ന്യൂഡൽഹി / 2026 / നവംബർ 06
ആഗോള വജ്രമേഖലയിലെ പ്രധാന വിഷയങ്ങളിൽ പങ്കാളികൾക്കിടയിൽ ധാരണ വളർത്താൻ ഇന്ത്യയുടെ നേതൃത്വത്തിൽ കൂടിയാലോചന നടന്നു. കിംബർലി പ്രോസസിന്റെ 2026ലെ അധ്യക്ഷരാജ്യമായ ഇന്ത്യ നവംബർ മൂന്നിന് അംഗോളയിലെ ലുവാണ്ടയിലാണ് യോഗം വിളിച്ചത്. കിംബർലി പ്രോസസ് അധ്യക്ഷനും കേന്ദ്ര വാണിജ്യവകുപ്പ് അഡീഷണൽ സെക്രട്ടറിയുമായ യശ്‌വീർ സിങ് നേതൃത്വം നൽകി. നവംബർ മുപ്പത് മുതൽ ഡിസംബർ നാലുവരെ ന്യൂഡൽഹിയിൽ നടക്കുന്ന കിംബർലി പ്രോസസ് സമ്പൂർണ സമ്മേളനത്തിന് മുന്നോടിയായുള്ള ആശയവിനിമയത്തിന്റെ ഭാഗമായിരുന്നു യോഗം. ആഫ്രിക്കൻ വജ്രോൽപ്പാദക രാജ്യങ്ങളുടെ അസോസിയേഷന്റെ ഇരുപതാം വാർഷികാഘോഷങ്ങളോടനുബന്ധിച്ചാണ് കൂടിയാലോചന സംഘടിപ്പിച്ചത്. നവംബർ മൂന്നിനും നാലിനുമായിരുന്നു വാർഷികാഘോഷങ്ങൾ.
കിംബർലി പ്രോസസിലെ പ്രവർത്തകസംഘങ്ങളുടെയും സമിതികളുടെയും അധ്യക്ഷരും ഉപാധ്യക്ഷരും യോഗത്തിൽ പങ്കെടുത്തു. നിലവിലെ ഉപാധ്യക്ഷരാജ്യമായ ഘാനയുടെയും മുൻ അധ്യക്ഷരാജ്യമായ യുണൈറ്റഡ് അറബ് എമിറേറ്റ്സിന്റെയും പ്രതിനിധികളും എത്തി. വേൾഡ് ഡയമണ്ട് കൗൺസിൽ, കിംബർലി പ്രോസസ് സിവിൽ സൊസൈറ്റി കൂട്ടായ്മ, റിസോൾവിന്റെ കീഴിലുള്ള ഡയമണ്ട് ഡെവലപ്മെന്റ് ഇനിഷ്യേറ്റീവ്, ആഫ്രിക്കൻ വജ്രോൽപ്പാദക രാജ്യങ്ങളുടെ അസോസിയേഷൻ എന്നിവയുൾപ്പെടെയുള്ള നിരീക്ഷക, പങ്കാളി സംഘടനകളുടെ പ്രതിനിധികളും പങ്കെടുത്തു. മിനുക്കാത്ത വജ്രങ്ങൾ ഉത്തരവാദിത്തത്തോടെ സംഭരിക്കൽ, സ്ഥാപനങ്ങളുടെ ഭരണനിർവഹണം, ചട്ടപാലനം, ഉപഭോക്തൃവിശ്വാസം എന്നിവയായിരുന്നു പ്രധാന വിഷയങ്ങൾ.
