ന്യൂഡൽഹി :2026 ജൂൺ 25

കാലവർഷം മുന്നേറുന്നു, പക്ഷേ എൽ നിനോയുടെ നിഴലിൽ

2026ലെ തെക്കുപടിഞ്ഞാറൻ കാലവർഷം ഇത്തവണ ശക്തമായ എൽ നിനോയുടെ സ്വാധീനത്തിലാണ് മുന്നേറുന്നത്. ജൂൺ 4ന് കേരളത്തിൽ അൽപം വൈകിയാണ് കാലവർഷം എത്തിയത്. എന്നാൽ പിന്നീട് കേരളം, ലക്ഷദ്വീപ്, തമിഴ്നാട്, കർണാടക, തെലങ്കാന, മഹാരാഷ്ട്ര, ഒഡിഷ, ഛത്തീസ്ഗഡ്, ജാർഖണ്ഡ്, ബിഹാർ എന്നിവിടങ്ങളിലാകെ മഴ വ്യാപിച്ചു. ജൂൺ 24, 25 തീയതികളിൽ ഗുജറാത്തിന്റെ ചില ഭാഗങ്ങൾ, മധ്യപ്രദേശ്, ഉത്തരാഖണ്ഡ്, തെക്കൻ ഉത്തർപ്രദേശ് എന്നിവിടങ്ങളിലേക്കും കാലവർഷം പ്രവേശിച്ചു. അടുത്ത മൂന്ന് നാല് ദിവസത്തിനുള്ളിൽ ഗുജറാത്ത്, മധ്യപ്രദേശ്, ഉത്തർപ്രദേശ്, ഉത്തരാഖണ്ഡ് എന്നിവിടങ്ങളിലെ ബാക്കി പ്രദേശങ്ങളിലേക്കും മഴ വ്യാപിക്കാനുള്ള സാഹചര്യമാണുള്ളത്. എന്നാൽ മഴയുടെ വ്യാപനം തുടരുന്നുണ്ടെങ്കിലും രാജ്യത്ത് എല്ലായിടത്തും ഒരേ തോതിൽ മഴ ലഭിക്കില്ലെന്ന മുന്നറിയിപ്പാണ് കാലാവസ്ഥാ വകുപ്പ് നൽകുന്നത്.

രാജ്യത്ത് മഴക്കുറവ് ആശങ്ക, വടക്കുകിഴക്കിന് പ്രതീക്ഷ

ജൂൺ മുതൽ സെപ്റ്റംബർ വരെയുള്ള സീസണിൽ രാജ്യത്ത് ലഭിക്കുക ദീർഘകാല ശരാശരിയുടെ 90 ശതമാനം മഴ മാത്രമായിരിക്കുമെന്നാണ് ഐഎംഡിയുടെ പുതിയ വിലയിരുത്തൽ. സാധാരണയേക്കാൾ കുറഞ്ഞ മഴ ലഭിക്കാനുള്ള സാധ്യത 84 ശതമാനവും, കടുത്ത മഴക്കുറവിന് മാത്രം 60 ശതമാനം സാധ്യതയുമുണ്ട്. കേരളം ഉൾപ്പെടെയുള്ള തെക്കൻ സംസ്ഥാനങ്ങൾ, മഹാരാഷ്ട്ര, ഗുജറാത്ത്, മധ്യപ്രദേശ് തുടങ്ങിയ മധ്യ, പടിഞ്ഞാറൻ മേഖലകൾ, കൂടാതെ വടക്കുപടിഞ്ഞാറൻ ഇന്ത്യയിലെ പല സംസ്ഥാനങ്ങളും മഴക്കുറവും ഉയർന്ന താപനിലയും നേരിടാൻ സാധ്യതയുള്ള പ്രദേശങ്ങളായി കണക്കാക്കപ്പെടുന്നു. അതേസമയം വടക്കുകിഴക്കൻ സംസ്ഥാനങ്ങളിലാണ് ഇത്തവണ സാധാരണ തോതിലുള്ള മികച്ച കാലവർഷം പ്രതീക്ഷിക്കുന്നത്. പശ്ചിമ ബംഗാളിന്റെയും സിക്കിമിന്റെയും ചില ഭാഗങ്ങളിൽ ഇതിനകം കനത്ത മഴ ലഭിച്ചിട്ടുണ്ടെങ്കിലും, ബിഹാറും ജാർഖണ്ഡും പോലുള്ള പ്രദേശങ്ങളിൽ സീസൺ പുരോഗമിക്കുമ്പോൾ മഴ കുറയാനുള്ള സാധ്യതയും കാലാവസ്ഥാ വിദഗ്ധർ ചൂണ്ടിക്കാട്ടുന്നു.

