ടെഹ്റാൻ, 2026 ജൂൺ 8 –
ഇറാൻ – ഇസ്രയേൽ സംഘർഷം വീണ്ടും രൂക്ഷമായി. തലസ്ഥാനമായ ടെഹ്റാൻ, തബ്റീസ്, ഇസ്ഫഹൻ, കറാജ് എന്നീ നഗരങ്ങളിൽ തുടർ സ്ഫോടനങ്ങൾ ഉണ്ടായതായി ഇറാൻ മാധ്യമങ്ങൾ സ്ഥിരീകരിച്ചു. ഇതിന് പിന്നാലെ മേഖലയിലെ സുരക്ഷാ സാഹചര്യം കൂടുതൽ ആശങ്കാജനകമായി.
പടിഞ്ഞാറൻ, മധ്യ ഇറാനിലെ സൈനിക ലക്ഷ്യങ്ങൾ ആക്രമിച്ചതായി ഇസ്രയേൽ അറിയിച്ചു. ഇറാനിയൻ ഭരണകൂടത്തിന്റെ സൈനിക കേന്ദ്രങ്ങൾക്കെതിരെയാണ് വ്യോമസേന ആക്രമണം നടത്തിയതെന്നാണ് ഇസ്രയേലിന്റെ വിശദീകരണം. അതേസമയം, ഇസ്രയേലിന്റെ വടക്കൻ മേഖലകൾ ലക്ഷ്യമാക്കി ഇറാൻ തൊടുത്ത നിരവധി മിസൈലുകൾ തകർത്തതായും ഇസ്രയേൽ സൈന്യം അവകാശപ്പെട്ടു. ഏത് തരത്തിലുള്ള വ്യോമാക്രമണങ്ങളെയും നേരിടാൻ സൈന്യം സജ്ജമാണെന്നും ഇറാന് ശക്തമായ തിരിച്ചടി നൽകാൻ നിർദേശം നൽകിയിട്ടുണ്ടെന്നും ഇസ്രയേൽ വ്യക്തമാക്കി.
ലബനൻ തലസ്ഥാനമായ ബെയ്റൂട്ടിൽ ഇസ്രയേൽ നടത്തിയ വ്യോമാക്രമണത്തിന് പിന്നാലെയാണ് സ്ഥിതി കൂടുതൽ വഷളായത്. ദഹിയേ മേഖലയിലെ ഹിസ്ബുള്ളയുടെ പ്രധാന കമാൻഡ് ആസ്ഥാനവും ഭൂഗർഭ പ്രവർത്തന കേന്ദ്രവും ലക്ഷ്യമിട്ടായിരുന്നു ആക്രമണം. തുടർന്ന് ഇറാൻ തിരിച്ചടിച്ചതോടെ ബെയ്റൂട്ടിൽ വീണ്ടും ആക്രമണം നടന്നു. സംഘർഷം രൂക്ഷമായ സാഹചര്യത്തിൽ ഇറാൻ, ഇറാഖ്, സിറിയ എന്നീ രാജ്യങ്ങൾ തങ്ങളുടെ വ്യോമപാതകൾ അടച്ചു. ഇസ്രയേലിന് നേരെ മിസൈൽ ആക്രമണം നടത്തിയതിന് പിന്നാലെയാണ് ഇറാൻ രാജ്യത്തിന്റെ പടിഞ്ഞാറൻ മേഖലയ്ക്ക് മുകളിലുള്ള വ്യോമപാതയും അടച്ചത്.
