ന്യൂഡൽഹി, 2026 ജൂൺ 26 –

രണ്ടാംനിര, മൂന്നാംനിര നഗരങ്ങളിൽ നിന്ന് വിദേശത്തേക്ക് യാത്ര ചെയ്യുന്നവർക്ക് കൂടുതൽ സൗകര്യമൊരുക്കാൻ എയർ ഇന്ത്യ രാജ്യത്തെ ആദ്യ ‘ഈസി കണക്ട്’ സർവീസ് വാരാണസിയിൽ നിന്ന് ആരംഭിച്ചു. കേന്ദ്ര വ്യോമയാന മന്ത്രി കെ. രാംമോഹൻ നായിഡു സർവീസ് ഉദ്ഘാടനം ചെയ്തു. പുതിയ സംവിധാനത്തിൽ യാത്രക്കാർക്ക് വാരാണസിയിൽ നിന്ന് യാത്ര തുടങ്ങുന്നതിന് മുമ്പുതന്നെ അന്താരാഷ്ട്ര ചെക്ക്-ഇൻ, ഇമിഗ്രേഷൻ നടപടികൾ പൂർത്തിയാക്കാനാകും.

ഡൽഹിയിൽ വീണ്ടും നടപടികൾ ആവശ്യമില്ല

പുതിയ ഹബ്-ആൻഡ്-സ്പോക്ക് മാതൃകയിൽ യാത്രക്കാർക്ക് സ്വന്തം നഗരത്തിൽ തന്നെ ബാഗേജ് അന്തിമ ലക്ഷ്യസ്ഥാനത്തേക്ക് ചെക്ക്-ഇൻ ചെയ്യാം. തുടർന്ന് ഡൽഹിയിലെത്തിയാൽ വീണ്ടും ബാഗേജ് സ്വീകരിക്കുകയോ ഇമിഗ്രേഷൻ പരിശോധന നടത്തുകയോ ചെയ്യേണ്ടതില്ല. വാരാണസിയിൽ നിന്ന് പുറപ്പെട്ട ആദ്യ സർവീസിലൂടെ ഡൽഹി വഴി ദുബായ്, കൊളംബോ, ജിദ്ദ, റിയാദ്, കാഠ്മണ്ഡു, ഫൂക്കറ്റ് എന്നിവയുൾപ്പെടെ നിരവധി അന്താരാഷ്ട്ര നഗരങ്ങളിലേക്ക് യാത്രക്കാർക്ക് തടസ്സമില്ലാതെ യാത്ര തുടരാനാകും.

കൂടുതൽ നഗരങ്ങളിലേക്കും പദ്ധതി വ്യാപിപ്പിക്കും

ഈ മാതൃക രാജ്യത്തെ വ്യോമഗതാഗത രംഗത്ത് വലിയ മാറ്റമുണ്ടാക്കുമെന്ന് കേന്ദ്ര വ്യോമയാന മന്ത്രി പറഞ്ഞു. അടുത്ത ആറാഴ്ചയ്ക്കുള്ളിൽ ആറു നഗരങ്ങളെ കൂടി ഈസി കണക്ട് പദ്ധതിയിൽ ഉൾപ്പെടുത്തുമെന്നും അദ്ദേഹം അറിയിച്ചു. വാരാണസിയാണ് ഈ സംവിധാനവുമായി ബന്ധിപ്പിക്കുന്ന ആദ്യ നഗരമെന്നും, വരും മാസങ്ങളിൽ കൂടുതൽ നഗരങ്ങളിലേക്ക് പദ്ധതി വ്യാപിപ്പിക്കുമെന്നും എയർ ഇന്ത്യ അറിയിച്ചു.