രാജ്യത്ത് മഴക്കുറവ് ആശങ്ക, വടക്കുകിഴക്കിന് പ്രതീക്ഷ
ജൂൺ മുതൽ സെപ്റ്റംബർ വരെയുള്ള സീസണിൽ രാജ്യത്ത് ലഭിക്കുക ദീർഘകാല ശരാശരിയുടെ 90 ശതമാനം മഴ മാത്രമായിരിക്കുമെന്നാണ് ഐഎംഡിയുടെ പുതിയ വിലയിരുത്തൽ. സാധാരണയേക്കാൾ കുറഞ്ഞ മഴ ലഭിക്കാനുള്ള സാധ്യത 84 ശതമാനവും, കടുത്ത മഴക്കുറവിന് മാത്രം 60 ശതമാനം സാധ്യതയുമുണ്ട്. കേരളം ഉൾപ്പെടെയുള്ള തെക്കൻ സംസ്ഥാനങ്ങൾ, മഹാരാഷ്ട്ര, ഗുജറാത്ത്, മധ്യപ്രദേശ് തുടങ്ങിയ മധ്യ, പടിഞ്ഞാറൻ മേഖലകൾ, കൂടാതെ വടക്കുപടിഞ്ഞാറൻ ഇന്ത്യയിലെ പല സംസ്ഥാനങ്ങളും മഴക്കുറവും ഉയർന്ന താപനിലയും നേരിടാൻ സാധ്യതയുള്ള പ്രദേശങ്ങളായി കണക്കാക്കപ്പെടുന്നു. അതേസമയം വടക്കുകിഴക്കൻ സംസ്ഥാനങ്ങളിലാണ് ഇത്തവണ സാധാരണ തോതിലുള്ള മികച്ച കാലവർഷം പ്രതീക്ഷിക്കുന്നത്. പശ്ചിമ ബംഗാളിന്റെയും സിക്കിമിന്റെയും ചില ഭാഗങ്ങളിൽ ഇതിനകം കനത്ത മഴ ലഭിച്ചിട്ടുണ്ടെങ്കിലും, ബിഹാറും ജാർഖണ്ഡും പോലുള്ള പ്രദേശങ്ങളിൽ സീസൺ പുരോഗമിക്കുമ്പോൾ മഴ കുറയാനുള്ള സാധ്യതയും കാലാവസ്ഥാ വിദഗ്ധർ ചൂണ്ടിക്കാട്ടുന്നു.

കേരളത്തിൽ ജൂൺ മാസത്തിലെ മഴയുടെ കണക്കുകൾ പരിശോധിക്കുമ്പോൾ വർഷംതോറും വലിയ ഏറ്റക്കുറച്ചിലുകളാണ് കാണുന്നത്. എൽ നിനോയും ലാ നിനോയും പോലുള്ള കാലാവസ്ഥാ പ്രതിഭാസങ്ങളുടെ സ്വാധീനമാണ് ഇതിന് പ്രധാന കാരണം. 2021ലും 2024ലും സാധാരണ നിലയോട് അടുത്ത മഴ ലഭിച്ചപ്പോൾ, 2022ലും പ്രത്യേകിച്ച് 2023ലും സംസ്ഥാനം കടുത്ത മഴക്കുറവ് നേരിട്ടു. 2025ൽ മഴ വീണ്ടും സാധാരണ നിലയിലായെങ്കിലും, 2026ൽ സ്ഥിതി വീണ്ടും ആശങ്കപ്പെടുത്തുന്നതാണ്. ഇന്ത്യാ കാലാവസ്ഥാ വകുപ്പിന്റെ തിരുവനന്തപുരം കേന്ദ്രത്തിന്റെ കണക്കുകൾ പ്രകാരം ജൂൺ 25 വരെ സംസ്ഥാനത്ത് ലഭിച്ചത് 355.6 മില്ലിമീറ്റർ മഴ മാത്രമാണ്. സാധാരണ ലഭിക്കേണ്ടത് 532.5 മില്ലിമീറ്ററായിരുന്ന സാഹചര്യത്തിൽ 33 ശതമാനം മഴക്കുറവാണ് രേഖപ്പെടുത്തിയത്.

ജൂൺ 4ന് കാലവർഷം വൈകിയെത്തിയതും ശക്തിപ്പെടുന്ന എൽ നിനോയുടെ സ്വാധീനവുമാണ് ഈ കുറവിന് പ്രധാന കാരണങ്ങളായി വിലയിരുത്തുന്നത്. ജില്ലകളുടെ കണക്കുകൾ പരിശോധിച്ചാൽ വയനാട്ടിൽ 64 ശതമാനവും ഇടുക്കിയിൽ 51 ശതമാനവും കാസർഗോഡിൽ 41 ശതമാനവും മഴക്കുറവ് രേഖപ്പെടുത്തിയപ്പോൾ, തിരുവനന്തപുരം മൂന്ന് ശതമാനം അധികമഴയും പത്തനംതിട്ടയിൽ താരതമ്യേന കുറഞ്ഞ മഴക്കുറവും രേഖപ്പെടുത്തി. സംസ്ഥാനത്താകെ മഴയുടെ വിതരണം ഒരേ രീതിയിലല്ലെന്നതിന്റെ വ്യക്തമായ സൂചനയാണ് ഈ കണക്കുകൾ നൽകുന്നത്.