ഭുവനേശ്വർ  / 2026  / ഒക്ടോബർ 23 

ഇന്ത്യൻ നഗരങ്ങളിലെ യാത്രാസൗകര്യവും ജീവിതനിലവാരവും മെച്ചപ്പെടുത്താനുള്ള പദ്ധതികൾ ചർച്ച ചെയ്യാൻ ഭുവനേശ്വറിൽ രണ്ട് ദേശീയ സമ്മേളനങ്ങൾ. കേന്ദ്ര ഭവന–നഗരകാര്യ മന്ത്രാലയം ഒഡിഷ സർക്കാരിന്റെ പിന്തുണയോടെ സംഘടിപ്പിക്കുന്ന പത്തൊൻപതാമത് അർബൻ മൊബിലിറ്റി ഇന്ത്യ സമ്മേളനവും പ്രദർശനവും ഒക്ടോബർ 23, 24 തീയതികളിൽ നടക്കും. രണ്ടാമത് ദേശീയ നഗര സംഗമം ഒക്ടോബർ 24, 25 തീയതികളിലാണ്. ഭുവനേശ്വറിലെ ഹോട്ടൽ മേഫെയർ സാങ്ച്വറിയാണ് രണ്ടു പരിപാടികൾക്കും വേദി. നയരൂപകർത്താക്കളും നഗരവികസന വിദഗ്ധരും ഭരണാധികാരികളും വിവിധ മേഖലകളിലെ പ്രതിനിധികളും പങ്കെടുക്കും. നഗരഗതാഗതം, അടിസ്ഥാനസൗകര്യങ്ങൾ, നഗരഭരണം, സേവനവിതരണം എന്നിവയിലെ വെല്ലുവിളികൾക്ക് പ്രായോഗിക പരിഹാരങ്ങൾ കണ്ടെത്തുകയാണ് ലക്ഷ്യം.

നഗരങ്ങളുടെ വളർച്ചയ്ക്ക് പുതിയ വഴികൾ തേടി ദേശീയ സംഗമം

ഒക്ടോബർ 22ന് ഭുവനേശ്വറിൽ നടന്ന മുന്നൊരുക്ക വാർത്താസമ്മേളനത്തിൽ കേന്ദ്ര ഭവന–നഗരകാര്യ മന്ത്രാലയം അഡീഷണൽ സെക്രട്ടറി സതീന്ദർ പാൽ സിങ് ദേശീയ നഗര സംഗമത്തിന്റെ വിശദാംശങ്ങൾ അറിയിച്ചു. മന്ത്രാലയം ജോയിന്റ് സെക്രട്ടറി പ്രവീർ കുമാർ അർബൻ മൊബിലിറ്റി ഇന്ത്യ സമ്മേളനത്തെക്കുറിച്ച് വിശദീകരിച്ചു. ഒഡിഷ സർക്കാർ അഡീഷണൽ ചീഫ് സെക്രട്ടറി ഉഷ പാധി സംസ്ഥാനത്തിന്റെ സഹകരണം വിശദീകരിച്ചു. മന്ത്രാലയം ഡയറക്ടർ യോഗേഷ് ആന്റിലും പങ്കെടുത്തു.

ദേശീയ നഗര സംഗമം കേന്ദ്ര ഭവന–നഗരകാര്യ സഹമന്ത്രി തോഖൻ സാഹു ഉദ്ഘാടനം ചെയ്യും. ഒഡിഷ മുഖ്യമന്ത്രി മോഹൻ ചരൺ മാജി ചടങ്ങിൽ പങ്കെടുക്കും. നീതി ആയോഗ് ചീഫ് എക്സിക്യൂട്ടീവ് ഓഫീസർ അനുരാഗ് ജെയിൻ, അംഗം രാജീവ് ഗൗബ എന്നിവർ മുഖ്യാതിഥികളാകും.

