ന്യൂഡൽഹി / 2026 / ഓഗസ്റ്റ് 16
ബ്രിക്സ് രാജ്യങ്ങളുടെ പരിസ്ഥിതി സഹകരണം ശക്തിപ്പെടുത്താനുള്ള പ്രധാന യോഗങ്ങൾക്ക് ന്യൂഡൽഹി വേദിയാകും. ഓഗസ്റ്റ് 17ന് പരിസ്ഥിതി പ്രവർത്തകസംഘത്തിന്റെയും കാലാവസ്ഥാ വ്യതിയാന-സുസ്ഥിര വികസന സമ്പർക്കസംഘത്തിന്റെയും മുതിർന്ന ഉദ്യോഗസ്ഥരുടെ യോഗം നടക്കും. ഓഗസ്റ്റ് 18ന് പന്ത്രണ്ടാമത് ബ്രിക്സ് പരിസ്ഥിതി മന്ത്രിമാരുടെ യോഗവും നടക്കും. ഭാരത് മണ്ഡപത്തിലാണ് പരിപാടികൾ. ഇന്ത്യയുടെ 2026ലെ ബ്രിക്സ് അധ്യക്ഷപദവിയുടെ ഭാഗമായി ‘പ്രതിരോധശേഷി, നവീകരണം, സഹകരണം, സുസ്ഥിരത എന്നിവയ്ക്കായുള്ള നിർമാണം’ എന്ന പ്രമേയത്തിലാണ് യോഗങ്ങൾ സംഘടിപ്പിക്കുന്നത്.
ഭൂപേന്ദർ യാദവ് അധ്യക്ഷത വഹിക്കും
കേന്ദ്ര പരിസ്ഥിതി, വനം, കാലാവസ്ഥാ വ്യതിയാന മന്ത്രി ഭൂപേന്ദർ യാദവാണ് മന്ത്രിതല യോഗത്തിന് അധ്യക്ഷത വഹിക്കുക. ബ്രിക്സ് അംഗരാജ്യങ്ങളിലെ മന്ത്രിമാർ, മുതിർന്ന ഉദ്യോഗസ്ഥർ, നയരൂപീകരണ വിദഗ്ധർ, വിഷയവിദഗ്ധർ എന്നിവർ പങ്കെടുക്കും. പരിസ്ഥിതി വിഷയങ്ങളിൽ പൊതുധാരണ രൂപപ്പെടുത്താനും രാജ്യങ്ങൾ തമ്മിലുള്ള സഹകരണം കൂടുതൽ ശക്തമാക്കാനുമാണ് ശ്രമം. ആദ്യ ദിവസം ഉദ്ഘാടന സമ്മേളനത്തിനൊപ്പം പരിസ്ഥിതി പ്രവർത്തകസംഘത്തിന്റെയും കാലാവസ്ഥാ വ്യതിയാന-സുസ്ഥിര വികസന സമ്പർക്കസംഘത്തിന്റെയും മുൻഗണനകൾ ചർച്ച ചെയ്യും. രണ്ടാം ദിവസം അന്തിമ രേഖയെക്കുറിച്ചുള്ള മന്ത്രിതല ചർച്ചകളും വിഷയാധിഷ്ഠിത സംവാദങ്ങളും നടക്കും.
യോഗങ്ങളിൽ ശ്രദ്ധ കേന്ദ്രീകരിക്കാൻ ഇന്ത്യ നാല് പ്രധാന മേഖലകളാണ് മുന്നോട്ടുവച്ചിരിക്കുന്നത്. ആദ്യത്തേത് സുസ്ഥിര ജീവിതശൈലിയാണ്. ഉത്തരവാദിത്വമുള്ള ഉപഭോഗം, സമൂഹത്തിന്റെ പങ്കാളിത്തം, രാജ്യങ്ങൾ തമ്മിലുള്ള അറിവ് പങ്കിടൽ, മികച്ച മാതൃകകളും വിജയകഥകളും കൈമാറ്റം ചെയ്യൽ എന്നിവ ഇതിന്റെ ഭാഗമാണ്. അംഗരാജ്യങ്ങളിൽ നിന്നുള്ള പുതിയ സമീപനങ്ങൾ വികസിപ്പിക്കുകയാണ് ലക്ഷ്യം.
രണ്ടാമത്തെ മുൻഗണന വനവൽക്കരണം, കാട്ടുതീ നിയന്ത്രണം, ദുരന്തപ്രതിരോധശേഷി എന്നിവയാണ്. ഭൂമിയുടെ പുനരുദ്ധാരണം ശക്തിപ്പെടുത്താൻ അറിവ് കൈമാറ്റം, ശേഷിവികസനം, മെച്ചപ്പെട്ട വിവരശേഖരണം, നിരീക്ഷണം എന്നിവ ഉപയോഗിക്കും. കാട്ടുതീ തടയൽ, മുൻകരുതൽ, നേരത്തെയുള്ള കണ്ടെത്തൽ, വേഗത്തിലുള്ള പ്രതികരണം എന്നിവയ്ക്കും പ്രത്യേക പ്രാധാന്യമുണ്ട്.
