ഇടുക്കി, 2026 ജൂണ് 9 –
ചിന്നക്കനാല് സൂര്യനെല്ലിയില് കാട്ടാന ആക്രമണത്തില് കൊല്ലപ്പെട്ട മാരിയുടെ കുടുംബത്തിന് സഹായഹസ്തവുമായി സര്ക്കാര്. മാരിയുടെ രണ്ട് മക്കളുടെ പേരില് ആദ്യഘട്ടമായി അഞ്ചുലക്ഷം രൂപ വീതം നല്കുമെന്ന് വനംവകുപ്പ് മന്ത്രി ഷിബു ബേബി ജോണ് അറിയിച്ചു. കുട്ടികളുടെ സംരക്ഷണച്ചുമതല വനംവകുപ്പ് ഏറ്റെടുക്കുമെന്നും വ്യക്തമാക്കി.
മക്കളുടെ 18 വയസ്സ് വരെയുള്ള വിദ്യാഭ്യാസച്ചെലവ് വനംവകുപ്പ് വഹിക്കും. കുടുംബത്തിന് എല്ലാ മാസവും 5000 രൂപ വീതം ധനസഹായം നല്കും. കുട്ടികള്ക്കായി വനംവകുപ്പില്നിന്ന് ഒരു ഉദ്യോഗസ്ഥനെ മെന്ററായി നിയോഗിക്കുമെന്നും അറിയിച്ചു. ഇത് പരിഹാരമല്ലെങ്കിലും പുതിയൊരു മാതൃകാപരമായ ഇടപെടലായി കാണുന്നതായും അടുത്ത മാസം പദ്ധതി തയ്യാറാക്കി ഡല്ഹിയില് അവതരിപ്പിക്കുമെന്നും മന്ത്രി പറഞ്ഞു.
കഴിഞ്ഞ ദിവസമാണ് കാട്ടാന ആക്രമണത്തില് മാരി കൊല്ലപ്പെട്ടത്. ഒപ്പമുണ്ടായിരുന്ന മകന് പരിക്കേറ്റിരുന്നു. കുട്ടിയെ സ്കൂളില് വിടാന് പോകുന്നതിനിടെയായിരുന്നു ആക്രമണം. പ്രദേശത്ത് കാട്ടാനയുടെ സാന്നിധ്യമുണ്ടെന്ന് നേരത്തേ അറിയിച്ചിരുന്നതായി വനംവകുപ്പ് അറിയിച്ചു. സൂര്യനെല്ലിയിലെ ജനവാസ മേഖലയിലാണ് രണ്ട് കാട്ടാനകള് തമ്പടിച്ചിരുന്നത്. കനത്ത മൂടല്മഞ്ഞ് കാരണം കാട്ടാനകളെ കാണാന് കഴിയാതിരുന്നതോടെയാണ് ആക്രമണമുണ്ടായത്. തുടര്ന്ന് മാരി മരിക്കുകയായിരുന്നു.