ഒഡിഷ സർക്കാരിന്റെയും ഹഡ്കോയുടെയും എൻബിസിസിയുടെയും പിന്തുണയോടെയാണ് സംഗമം സംഘടിപ്പിക്കുന്നത്. നാഷണൽ ഇൻസ്റ്റിറ്റ്യൂട്ട് ഓഫ് അർബൻ അഫയേഴ്സ് വിജ്ഞാന പങ്കാളിയാണ്. ഹഡ്കോയും എൻബിസിസിയുമാണ് പ്രധാന പ്രായോജകർ.

‘നഗരങ്ങളുടെ മുന്നേറ്റം: നഗര സംവിധാനങ്ങളും പരിഹാരങ്ങളും സേവനവിതരണവും പുനർവിചിന്തനം ചെയ്യുക’ എന്നതാണ് ഇത്തവണത്തെ പ്രമേയം. നഗരങ്ങളുടെ പ്രവർത്തനം മെച്ചപ്പെടുത്താൻ ഭരണസംവിധാനങ്ങളും സ്ഥാപനങ്ങളും പദ്ധതികൾ നടപ്പാക്കുന്ന സംവിധാനങ്ങളും എങ്ങനെ ശക്തിപ്പെടുത്താമെന്ന് ചർച്ച ചെയ്യും. നയരൂപകർത്താക്കൾ, നഗരഭരണ ഉദ്യോഗസ്ഥർ, സാങ്കേതിക വിദഗ്ധർ, വ്യവസായ പ്രതിനിധികൾ, മറ്റു ബന്ധപ്പെട്ട വിഭാഗങ്ങൾ എന്നിവർക്ക് പുതിയ നഗരപ്രശ്നങ്ങൾ ചർച്ച ചെയ്യാനും പ്രായോഗിക പരിഹാരങ്ങൾ കണ്ടെത്താനുമുള്ള വേദിയാണിതെന്ന് സതീന്ദർ പാൽ സിങ് പറഞ്ഞു.

ഇന്ത്യയിലെ നഗരവികസനത്തിന്റെ ഭാവി ചർച്ച ചെയ്യാനുള്ള വാർഷിക വേദിയായാണ് ദേശീയ നഗര സംഗമം ആരംഭിച്ചത്. ആദ്യ സംഗമം 2025 നവംബറിൽ ന്യൂഡൽഹിയിൽ നടന്നു. നഗരവികസനത്തിലെ പ്രധാന മേഖലകളെക്കുറിച്ച് വിവിധ വിഭാഗങ്ങൾ അന്ന് ചർച്ച നടത്തിയിരുന്നു.

നടക്കാനുള്ള അവകാശം മുതൽ നഗരസഭകളുടെ അധികാരം വരെ ഏഴ് വിഷയങ്ങൾ

ദേശീയ നഗര സംഗമത്തിൽ ഏഴ് പ്രധാന വിഷയങ്ങളിലാണ് ചർച്ച നടക്കുക. ‘നടക്കാനുള്ള അവകാശം’ എന്ന വിഷയത്തിൽ നഗരവീഥികൾ കൂടുതൽ സുരക്ഷിതവും എല്ലാവർക്കും ഉപയോഗിക്കാവുന്നതുമാക്കാനുള്ള വഴികൾ പരിശോധിക്കും. ഇടമുറിയാത്ത നടപ്പാതകൾ, സുരക്ഷിത സ്കൂൾ പരിസരങ്ങൾ, മെച്ചപ്പെട്ട റോഡ് മുറിച്ചുകടക്കൽ സൗകര്യങ്ങൾ, യാത്രയുടെ അവസാനഘട്ടത്തിലെ ഗതാഗതബന്ധം എന്നിവയ്ക്ക് പ്രാധാന്യം നൽകും.

