കരുവന്നൂർ ബാങ്ക് തട്ടിപ്പ്: സിപിഎം നേതാക്കൾ ഉൾപ്പെടെ മുഴുവൻ പ്രതികൾക്കും സമൻസ്

കൊച്ചി, 2026 ജൂൺ 6 –

കരുവന്നൂർ സഹകരണ ബാങ്ക് തട്ടിപ്പ് കേസിൽ സിപിഎമ്മിന് വലിയ തിരിച്ചടിയായി കോടതിയുടെ നടപടി. സിപിഎം നേതാക്കളായ കെ.രാധാകൃഷ്ണൻ, എ.സി.മൊയ്തീൻ, എം.എം.വർഗീസ് എന്നിവരടക്കം കേസിലെ മുഴുവൻ പ്രതികൾക്കും കലൂരിലെ പി.എം.എൽ.എ കോടതി സമൻസ് അയച്ചു. പ്രതികൾക്കെതിരെ പ്രഥമദൃഷ്ട്യാ തെളിവുണ്ടെന്ന് കോടതി നിരീക്ഷിച്ചു. അടുത്ത മാസം നാലിന് എല്ലാവരും നേരിട്ട് കോടതിയിൽ ഹാജരാകണമെന്നും നിർദേശിച്ചു.

കരുവന്നൂർ ബാങ്കിൽ വൻ സാമ്പത്തിക തട്ടിപ്പ് നടന്നതായും ബാങ്കിന് കോടിക്കണക്കിന് രൂപയുടെ നഷ്ടമുണ്ടായതായുമാണ് എൻഫോഴ്‌സ്‌മെന്റ് ഡയറക്ടറേറ്റിന്റെ കണ്ടെത്തൽ. ബാങ്കിലെ ജീവനക്കാരും ഭരണസമിതി അംഗങ്ങളും ചേർന്ന് സാധാരണ നിക്ഷേപകരുടെ ആധാരങ്ങളും മറ്റ് രേഖകളും ഉപയോഗിച്ച് അവരുടെ അറിവോ സമ്മതമോ ഇല്ലാതെ കോടിക്കണക്കിന് രൂപയുടെ വ്യാജ വായ്പകൾ അനുവദിച്ചെന്നാണ് അന്വേഷണ ഏജൻസിയുടെ ആരോപണം.

ഒരു വ്യക്തിക്ക് അനുവദിക്കാവുന്ന വായ്പാ പരിധി മറികടന്ന് പലരുടെയും പേരിൽ ബെനാമി വായ്പകൾ അനുവദിച്ച് കോടികൾ തട്ടിയെടുത്തതായും കണ്ടെത്തിയിട്ടുണ്ട്. കേസിലെ പ്രധാന പ്രതികളുടെയും ഇടനിലക്കാരുടെയും കോടിക്കണക്കിന് രൂപ വിലമതിക്കുന്ന സ്വത്തുക്കളും ബാങ്ക് അക്കൗണ്ടുകളും നേരത്തെ എൻഫോഴ്‌സ്‌മെന്റ് ഡയറക്ടറേറ്റ് കണ്ടുകെട്ടിയിരുന്നു. കേസിന്റെ തുടർനടപടികളിൽ നിർണായക ഘട്ടമായാണ് പുതിയ കോടതി നടപടി വിലയിരുത്തപ്പെടുന്നത്.