വിശ്വാസവും ചട്ടപാലനവും വിശ്വാസ്യതയും ഉറപ്പാക്കാൻ നടപടികൾ
പ്രവർത്തകസംഘങ്ങളുടെയും സമിതികളുടെയും അധ്യക്ഷരും ഉപാധ്യക്ഷരും തങ്ങളുടെ പ്രവർത്തനപദ്ധതികളിലെ പുരോഗതി വിശദീകരിച്ചു. സമ്പൂർണ സമ്മേളനത്തിന്റെ പരിഗണനയ്ക്ക് നൽകാനുദ്ദേശിക്കുന്ന വിഷയങ്ങളും അവതരിപ്പിച്ചു. ഭരണപരമായ തീരുമാനങ്ങളുടെ കരടുകൾ, മിനുക്കാത്ത വജ്രങ്ങളുടെ ഉത്തരവാദിത്തമുള്ള സംഭരണത്തിനായുള്ള പദ്ധതികൾ, സ്ഥിതിവിവരക്കണക്കുകൾ റിപ്പോർട്ട് ചെയ്യുന്ന സംവിധാനത്തിലെ മെച്ചപ്പെടുത്തലുകൾ എന്നിവ ഇതിൽ ഉൾപ്പെട്ടു. സ്ഥാപനങ്ങളുടെ ഭരണനിർവഹണവും പങ്കാളികളുടെ ചട്ടപാലനവും ശക്തമാക്കാനുള്ള നടപടികളും ചർച്ചയായി. കൂടുതൽ ഏകോപനം ആവശ്യമായ വിഷയങ്ങളും നേരത്തേ ധാരണയിലെത്തിയാൽ സമ്മേളനത്തിന്റെ പ്രവർത്തനങ്ങൾക്ക് സഹായകമാകുന്ന മേഖലകളും യോഗം കണ്ടെത്തി.
ഇന്ത്യയുടെ അധ്യക്ഷകാലത്തെ പ്രമേയമായ വിശ്വാസം, ചട്ടപാലനം, വിശ്വാസ്യത എന്നിവ യോഗം ആവർത്തിച്ച് ഉറപ്പിച്ചു. ആഗോള വജ്രമേഖലയുടെ നിലവിലെ സാഹചര്യവും മാറിവരുന്ന മുൻഗണനകളും തുറന്ന ചർച്ചയ്ക്ക് വിധേയമായി. വജ്രോൽപ്പാദക രാജ്യങ്ങളുടെയും സമൂഹങ്ങളുടെയും സുസ്ഥിരത, കിംബർലി പ്രോസസ് സെക്രട്ടേറിയറ്റിന് സ്ഥിരമായ ധനസഹായവും പ്രവർത്തനത്തുടർച്ചയും ഉറപ്പാക്കൽ, സർട്ടിഫിക്കേഷനും സ്ഥിതിവിവരക്കണക്കുകളുടെ കൈകാര്യം ചെയ്യലും ഡിജിറ്റലാക്കൽ എന്നിവ ചർച്ച ചെയ്തു. കിംബർലി പ്രോസസ് സർട്ടിഫിക്കേഷൻ പദ്ധതിയുടെ ചട്ടപാലനം ശക്തമാക്കുന്നതും പരിഗണിച്ചു. സംഘർഷങ്ങൾക്ക് ധനസഹായമാകുന്ന വജ്രങ്ങളുടെ നിർവചനം പരിഷ്‌കരിക്കൽ, ഉത്തരവാദിത്തമുള്ള സംഭരണം, പരമ്പരാഗത ചെറുകിട ഖനനത്തിലൂടെയും നദീതടങ്ങളിലെ നിക്ഷേപങ്ങളിൽനിന്നുമുള്ള വജ്രോൽപ്പാദനം എന്നിവയിലും അഭിപ്രായങ്ങൾ പങ്കുവെച്ചു. ഉപഭോക്തൃവിശ്വാസത്തിന്റെയും ഫലപ്രദമായ റിപ്പോർട്ടിങ്ങിന്റെയും പരസ്പര വിലയിരുത്തൽ സംവിധാനങ്ങളുടെയും പ്രാധാന്യവും ചർച്ചയായി.