‘ജലം, മാലിന്യം, വിഭവങ്ങളുടെ കാര്യക്ഷമമായ ഉപയോഗം’ എന്ന ചർച്ചയിൽ അടിസ്ഥാനസൗകര്യങ്ങൾ നിർമിക്കുന്നതിനപ്പുറം സേവനങ്ങളുടെ കാര്യക്ഷമത കൂട്ടുന്നതിനാണ് ഊന്നൽ. ജലനഷ്ടം കുറയ്ക്കുക, ശുദ്ധീകരിച്ച വെള്ളം വീണ്ടും ഉപയോഗിക്കുക, മാലിന്യത്തിൽനിന്ന് മൂല്യമുള്ള വസ്തുക്കൾ വീണ്ടെടുക്കുക എന്നിവ പരിശോധിക്കും.

‘താങ്ങാനാകുന്ന ചെലവിൽ പാർപ്പിടം’ എന്ന വിഷയത്തിൽ വാടകവീടുകളുടെ വർധിച്ചുവരുന്ന ആവശ്യകത ചർച്ച ചെയ്യും. അനുമതിനടപടികൾ ലളിതമാക്കൽ, ഭൂമിയും ധനസഹായവും ലഭിക്കുന്നത് എളുപ്പമാക്കൽ, ചെലവുകുറഞ്ഞതും കാലാവസ്ഥാ വെല്ലുവിളികളെ ചെറുക്കുന്നതുമായ നിർമാണ സാങ്കേതികവിദ്യകൾ കൂടുതൽ ഉപയോഗിക്കൽ എന്നിവയും പരിഗണിക്കും.

‘സംയോജിത നഗരവികസനവും അടിസ്ഥാനസൗകര്യ പദ്ധതികളുടെ നടത്തിപ്പും’ എന്ന ചർച്ചയിൽ വിവിധ ഏജൻസികളുടെ ഏകോപനം പരിശോധിക്കും. ജലം, വൈദ്യുതി തുടങ്ങിയ സേവനങ്ങൾക്കായുള്ള സംയോജിത ആസൂത്രണവും ഭൂവിവര സംവിധാനത്തെ അടിസ്ഥാനമാക്കിയുള്ള പ്രവർത്തനവും ആവർത്തിച്ചുള്ള പ്രവൃത്തികൾ കുറയ്ക്കാനും പദ്ധതികളുടെ ആസൂത്രണവും നടത്തിപ്പും മെച്ചപ്പെടുത്താനും എങ്ങനെ സഹായിക്കുമെന്നാണ് വിലയിരുത്തുക.

‘നഗരസേവന വിതരണത്തിലെ പുതിയ സമീപനങ്ങൾ’ എന്ന വിഷയത്തിൽ നഗരസഭകളുടെ സേവനം മെച്ചപ്പെടുത്താനുള്ള മാർഗങ്ങൾ ചർച്ച ചെയ്യും. സ്ഥാപനങ്ങളുടെ ചുമതലകൾ വ്യക്തമാക്കൽ, സാമ്പത്തികശേഷി വർധിപ്പിക്കൽ, സാധനങ്ങളും സേവനങ്ങളും വാങ്ങുന്ന നടപടികളിലെ പരിഷ്കാരം, സാങ്കേതികശേഷി വികസനം, സ്വകാര്യ മേഖലയുമായുള്ള പങ്കാളിത്തം എന്നിവ ഇതിൽ ഉൾപ്പെടും.

‘മാതൃകാ കെട്ടിട നിർമാണ ഉപനിയമങ്ങൾ’ എന്ന ചർച്ചയിൽ നിലവിലെ നിയന്ത്രണങ്ങൾ പരിഷ്കരിക്കാനുള്ള സാധ്യത പരിശോധിക്കും. കെട്ടിടാനുമതി ലളിതമാക്കൽ, സുരക്ഷയും എല്ലാവർക്കുമുള്ള പ്രവേശനസൗകര്യവും ഉറപ്പാക്കൽ, കാലാവസ്ഥാ പ്രതിരോധശേഷിക്കും പുതിയ നിർമാണ സാങ്കേതികവിദ്യകൾക്കും അനുയോജ്യമായ മാറ്റങ്ങൾ വരുത്തൽ എന്നിവയാണ് ലക്ഷ്യം.

