തിരുവനന്തപുരം, 2026 ജൂൺ 24 –

സംസ്ഥാനത്ത് ഡെങ്കിപ്പനി വ്യാപനം തുടരുന്നതിനിടെ ഇന്ന് 159 പേർക്ക് രോഗം സ്ഥിരീകരിച്ചു. ഡെങ്കിപ്പനി ബാധിച്ച് ഒരാൾ മരിച്ചു. ഇതോടൊപ്പം 15 പേർക്ക് ഷിഗെല്ലയും 22 പേർക്ക് എലിപ്പനിയും സ്ഥിരീകരിച്ചു. ഒരാൾക്ക് അമീബിക് മസ്തിഷ്ക ജ്വരവും സ്ഥിരീകരിച്ചിട്ടുണ്ട്. സംസ്ഥാനത്താകെ നിലവിൽ 13,747 പനിബാധിതരാണുള്ളത്.

നിപ രോഗബാധിതന്റെ സമ്പർക്കപ്പട്ടികയിലുള്ള 11 പേരെ നിരീക്ഷണത്തിൽ നിന്ന് ഒഴിവാക്കി. 21 ദിവസത്തെ നിരീക്ഷണം പൂർത്തിയാക്കിയ ഇവർ കുറഞ്ഞ റിസ്ക് വിഭാഗത്തിൽപ്പെട്ടവരാണ്. നിരീക്ഷണ കാലയളവിൽ രോഗലക്ഷണങ്ങൾ ഒന്നും കാണാത്തതിനാലാണ് നടപടി. നിപ രോഗബാധിതനുമായി ബന്ധപ്പെട്ട ആരെയും പുതുതായി ആശുപത്രിയിൽ പ്രവേശിപ്പിച്ചിട്ടില്ലെന്നും ആരോഗ്യവകുപ്പ് അറിയിച്ചു.

നിലവിൽ വളരെ ഉയർന്ന റിസ്ക് വിഭാഗത്തിൽപ്പെട്ട നാല് പേരും ഉയർന്ന റിസ്ക് വിഭാഗത്തിൽപ്പെട്ട 14 പേരും ക്വാറന്റൈനിലാണ്. കുറഞ്ഞ റിസ്ക് വിഭാഗത്തിൽപ്പെട്ട 75 പേർ ഇപ്പോഴും നിരീക്ഷണത്തിലാണ്. നിപ ബാധിച്ച രോഗി കോഴിക്കോട് മെഡിക്കൽ കോളജിൽ വെന്റിലേറ്ററിന്റെ സഹായത്തോടെ ചികിത്സ തുടരുകയാണ്.