ആഫ്രിക്കൻ രാജ്യങ്ങളുമായുള്ള ബന്ധത്തിന് ഇന്ത്യയുടെ നിരീക്ഷകപദവി കരുത്താകും
വിശ്വാസം, ചട്ടപാലനം, വിശ്വാസ്യത എന്നിവയ്ക്കാണ് ഇന്ത്യയുടെ അധ്യക്ഷകാലത്ത് ഊന്നൽ നൽകുന്നതെന്ന് യശ്‌വീർ സിങ് പറഞ്ഞു. കിംബർലി പ്രോസസിന്റെയും വജ്രവ്യവസായത്തിന്റെയും ഭാവിക്ക് പ്രധാനമായ വിഷയങ്ങളിൽ പ്രവർത്തകസംഘങ്ങളുടെ നേതൃത്വവുമായും ഉപാധ്യക്ഷരാജ്യവുമായും നിരീക്ഷകരുമായും നേരിട്ട് സംസാരിക്കാൻ ലുവാണ്ടയിലെ യോഗം അവസരമൊരുക്കി. ന്യൂഡൽഹി സമ്മേളനത്തിന് മുമ്പ് വിഷയങ്ങളിൽ പൊതുധാരണ വളർത്തുകയാണ് ലക്ഷ്യം. ക്രിയാത്മകമായ ചർച്ചകളിലൂടെയും സമവായത്തെ അടിസ്ഥാനമാക്കിയുള്ള തീരുമാനങ്ങളിലൂടെയും പ്രായോഗിക ഫലങ്ങളിലേക്ക് നീങ്ങാനാണ് ശ്രമമെന്നും അദ്ദേഹം വ്യക്തമാക്കി. ആഫ്രിക്കൻ വജ്രോൽപ്പാദക രാജ്യങ്ങളുടെ അസോസിയേഷനിൽ ഇന്ത്യയ്ക്ക് നിരീക്ഷകപദവിയുണ്ട്. ആഫ്രിക്കൻ വജ്രോൽപ്പാദക രാജ്യങ്ങളുമായി സ്ഥാപനതലത്തിൽ ഇടപഴകാൻ ഇത് വേദിയൊരുക്കുന്നു. മിനുക്കാത്ത വജ്രങ്ങളുടെ വിതരണശൃംഖല സുരക്ഷിതമാക്കൽ, സാങ്കേതിക അറിവുകളുടെ കൈമാറ്റം, മൂല്യവർധന, വിപണിപ്രവേശനം, ധാർമികവും സുസ്ഥിരവുമായ രീതികളുടെ പ്രോത്സാഹനം എന്നിവയിൽ സഹകരണസാധ്യതകളുമുണ്ട്.
ആഫ്രിക്കൻ വജ്രോൽപ്പാദക രാജ്യങ്ങൾക്കിടയിലെ സഹകരണം മെച്ചപ്പെടുത്താൻ 2006 നവംബർ നാലിന് അംഗോളയിലെ ലുവാണ്ടയിലാണ് അസോസിയേഷൻ സ്ഥാപിച്ചത്. സംഘടനയിൽ പതിനഞ്ച് പൂർണ അംഗരാജ്യങ്ങളും എട്ട് നിരീക്ഷകരുമുണ്ട്. റഷ്യയും ഇന്ത്യയുമാണ് ആഫ്രിക്കയ്ക്ക് പുറത്തുനിന്നുള്ള രണ്ട് നിരീക്ഷകർ. അംഗരാജ്യങ്ങൾ ചേർന്ന് ആഗോള വജ്രോൽപ്പാദനത്തിന്റെ അറുപത് ശതമാനത്തിലധികം സംഭാവന ചെയ്യുന്നു. നിലവിൽ സിയറ ലിയോണാണ് സംഘടനയുടെ അധ്യക്ഷരാജ്യം. ഖനി, ധാതുവിഭവ മന്ത്രി ജൂലിയസ് ഡാനിയൽ മട്ടായിയാണ് രാജ്യത്തെ പ്രതിനിധീകരിക്കുന്നത്. നവംബർ നാലിന് ലുവാണ്ടയിൽ നടന്ന മന്ത്രിതല കൗൺസിലിന്റെ പതിമൂന്നാമത് അസാധാരണ യോഗത്തിൽ ബോട്സ്വാനയ്ക്ക് നിരീക്ഷക അംഗത്വം നൽകി.