‘മാതൃകാ നഗരസഭാ നിയമം’ എന്ന വിഷയത്തിൽ നഗരസഭകളുടെ സ്വയംഭരണം ശക്തിപ്പെടുത്താനുള്ള നിയമപരിഷ്കാരങ്ങൾ ചർച്ച ചെയ്യും. ജനപ്രതിനിധികളുടെയും നിർവഹണ ഉദ്യോഗസ്ഥരുടെയും അധികാരങ്ങൾ വ്യക്തമാക്കുക, സ്ഥാപനങ്ങളുടെ പ്രവർത്തനശേഷിയും ഉത്തരവാദിത്വവും വർധിപ്പിക്കുക എന്നിവയും പരിഗണിക്കും.

സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും നഗരവികസന മന്ത്രിമാരുടെ യോഗവും സംഗമത്തിന്റെ ഭാഗമാകും. മുൻ ദേശീയ, മേഖലാതല മന്ത്രിതല യോഗങ്ങളിൽ ചർച്ച ചെയ്ത വിഷയങ്ങളിലെ പുരോഗതി വിലയിരുത്തും. തുടർനടപടിയും ഏകോപനവും ആവശ്യമായ മുൻഗണനകൾ കണ്ടെത്തുകയും ചെയ്യും.

ഡിജിറ്റൽ കാലത്തെ നഗരയാത്ര; ഗതാഗത സമ്മേളനത്തിൽ 1,500 പ്രതിനിധികൾ

‘ഡിജിറ്റൽ കാലത്ത് നഗരങ്ങളിലെ യാത്രാസൗകര്യവും ജീവിക്കാൻ അനുയോജ്യമായ സാഹചര്യങ്ങളും’ എന്നതാണ് പത്തൊൻപതാമത് അർബൻ മൊബിലിറ്റി ഇന്ത്യ സമ്മേളനത്തിന്റെ പ്രമേയം. ഒഡിഷ സർക്കാരിന്റെ പിന്തുണയോടെ ഇൻസ്റ്റിറ്റ്യൂട്ട് ഓഫ് അർബൻ ട്രാൻസ്പോർട്ട് ഇന്ത്യ വഴിയാണ് കേന്ദ്ര മന്ത്രാലയം സമ്മേളനം സംഘടിപ്പിക്കുന്നത്.

പുതിയ ഡിജിറ്റൽ സാങ്കേതികവിദ്യകളിലൂടെ നഗരങ്ങളിലെ യാത്രാസൗകര്യം, സംയോജിത ഗതാഗത അടിസ്ഥാനസൗകര്യങ്ങൾ, നഗരജീവിതത്തിന്റെ നിലവാരം എന്നിവ മെച്ചപ്പെടുത്തുന്നതിലാണ് ശ്രദ്ധയെന്ന് പ്രവീർ കുമാർ അറിയിച്ചു. സുസ്ഥിരവും കാർബൺ പുറന്തള്ളൽ കുറഞ്ഞതുമായ പൊതുഗതാഗതം, വിവിധ യാത്രാമാർഗങ്ങളുടെ ഏകോപനം, യാത്രയുടെ ആദ്യഘട്ടത്തിലെയും അവസാനഘട്ടത്തിലെയും ഗതാഗതബന്ധം എന്നിവ ചർച്ച ചെയ്യും.

നഗരയാത്ര മെച്ചപ്പെടുത്തുന്നതിൽ സാങ്കേതികവിദ്യയുടെ പങ്കും പരിശോധിക്കും. വിവിധ യാത്രാസേവനങ്ങൾ ഒരുമിച്ച് ലഭ്യമാക്കുന്ന ‘മൊബിലിറ്റി ആസ് എ സർവീസ്’, തത്സമയ ജിപിഎസ് അധിഷ്ഠിത സംവിധാനങ്ങൾ എന്നിവ തടസ്സമില്ലാത്തതും കാര്യക്ഷമവുമായ യാത്രയ്ക്ക് എങ്ങനെ സഹായിക്കുമെന്നതും ചർച്ചയാകും.

