വാരാണസി  / 2026  / നവംബർ 5

കാശി തമിഴ് സംഗമത്തിന്റെ അഞ്ചാം പതിപ്പിനുള്ള ഒരുക്കങ്ങളും വിവിധ ഏജൻസികൾ തമ്മിലുള്ള ഏകോപനവും വിലയിരുത്താൻ വാരാണസിയിലെ ബനാറസ് ഹിന്ദു സർവകലാശാലയിൽ നവംബർ മൂന്നിന് ഉന്നതതല യോഗം ചേർന്നു. കേന്ദ്ര ഉന്നത വിദ്യാഭ്യാസ വകുപ്പ് സെക്രട്ടറി ദീപ്തി ഗൗർ മുഖർജി അധ്യക്ഷത വഹിച്ചു. നവംബർ 28 മുതൽ ഡിസംബർ 12 വരെ നടക്കുന്ന സംഗമത്തിന്റെ പ്രമേയം ‘തിരുക്കുറൾ പയിൽവോം തിരുക്കുറൾ അഭ്യാസ് കരേൻ’ എന്നതാണ്. പ്രാചീന തമിഴ് കൃതിയായ തിരുക്കുറളിലെ കാലാതീതമായ ധാർമിക, സദാചാര ആശയങ്ങൾ രാജ്യത്തെ യുവജനങ്ങളിലേക്കും പഠിതാക്കളിലേക്കും എത്തിക്കുകയാണ് ലക്ഷ്യം.

യാത്രാസൗകര്യങ്ങളും പരിപാടികളും ചർച്ച ചെയ്തു

ബനാറസ് ഹിന്ദു സർവകലാശാല വൈസ് ചാൻസലർ പ്രൊഫസർ അജിത് കുമാർ ചതുർവേദി, ഉത്തർപ്രദേശ് സർക്കാരിന്റെ ഉന്നത വിദ്യാഭ്യാസ വിഭാഗം അഡീഷണൽ ചീഫ് സെക്രട്ടറി അമിത് കുമാർ ഘോഷ് എന്നിവർ യോഗത്തിൽ പങ്കെടുത്തു. കേന്ദ്ര വിദ്യാഭ്യാസ മന്ത്രാലയം, സംസ്ഥാന സർക്കാർ, ജില്ലാ ഭരണകൂടം, സർവകലാശാല, ഇന്ത്യൻ റെയിൽവേ എന്നിവയിലെ മുതിർന്ന ഉദ്യോഗസ്ഥരും മറ്റ് പ്രധാന പങ്കാളികളും സന്നിഹിതരായിരുന്നു. വകുപ്പുകൾ തമ്മിലും ജില്ലാ ഭരണതലത്തിലുമുള്ള ഏകോപനം, ഐആർസിടിസി ഒരുക്കുന്ന പ്രത്യേക ട്രെയിൻ യാത്രാസൗകര്യങ്ങൾ, മറ്റ് യാത്രാ അനുബന്ധ ക്രമീകരണങ്ങൾ, അടിസ്ഥാന സൗകര്യങ്ങൾ, പ്രദർശനങ്ങൾ, സന്ദർശനയാത്രകൾ, സാംസ്കാരിക പരിപാടികൾ എന്നിവ ചർച്ച ചെയ്തു. പ്രവർത്തനസജ്ജത വിലയിരുത്താൻ മന്ത്രാലയത്തിലെ മുതിർന്ന ഉദ്യോഗസ്ഥർ നമോ ഘാട്ട് ഉൾപ്പെടെ പ്രധാന വേദികളും അനുബന്ധ വേദികളും സന്ദർശിച്ചു.

