുകളും സമർപ്പിക്കാനുള്ള സമയം ഒക്ടോബർ 12 വരെയും അവ തീർപ്പാക്കാനുള്ള സമയം നവംബർ 10 വരെയും നീട്ടി.

പട്ടികയിൽ പേരില്ലാത്തവർക്ക് പ്രത്യേക രജിസ്ട്രേഷൻ നടപടി

ബിഹാറും പശ്ചിമ ബംഗാളും ഉൾപ്പെടെ 20 സംസ്ഥാനങ്ങളിലും കേന്ദ്രഭരണ പ്രദേശങ്ങളിലും പ്രത്യേക തീവ്ര പരിഷ്കരണം പൂർത്തിയായതായി കമ്മീഷൻ അറിയിച്ചു. പരിഷ്കരണത്തിനിടയിലോ അതിനുശേഷമോ പേരൊഴിഞ്ഞവർക്ക് പട്ടികയുടെ തുടർച്ചയായ പുതുക്കൽ നടപടിയിലൂടെ ബന്ധപ്പെട്ട വോട്ടർ രജിസ്ട്രേഷൻ ഉദ്യോഗസ്ഥന് അപേക്ഷിക്കാം. യുവാക്കളും ആദ്യമായി വോട്ട് ചെയ്യാൻ അർഹത നേടിയവരും ഇങ്ങനെ അപേക്ഷിക്കാം. ഇവരെ സഹായിക്കാനും രജിസ്ട്രേഷനായി ഉടൻ പ്രത്യേക നടപടി തുടങ്ങാനും മുഖ്യ തിരഞ്ഞെടുപ്പ് ഉദ്യോഗസ്ഥർ, ജില്ലാ തിരഞ്ഞെടുപ്പ് ഉദ്യോഗസ്ഥർ, വോട്ടർ രജിസ്ട്രേഷൻ ഉദ്യോഗസ്ഥർ എന്നിവർക്ക് നിർദേശം നൽകി.

ഗോവയിൽ പട്ടികയിൽ ഉൾപ്പെടാതെ പോയ വോട്ടർമാരുടെ വീടുകളിലെത്തി ഫോമുകൾ ശേഖരിക്കാൻ മുഖ്യ തിരഞ്ഞെടുപ്പ് ഉദ്യോഗസ്ഥൻ നിർദേശിച്ചിട്ടുണ്ട്. അത്തരത്തിലുള്ള 97 പേരിൽ 81 പേർ പേര് ചേർക്കാൻ ഫോം ആറ് പൂരിപ്പിച്ചതായും കമ്മീഷൻ അറിയിച്ചു.

ഇസിനെറ്റ് പരിശോധിക്കാൻ വിദഗ്ധ സമിതി

ഉദ്യോഗസ്ഥർക്ക് അവരുടെ നിയമപരമായ അധികാരങ്ങൾക്ക് അനുസരിച്ചാണ് ഇസിനെറ്റ് സംവിധാനത്തിൽ പ്രവേശനം നൽകിയിരിക്കുന്നതെന്ന് കമ്മീഷൻ വ്യക്തമാക്കി. മുതിർന്ന ഡെപ്യൂട്ടി തിരഞ്ഞെടുപ്പ് കമ്മീഷണറുടെ നേതൃത്വത്തിലുള്ള സമിതി, സംവിധാനം നിയമങ്ങൾക്കും ചട്ടങ്ങൾക്കും അനുസൃതമാണെന്ന് വീണ്ടും പരിശോധിക്കും. ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജിയിലെയോ ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ടെക്നോളജിയിലെയോ ഒരു സ്വതന്ത്ര വിദഗ്ധനും സമിതിയിലുണ്ടാകും. സമിതി കമ്മീഷന് റിപ്പോർട്ട് നൽകും.

സംസ്ഥാന മുഖ്യ തിരഞ്ഞെടുപ്പ് ഉദ്യോഗസ്ഥരുടെ അഭിപ്രായങ്ങൾ പരിഗണിച്ച് കഴിഞ്ഞ ഏതാനും മാസങ്ങളിൽ പോർട്ടലിൽ നിരവധി മാറ്റങ്ങൾ വരുത്തിയിട്ടുണ്ട്. ഫീൽഡ് ഉദ്യോഗസ്ഥർക്ക് കൂടുതൽ സൗകര്യം ആവശ്യമെങ്കിൽ അതും പ്രവർത്തനക്ഷമമാക്കും. ഇനി മുതൽ വിവരസാങ്കേതിക സംവിധാനങ്ങളും പോർട്ടലുകളും സംബന്ധിച്ച എല്ലാ പുതിയ പദ്ധതികളും കമ്മീഷന്റെ അംഗീകാരത്തിന് മുമ്പ് ഉദ്യോഗസ്ഥരുടെ സമിതിയിൽ ചർച്ച ചെയ്യും.

