ഉജ്ജയിൻ  /  2026 /  നവംബർ 06 

തൊഴിൽ കോഡുകൾ, തൊഴിലാളി ക്ഷേമം, സാമൂഹിക സംരക്ഷണം എന്നിവയെക്കുറിച്ച് അവബോധം നൽകുന്നതിനായി മധ്യപ്രദേശിലെ ഉജ്ജയിൻ ജില്ലയിലെ നാഗ്ദയിൽ ശ്രമ സംവാദ് പരിപാടി സംഘടിപ്പിച്ചു. നവംബർ നാലിനായിരുന്നു ജില്ലാതല പരിശീലനവും ബോധവത്കരണ പരിപാടിയും. കേന്ദ്ര തൊഴിൽ മന്ത്രാലയവും മധ്യപ്രദേശ് തൊഴിൽ വകുപ്പും ഗ്രാസിം ഇൻഡസ്ട്രീസ് ലിമിറ്റഡിന്റെ സഹകരണത്തോടെയാണ് പരിപാടി നടത്തിയത്. തൊഴിലുടമകൾക്കും മാനവവിഭവശേഷി, നിയമം, ധനകാര്യം എന്നീ മേഖലകളിലെ വിദഗ്ധർക്കും തൊഴിൽ കോഡുകളെയും അവയ്ക്കു കീഴിലുള്ള ചട്ടങ്ങളെയും കുറിച്ച് വ്യക്തത നൽകുകയായിരുന്നു ലക്ഷ്യം.

നൂറ്റമ്പതിലധികം പ്രതിനിധികൾ പങ്കെടുത്തു

കേന്ദ്ര തൊഴിൽ മന്ത്രാലയം ഡയറക്ടർ എസ് ആർ ദത്ത പരിപാടിയിൽ അധ്യക്ഷത വഹിച്ചു. നാഗ്ദയിലെ ഗ്രാസിം ഇൻഡസ്ട്രീസ് ലിമിറ്റഡ് വൈസ് പ്രസിഡന്റും വിരമിച്ച സ്ക്വാഡ്രൺ ലീഡറുമായ എസ് കെ സിങ് സഹാധ്യക്ഷനായി. കേന്ദ്ര തൊഴിൽ മന്ത്രാലയം, മധ്യപ്രദേശ് തൊഴിൽ വകുപ്പ്, എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷൻ, എംപ്ലോയീസ് സ്റ്റേറ്റ് ഇൻഷുറൻസ് കോർപ്പറേഷൻ, കേന്ദ്ര ചീഫ് ലേബർ കമ്മീഷണറുടെ കാര്യാലയം, തൊഴിലാളി ക്ഷേമ ഡയറക്ടറേറ്റ് ജനറൽ എന്നിവിടങ്ങളിലെ മുതിർന്ന ഉദ്യോഗസ്ഥർ പങ്കെടുത്തു. തൊഴിലുടമകൾ, വ്യവസായ പ്രതിനിധികൾ, നിയമം, മാനവവിഭവശേഷി, ധനകാര്യം എന്നീ മേഖലകളിലെ വിദഗ്ധർ ഉൾപ്പെടെ നൂറ്റമ്പതിലധികം പേരും പരിപാടിക്കെത്തി. തൊഴിൽ പരിഷ്കാരങ്ങൾ, ക്ഷേമം, സാമൂഹിക സംരക്ഷണം എന്നിവയിൽ അവബോധവും സ്ഥാപനങ്ങളുടെ പ്രവർത്തനശേഷിയും വർധിപ്പിക്കുക, കേന്ദ്രവും സംസ്ഥാനവും തമ്മിലുള്ള ഏകോപനവും ബന്ധപ്പെട്ട വിഭാഗങ്ങളുടെ പങ്കാളിത്തവും ശക്തിപ്പെടുത്തുക എന്നിവയും പരിപാടിയുടെ ലക്ഷ്യങ്ങളായിരുന്നു