ദേശീയ, അന്തർദേശീയ പ്രഭാഷകർ ഉൾപ്പെടെ ഏകദേശം 1,500 പ്രതിനിധികളെ പ്രതീക്ഷിക്കുന്നു. കേന്ദ്ര സഹമന്ത്രി തോഖൻ സാഹു സമ്മേളനം ഉദ്ഘാടനം ചെയ്യും. ഒഡിഷ ഭവന–നഗരവികസന മന്ത്രി ഡോ. കൃഷ്ണ ചന്ദ്ര മഹാപാത്രയും മറ്റു വിശിഷ്ടാതിഥികളും പങ്കെടുക്കും.

ദേശീയ, അന്തർദേശീയ വിദഗ്ധർ, നയരൂപകർത്താക്കൾ, കേന്ദ്ര–സംസ്ഥാന സർക്കാരുകളിലെ മുതിർന്ന ഉദ്യോഗസ്ഥർ, മെട്രോ റെയിൽ കമ്പനികളുടെ മാനേജിങ് ഡയറക്ടർമാർ, ഗതാഗത സ്ഥാപനങ്ങളുടെ ചീഫ് എക്സിക്യൂട്ടീവുമാർ എന്നിവർ സമ്മേളനത്തിലുണ്ടാകും. സാങ്കേതികവിദ്യയും സേവനങ്ങളും നൽകുന്ന സ്ഥാപനങ്ങൾ, വിവിധ മേഖലകളിലെ പ്രൊഫഷണലുകൾ, അധ്യാപകർ എന്നിവരും പങ്കെടുക്കും.

സമ്മേളനത്തോടനുബന്ധിച്ചുള്ള പ്രദർശനത്തിൽ ഇന്ത്യയിലെയും വിദേശത്തെയും മികച്ച നഗരഗതാഗത മാതൃകകൾ അവതരിപ്പിക്കും. പുതിയ ഗതാഗത സാങ്കേതികവിദ്യകൾ, സേവനങ്ങൾ, അനുബന്ധ മേഖലകളിലെ സംവിധാനങ്ങൾ എന്നിവയും പ്രദർശിപ്പിക്കും. ആദ്യദിവസം തോഖൻ സാഹു പ്രദർശനം ഉദ്ഘാടനം ചെയ്യും. ഡോ. കൃഷ്ണ ചന്ദ്ര മഹാപാത്രയും മറ്റു വിശിഷ്ടാതിഥികളും പങ്കെടുക്കും. രണ്ടുദിവസം നീളുന്ന പ്രദർശനത്തിൽ ഒഡിഷ സർക്കാർ, മെട്രോ റെയിൽ കമ്പനികൾ, പൊതുമേഖല, സ്വകാര്യ മേഖല എന്നിവിടങ്ങളിൽനിന്നായി 28 പ്രദർശകർ പങ്കെടുക്കും.

യുവ ഗവേഷകർക്കും ഡോക്ടറൽ വിദ്യാർഥികൾക്കും ഗവേഷണഫലങ്ങൾ അവതരിപ്പിക്കാൻ നാലു സെഷനുകളിലായി ഗവേഷണ സംഗമവും നടക്കും. വിദഗ്ധസംഘം തിരഞ്ഞെടുത്ത 46 ഗവേഷണ പ്രബന്ധങ്ങളിൽ 20 എണ്ണം നേരിട്ടുള്ള അവതരണമായും ശേഷിക്കുന്ന 26 എണ്ണം പോസ്റ്റർ അവതരണമായും അവതരിപ്പിക്കും. വിധികർത്താക്കൾ തിരഞ്ഞെടുക്കുന്ന മികച്ച മൂന്ന് പ്രബന്ധങ്ങൾക്ക് 25,000 രൂപയുടെ പാരിതോഷികം നൽകും. എല്ലാ അവതാരകർക്കും സർട്ടിഫിക്കറ്റുകളും ലഭിക്കും.

