റോപർ (പഞ്ചാബ്)  / 2026  / ഒക്ടോബർ 24

പഞ്ചാബിലെ റോപർ, ഹോഷിയാർപുർ, അമൃത്സർ എന്നിവിടങ്ങളിൽ നെൽവൈക്കോൽ കൈകാര്യം ചെയ്യുന്നതിനും വിളയവശിഷ്ടങ്ങൾ കത്തിക്കുന്നത് തടയുന്നതിനുമുള്ള ഒരുക്കങ്ങൾ ഉന്നതതല സംഘം വിലയിരുത്തി. ദേശീയ തലസ്ഥാന മേഖലയിലെയും സമീപ പ്രദേശങ്ങളിലെയും വായുഗുണനിലവാര പരിപാലന കമ്മിഷൻ അധ്യക്ഷന്റെ നേതൃത്വത്തിലായിരുന്നു സന്ദർശനം. നെല്ല് കൊയ്ത്ത് നടക്കുന്ന സാഹചര്യത്തിൽ, കൃഷിയിടങ്ങളിൽത്തന്നെയും പുറത്തേക്ക് കൊണ്ടുപോയും വൈക്കോൽ കൈകാര്യം ചെയ്യുന്ന നടപടികളാണ് സംഘം പരിശോധിച്ചത്. ഒക്ടോബർ 23ന് വൈകിട്ട് 7.32ന് ഡൽഹിയിലെ പ്രസ് ഇൻഫർമേഷൻ ബ്യൂറോയാണ് സന്ദർശനവിവരം പുറത്തുവിട്ടത്.

വൈദ്യുതനിലയങ്ങൾ മുതൽ കൃഷിയിടങ്ങൾ വരെ പരിശോധന

താപവൈദ്യുത നിലയങ്ങൾ, കംപ്രസ്ഡ് ബയോഗ്യാസ് പ്ലാന്റുകൾ, കൃഷി വിജ്ഞാന കേന്ദ്രം, കൃഷിയിടങ്ങൾ, ബയോമാസ് പ്ലാന്റ് എന്നിവിടങ്ങളിൽ സംഘം സന്ദർശനം നടത്തി. നെൽവൈക്കോൽ ഫലപ്രദമായി കൈകാര്യം ചെയ്യാൻ താഴെത്തട്ടിൽ നടപ്പാക്കുന്ന നടപടികളും അവയ്ക്കുള്ള ഒരുക്കങ്ങളും പരിശോധിച്ചു. കൃഷി വിജ്ഞാന കേന്ദ്രത്തിൽ, വൈക്കോൽ കൃഷിയിടത്തിൽത്തന്നെ കൈകാര്യം ചെയ്യാനും പുറത്തേക്ക് കൊണ്ടുപോയി ഉപയോഗിക്കാനുമുള്ള യന്ത്രങ്ങളുടെ പ്രവർത്തനപ്രദർശനവും സംഘം കണ്ടു.

വൈക്കോൽ ഇന്ധനമായി ഉപയോഗിക്കുന്നതിൽ ലക്ഷ്യം കൈവരിക്കണം

താപവൈദ്യുത നിലയങ്ങളിൽ മറ്റു ഇന്ധനങ്ങൾക്കൊപ്പം ജൈവാവശിഷ്ടങ്ങൾ ചേർത്ത് കത്തിക്കുന്നതിനുള്ള ലക്ഷ്യങ്ങൾ കൈവരിക്കണമെന്ന് കമ്മിഷൻ സംസ്ഥാന അധികൃതർക്ക് നിർദേശം നൽകി. ഇക്കാര്യത്തിൽ മലിനീകരണ പുറന്തള്ളൽ മാനദണ്ഡങ്ങൾ പാലിക്കുന്നതിന് പ്രത്യേക ശ്രദ്ധ നൽകണം. കൃഷിയിടങ്ങൾക്ക് പുറത്തുള്ള വൈക്കോൽ ഉപയോഗത്തിന്റെ ഭാഗമായി, താപവൈദ്യുത നിലയങ്ങളിലും നെൽക്കുറ്റി ഉപയോഗിക്കുന്ന ബയോമാസ് പ്ലാന്റുകളിലും നെൽവൈക്കോൽ പരമാവധി പ്രയോജനപ്പെടുത്താനുള്ള ക്രമീകരണങ്ങളും സംവിധാനങ്ങളും സംഘം വിലയിരുത്തി.

കൊയ്ത്ത് തിരക്കിൽ കർഷകർക്ക് യന്ത്രങ്ങൾ സമയത്ത് ലഭിക്കണം

നെൽക്കൃഷിയുടെ അവശിഷ്ടങ്ങൾ കൈകാര്യം ചെയ്യാൻ കർഷകരെ സഹായിക്കുന്ന യന്ത്രങ്ങൾ ആവശ്യത്തിന് ലഭ്യമാണോയെന്നും സംഘം പരിശോധിച്ചു. കൊയ്ത്ത് ഊർജിതമാകുന്ന സാഹചര്യത്തിൽ, വിളയവശിഷ്ട പരിപാലന യന്ത്രങ്ങൾ കർഷകർക്ക് സമയത്ത് ലഭിക്കുന്നുവെന്ന് ഉറപ്പാക്കാൻ ബന്ധപ്പെട്ട എല്ലാ അധികൃതരും ഏകോപിതമായി പ്രവർത്തനം ശക്തമാക്കണമെന്ന് കമ്മിഷൻ ആവശ്യപ്പെട്ടു. കൊയ്ത്ത് ഏറ്റവും തിരക്കേറിയ ഘട്ടത്തിലെ ആവശ്യങ്ങൾക്കനുസരിച്ച് യന്ത്രങ്ങൾ ലഭ്യമാക്കുകയും ഫലപ്രദമായി വിന്യസിക്കുകയും വേണം. കർഷകർക്കുള്ള സഹായം പരമാവധി ഉറപ്പാക്കണമെന്നും നിർദേശിച്ചു.

കൃഷിയിടങ്ങളിൽ നിരീക്ഷണം ശക്തമാക്കാൻ നിർദേശം

നെൽക്കുറ്റിയും വൈക്കോലും കത്തിക്കുന്ന സംഭവങ്ങൾ പരമാവധി കുറയ്ക്കാൻ അവ കൈകാര്യം ചെയ്യുന്ന സംവിധാനങ്ങൾ ശക്തിപ്പെടുത്തണമെന്ന് കമ്മിഷൻ സംസ്ഥാന അധികൃതരോട് ആവശ്യപ്പെട്ടു. കൃഷിയിടതലത്തിൽ മുൻകൂട്ടിയുള്ള നിരീക്ഷണം വേണം. പ്രവർത്തനത്തിലെ പോരായ്മകൾ സമയബന്ധിതമായി പരിഹരിക്കുകയും വേണം. നിലവിൽ നടപ്പാക്കുന്ന നെൽവൈക്കോൽ പരിപാലന നടപടികൾ ഫലപ്രദമാക്കാൻ ഇവ അനിവാര്യമാണെന്നും കമ്മിഷൻ വ്യക്തമാക്കി.

.