നാല് തൊഴിൽ കോഡുകളിലെ ബാധ്യതകൾ വിശദീകരിച്ചു

തൊഴിൽ കോഡുകൾ, തൊഴിലുടമകളുടെ ഉത്തരവാദിത്വങ്ങൾ, കേന്ദ്ര സർക്കാരിന്റെ പ്രധാന സാമൂഹിക സുരക്ഷാ പദ്ധതികൾ എന്നിവയെക്കുറിച്ച് പ്രായോഗിക ധാരണ നൽകുന്ന സാങ്കേതിക സെഷനുകൾ നടന്നു. നാല് തൊഴിൽ കോഡുകളിലും അവയ്ക്കു കീഴിൽ വിജ്ഞാപനം ചെയ്ത കേന്ദ്ര ചട്ടങ്ങളിലും തൊഴിലുടമകൾ പാലിക്കേണ്ട പ്രധാന വ്യവസ്ഥകൾ കേന്ദ്ര തൊഴിൽ മന്ത്രാലയത്തിലെ ഉദ്യോഗസ്ഥർ വിശദീകരിച്ചു. നിയമപരമായ ബാധ്യതകളും ചട്ടങ്ങൾ പാലിക്കുന്നതിലെ ഉത്തരവാദിത്വങ്ങളും സംബന്ധിച്ച് പ്രായോഗിക മാർഗനിർദേശം നൽകി. തൊഴിൽ കോഡുകൾ പ്രവർത്തനതലത്തിൽ എങ്ങനെ നടപ്പാക്കണമെന്ന് മനസ്സിലാക്കാനും സെഷനുകൾ സഹായിച്ചു.

തൊഴിൽ പദ്ധതികളും സഹായക കൈപ്പുസ്തകങ്ങളും പരിചയപ്പെടുത്തി

പ്രധാനമന്ത്രി വികസിത് ഭാരത് റോസ്ഗാർ യോജനയെക്കുറിച്ച് എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷന്റെ പ്രതിനിധികൾ സെഷൻ നയിച്ചു. പ്രധാനമന്ത്രി ശ്രമയോഗി മാന്ധൻ പദ്ധതിയെക്കുറിച്ചുള്ള സെഷൻ തൊഴിലാളി ക്ഷേമ ഡയറക്ടറേറ്റ് ജനറലിന്റെ പ്രതിനിധികൾ കൈകാര്യം ചെയ്തു. തൊഴിൽ കോഡുകളും ചട്ടങ്ങളും ഫലപ്രദമായി നടപ്പാക്കാൻ തൊഴിലുടമകളെയും നിയമവ്യവസ്ഥകൾ പാലിക്കുന്നതുമായി ബന്ധപ്പെട്ട വിദഗ്ധരെയും സഹായിക്കുന്നതിനായി കേന്ദ്ര തൊഴിൽ മന്ത്രാലയം തയ്യാറാക്കിയ കൈപ്പുസ്തകവും പതിവുചോദ്യങ്ങളുടെ സമാഹാരവും പങ്കെടുത്തവർക്ക് നൽകി.

ചോദ്യോത്തരങ്ങളിലൂടെ സംശയങ്ങൾ തീർത്തു

തൊഴിൽ കോഡുകൾ, പാലിക്കേണ്ട നിയമവ്യവസ്ഥകൾ, സാമൂഹിക സുരക്ഷാ വ്യവസ്ഥകൾ എന്നിവയെക്കുറിച്ചുള്ള സംശയങ്ങൾ ഉന്നയിക്കാനും കൂടുതൽ വ്യക്തത നേടാനും ചോദ്യോത്തര വേള ഒരുക്കി. കേന്ദ്ര, സംസ്ഥാന സർക്കാർ അധികൃതരെയും വ്യവസായ പ്രതിനിധികളെയും ഒരുമിച്ചെത്തിച്ച പരിപാടി വിഷയങ്ങളിലുള്ള അവബോധവും ധാരണയും വർധിപ്പിച്ചു. ബന്ധപ്പെട്ട വിഭാഗങ്ങളുടെ പങ്കാളിത്തം ശക്തിപ്പെടുത്താനും തൊഴിൽ കോഡുകൾ ഫലപ്രദമായി സ്വീകരിച്ച് നടപ്പാക്കുന്നതിനും പരിപാടി സഹായിച്ചു.