കൊൽക്കത്ത, 2026 ജൂൺ 20

ഇന്ത്യൻ നാവികസേന തദ്ദേശീയമായി നിർമ്മിച്ച മൂന്ന് മുൻനിര നാവിക പ്ലാറ്റ്ഫോമുകളായ ദുനഗിരി, സൻശോധക്, അഗ്രയ് എന്നിവ 2026 ജൂൺ 21ന് കൊൽക്കത്തയിൽ കമ്മീഷൻ ചെയ്യാൻ ഒരുങ്ങുകയാണ്. ഇന്ത്യൻ നാവികസേനയുടെ പ്രവർത്തനശേഷി കൂടുതൽ ശക്തിപ്പെടുത്തുന്നതാണ് ഈ നീക്കം. സമുദ്ര പോരാട്ടം, ജലശാസ്ത്ര സർവേ, അന്തർവാഹിനി പ്രതിരോധം എന്നീ മേഖലകളിലെ പ്രധാന ശേഷികളാണ് ഈ പ്ലാറ്റ്ഫോമുകൾ നൽകുന്നത്.

പ്രധാനമന്ത്രിയുടെ സാന്നിധ്യത്തിലാണ് ചടങ്ങ് നടക്കുക. ഇന്ത്യൻ നാവികസേനയുടെ യുദ്ധക്കപ്പൽ രൂപകൽപ്പന വിഭാഗം രൂപകൽപ്പന ചെയ്തതും കൊൽക്കത്തയിലെ ഗാർഡൻ റീച്ച് ഷിപ്പ് ബിൽഡേഴ്സ് ആൻഡ് എഞ്ചിനീയേഴ്സ് നിർമ്മിച്ചതുമാണ് ഈ കപ്പലുകൾ. ദുനഗിരിയിൽ അത്യാധുനിക ആയുധങ്ങളും സെൻസറുകളും ഉൾപ്പെടുത്തിയിട്ടുണ്ട്. സൻശോധക് തീരപ്രദേശങ്ങളിലും ആഴക്കടലിലും സർവേ നടത്താനും വിവരശേഖരണത്തിനുമായി സജ്ജീകരിച്ചിരിക്കുന്നു. അഗ്രയ് അന്തർവാഹിനി ഭീഷണികൾ കണ്ടെത്താനും നേരിടാനുമുള്ള സംവിധാനങ്ങളോടെയാണ് ഒരുക്കിയിരിക്കുന്നത്.

ഈ മൂന്ന് പ്ലാറ്റ്ഫോമുകളും ഇന്ത്യയുടെ തദ്ദേശീയ കപ്പൽനിർമാണ മേഖലയിലെ വളർച്ചയാണ് കാണിക്കുന്നത്. ഇവയിൽ 75 ശതമാനത്തിലധികം തദ്ദേശീയ ഘടകങ്ങളാണ് ഉപയോഗിച്ചിരിക്കുന്നത്. 200ലധികം സൂക്ഷ്മ, ചെറുകിട, ഇടത്തരം സംരംഭങ്ങൾ നിർമ്മാണത്തിൽ പങ്കാളികളായി. ഇതിലൂടെ നേരിട്ടും പരോക്ഷമായും വലിയ തൊഴിൽ അവസരങ്ങളും സൃഷ്ടിക്കപ്പെട്ടു. ആത്മനിർഭർ ഭാരത് ലക്ഷ്യങ്ങൾ മുന്നോട്ട് കൊണ്ടുപോകുന്നതിനും രാജ്യത്തിന്റെ സമുദ്രസുരക്ഷാ ശേഷി കൂടുതൽ ശക്തമാക്കുന്നതിനുമുള്ള സംയുക്ത ശ്രമങ്ങളുടെ ഭാഗമായാണ് ഈ കമ്മീഷനിംഗ് വിലയിരുത്തപ്പെടുന്നത്.

.