തിരുവനന്തപുരം /  2026 / സെപ്റ്റംബർ 27 

തിരുവനന്തപുരം ശ്രീ ഉത്രാടം തിരുനാൾ അക്കാദമി ഓഫ് മെഡിക്കൽ സയൻസസിന്റെ പതിനഞ്ചാം ബിരുദദാനച്ചടങ്ങിൽ ഉപരാഷ്ട്രപതി സി. പി. രാധാകൃഷ്ണൻ മുഖ്യാതിഥിയായി പങ്കെടുത്തു. പുതിയ ഡോക്ടർമാർ ശാസ്ത്രീയ മികവിനൊപ്പം രോഗികളോടുള്ള കരുതലും പുലർത്തണമെന്ന് അദ്ദേഹം പറഞ്ഞു. സ്ഥാപനത്തിലെ റോബോട്ടിക് ശസ്ത്രക്രിയാ സംവിധാനവും കമ്പ്യൂട്ടറിന്റെ സഹായത്തോടെയുള്ള രോഗനിർണയ സംവിധാനവും ഉദ്ഘാടനം ചെയ്ത പശ്ചാത്തലത്തിലായിരുന്നു സാങ്കേതികവിദ്യയുടെ ഉപയോഗത്തെക്കുറിച്ചുള്ള അദ്ദേഹത്തിന്റെ പരാമർശം.

സാങ്കേതികവിദ്യയ്ക്കൊപ്പം രോഗിയെ കേൾക്കാനും കഴിയണം

കേരളത്തിലെ ആരോഗ്യരംഗത്തും മെഡിക്കൽ വിദ്യാഭ്യാസരംഗത്തും അക്കാദമിക്ക് പ്രധാന സ്ഥാനമുണ്ടെന്ന് ഉപരാഷ്ട്രപതി പറഞ്ഞു. നൽകുന്ന വിദ്യാഭ്യാസം, പരിശീലിപ്പിച്ചെടുക്കുന്ന ഡോക്ടർമാർ, നടത്തുന്ന ഗവേഷണം, സേവനം ലഭിക്കുന്ന രോഗികൾ എന്നിവയിലാണ് ഒരു മെഡിക്കൽ സ്ഥാപനത്തിന്റെ യഥാർഥ കരുത്തെന്നും അദ്ദേഹം വ്യക്തമാക്കി.

നിർമിതബുദ്ധി, റോബോട്ടിക്സ്, ഡിജിറ്റൽ ആരോഗ്യസംവിധാനങ്ങൾ, മെച്ചപ്പെട്ട രോഗചിത്രീകരണ സാങ്കേതികവിദ്യ, വ്യക്തിയുടെ പ്രത്യേകതകൾ കണക്കിലെടുത്തുള്ള ചികിത്സ എന്നിവ ആരോഗ്യരംഗത്തെ മാറ്റുകയാണ്. ഈ മാറ്റത്തിനൊപ്പം മെഡിക്കൽ വിദ്യാഭ്യാസവും ചികിത്സയും മുന്നോട്ടുപോകേണ്ടതിന്റെ പ്രാധാന്യമാണ് പുതിയ സംവിധാനങ്ങൾ കാണിക്കുന്നതെന്ന് അദ്ദേഹം പറഞ്ഞു. യന്ത്രത്തിന് വിവരങ്ങൾ വിശകലനം ചെയ്യാം. റോബോട്ടിന് സഹായിക്കാം. കമ്പ്യൂട്ടർ സംവിധാനത്തിന് വിവരങ്ങളിലെ മാതൃകകൾ കണ്ടെത്താം. പക്ഷേ രോഗിയെ കേൾക്കാനും മനസ്സിലാക്കാനും ആശ്വസിപ്പിക്കാനും ഉത്തരവാദിത്വം ഏറ്റെടുക്കാനും ഡോക്ടർ തന്നെ വേണമെന്നും അദ്ദേഹം ഓർമിപ്പിച്ചു.

വെള്ളക്കോട്ടിനോടുള്ള വിശ്വാസം കാത്തുസൂക്ഷിക്കണം

രോഗനിർണയത്തിൽ കൃത്യതയും സംസാരത്തിൽ സത്യസന്ധതയും ചികിത്സയിൽ കരുണയും ഓരോ തീരുമാനത്തിലും ധാർമികതയും വേണമെന്ന് ബിരുദധാരികളോട് ഉപരാഷ്ട്രപതി ആവശ്യപ്പെട്ടു. ശാസ്ത്രീയ മികവും മനുഷ്യസ്നേഹവും ഒരുമിച്ച് കൊണ്ടുപോകണം. അറിവ് മനസ്സിലും കരുണ ഹൃദയത്തിലും സത്യനിഷ്ഠ പെരുമാറ്റത്തിലും ഉണ്ടാകണമെന്ന മൂന്ന് മാർഗനിർദേശങ്ങളും അദ്ദേഹം നൽകി.

