ന്യൂഡൽഹി / 2026 /ജൂലൈ 26

ഇന്ത്യയുടെ ആദ്യ ഹൈഡ്രജൻ ട്രെയിൻ ഹരിയാനയിലെ ജിന്ദിനും സോനിപത്തിനും ഇടയിൽ സർവീസ് ആരംഭിച്ചു. 2026 ജൂലൈ 17നാണ് ഡൽഹിക്ക് സമീപം ട്രെയിൻ യാത്രയ്ക്ക് തുടക്കമിട്ടത്. ഇന്ത്യൻ റെയിൽവേയുടെ നേതൃത്വത്തിൽ തദ്ദേശീയമായി വികസിപ്പിച്ച ട്രെയിൻ ഇതുവരെ 1,200 കിലോമീറ്ററിലധികം തടസ്സമില്ലാതെ സഞ്ചരിച്ചു. ഇതിലൂടെ 3,200 ലിറ്ററിലധികം ഡീസൽ ഉപയോഗം ഒഴിവാക്കാനായി.

പുകയില്ല, പുറത്തുവരുന്നത് നീരാവി മാത്രം

ഹൈഡ്രജനും ഓക്സിജനും തമ്മിലുള്ള രാസപ്രവർത്തനത്തിലൂടെയാണ് ട്രെയിനിൽ ആവശ്യമായ വൈദ്യുതി ഉത്പാദിപ്പിക്കുന്നത്. ഈ വൈദ്യുതിയാണ് ട്രെയിൻ ഓടിക്കാൻ ഉപയോഗിക്കുന്നത്. പ്രവർത്തനത്തിന്റെ ഉപോൽപ്പന്നമായി പുറത്തുവരുന്നത് നീരാവി മാത്രമാണ്. പുകയോ കാർബൺ പുറന്തള്ളലോ ഇല്ലാത്തതിനാൽ നിലവിലുള്ളതിൽ ഏറ്റവും പരിസ്ഥിതിസൗഹൃദമായ റെയിൽ ഗതാഗത സംവിധാനമാണിത്.

പത്ത് കോച്ചുകൾക്ക് 2,400 കിലോവാട്ട് കരുത്ത്

പത്ത് കോച്ചുകളുള്ള ട്രെയിനിൽ രണ്ട് ഹൈഡ്രജൻ ഡ്രൈവിങ് പവർ കാറുകളാണുള്ളത്. ഇവ രണ്ടും ചേർന്ന് 2,400 കിലോവാട്ട് വൈദ്യുതി നൽകും. ലിഥിയം അയൺ ഫോസ്ഫേറ്റ് ബാറ്ററികളും ഹൈഡ്രജൻ സിലിണ്ടറുകളും ട്രെയിനിന്റെ പ്രവർത്തനത്തിന് പിന്തുണ നൽകുന്നു. ഇന്ത്യൻ റെയിൽവേയുടെ നേതൃത്വത്തിലാണ് പദ്ധതി പൂർണമായും നടപ്പാക്കിയത്.

ജിന്ദിൽ പ്രത്യേക ഹൈഡ്രജൻ സംഭരണകേന്ദ്രം

ഹരിത ഹൈഡ്രജൻ 500 ബാർ വരെ മർദത്തിലാണ് സംഭരിക്കുന്നത്. 350 ബാർ മർദത്തിലാണ് ട്രെയിനിലേക്ക് ഹൈഡ്രജൻ നിറയ്ക്കുന്നത്. ഏകദേശം 3,000 കിലോഗ്രാം ഹൈഡ്രജൻ സൂക്ഷിക്കാനുള്ള സൗകര്യമാണ് ജിന്ദിൽ ഒരുക്കിയിരിക്കുന്നത്. റെയിൽവേയുടെ ആദ്യ പ്രത്യേക ഹൈഡ്രജൻ സംഭരണകേന്ദ്രമാണിത്.

സുരക്ഷയ്ക്ക് പലതട്ടിലുള്ള സംവിധാനങ്ങൾ

ഹൈഡ്രജൻ ചോർച്ച, അമിത ചൂട്, തീ, പുക എന്നിവ കണ്ടെത്താൻ പ്രത്യേകം സുരക്ഷാസംവിധാനങ്ങൾ ട്രെയിനിലുണ്ട്. അപകടസാഹചര്യങ്ങളിൽ പ്രവർത്തനം തനിയെ നിർത്താനുള്ള സംവിധാനവും തുടർച്ചയായ വായുസഞ്ചാര സൗകര്യവും ഒരുക്കിയിട്ടുണ്ട്. രാജ്യാന്തര സുരക്ഷാമാനദണ്ഡങ്ങളും നിർബന്ധിത പരിശോധനകളും പാലിച്ചാണ് ട്രെയിൻ പ്രവർത്തിക്കുന്നത്.

ഡൽഹി പാതയിലും പരീക്ഷണയോട്ടം ഉടൻ

ജിന്ദ്–സോനിപത്ത് പാതയിലെ വിജയകരമായ പ്രവർത്തനത്തിന് പിന്നാലെ ഡൽഹി പാതയിലും പരീക്ഷണയോട്ടം ഉടൻ ആരംഭിക്കും. തദ്ദേശീയ ഹൈഡ്രജൻ റെയിൽ സംവിധാനം രൂപപ്പെടുത്തുന്നതിലെ പ്രധാന മുന്നേറ്റമായാണ് പദ്ധതിയെ റെയിൽവേ വിലയിരുത്തുന്നത്. മലിനീകരണമില്ലാത്ത റെയിൽ ഗതാഗതം കൂടുതൽ മേഖലകളിലേക്ക് വ്യാപിപ്പിക്കാനും ശുദ്ധഗതാഗത രംഗത്ത് ഇന്ത്യയെ മുന്നിലെത്തിക്കാനും പദ്ധതി വഴിയൊരുക്കും.