2006ലെ ദേശീയ നഗരഗതാഗത നയത്തിന്റെ ഭാഗമായി കേന്ദ്ര ഭവന–നഗരകാര്യ മന്ത്രാലയം വർഷംതോറും നടത്തുന്ന പരിപാടിയാണിത്. സംസ്ഥാന, നഗരതലങ്ങളിലെ പ്രവർത്തനശേഷി വർധിപ്പിക്കുന്നതിനും എല്ലാവർക്കും തുല്യമായി പ്രയോജനപ്പെടുന്ന സുസ്ഥിര നഗരഗതാഗത സംവിധാനങ്ങൾ പ്രോത്സാഹിപ്പിക്കുന്നതിനുമാണ് നയം ഊന്നൽ നൽകുന്നത്. ഇന്ത്യയിലെയും ലോകത്തിന്റെ വിവിധ ഭാഗങ്ങളിലെയും അറിവും അനുഭവങ്ങളും മികച്ച മാതൃകകളും പങ്കിടാൻ സമ്മേളനം സഹായിക്കുന്നു.

വൈദ്യുത ബസുകളും നഗരാസൂത്രണ പദ്ധതികളും അവതരിപ്പിക്കാൻ ഒഡിഷ

സുസ്ഥിര നഗരവികസനം, മെച്ചപ്പെട്ട നഗരഗതാഗതം, കാര്യക്ഷമമായ നഗരസേവന വിതരണം എന്നിവയിൽ സംസ്ഥാന സർക്കാരിന്റെ പ്രതിബദ്ധത ഉഷ പാധി വ്യക്തമാക്കി. രണ്ട് ദേശീയ പരിപാടികൾക്കും ഭുവനേശ്വർ ആതിഥേയത്വം വഹിക്കുന്നത് നഗരപരിവർത്തനവുമായി ബന്ധപ്പെട്ട ദേശീയ ചർച്ചകളിൽ ഒഡിഷയുടെ വർധിച്ചുവരുന്ന പങ്കാളിത്തമാണ് കാണിക്കുന്നതെന്ന് അവർ പറഞ്ഞു.

നഗര അടിസ്ഥാനസൗകര്യങ്ങൾ ശക്തിപ്പെടുത്തൽ, സാങ്കേതികവിദ്യയുടെ സഹായത്തോടെയുള്ള ഗതാഗത പരിഹാരങ്ങൾ, യാത്രാസൗകര്യവും ജീവിതനിലവാരവും മെച്ചപ്പെടുത്തൽ എന്നിവയിലാണ് സംസ്ഥാനത്തിന്റെ ശ്രദ്ധ. എല്ലാവരെയും ഉൾക്കൊള്ളുന്ന, സുസ്ഥിരവും ഭാവിയിലെ ആവശ്യങ്ങൾ നേരിടാൻ സജ്ജവുമായ നഗരങ്ങൾക്കായി വിവിധ വിഭാഗങ്ങളുടെ സഹകരണം ഉറപ്പാക്കുമെന്നും അവർ അറിയിച്ചു.