മാലിന്യസംസ്കരണവും കാലാവസ്ഥാ പൊരുത്തപ്പെടലും
മൂന്നാമത്തെ മുൻഗണന ചാക്രിക സമ്പദ്വ്യവസ്ഥയാണ്. കാര്യക്ഷമമായ മാലിന്യസംസ്കരണം ഉറപ്പാക്കാൻ ഉൽപാദകരുടെ വിപുലീകരിച്ച ഉത്തരവാദിത്വവുമായി ബന്ധപ്പെട്ട നയങ്ങളും നിയന്ത്രണ സംവിധാനങ്ങളും ശക്തിപ്പെടുത്താനാണ് ഉദ്ദേശിക്കുന്നത്. വിഭവങ്ങളുടെ കാര്യക്ഷമമായ ഉപയോഗവും തുല്യതയും ഉറപ്പാക്കുന്ന മികച്ച മാതൃകകൾ അംഗരാജ്യങ്ങൾ പങ്കുവയ്ക്കും. ചാക്രിക സമ്പദ്വ്യവസ്ഥയിലേക്കുള്ള മാറ്റത്തിന് ഇത് പ്രധാന നയോപാധിയായി മാറുമെന്നാണ് പ്രതീക്ഷ.
നാലാമത്തെ മുൻഗണന കാലാവസ്ഥാ വ്യതിയാനവുമായി പൊരുത്തപ്പെടലാണ്. ജനകേന്ദ്രിതവും സമൂഹനേതൃത്വത്തിലുള്ളതുമായ സമീപനങ്ങൾക്കാണ് പ്രാധാന്യം. പരമ്പരാഗത അറിവിനെ അടിസ്ഥാനമാക്കിയുള്ള പ്രവർത്തനങ്ങൾ, പ്രായോഗിക സഹകരണം, മികച്ച മാതൃകകളുടെ കൈമാറ്റം, നയപരമായ ഫലങ്ങൾ എന്നിവയിലൂടെ അംഗരാജ്യങ്ങളുടെ കാലാവസ്ഥാ പ്രതിരോധശേഷി വർധിപ്പിക്കുകയാണ് ലക്ഷ്യം.
മാർച്ച് മുതൽ തുടങ്ങിയ ചർച്ചകളുടെ തുടർച്ച
ഇന്ത്യയുടെ ബ്രിക്സ് അധ്യക്ഷപദവിയുടെ ഭാഗമായി പരിസ്ഥിതി, വനം, കാലാവസ്ഥാ വ്യതിയാന മന്ത്രാലയം 2026 മാർച്ച് മുതൽ ജൂലൈ വരെ നിരവധി ഓൺലൈൻ യോഗങ്ങളും സാങ്കേതിക സമ്മേളനങ്ങളും വെബിനാറുകളും സംവാദങ്ങളും നടത്തി. വിഭവക്ഷമതയും ചാക്രിക സമ്പദ്വ്യവസ്ഥയും, കാലാവസ്ഥാ പൊരുത്തപ്പെടൽ ലക്ഷ്യങ്ങളുമായി കാർബൺ വിപണികളെ ബന്ധിപ്പിക്കൽ, ഭൂക്ഷയം, മരുഭൂവൽക്കരണം, വരൾച്ച, കാട്ടുതീ നിയന്ത്രണം എന്നിവയും ചർച്ചയായി. ന്യൂഡൽഹിയിലെ നേരിട്ടുള്ള യോഗങ്ങൾക്ക് പൊതുധാരണ രൂപപ്പെടുത്താൻ ഈ ചർച്ചകൾ സഹായിച്ചതായി കേന്ദ്ര സർക്കാർ അറിയിച്ചു.
ബ്രിക്സ് പരിസ്ഥിതി പ്രവർത്തകസംഘം 2015ൽ മോസ്കോയിൽ നടന്ന ആദ്യ ബ്രിക്സ് പരിസ്ഥിതി മന്ത്രിമാരുടെ യോഗത്തിലാണ് രൂപീകരിച്ചത്. പരിസ്ഥിതി മുൻഗണനകളിൽ അനുഭവങ്ങളും മികച്ച പ്രവർത്തനരീതികളും പങ്കിടാനും കൂട്ടായ നടപടി ശക്തിപ്പെടുത്താനുമാണ് സംഘം രൂപീകരിച്ചത്. കാലാവസ്ഥാ വ്യതിയാന-സുസ്ഥിര വികസന സമ്പർക്കസംഘം 2024ലാണ് നിലവിൽ വന്നത്. കാലാവസ്ഥാ വിഷയങ്ങളിൽ അംഗരാജ്യങ്ങളുടെ സഹകരണം കൂടുതൽ കാര്യക്ഷമമാക്കുകയാണ് ഇതിന്റെ ലക്ഷ്യം.
.