ആത്മവിശ്വാസത്തോടൊപ്പം വിനയവും ലക്ഷ്യബോധത്തോടൊപ്പം ധാർമികതയും വേണം. സാങ്കേതികവിദ്യയിൽ മുന്നേറുമ്പോഴും കരുണ കൈവിടരുത്. വിജയിച്ചാലും സമൂഹവുമായുള്ള ബന്ധം നിലനിർത്തണം. ലഹരിമരുന്നുകളോട് എപ്പോഴും ‘വേണ്ട’ എന്നു പറയണമെന്നും യുവ ഡോക്ടർമാരോട് അദ്ദേഹം ആവശ്യപ്പെട്ടു.

ഉന്നതവിദ്യാഭ്യാസം വികസിത ഇന്ത്യയുടെ അടിത്തറ

പ്രധാനമന്ത്രി നരേന്ദ്ര മോദി മുന്നോട്ടുവച്ച 2047ലെ വികസിത ഇന്ത്യ എന്ന ലക്ഷ്യത്തിലേക്ക് രാജ്യം ആത്മവിശ്വാസത്തോടെ നീങ്ങുകയാണെന്ന് ഉപരാഷ്ട്രപതി പറഞ്ഞു. എല്ലാ സംസ്ഥാനങ്ങളും ജില്ലകളും ഗ്രാമങ്ങളും വികസിച്ചാൽ മാത്രമേ ആ ലക്ഷ്യം കൈവരിക്കാനാകൂ എന്നാണ് പ്രധാനമന്ത്രി വ്യക്തമാക്കിയിട്ടുള്ളത്. ഉന്നതവിദ്യാഭ്യാസത്തിനുള്ള അവസരം ഈ കാഴ്ചപ്പാടിന്റെ കേന്ദ്രത്തിലാണെന്നും അദ്ദേഹം പറഞ്ഞു.

കഴിഞ്ഞ പന്ത്രണ്ട് വർഷത്തെ മെഡിക്കൽ വിദ്യാഭ്യാസവ്യാപനം ചൂണ്ടിക്കാട്ടി, മുമ്പ് ന്യൂഡൽഹിയിൽ ഒരു എയിംസ് മാത്രമായിരുന്നിടത്ത് പുതുതായി പന്ത്രണ്ട് എയിംസുകൾ സ്ഥാപിച്ചതായി ഉപരാഷ്ട്രപതി പറഞ്ഞു.

ബിരുദം നേടുന്നവരിൽ കൂടുതൽ സ്ത്രീകൾ

രാജ്യത്തിന്റെ വിവിധ ഭാഗങ്ങളിലെ ബിരുദദാനച്ചടങ്ങുകളിൽ പുരുഷന്മാരേക്കാൾ കൂടുതൽ സ്ത്രീകൾ ബിരുദങ്ങളും മെഡലുകളും നേടുന്ന പ്രവണത കണ്ടിട്ടുണ്ടെന്ന് അദ്ദേഹം പറഞ്ഞു. ഈ ചടങ്ങിൽ ബിരുദം നേടുന്നത് 60 സ്ത്രീകളും 32 പുരുഷന്മാരുമാണ്. ബിരുദാനന്തര ബിരുദം നേടുന്ന ഡോക്ടർമാരിൽ അഞ്ച് സ്ത്രീകളും രണ്ട് പുരുഷന്മാരുമുണ്ട്. ഇതിനെ സ്വാഗതാർഹമായ മാറ്റമെന്ന് അദ്ദേഹം വിശേഷിപ്പിച്ചു.

മറ്റൊരാളുടെ ജീവിതത്തിൽ നല്ല മാറ്റമുണ്ടാക്കാനുള്ള അവസരമാണ് ഡോക്ടറാകുന്നതിന്റെ ഏറ്റവും വലിയ ഭാഗ്യമെന്ന് പറഞ്ഞുകൊണ്ടാണ് അദ്ദേഹം പ്രസംഗം അവസാനിപ്പിച്ചത്. ബിരുദധാരികൾക്ക് വിജയകരവും അർഥപൂർണവുമായ തൊഴിൽജീവിതം ആശംസിച്ചു. മെഡിക്കൽ വിദ്യാഭ്യാസം, ചികിത്സ, ഗവേഷണം, നൂതന ആശയങ്ങൾ എന്നീ മേഖലകളിലെ മികവിന്റെ കേന്ദ്രമായി അക്കാദമി വളരട്ടെയെന്നും അദ്ദേഹം ആശംസിച്ചു.

ചടങ്ങിൽ തമിഴ്നാടിന്റെയും കേരളത്തിന്റെയും ഗവർണർ രാജേന്ദ്ര വിശ്വനാഥ് ആർലേക്കർ, കേരള സർക്കാരിലെ തൊഴിൽ, മൃഗസംരക്ഷണം, വനിതാ ശിശുവികസന മന്ത്രി ബിന്ദു കൃഷ്ണ, അക്കാദമി ചെയർമാൻ ഡോ. എ. സി. ഷൺമുഖം, കേരള ആരോഗ്യശാസ്ത്ര സർവകലാശാല വൈസ് ചാൻസലർ ഡോ. മോഹനൻ കുന്നുമ്മൽ എന്നിവർ പങ്കെടുത്തു. അധ്യാപകരും ജീവനക്കാരും ബിരുദധാരികളും അവരുടെ കുടുംബാംഗങ്ങളും ചടങ്ങിലുണ്ടായിരുന്നു.