ന്യൂഡൽഹി, 2026 ജൂൺ 24 –

രാജ്യത്തെ ഗതാഗതം, മൊബിലിറ്റി, ലോജിസ്റ്റിക്സ് മേഖലകളെ കേന്ദ്രീകരിച്ച് ഇന്ത്യയിലെ ആദ്യ സ്ഥിരവും സ്വതന്ത്രവുമായ ഗവേഷണ കേന്ദ്രം ഡൽഹിയിൽ സ്ഥാപിക്കാൻ ദേശീയപാത അതോറിറ്റി തീരുമാനിച്ചു. നാഷണൽ കൗൺസിൽ ഓഫ് അപ്ലൈഡ് ഇക്കണോമിക് റിസർച്ച് സ്ഥാപനത്തിലാണ് കേന്ദ്രം പ്രവർത്തിക്കുക. റോഡ് ഗതാഗത മേഖലയിലെ നയരൂപീകരണത്തിന് ശാസ്ത്രീയ പഠനങ്ങളുടെ പിന്തുണ ഉറപ്പാക്കുകയെന്ന ലക്ഷ്യത്തോടെയാണ് പുതിയ കേന്ദ്രം ആരംഭിക്കുന്നത്. എൻഎച്ച്എഐയും എൻസിഎഇആറും ഇതിനായി ധാരണാപത്രത്തിൽ ഒപ്പുവെച്ചു.

നയരൂപീകരണത്തിന് ഗവേഷണ പിന്തുണ

ഗതാഗതം, മൊബിലിറ്റി, ലോജിസ്റ്റിക്സ് എന്നിവയുടെ സാമ്പത്തിക വശങ്ങളെക്കുറിച്ചുള്ള പ്രായോഗിക ഗവേഷണങ്ങളാണ് കേന്ദ്രം നടത്തുക. ദേശീയപാതകളുടെ സാമ്പത്തിക സ്വാധീനം, ചരക്ക് ഗതാഗതം, വിവിധ ഗതാഗത സംവിധാനങ്ങളുടെ ഏകോപനം, ടോൾ നയം, ആസ്തി ധനസമ്പാദനം, റോഡ് സുരക്ഷ, സാങ്കേതികവിദ്യയുടെ ഉപയോഗം തുടങ്ങിയ വിഷയങ്ങൾ പഠനപരിധിയിൽ വരും. ഈ പഠനങ്ങളുടെ ഫലങ്ങൾ കേന്ദ്ര റോഡ് ഗതാഗത മന്ത്രാലയത്തിനും മറ്റ് സർക്കാർ ഏജൻസികൾക്കും നയങ്ങൾ രൂപീകരിക്കാൻ സഹായകരമാകുമെന്നാണ് പ്രതീക്ഷ.

ദീർഘകാല പദ്ധതികൾക്ക് കരുത്താകും

ദേശീയപാത ശൃംഖലയുടെ വികസനവും ലോജിസ്റ്റിക്സ് കാര്യക്ഷമതയും മെച്ചപ്പെടുത്താൻ ഉയർന്ന നിലവാരത്തിലുള്ള ഗവേഷണവും നയവിശകലനവും ആവശ്യമാണ് എന്ന വിലയിരുത്തലിന്റെ അടിസ്ഥാനത്തിലാണ് പുതിയ കേന്ദ്രം രൂപീകരിക്കുന്നത്. സാമ്പത്തിക വിദഗ്ധർ, ഗതാഗത വിദഗ്ധർ, പൊതുനയ വിദഗ്ധർ, അക്കാദമിക് രംഗത്തെ പ്രമുഖർ എന്നിവരടങ്ങുന്ന ഉപദേശക സമിതി കേന്ദ്രത്തിന്റെ പ്രവർത്തനങ്ങൾക്ക് മാർഗനിർദേശം നൽകും. പത്ത് വർഷത്തേക്ക് കേന്ദ്രത്തിന്റെ പ്രവർത്തനങ്ങൾക്ക് എൻഎച്ച്എഐ പിന്തുണ നൽകും.