ന്യൂഡൽഹി  /2026  /ഒക്ടോബർ 15 

ആഗോള ടെലികോം സാങ്കേതികവിദ്യാ വികസനത്തിലും നിലവാരനിർണയത്തിലും ഇന്ത്യയുടെ പങ്ക് കൂടുതൽ ശക്തമാക്കാനുള്ള പ്രതിബദ്ധത ആവർത്തിച്ച് ടെലികമ്മ്യൂണിക്കേഷൻ എൻജിനീയറിങ് സെന്റർ. ഒക്ടോബർ 14ന് ന്യൂഡൽഹിയിലെ ടി.ഇ.സി. മാനക് ഹാളിൽ നടന്ന ലോക നിലവാര ദിനാചരണത്തിലാണ് ഇക്കാര്യം വ്യക്തമാക്കിയത്. കേന്ദ്ര വാർത്താവിനിമയ മന്ത്രാലയത്തിലെ ടെലികമ്മ്യൂണിക്കേഷൻ വകുപ്പിന് കീഴിലുള്ള ദേശീയ നിലവാരനിർണയ സ്ഥാപനമായ ടി.ഇ.സി.യുടെ എല്ലാ മുതിർന്ന ഉദ്യോഗസ്ഥരും പരിപാടിയിൽ പങ്കെടുത്തു.

ആഭ്യന്തര സാങ്കേതികവിദ്യയ്ക്ക് കരുത്ത്

ടെലികോം മേഖലയിലെ മാനദണ്ഡങ്ങൾ തയ്യാറാക്കുന്നതിലും ആഭ്യന്തര സാങ്കേതിക സ്വാശ്രയത്വം വളർത്തുന്നതിലും ടി.ഇ.സി. വഹിക്കുന്ന പങ്ക് പരിപാടിയിൽ എടുത്തുപറഞ്ഞു. അന്താരാഷ്ട്ര ടെലികമ്മ്യൂണിക്കേഷൻ യൂണിയന്റെ നിലവാരനിർണയ വിഭാഗമായ ഐ.ടി.യു.-ടി. ഉൾപ്പെടെയുള്ള അന്താരാഷ്ട്ര സ്ഥാപനങ്ങളിലെ സജീവ പങ്കാളിത്തവും ചർച്ചയായി. ഇന്ത്യയിലെ ടെലികോം ഉപകരണങ്ങൾക്കും സേവനങ്ങൾക്കും ശൃംഖലകൾക്കും ആവശ്യമായ മാനദണ്ഡങ്ങൾ വികസിപ്പിക്കുന്ന ദേശീയ സ്ഥാപനമായാണ് ടി.ഇ.സി. പ്രവർത്തിക്കുന്നത്.

വിവിധ മേഖലകളിലായി 596 മാനദണ്ഡങ്ങൾ

മാനദണ്ഡങ്ങൾ വിജ്ഞാപനം ചെയ്യുന്നതിനും മാനദണ്ഡങ്ങളുമായുള്ള പൊരുത്തം വിലയിരുത്തുന്നതിനും സർട്ടിഫിക്കേഷൻ നൽകുന്നതിനുമുള്ള 2025ലെ ടെലികമ്മ്യൂണിക്കേഷൻ ചട്ടങ്ങളുടെ അടിസ്ഥാനത്തിലാണ് ടി.ഇ.സി.യുടെ പ്രവർത്തനം. മാനദണ്ഡങ്ങൾ രൂപപ്പെടുത്തുക, അവ പാലിക്കുന്നുണ്ടെന്ന് പരിശോധിക്കുന്ന സ്ഥാപനങ്ങൾക്ക് അംഗീകാരം നൽകുക, സർട്ടിഫിക്കറ്റുകൾ നൽകുക എന്നിവയാണ് ചുമതലകൾ. വിവിധ സാങ്കേതിക മേഖലകളിലായി 596 മാനദണ്ഡങ്ങൾ പുറത്തിറക്കിയിട്ടുണ്ട്. അവശ്യ ആവശ്യകതകൾ, പൊതുവായ ആവശ്യകതകൾ, പരിശോധനാ മാർഗനിർദേശങ്ങൾ, ടി.ഇ.സി.യുടെ മാനദണ്ഡ രേഖകൾ എന്നിവ ഇതിൽ ഉൾപ്പെടുന്നു. ഇതുവരെ 82 പരിശോധനാ സ്ഥാപനങ്ങളെ നിയോഗിക്കുകയും 5,400ലധികം സർട്ടിഫിക്കറ്റുകൾ നൽകുകയും ചെയ്തിട്ടുണ്ട്.

ആഗോള വേദികളിൽ ഇന്ത്യൻ ഉദ്യോഗസ്ഥരുടെ നേതൃത്വം

ഐ.ടി.യു.-ടി.യുടെ വിവിധ പഠനസംഘങ്ങളിൽ പ്രധാന നേതൃത്വചുമതലകൾ വഹിച്ച് ഇന്ത്യയെ പ്രതിനിധീകരിക്കുന്ന ടി.ഇ.സി. ഉദ്യോഗസ്ഥരുടെ പ്രവർത്തനത്തെ സ്ഥാപനത്തിന്റെ സീനിയർ ഡെപ്യൂട്ടി ഡയറക്ടർ ജനറലും മേധാവിയുമായ സയ്യിദ് തൗസീഫ് അബ്ബാസ് അഭിനന്ദിച്ചു. ആഗോള നിലവാരനിർണയത്തിൽ ഇന്ത്യയുടെ സംഭാവന ഉറപ്പാക്കാൻ ഉദ്യോഗസ്ഥർ നടത്തുന്ന നിരന്തര പരിശ്രമവും അദ്ദേഹം എടുത്തുപറഞ്ഞു.

ഉപഭോക്തൃ താൽപര്യവും ശൃംഖലാ സുരക്ഷയും

ടി.ഇ.സി. തയ്യാറാക്കുന്ന ശക്തമായ ദേശീയ മാനദണ്ഡങ്ങൾ ഉപഭോക്താക്കളുടെ താൽപര്യം സംരക്ഷിക്കുന്നതായി പരിപാടിയിൽ വ്യക്തമാക്കി. ശൃംഖലാ സുരക്ഷ, വ്യത്യസ്ത സംവിധാനങ്ങൾ പരസ്പരം ചേർന്ന് പ്രവർത്തിക്കാനുള്ള ശേഷി, സേവനനിലവാരം എന്നിവയും ഇവ ഉറപ്പാക്കുന്നു. ഇന്ത്യയുടെ ഡിജിറ്റൽ സംവിധാനങ്ങളെ ആഗോള നിലവാരവുമായി പൊരുത്തപ്പെടുത്താനും ഈ മാനദണ്ഡങ്ങൾ സഹായിക്കുന്നതായി ചൂണ്ടിക്കാട്ടി.

.