പരിപാടികൾക്കിടെ ഒഡിഷയിൽ പിഎം ഇ–ബസ് സേവ ആരംഭിക്കാൻ പദ്ധതിയുണ്ട്. മലിനീകരണം കുറഞ്ഞ പൊതുഗതാഗതവും മെച്ചപ്പെട്ട നഗരയാത്രാ ബന്ധവും മുന്നോട്ടുകൊണ്ടുപോകാനാണ് ശ്രമം. അങ്കുർ കൈപ്പുസ്തകം, ഒഡിഷ നഗരാസൂത്രണ കൈപ്പുസ്തകങ്ങൾ, സർക്കാർ–സ്വകാര്യ ഉടമസ്ഥതയിലുള്ള പൊതുഇടങ്ങൾ സംബന്ധിച്ച സംസ്ഥാനനയം എന്നിവയും പുറത്തിറക്കും. നഗരഭരണ ശേഷി വികസനം, ആസൂത്രിത വളർച്ച, എല്ലാവർക്കും ഉപയോഗിക്കാവുന്ന പൊതുഇടങ്ങൾ എന്നിവയിലെ സംസ്ഥാനത്തിന്റെ പ്രവർത്തനങ്ങളാണ് ഇവ അവതരിപ്പിക്കുന്നത്.

ക്രൂട്ടിന്റെ പ്രത്യേക പവിലിയനിൽ ഒഡിഷയുടെ പൊതുഗതാഗത യാത്ര പ്രദർശിപ്പിക്കും. അമ ബസ്, വൈദ്യുത വാഹന ഗതാഗതം, പ്രധാന യാത്രാമാർഗങ്ങളിലേക്ക് ബന്ധിപ്പിക്കുന്ന അനുബന്ധ സർവീസുകൾ, സ്ത്രീകളുടെ പങ്കാളിത്തം എന്നിവ ഇതിലുണ്ടാകും. സാങ്കേതികവിദ്യയുടെ സഹായത്തോടെ യാത്രക്കാരുടെ സൗകര്യവും സുരക്ഷയും മെച്ചപ്പെടുത്തുന്ന സംവിധാനങ്ങളും അവതരിപ്പിക്കും.

പ്രശസ്ത മണൽശിൽപി സുദർശൻ പട്നായിക്കിന്റെ പ്രത്യേക മണൽശിൽപവും ഒരുക്കും. ഒഡിഷയുടെ സാംസ്കാരിക പൈതൃകത്തെ സുസ്ഥിരവും എല്ലാവരെയും ഉൾക്കൊള്ളുന്നതുമായ ഗതാഗതവുമായി ബന്ധിപ്പിക്കുന്നതാണ് ശിൽപം. കാൽനടക്കാർ, സൈക്കിൾ യാത്രക്കാർ, എല്ലാവർക്കും ഉപയോഗിക്കാവുന്ന തെരുവുകൾ എന്നിവയ്ക്ക് ഇതിൽ പ്രാധാന്യം നൽകും.

നഗരക്കാഴ്ചകൾക്കൊപ്പം വനിതാസംരംഭങ്ങളും കൈത്തറിയും കൊരാപുട്ട് കാപ്പിയും

പ്രതിനിധികളെ സ്വീകരിക്കാൻ ഭുവനേശ്വർ മുനിസിപ്പൽ കോർപ്പറേഷൻ നഗരശുചീകരണം, ശുചിത്വ പ്രവർത്തനങ്ങൾ, സൗന്ദര്യവത്കരണം, പൊതുഇടങ്ങളുടെ നവീകരണം എന്നിവ നടത്തുകയാണ്. മാലിന്യസംസ്കരണവും വിഭവങ്ങളുടെ വീണ്ടെടുപ്പും നേരിട്ടറിയാനുള്ള സന്ദർശനങ്ങൾ ഒരുക്കും. അഭയകേന്ദ്രങ്ങളും പുനരധിവാസവും, എല്ലാവരെയും ഉൾക്കൊള്ളുന്ന അയൽപ്പക്ക വികസനം, നഗരത്തിലെ ഹരിതമേഖലകൾ, പൗരസേവനങ്ങൾ എന്നിവയിലെ പദ്ധതികളും പരിചയപ്പെടുത്തും.

