ന്യൂഡൽഹി  / 2026 /  ഒക്ടോബർ 15 

ഇന്ത്യയും ബ്രൂണൈ ദാറുസ്സലാമും തമ്മിലുള്ള വ്യാപാരവും സാമ്പത്തിക സഹകരണവും വിലയിരുത്താൻ മൂന്നാമത് സംയുക്ത വ്യാപാര സമിതി യോഗം ചേർന്നു. ഇരുരാജ്യങ്ങളും തമ്മിലുള്ള വാണിജ്യബന്ധം കൂടുതൽ ശക്തമാക്കാനുള്ള വഴികളും യോഗം പരിശോധിച്ചു. ഇന്ത്യയുടെ വാണിജ്യ വ്യവസായ മന്ത്രാലയത്തിലെ വാണിജ്യവകുപ്പ് ജോയിന്റ് സെക്രട്ടറി അമിത് വർമയും ബ്രൂണൈയുടെ സാമ്പത്തിക, വ്യാപാര, വ്യവസായ മന്ത്രാലയത്തിലെ സാമ്പത്തിക, വ്യാപാരകാര്യ പെർമനന്റ് സെക്രട്ടറി ഡോ. മെയ് ഫഈസ അഹമ്മദ് അരിഫിനും യോഗത്തിൽ സംയുക്തമായി അധ്യക്ഷത വഹിച്ചു. ഇരുരാജ്യങ്ങളിലെയും ബന്ധപ്പെട്ട മന്ത്രാലയങ്ങൾ, വകുപ്പുകൾ, സംഘടനകൾ എന്നിവയുടെ പ്രതിനിധികളും ചർച്ചയിൽ പങ്കെടുത്തു.

കാർഷിക ഉൽപ്പന്നങ്ങളുടെ കയറ്റുമതിക്ക് കൂടുതൽ അവസരം

ഇരുരാജ്യങ്ങളും തമ്മിലുള്ള വ്യാപാരം വർധിപ്പിക്കുക, വിപണി പ്രവേശനവുമായി ബന്ധപ്പെട്ട മുൻഗണനാ വിഷയങ്ങൾ പരിഹരിക്കുക എന്നിവയ്ക്കാണ് ചർച്ചയിൽ പ്രാധാന്യം നൽകിയത്. ഇരുരാജ്യങ്ങളിലെയും വ്യവസായ സ്ഥാപനങ്ങൾ തമ്മിലുള്ള ആശയവിനിമയവും ഇടപാടുകളും സുഗമമാക്കാനുള്ള സ്ഥാപനതല സംവിധാനങ്ങളും പരിശോധിച്ചു. ഇന്ത്യയിൽനിന്ന് ബ്രൂണൈയിലേക്ക് കാർഷിക ഉൽപ്പന്നങ്ങളുടെയും മൃഗജന്യ ഉൽപ്പന്നങ്ങളുടെയും കയറ്റുമതി സുഗമമാക്കുന്നതും ചർച്ചയായി. ഭക്ഷ്യസുരക്ഷയ്ക്ക് പിന്തുണ നൽകാനും വ്യാപാരത്തിൽ കൂടുതൽ വൈവിധ്യം കൊണ്ടുവരാനുമാണ് ഇതിലൂടെ ലക്ഷ്യമിടുന്നത്.

ഔഷധം, ആരോഗ്യം, ഊർജം മേഖലകളിൽ സഹകരണം

ഔഷധം, ആരോഗ്യപരിരക്ഷ, ഊർജം എന്നിവ കൂടുതൽ സഹകരിക്കാവുന്ന പ്രധാന മേഖലകളായി ഇരുപക്ഷവും കണ്ടെത്തി. ഔഷധ, ആരോഗ്യപരിരക്ഷാ മേഖലകളിൽ ബന്ധം വിപുലീകരിക്കാനുള്ള സാധ്യത കണക്കിലെടുത്ത് നിയന്ത്രണ സംവിധാനങ്ങൾ തമ്മിലുള്ള സഹകരണം, സംഭരണം, ആരോഗ്യസേവനങ്ങൾ എന്നിവയിലെ അവസരങ്ങൾ പരിശോധിച്ചു. വ്യവസായ വളർച്ച തുടർച്ചയായി മുന്നോട്ടുകൊണ്ടുപോകാൻ പരമ്പരാഗത ഊർജമേഖലയിലും പുതുതായി വളർന്നുവരുന്ന ഊർജമേഖലകളിലും പങ്കാളിത്തം ശക്തമാക്കുന്നതും ചർച്ച ചെയ്തു.

വിനോദസഞ്ചാരവും വ്യാപാരമേളകളും ബന്ധം ശക്തമാക്കും

ജനങ്ങൾ തമ്മിലുള്ള ബന്ധവും വാണിജ്യരംഗത്തെ ഇടപെടലുകളും ശക്തമാക്കേണ്ടതിന്റെ പ്രാധാന്യം ഇരുരാജ്യങ്ങളും ചൂണ്ടിക്കാട്ടി. വിനോദസഞ്ചാരത്തിലെ സഹകരണവും വ്യാപാരമേളകളിലും പ്രദർശനങ്ങളിലുമുള്ള പങ്കാളിത്തവും ഇതിന് സഹായിക്കും. പ്രത്യേക ലക്ഷ്യങ്ങളോടെയുള്ള വ്യാപാര പ്രോത്സാഹന പരിപാടികളും ഇരുരാജ്യങ്ങളിലേക്കുമുള്ള വ്യാപാര പ്രതിനിധിസംഘങ്ങളുടെ സന്ദർശനങ്ങളും നടത്തുന്നതിന്റെ സാധ്യതയും വിലയിരുത്തി. ഉൽപ്പാദനം, അടിസ്ഥാനസൗകര്യം, സേവനങ്ങൾ എന്നീ മേഖലകളിലെ നിക്ഷേപ അവസരങ്ങൾ കണ്ടെത്താൻ ഇത്തരം നടപടികൾ സഹായിക്കുമെന്ന് ഇരുപക്ഷവും അഭിപ്രായപ്പെട്ടു.

തുടർനടപടികൾ നിരീക്ഷിക്കും; അടുത്ത യോഗം ബ്രൂണൈയിൽ

യോഗത്തിൽ ചർച്ച ചെയ്ത വ്യാപാര, നിക്ഷേപ ലക്ഷ്യങ്ങൾ മുന്നോട്ടുകൊണ്ടുപോകാനുള്ള പ്രതിബദ്ധത ഇരുരാജ്യങ്ങളും ആവർത്തിച്ചു. തുടർനടപടികൾ നിരീക്ഷിക്കാൻ ബന്ധപ്പെട്ട ഏകോപന ഏജൻസികളും പ്രവർത്തകസംഘങ്ങളും തമ്മിൽ പതിവായി ആശയവിനിമയം നടത്തും. ഇന്ത്യ–ബ്രൂണൈ ദാറുസ്സലാം സംയുക്ത വ്യാപാര സമിതിയുടെ അടുത്ത യോഗം ബ്രൂണൈ ദാറുസ്സലാമിൽ നടക്കും.

.