മുൻ തീരുമാനങ്ങളും ഭരണനടപടികളും വിശദീകരിച്ച് കമ്മീഷൻ

കാബിനറ്റ് സെക്രട്ടറിക്ക് അയച്ച കത്ത് കമ്മീഷന്റെ നയവുമായോ വിവരസാങ്കേതിക വിഭാഗവുമായോ ബന്ധപ്പെട്ടതല്ലെന്ന് കമ്മീഷൻ വ്യക്തമാക്കി. കമ്മീഷനിലേക്ക് ഡെപ്യൂട്ടേഷനിൽ വന്ന ഒരു ഉദ്യോഗസ്ഥന്റെ പ്രവർത്തനവുമായി ബന്ധപ്പെട്ടതായിരുന്നു അത്. രണ്ട് കമ്മീഷണർമാരുടെ ഉത്തരവുകൾക്കുശേഷം ആ ഉദ്യോഗസ്ഥൻ പുറപ്പെടുവിച്ച ജോലിവിഭജന ഉത്തരവുകൾ നടപ്പായിട്ടില്ല. വിവരസാങ്കേതിക വിഭാഗത്തിൽ ഡെപ്യൂട്ടി തിരഞ്ഞെടുപ്പ് കമ്മീഷണർക്കുണ്ടായിരുന്ന മേൽനോട്ടവും പിൻവലിച്ചിട്ടില്ലെന്ന് കമ്മീഷൻ പറഞ്ഞു.

രാജ്യവ്യാപക പ്രത്യേക തീവ്ര പരിഷ്കരണം ഉൾപ്പെടെ സമീപ മാസങ്ങളിൽ നിരവധി തീരുമാനങ്ങൾ എടുത്തതായും കമ്മീഷൻ അറിയിച്ചു. ബിഹാറിൽ തുടങ്ങി പശ്ചിമ ബംഗാളിലും മറ്റ് 30 സംസ്ഥാനങ്ങളിലും കേന്ദ്രഭരണ പ്രദേശങ്ങളിലും പരിഷ്കരണം നടത്താനുള്ള 2025 ജൂൺ 24ലെ ഉത്തരവ് കമ്മീഷൻ ഏകകണ്ഠമായി അംഗീകരിച്ചതാണ്. 2026 മെയ് 27ലെ ഉത്തരവിലൂടെ സുപ്രീം കോടതി അത് ശരിവച്ചതായും കമ്മീഷൻ പറഞ്ഞു. 12 സംസ്ഥാനങ്ങളുടെയും കേന്ദ്രഭരണ പ്രദേശങ്ങളുടെയും സമയക്രമം 2025 ഒക്ടോബർ 27നും, 19 ഇടങ്ങളിലേത് 2026 മെയ് 14നും ഏകകണ്ഠമായ അംഗീകാരത്തോടെ പുറത്തിറക്കി. മൂന്നാം ഘട്ടത്തിലെ ശേഷിക്കുന്ന 12 സംസ്ഥാനങ്ങളിൽ അന്തിമ പട്ടിക പ്രസിദ്ധീകരിച്ചശേഷമേ വോട്ടർമാരുടെ അന്തിമ എണ്ണം അറിയാനാകൂ.

കമ്മീഷന്റെ എല്ലാ യോഗങ്ങളുടെയും അജൻഡ മുൻകൂട്ടി നൽകും; യോഗനടപടികളുടെ രേഖയും പുറത്തിറക്കും. എല്ലാ ഉദ്യോഗസ്ഥരുടെയും വാർഷിക പ്രവർത്തന വിലയിരുത്തൽ റിപ്പോർട്ടുകൾ ഓരോ വർഷവും ഡിസംബർ 31നകം പൂർത്തിയാക്കും. ഉദ്യോഗസ്ഥരുടെ വിദേശയാത്രകൾക്ക് കമ്മീഷന്റെ അനുമതി വാങ്ങണം. കമ്മീഷണർമാർ ഉദ്യോഗസ്ഥർക്ക് നൽകുന്ന എല്ലാ നിർദേശങ്ങളും കൃത്യമായി പാലിക്കണമെന്നും തീരുമാനിച്ചു. സെപ്റ്റംബർ 26ലെ യോഗതീരുമാനങ്ങൾ പ്രകാരം പുറത്തിറക്കിയ ഈ വാർത്താക്കുറിപ്പിന് മുഴുവൻ കമ്മീഷന്റെയും അംഗീകാരമുണ്ടെന്ന് അറിയിച്ചു.