നൈപുണ്യവികസനത്തിനും വ്യാപാരത്തിനും ധാരണാപത്രം
നവംബർ നാലിന് അസോസിയേഷന്റെ മന്ത്രിതല കൗൺസിലിലും ഇരുപതാം വാർഷികത്തിന്റെ പ്രധാന അനുസ്മരണ പരിപാടിയിലും യശ്‌വീർ സിങ് പങ്കെടുത്തു. ഭാവിക്കായുള്ള പങ്കാളിത്തം, ആഫ്രിക്കയുടെ വജ്രമേഖലയുടെ ഭാവിയെക്കുറിച്ചുള്ള ആഗോള വ്യവസായ കാഴ്ചപ്പാട് എന്ന വിഷയത്തിൽ അദ്ദേഹം അവതരണം നടത്തി. ആഗോള വജ്ര മൂല്യശൃംഖലയിൽ ആഫ്രിക്കൻ ഉൽപ്പാദക രാജ്യങ്ങൾക്കുള്ള കേന്ദ്രസ്ഥാനം അദ്ദേഹം ചൂണ്ടിക്കാട്ടി. ഉൽപ്പാദകരും നിർമാണകേന്ദ്രങ്ങളും ഉപഭോക്തൃവിപണികളും തമ്മിലുള്ള പങ്കാളിത്തം സ്വാഭാവിക വജ്രമേഖലയുടെ ദീർഘകാല സുസ്ഥിരതയ്ക്ക് എങ്ങനെ സഹായിക്കാമെന്നും വിശദീകരിച്ചു. സ്വാഭാവിക വജ്രങ്ങളിലുള്ള ഉപഭോക്തൃവിശ്വാസവും കിംബർലി പ്രോസസിന്റെ കുറഞ്ഞ മാനദണ്ഡങ്ങൾ കർശനമായി പാലിക്കുന്നതും അനിവാര്യമാണ്. വിശ്വാസ്യതയും എല്ലാവരെയും ഉൾക്കൊള്ളുന്ന സമീപനവുമുള്ള കിംബർലി പ്രോസസും വേണം. വജ്രവിഭവങ്ങൾ ഉൽപ്പാദക രാജ്യങ്ങളുടെ വികസനത്തിന് തുടർന്നും സംഭാവന ചെയ്യാൻ ഇവ ആവശ്യമായ ഘടകങ്ങളാണെന്ന് അദ്ദേഹം പറഞ്ഞു.
സംഘടനയുടെ ഇരുപത് വർഷത്തെ പ്രവർത്തനം അടയാളപ്പെടുത്തിയ പരിപാടിയിൽ ആഫ്രിക്കൻ വജ്രോൽപ്പാദക രാജ്യങ്ങളുടെയും വ്യവസായത്തിന്റെയും മറ്റ് ബന്ധപ്പെട്ട വിഭാഗങ്ങളുടെയും പ്രതിനിധികൾ പങ്കെടുത്തു. അസോസിയേഷന്റെ സുസ്ഥിര വജ്ര മാനദണ്ഡം, ബിസിനസ് കൗൺസിൽ, സുസ്ഥിരതയും ഓഡിറ്റ് രീതികളും എന്നിവ ചർച്ചയായി. സ്വാഭാവിക വജ്രങ്ങളുടെ ആധികാരികത സംരക്ഷിക്കൽ, വ്യവസായത്തിന്റെ താൽപര്യങ്ങൾക്കായി ശബ്ദമുയർത്തൽ, വിപണിയിൽ വ്യത്യസ്തത വ്യക്തമാക്കൽ, ഉപഭോക്തൃവിശ്വാസം എന്നിവയും പരിഗണിച്ചു. വാർഷികാഘോഷങ്ങളോടൊപ്പം നടന്ന മന്ത്രിതല കൗൺസിലിന്റെ പതിമൂന്നാമത് അസാധാരണ യോഗം ഇന്ത്യയിലെ ജെം ആൻഡ് ജ്വല്ലറി എക്സ്പോർട്ട് പ്രൊമോഷൻ കൗൺസിലും അസോസിയേഷനും തമ്മിലുള്ള ധാരണാപത്രത്തിന് അംഗീകാരം നൽകി. ഇന്ത്യൻ രത്ന, ആഭരണ വ്യവസായവും ആഫ്രിക്കൻ വജ്രോൽപ്പാദക രാജ്യങ്ങളും തമ്മിലുള്ള സഹകരണം ശക്തമാക്കുകയാണ് ലക്ഷ്യം. വജ്രങ്ങൾ തരംതിരിക്കൽ, മൂല്യനിർണയം, നിർമാണം എന്നിവയിൽ ശേഷിവികസനവും നൈപുണ്യപരിശീലനവും ഇതിൽ ഉൾപ്പെടും. സാങ്കേതിക വൈദഗ്ധ്യത്തിന്റെ കൈമാറ്റവും വജ്ര മൂല്യശൃംഖലയിലുടനീളമുള്ള വ്യാപാര, നിക്ഷേപബന്ധങ്ങളുടെ പ്രോത്സാഹനവും ധാരണാപത്രം ലക്ഷ്യമിടുന്നു.