തമിഴ്നാട്ടിൽനിന്ന് ആയിരത്തിനാനൂറോളം പേർ എട്ടുദിവസത്തെ യാത്രയ്ക്ക്

പരിപാടിയുടെ ഭാഗമായി തമിഴ്നാട്ടിൽനിന്ന് ഏകദേശം ആയിരത്തിനാനൂറ് പേർ പങ്കെടുക്കും. ഇരുനൂറോളം പേർ വീതമുള്ള ഏഴ് സംഘങ്ങളായാണ് ഇവരെ തിരിക്കുക. ഓരോ സംഘത്തിന്റെയും എട്ടുദിവസത്തെ യാത്രയിൽ നാലുദിവസം യാത്രയ്ക്കും നാലുദിവസം സന്ദർശനങ്ങൾക്കും ചിട്ടപ്പെടുത്തിയ പരിപാടികൾക്കുമായിരിക്കും. വാരാണസി, പ്രയാഗ്‌രാജ്, അയോധ്യ എന്നിവിടങ്ങൾ സന്ദർശിക്കും. സാംസ്കാരിക, അക്കാദമിക, വിവിധ വിഷയമേഖലകളുമായി ബന്ധപ്പെട്ട പരിപാടികൾക്കും ആത്മീയ പരിപാടികൾക്കും യാത്രയിൽ അവസരമുണ്ടാകും. തമിഴ്നാട്ടിൽനിന്നുള്ള അമ്പത് അധ്യാപകരും ഉത്തർപ്രദേശിലെത്തും. സംഗമകാലത്ത് ഇവർ സ്കൂളുകളിലും കോളേജുകളിലും തിരുക്കുറൾ പഠിപ്പിക്കും.

ആയിരം ഉന്നത വിദ്യാഭ്യാസ സ്ഥാപനങ്ങളിൽ വിദ്യാർഥി പരിപാടി

കാശി തമിഴ് സംഗമത്തിന്റെ വെബ് പോർട്ടലും പ്രതിനിധികളുടെ രജിസ്ട്രേഷനും കേന്ദ്ര വിദ്യാഭ്യാസ മന്ത്രി പ്രഹ്ലാദ് ജോഷി ഒക്ടോബർ ഇരുപത്തിരണ്ടിന് ഉദ്ഘാടനം ചെയ്തിരുന്നു. വിവിധ വിഷയങ്ങൾ പഠിക്കുന്നവരും വ്യത്യസ്ത ഭാഷാപശ്ചാത്തലങ്ങളിലുള്ളവരുമായ വിദ്യാർഥികൾക്ക് തിരുക്കുറളിനെക്കുറിച്ച് കൂടുതൽ മനസ്സിലാക്കാൻ രാജ്യത്തെ ആയിരം ഉന്നത വിദ്യാഭ്യാസ സ്ഥാപനങ്ങളിലൂടെ ദേശീയതലത്തിൽ വിദ്യാർഥി പങ്കാളിത്ത പരിപാടിയും നടത്തും. തിരുക്കുറളിന്റെ ഉപദേശങ്ങളും മൂല്യങ്ങളും കൂടുതൽ പേരിലെത്തിക്കാൻ ചിട്ടപ്പെടുത്തിയ പഠനം, ഗവേഷണം, ക്യാമ്പസുകൾ കേന്ദ്രീകരിച്ചുള്ള പ്രവർത്തനങ്ങൾ എന്നിവ ഇതിൽ ഉൾപ്പെടും. വിശദാംശങ്ങൾ പരിപാടിയുടെ ഔദ്യോഗിക വെബ് പോർട്ടലിൽ ലഭ്യമാണ്.

ഏകോപനത്തിന് ചെന്നൈയിലെ കേന്ദ്രവും രണ്ട് വിദ്യാഭ്യാസ സ്ഥാപനങ്ങളും

ചെന്നൈയിലെ സെൻട്രൽ ഇൻസ്റ്റിറ്റ്യൂട്ട് ഓഫ് ക്ലാസിക്കൽ തമിഴാണ് ഡിജിറ്റൽ പ്രചാരണം, പ്രസിദ്ധീകരണങ്ങൾ, സ്ഥാപനങ്ങളുമായുള്ള സഹകരണം എന്നിവയ്ക്ക് നേതൃത്വം നൽകുന്നത്. തമിഴ്നാട്ടിലെ പ്രവർത്തനങ്ങളുടെ മുഖ്യ ഏകോപന സ്ഥാപനം മദ്രാസ് ഐഐടിയാണ്. കാശിയിലെ പ്രവർത്തനങ്ങൾ ബനാറസ് ഹിന്ദു സർവകലാശാല ഏകോപിപ്പിക്കും.

.