ടെഹ്റാൻ | പശ്ചിമേഷ്യൻ യുദ്ധം കൊടുമ്പിരിക്കൊള്ളുന്നതിനിടെ ലോകത്തിന്റെ ‘കണ്ഠനാഡി’ എന്ന് വിശേഷിപ്പിക്കപ്പെടുന്ന ഹോർമുസ് കടലിടുക്ക് ഇറാൻ അടച്ചു. . ലോകത്ത് പ്രതിദിനം ഉപയോഗിക്കുന്ന എണ്ണയുടെ അഞ്ചിലൊന്നും കടന്നുപോകുന്നത് ഈ പാതയിലൂടെയാണ്. ഈ നടപടി ആഗോളതലത്തിൽ വൻ പ്രത്യാഘാതങ്ങൾക്ക് വഴിവെക്കും തന്ത്രപ്രധാമായ ഈ പാത അടഞ്ഞതോടെ ആഗോള വിപണിയിൽ എണ്ണവില കുതിച്ചുയരുകയും വിതരണ ശൃംഖല പൂർണ്ണമായും തകരുകയും ചെയ്യുന്ന സാഹചര്യമാണ് നിലവിലുള്ളത്.
എണ്ണ വ്യാപാരത്തിന്റെ ഏകദേശം 20-25 ശതമാനവും നടക്കുന്നത് ഹോർമുസ് കടലിടുക്ക് വഴിയാണ്
ലോകത്തെ എണ്ണ വ്യാപാരത്തിന്റെ ഏകദേശം 20-25 ശതമാനവും നടക്കുന്നത് ഹോർമുസ് കടലിടുക്ക് വഴിയാണ്. സൗദി അറേബ്യ, ഇറാഖ്, യു എ ഇ, കുവൈത്ത്, ഖത്തർ തുടങ്ങിയ രാജ്യങ്ങളിൽ നിന്നുള്ള എണ്ണക്കപ്പലുകൾക്ക് അന്താരാഷ്ട്ര വിപണിയിലെത്താനുള്ള ഏക മാർഗ്ഗമാണിത്. കടലിടുക്ക് അടഞ്ഞതോടെ പ്രതിദിനം ഏകദേശം 20 ദശലക്ഷം ബാരൽ എണ്ണയുടെ കുറവാണ് ആഗോള വിപണിയിൽ അനുഭവപ്പെടുന്നത്. ഇത് ക്രൂഡ് ഓയിൽ വില ബാരലിന് 100 ഡോളറിനും മുകളിലേക്ക് ഉയരാൻ കാരണമായി
ദ്രവീകൃത പ്രകൃതിവാതകത്തിന്റെ ഖത്തറിൽ നിന്നുള്ള വിതരണം പൂർണ്ണമായും നിലച്ചു.
ലോകത്തെ ഏറ്റവും വലിയ ദ്രവീകൃത പ്രകൃതിവാതക (LNG) കയറ്റുമതിക്കാരായ ഖത്തറിൽ നിന്നുള്ള വിതരണം പൂർണ്ണമായും നിലച്ചു. യൂറോപ്പിലെയും ഏഷ്യയിലെയും പല രാജ്യങ്ങളും തങ്ങളുടെ ഊർജ്ജ ആവശ്യങ്ങൾക്കായി ഖത്തറിനെയാണ് ആശ്രയിക്കുന്നത്. ഖത്തർ എനർജി ഉൽപ്പാദനം നിർത്തിവെച്ചതോടെ യൂറോപ്പിലെ ഗ്യാസ് വിലയിൽ 50 ശതമാനത്തോളം വർധനവാണുണ്ടായത്. ഇത് വരും മാസങ്ങളിൽ യൂറോപ്പിൽ കനത്ത വൈദ്യുതി പ്രതിസന്ധിക്കും വിലക്കയറ്റത്തിനും കാരണമാകും.
കാർഷിക ഉൽപ്പന്നങ്ങളുടെ കയറ്റുമതിയും പ്രതിസന്ധിയിലായി
ഇന്ത്യയേയും ഈ പ്രതിസന്ധി വലിയ തോതിൽ ബാധിക്കും. ഇന്ത്യക്കാവശ്യമായ എണ്ണയുടെ 40 ശതമാനത്തിലധികം ഈ പാതയിലൂടെയാണ് വരുന്നത്. എൽ പി ജി, എൽ എൻ ജി ഇറക്കുമതിയുടെ 60 ശതമാനവും ഹോർമുസ് വഴിയാണ്. വിതരണം തടസ്സപ്പെടുന്നത് രാജ്യത്ത് ഇന്ധനക്ഷാമത്തിനും വിലക്കയറ്റത്തിനും ഇടയാക്കും. ഇന്ത്യയുടെ ബാസ്മതി അരി കയറ്റുമതിയുടെ പകുതിയോളം പോകുന്നത് ഗൾഫ് രാജ്യങ്ങളിലേക്കാണ്. കപ്പൽ ഗതാഗതം നിലച്ചതോടെ കാർഷിക ഉൽപ്പന്നങ്ങളുടെ കയറ്റുമതിയും പ്രതിസന്ധിയിലായി.
ചരക്ക് കൂലി കുത്തനെ ഉയർന്നു.
യുദ്ധസാഹചര്യം നിലനിൽക്കുന്നതിനാൽ ഈ മേഖലയിലൂടെയുള്ള കപ്പൽ ഇൻഷുറൻസ് പ്രീമിയം 50 ശതമാനത്തിലധികം വർധിച്ചു. കപ്പലുകൾ ദീർഘദൂര പാതകൾ തിരഞ്ഞെടുക്കാൻ നിർബന്ധിതരായതോടെ ചരക്ക് കൂലി (Freight charges) കുത്തനെ ഉയർന്നു. ഇത് ആഗോളതലത്തിൽ നിത്യോപയോഗ സാധനങ്ങളുടെ വില കൂടുന്നതിനും പണപ്പെരുപ്പത്തിനും (Inflation) കാരണമാകും.
