തിരുവനന്തപുരം, 2026 ജൂൺ 26 –

തിരുവനന്തപുരം കോർപ്പറേഷനിൽ സിപിഎം, ബിജെപി കൗൺസിലർമാർ തമ്മിലുണ്ടായ സംഘർഷത്തിൽ മ്യൂസിയം പൊലീസ് ഇരുവിഭാഗങ്ങൾക്കുമെതിരെ കേസെടുത്തു. എൽഡിഎഫ് കൗൺസിലറുടെ പരാതിയിൽ മേയറും ഡെപ്യൂട്ടി മേയറും പ്രതികളായാണ് കേസ് രജിസ്റ്റർ ചെയ്തത്. ബിജെപി കൗൺസിലറുടെ പരാതിയിൽ എസ്. പി. ദീപക്, ശ്രീകുമാർ, വഞ്ചിയൂർ ബാബു ഉൾപ്പെടെ അഞ്ച് പേർക്കെതിരെയും കേസെടുത്തു.

കാപ്പ കേസിൽ ജയിലിലുള്ള കൗൺസിലർ ആർ. സുഗതന്റെ രാജി ആവശ്യപ്പെട്ട് എൽഡിഎഫ് നടത്തിയ റിലേ സമരമാണ് സംഘർഷത്തിലേക്ക് നയിച്ചത്. ഏറ്റുമുട്ടലിൽ മേയർ വി. വി. രാജേഷിനും നിരവധി കൗൺസിലർമാർക്കും പരിക്കേറ്റു.

സംഘർഷത്തിനിടെ മേയർ നിലത്തുവീണു

സംഘർഷത്തിനിടെ മേയർ വി. വി. രാജേഷ് ഉൾപ്പെടെയുള്ളവർ നിലത്തുവീണു. ഏറെ പണിപ്പെട്ടാണ് പൊലീസിന് മേയറെ ഓഫീസിനുള്ളിലേക്ക് മാറ്റാനായത്. പരിക്കിനെ തുടർന്ന് മേയറിന്റെ കാലിൽ പ്ലാസ്റ്ററിട്ടു. സിപിഎം കാട്ടായിക്കോണം കൗൺസിലർ സിന്ധു ശശിയുടെ തലയ്ക്കും പരിക്കേറ്റതായി റിപ്പോർട്ടുണ്ട്.