ന്യൂഡൽഹി  / 2026  / ഒക്ടോബർ 19 

ഭൗമശാസ്ത്ര മേഖലയിൽ ഡോക്ടറൽ ഗവേഷണം വിപുലപ്പെടുത്താൻ കേന്ദ്ര ഭൗമശാസ്ത്ര മന്ത്രാലയവും അക്കാദമി ഓഫ് സയന്റിഫിക് ആൻഡ് ഇന്നൊവേറ്റീവ് റിസർച്ചും കൈകോർത്തു. ഒക്ടോബർ 13ന് ന്യൂഡൽഹിയിലെ പൃഥ്വി ഭവനിൽ നടന്ന ചടങ്ങിലാണ് സഹകരണം ഔദ്യോഗികമായി പ്രഖ്യാപിച്ചത്. മന്ത്രാലയത്തിന് കീഴിലെ പത്ത് ഗവേഷണ സ്ഥാപനങ്ങൾക്കും അക്കാദമിയുടെ അനുബന്ധ ഗവേഷണ സ്ഥാപനങ്ങളായി അംഗീകാരം ലഭിച്ചു.

വിദ്യാർഥികൾക്കും യുവശാസ്ത്രജ്ഞർക്കും കൂടുതൽ ഗവേഷണ അവസരങ്ങൾ ഒരുക്കുകയാണ് ലക്ഷ്യം. മന്ത്രാലയത്തിന്റെ ഗവേഷണ സൗകര്യങ്ങളും ശാസ്ത്രജ്ഞരുടെ വൈദഗ്ധ്യവും അക്കാദമിയുടെ പഠനസംവിധാനവുമായി കൂട്ടിയിണക്കും. മന്ത്രാലയത്തെ പ്രതിനിധീകരിച്ച് മിഷൻ മൗസത്തിന്റെ ഡയറക്ടറും ശാസ്ത്രജ്ഞനുമായ ഡോ. പ്രവീൺ കുമാർ ഡിയും അക്കാദമി ഡയറക്ടർ പ്രൊഫ. മനോജ് കുമാർ ധറുമാണ് ധാരണാപത്രത്തിൽ ഒപ്പുവച്ചത്.

ഓഗസ്റ്റ് 21ന് ഒപ്പുവച്ച ധാരണാപത്രത്തിന്റെ ഔദ്യോഗിക പ്രഖ്യാപനവും രേഖാകൈമാറ്റവുമാണ് ഒക്ടോബർ 13ന് നടന്നത്. ഭൗമശാസ്ത്ര മന്ത്രാലയ സെക്രട്ടറി ഡോ. ശ്രീനിവാസ കുമാർ തുമ്മലയും ഇരുസ്ഥാപനങ്ങളിലെയും മുതിർന്ന ഉദ്യോഗസ്ഥരും ചടങ്ങിൽ പങ്കെടുത്തു. വിവിധ ശാസ്ത്രശാഖകളെ ബന്ധിപ്പിക്കുന്ന ഗവേഷണത്തിനും ദേശീയ ലബോറട്ടറികളിലെ സൗകര്യങ്ങൾ പങ്കിടുന്നതിനും സഹകരണം വഴിയൊരുക്കും.

ഗവേഷണം മന്ത്രാലയ സ്ഥാപനങ്ങളിൽ; ബിരുദം അക്കാദമി നൽകും

അക്കാദമിയുടെ ഡോക്ടറൽ പഠനത്തിന് തിരഞ്ഞെടുക്കപ്പെടുന്ന വിദ്യാർഥികൾ മന്ത്രാലയത്തിന്റെ ഗവേഷണ സ്ഥാപനങ്ങളിലാകും ഗവേഷണം നടത്തുക. അക്കാദമിയുടെ അധ്യാപകരായി അംഗീകാരം ലഭിച്ച മന്ത്രാലയ ശാസ്ത്രജ്ഞർ മേൽനോട്ടം വഹിക്കും. ഡോക്ടറൽ ബിരുദം നൽകുന്നത് അക്കാദമിയായിരിക്കും. ഗവേഷണം നടത്തിയ സ്ഥാപനത്തിന്റെ പേരും ബിരുദ സർട്ടിഫിക്കറ്റിൽ രേഖപ്പെടുത്തും.

പത്ത് സ്ഥാപനങ്ങളും അക്കാദമിയുടെ ഏറ്റവും പുതിയ ഡോക്ടറൽ പ്രവേശന നടപടികളിൽ പങ്കെടുക്കുന്നുണ്ട്. പഠനപ്രവർത്തനങ്ങൾ ഏകോപിപ്പിക്കാൻ ഓരോ സ്ഥാപനത്തിലും കോഓർഡിനേറ്റർമാരെ നിയമിച്ചു. മന്ത്രാലയതലത്തിൽ കേന്ദ്ര കോഓർഡിനേറ്ററെയും നിയോഗിച്ചിട്ടുണ്ട്.

കാലാവസ്ഥ മുതൽ ആഴക്കടൽ വരെ ഗവേഷണ അവസരങ്ങൾ

കാലാവസ്ഥാ പ്രവചനം, കാലാവസ്ഥാ സേവനങ്ങൾ, ധ്രുവപ്രദേശങ്ങളും ഹിമമണ്ഡലവും, സമുദ്രനിരീക്ഷണം തുടങ്ങിയ മേഖലകളിൽ ഗവേഷണത്തിന് അവസരമുണ്ടാകും. സമുദ്ര റോബോട്ടിക്സ്, ആഴക്കടൽ ഖനനം, കടൽവെള്ളത്തിൽനിന്ന് ഉപ്പ് നീക്കൽ, ഭൂകമ്പപഠനം, ഭൂകമ്പസാധ്യതാ വിലയിരുത്തൽ എന്നിവയും ഇതിൽ ഉൾപ്പെടുന്നു.

തീരദേശ പ്രക്രിയകൾ, സമുദ്രജീവ വിഭവങ്ങൾ, ഭൗമശാസ്ത്രത്തിലെ നിർമിതബുദ്ധി പ്രയോഗങ്ങൾ എന്നിവയിലും ഗവേഷണം നടത്താം. ഗവേഷണത്തിലൂടെ രൂപപ്പെടുന്ന ബൗദ്ധികസ്വത്തിൽ വിദ്യാർഥിക്ക് കണ്ടുപിടിത്തക്കാരനെന്ന അംഗീകാരം ഉറപ്പാക്കും. സംയുക്ത ബൗദ്ധികസ്വത്ത് പരസ്പരം പങ്കിടാനും ധാരണയുണ്ട്.