തിരുവനന്തപുരം, 2026 ജൂൺ 8 –
വെടിവച്ചാംകോവിൽ നടന്ന 17 കാരന്റെ മരണത്തിൽ ഗുരുതര ആരോപണവുമായി കുടുംബം രംഗത്തെത്തി. കൊല്ലപ്പെട്ട ശിവസൂര്യയെ പ്രതികൾ കരുതിക്കൂട്ടി കൊലപ്പെടുത്തിയതാണെന്നാണ് പിതാവ് സുരേഷ് കുമാറിന്റെ ആരോപണം. അബദ്ധത്തിൽ ചില്ല് ഗ്ലാസിലേക്ക് വീണ് മരിച്ചതാണെന്ന നിഗമനം വിശ്വസിക്കുന്നില്ലെന്നും കുടുംബം പറയുന്നു.
ഉപരിപഠനത്തിന് അപേക്ഷ നൽകാനായി അക്ഷയ കേന്ദ്രത്തിലേക്ക് പോയ ശിവസൂര്യ പിന്നീട് ചേതനയറ്റ നിലയിൽ തിരിച്ചെത്തിയതിന്റെ ഞെട്ടലിലാണ് കുടുംബം. സംഭവ ദിവസം ഐടിഐ പ്രവേശനത്തിന് അപേക്ഷിക്കാനാണ് ശിവസൂര്യ പോയത്. പലതവണ ഫോൺ വിളിച്ചിട്ടും മകൻ ഫോൺ എടുത്തില്ലെന്ന് കുടുംബം പറയുന്നു. രാത്രി സുഹൃത്തുക്കളാണ് അപകടം സംഭവിച്ച വിവരം അറിയിച്ചതെന്നും അവർ പറയുന്നു. ഗ്ലാസ് കഷ്ണങ്ങൾ ഉപയോഗിച്ച് കുത്തിക്കൊലപ്പെടുത്തിയതാകാമെന്നാണ് പിതാവിന്റെ സംശയം.
മകനെ കൊലപ്പെടുത്തുക എന്ന ലക്ഷ്യത്തോടെയാണ് പ്രതികൾ എത്തിയതെന്ന് സുരേഷ് കുമാർ ആരോപിച്ചു. മകന് നീതി ലഭിക്കാൻ ഏതറ്റം വരെയും പോകുമെന്നും അദ്ദേഹം വ്യക്തമാക്കി. ഒന്നര വർഷം മുമ്പ് ടർഫിൽ വച്ച് പ്രതികൾ ശിവസൂര്യയുമായി പ്രശ്നമുണ്ടാക്കിയിരുന്നുവെന്ന് സഹോദരൻ ശിവകൃഷ്ണയും പറയുന്നു. അതിന്റെ പിറ്റേന്ന് സംഘം സ്കൂളിലെത്തി ശിവസൂര്യയെ മർദിച്ചിരുന്നുവെന്നും സഹോദരൻ ആരോപിച്ചു.
