ശബരിമല യുവതീപ്രവേശനത്തിൽ ചതിക്കിരയായെന്ന് എ. പത്മകുമാർ; ആത്മകഥയിൽ വെളിപ്പെടുത്തലെന്ന് സൂചന

തിരുവനന്തപുരം, 2026 ജൂൺ 14 –

ശബരിമല യുവതീപ്രവേശന സമയത്ത് താൻ കടുത്ത ചതിക്ക് ഇരയായിരുന്നുവെന്ന് തിരുവിതാംകൂർ ദേവസ്വം ബോർഡ് മുൻ പ്രസിഡന്റും സിപിഎം നേതാവുമായ എ. പത്മകുമാർ വെളിപ്പെടുത്തി. ശബരിമല സ്വർണക്കൊള്ളക്കേസിൽ നിലവിൽ പ്രതിയായ പത്മകുമാർ, അന്നത്തെ സംഭവങ്ങളുമായി ബന്ധപ്പെട്ട അണിയറ നീക്കങ്ങൾ എല്ലാം അതത് ദിവസം തന്നെ ഡയറിയിൽ രേഖപ്പെടുത്തിയിട്ടുണ്ടെന്നും അവ ആത്മകഥയിലൂടെ പുറത്തുവിടുമെന്നും അടുത്ത സുഹൃത്തുക്കളോട് പറഞ്ഞതായി വിവരം. ഇടത് സർക്കാർ ശബരിമലയിൽ യുവതീപ്രവേശനത്തിനായി രഹസ്യനീക്കം നടത്തിയ ദിവസം തനെയും അന്നത്തെ എഡിജിപി എസ്. ശ്രീജിത്തിനെയും ബോധപൂർവം അവിടെ നിന്ന് മാറ്റിനിർത്തിയതായും അദ്ദേഹം ആരോപിക്കുന്നു.

അന്ന് സന്ധ്യയോടെ എസ്. ശ്രീജിത്തിനെ ഡിജിപിയും തന്നെ മുഖ്യമന്ത്രിയുടെ അഡീഷണൽ പ്രൈവറ്റ് സെക്രട്ടറിയും അടിയന്തരമായി തിരുവനന്തപുരത്തേക്ക് വിളിച്ചുവരുത്തിയെന്നാണ് പത്മകുമാറിന്റെ വാദം. തുടർന്ന് പുലർച്ചെ മൂന്ന് മണിയോടെ ദേവസ്വം ബോർഡ് ഓഫീസിലെ മുറിയിലെത്തി ടെലിവിഷൻ ഓൺ ചെയ്തപ്പോഴാണ് ശബരിമലയിൽ യുവതികൾ മലകയറിയ വിവരം അറിഞ്ഞതെന്നും അദ്ദേഹം പറയുന്നു. തങ്ങളെ മനഃപൂർവം മാറ്റിനിർത്തി നടത്തിയ ഈ നീക്കത്തിന് പിന്നിൽ പ്രവർത്തിച്ച ഉന്നത കരങ്ങളെക്കുറിച്ച് ആത്മകഥയിൽ കൃത്യമായി പറയുമെന്നും സുഹൃത്തുക്കളോട് വ്യക്തമാക്കിയിട്ടുണ്ട്. ശബരിമല സ്വർണക്കൊള്ളക്കേസുമായി ബന്ധപ്പെട്ട വിവാദങ്ങളിലും അദ്ദേഹം പ്രതികരിച്ചിട്ടുണ്ട്. ദേവസ്വം രജിസ്റ്ററിൽ “ചെമ്പ് പാളി” എന്ന് എഴുതിച്ചേർത്തത് മറ്റാരോ ആണെന്നും അതിൽ ഒപ്പിടാൻ താൻ നിർബന്ധിതനായിരുന്നുവെന്നുമാണ് അദ്ദേഹത്തിന്റെ വാദം. ഈ കൈപ്പട ആരുടേതാണെന്ന് കണ്ടെത്താൻ ശാസ്ത്രീയ പരിശോധന നടത്തണമെന്നും അദ്ദേഹം ആവശ്യപ്പെട്ടിട്ടുണ്ട്.

അതേസമയം, സ്വർണക്കൊള്ളക്കേസിൽ പാർട്ടിയിൽ നിന്ന് കടുത്ത അച്ചടക്ക നടപടി ഒഴിവാക്കുന്നതിനായി പത്മകുമാർ നടത്തുന്ന സമ്മർദ്ദ തന്ത്രമാണ് ഈ ആത്മകഥാ വിവാദമെന്ന വിലയിരുത്തലും ഉയരുന്നുണ്ട്. പല നിർണായക വിവരങ്ങളും പുറത്തുവന്നാൽ പാർട്ടിയിലെയും സർക്കാരിലെയും ഉന്നതർ കുടുങ്ങുമെന്ന ആശങ്ക നേതൃത്വത്തിനുണ്ടെന്നും റിപ്പോർട്ടുകളുണ്ട്. നിലവിൽ പത്മകുമാർ സിപിഎം ജില്ലാ കമ്മിറ്റി അംഗമാണ്. ജില്ലാ കമ്മിറ്റി എന്ത് നടപടിയെടുത്താലും അന്തിമ തീരുമാനം സംസ്ഥാന കമ്മിറ്റിയുടേതായിരിക്കുമെന്നും സൂചനയുണ്ട്.