മുംബൈ  / 2026  / ഒക്ടോബർ 23  

രാസവ്യവസായത്തിലും പെട്രോകെമിക്കൽ മേഖലയിലും നിക്ഷേപവും ആഗോള സഹകരണവും ശക്തമാക്കാൻ പതിനാലാമത് ഇന്ത്യ കെം സമ്മേളനത്തിന് മുംബൈയിൽ തുടക്കമായി. കേന്ദ്ര രാസവള മന്ത്രിയും ആരോഗ്യ മന്ത്രിയുമായ ജെ. പി. നഡ്ഡ ഒക്ടോബർ 22ന് ഉദ്ഘാടനം ചെയ്തു. നെസ്‌കോയിലെ ബോംബെ എക്സിബിഷൻ സെന്ററിൽ അന്താരാഷ്ട്ര പ്രദർശനവും അദ്ദേഹം തുറന്നു. മൂന്നുദിവസത്തെ പരിപാടിയിൽ ഇരുനൂറിലധികം ഇന്ത്യൻ, വിദേശ പ്രദർശകരും എണ്ണായിരത്തിലധികം ബിസിനസ് സന്ദർശകരും പങ്കെടുക്കുന്നു. അമ്പത് പ്രമുഖ ഇന്ത്യൻ, വിദേശ കമ്പനികളുടെ മേധാവികളും പരിപാടിയുടെ ഭാഗമാണ്.

മൂന്ന് പുതിയ കെമിക്കൽ പാർക്കുകൾ; നിക്ഷേപകരെ ക്ഷണിച്ച് സംസ്ഥാനങ്ങൾ

രാസവ്യവസായത്തിന് അനുകൂലമായ സാഹചര്യമൊരുക്കുകയാണ് കേന്ദ്രസർക്കാരെന്ന് നഡ്ഡ പറഞ്ഞു. മൂന്ന് പുതിയ കെമിക്കൽ പാർക്കുകൾക്കായുള്ള ഭാരത് ഔദ്യോഗിക് വികാസ് യോജനയുടെ ഭാഗമായ ഭവ്യ രസായൻ പദ്ധതി വലിയ മാറ്റമുണ്ടാക്കുമെന്നും അദ്ദേഹം വ്യക്തമാക്കി. തുറമുഖങ്ങൾ, റെയിൽവേ, വിമാനത്താവളങ്ങൾ, റോഡുകൾ എന്നിവയുമായുള്ള ഗതാഗതബന്ധം ഉറപ്പാക്കും. ഉൽപ്പാദനത്തിന്റെ വിവിധ ഘട്ടങ്ങളെ ബന്ധിപ്പിക്കുന്ന സൗകര്യങ്ങളും പരിഗണിക്കും. വ്യാപാരനടപടികൾ എളുപ്പമാക്കുന്നതും സ്വതന്ത്ര വ്യാപാര കരാറുകൾ വിപുലീകരിക്കുന്നതും നിക്ഷേപത്തിനും വിദേശവിപണികളിലേക്കുള്ള പ്രവേശനത്തിനും അവസരമൊരുക്കുന്നുവെന്ന് പ്രധാനമന്ത്രി നരേന്ദ്ര മോദി സന്ദേശത്തിൽ പറഞ്ഞു. മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നവിസ്, മധ്യപ്രദേശ് മുഖ്യമന്ത്രി മോഹൻ യാദവ്, ഒഡിഷ മുഖ്യമന്ത്രി മോഹൻ ചരൺ മാഝി എന്നിവർ തങ്ങളുടെ സംസ്ഥാനങ്ങളിലേക്ക് നിക്ഷേപകരെ ക്ഷണിച്ചു. പദ്ധതി നടപ്പാക്കുന്നതിൽ സംസ്ഥാനങ്ങളുടെ പങ്ക് നിർണായകമാണെന്ന് കേന്ദ്ര സഹമന്ത്രി അനുപ്രിയ പട്ടേലും വ്യക്തമാക്കി.

യുവാക്കളുടെ ആശയങ്ങൾക്കും അവസരം; പങ്കാളിരാജ്യമായി ജപ്പാൻ

കേന്ദ്ര രാസവസ്തു–പെട്രോകെമിക്കൽ വകുപ്പും ഇന്ത്യൻ വാണിജ്യ വ്യവസായ ചേംബറുകളുടെ ഫെഡറേഷനായ ഫിക്കിയും ചേർന്നാണ് പരിപാടി സംഘടിപ്പിക്കുന്നത്. ആഗോള രാസവ്യവസായ കേന്ദ്രമായി വളരുന്ന ഇന്ത്യയുടെ സാധ്യതകളാണ് പ്രമേയം. ജപ്പാനാണ് പങ്കാളിരാജ്യം. ഏഴ് ഇന്ത്യൻ സംസ്ഥാനങ്ങളും പങ്കാളികളാണ്. വിദ്യാർഥികൾക്കും യുവ സംരംഭകർക്കും വ്യവസായത്തിലെ പ്രശ്നങ്ങൾക്ക് ഗവേഷണാധിഷ്ഠിത പരിഹാരങ്ങൾ നിർദേശിക്കാൻ യുവ നവീകരണ മത്സരവും ഇത്തവണയുണ്ട്. ഇന്ത്യൻ രാസവ്യവസായത്തിന്റെ മൂല്യം 2030ഓടെ 30,000 കോടി അമേരിക്കൻ ഡോളറിലേക്കും 2040ഓടെ ഒരു ലക്ഷം കോടി അമേരിക്കൻ ഡോളറിലേക്കും എത്തുമെന്നാണ് വിലയിരുത്തൽ. ആഭ്യന്തര ആവശ്യകതയും കയറ്റുമതി സാധ്യതകളും സർക്കാർ നടപടികളും ഈ വളർച്ചയ്ക്ക് പിന്തുണയാകുമെന്നാണ് പ്രതീക്ഷ.

.