ഭുവനേശ്വർ വികസന അതോറിറ്റി പ്രദർശനങ്ങളും പഠനസന്ദർശനങ്ങളും ഒരുക്കി പിന്തുണ നൽകും. ആസൂത്രിത നഗരവികസനം, പാർപ്പിടം, നഗരാസൂത്രണ പദ്ധതികൾ, പൊതുഗതാഗത അടിസ്ഥാനസൗകര്യങ്ങൾ, പാർക്കുകൾ, നവീകരിച്ച പൊതുഇടങ്ങൾ എന്നിവ അവതരിപ്പിക്കും.

പ്രത്യേക ഏകാമ്ര പൈതൃകനടത്തവും സൈക്കിൾ യാത്രയും സംഘടിപ്പിക്കും. ഭുവനേശ്വറിന്റെ പൈതൃകവും പൊതുഇടങ്ങളും അനുഭവിച്ചറിയാൻ പ്രതിനിധികൾക്ക് അവസരം ലഭിക്കും. നടത്തം, സൈക്കിൾ യാത്ര, മോട്ടോർ വാഹനങ്ങളെ ആശ്രയിക്കാത്ത യാത്രാരീതികൾ എന്നിവ പ്രോത്സാഹിപ്പിക്കുകയാണ് ലക്ഷ്യം.

ബസുകളുടെ നവീകരണം, മേഖലാതല ഗതാഗത ആസൂത്രണം, നഗരസേവന വിതരണം എന്നിവയിലെ അനുഭവങ്ങൾ ഒഡിഷ പങ്കിടും. ദേശീയതലത്തിലെ ചർച്ചകളെ പ്രാദേശിക നടപ്പാക്കലുമായും ജനങ്ങളുടെ ആവശ്യങ്ങളുമായും ബന്ധിപ്പിക്കാനാണ് ശ്രമം.

മിഷൻ ശക്തിയുടെ പങ്കാളിത്തത്തിലൂടെ വനിതാ സ്വയംസഹായ സംഘങ്ങളുടെ ഉൽപ്പന്നങ്ങൾ പ്രദർശിപ്പിക്കും. സ്ത്രീകളുടെ സംരംഭകത്വവും സമൂഹത്തിന്റെ നേതൃത്വത്തിലുള്ള ഉപജീവന പ്രവർത്തനങ്ങളും ഇതിലൂടെ പരിചയപ്പെടുത്തും. ഉത്കലിക ഒഡിഷയുടെ സമ്പന്നമായ കരകൗശല പാരമ്പര്യവും കരകൗശല തൊഴിലാളികളുടെ കഴിവുകളും അവതരിപ്പിക്കും. ബോയനിക സംസ്ഥാനത്തിന്റെ കൈത്തറി പാരമ്പര്യവും നെയ്ത്തുകാരുടെ നൈപുണ്യവും വൈവിധ്യമാർന്ന വസ്ത്രപാരമ്പര്യങ്ങളും പ്രദർശിപ്പിക്കും. കൊരാപുട്ട് കോഫി സംസ്ഥാനത്തിന്റെ സവിശേഷ കാപ്പി പ്രതിനിധികൾക്ക് പരിചയപ്പെടുത്തും. കൊരാപുട്ട് മേഖലയിലെ ഉൽപ്പാദനവും അതുമായി ബന്ധപ്പെട്ട ഉപജീവനമാർഗങ്ങളും ഇതിലൂടെ അവതരിപ്പിക്കും.

ആശയങ്ങളും അനുഭവങ്ങളും പങ്കിടാനും നിലവിലെ നഗരപ്രശ്നങ്ങൾക്ക് പരിഹാരങ്ങൾ ചർച്ച ചെയ്യാനും രണ്ട് പരിപാടികളും പൊതുവേദിയാകും. സുസ്ഥിര നഗരഗതാഗതം, മെച്ചപ്പെട്ട യാത്രാസൗകര്യം, ഫലപ്രദമായ നഗരഭരണം, കാര്യക്ഷമമായ നഗരസേവന വിതരണം എന്നിവയിലാണ് ചർച്ചകൾ കേന്ദ്രീകരിക്കുക.