ന്യൂഡൽഹി സമ്മേളനത്തിന് ഒരുക്കം; ഇന്ത്യ ആതിഥേയരാകുന്നത് മൂന്നാം തവണ
ലുവാണ്ടയിലെ ചർച്ചകൾ ന്യൂഡൽഹിയിൽ നടക്കുന്ന കിംബർലി പ്രോസസ് സമ്പൂർണ സമ്മേളനത്തിന്റെ ഒരുക്കങ്ങൾക്ക് കരുത്തേകും. നവംബർ മുപ്പത് മുതൽ ഡിസംബർ നാലുവരെ ഭാരത് മണ്ഡപത്തിലാണ് സമ്മേളനം. അതിന് മുന്നോടിയായി നവംബർ ഇരുപത്തിയൊമ്പതിന് കിംബർലി പ്രോസസ് ഫോറമായ ന്യൂഡൽഹി ഡയമണ്ട് ഡയലോഗ് നടക്കും. അനുബന്ധ പരിപാടികൾ ഡിസംബർ അഞ്ചുവരെ തുടരും. 2008ലും 2019ലും അധ്യക്ഷപദവി വഹിച്ച ഇന്ത്യ മൂന്നാം തവണയാണ് സമ്പൂർണ സമ്മേളനത്തിന് ആതിഥേയത്വം വഹിക്കുന്നത്.
ഐക്യരാഷ്ട്രസഭയുടെ പൊതുസഭ 2000ൽ അംഗീകരിച്ച 55/56 പ്രമേയത്തിന്റെ അടിസ്ഥാനത്തിലാണ് കിംബർലി പ്രോസസ് സർട്ടിഫിക്കേഷൻ പദ്ധതി രൂപീകരിച്ചത്. സംഘർഷങ്ങൾക്ക് ധനസഹായമാകുന്ന വജ്രങ്ങൾ നിയമാനുസൃതമായ മിനുക്കാത്ത വജ്രവ്യാപാരത്തിലേക്ക് കടക്കുന്നത് തടയുകയാണ് ഈ അന്താരാഷ്ട്ര സംരംഭത്തിന്റെ ലക്ഷ്യം. സർക്കാരുകൾ, വജ്രവ്യവസായം, പൗരസമൂഹം എന്നിവ ഉൾപ്പെട്ട ത്രികക്ഷി സംവിധാനത്തിലൂടെയാണ് പ്രവർത്തനം. നിലവിൽ എൺപത്തിയാറ് രാജ്യങ്ങളെ പ്രതിനിധീകരിക്കുന്ന അറുപത് പങ്കാളികളുണ്ട്. യൂറോപ്യൻ യൂണിയനും അതിലെ അംഗരാജ്യങ്ങളും ഒരൊറ്റ ഘടകമായാണ് പങ്കെടുക്കുന്നത്. പങ്കാളി രാജ്യങ്ങൾക്കിടയിൽ ഓരോ വർഷവും അധ്യക്ഷപദവി മാറും. 2026 ജനുവരി ഒന്നിനാണ് ഇന്ത്യ അധ്യക്ഷപദവി ഏറ്റെടുത്തത്.
.
