ന്യൂഡൽഹി / 2026 / നവംബർ 12
ഇന്ത്യയിലേക്കെത്തുന്ന വിദേശികൾക്കുള്ള വീസ സംവിധാനം കേന്ദ്ര സർക്കാർ ലളിതമാക്കി. പ്രധാനമന്ത്രി നരേന്ദ്ര മോദിയുടെ നേതൃത്വത്തിലും കേന്ദ്ര ആഭ്യന്തര, സഹകരണ മന്ത്രി അമിത് ഷായുടെ മാർഗനിർദേശത്തിലുമാണ് പരിഷ്‌കാരം. പ്രധാന വീസ വിഭാഗങ്ങൾ 13ൽ നിന്ന് ഒൻപതായും ഉപവിഭാഗങ്ങൾ 49ൽ നിന്ന് 23 ആയും ആഭ്യന്തര മന്ത്രാലയം കുറച്ചു. 2026 ഓഗസ്റ്റ് 27നാണ് ഈ മാറ്റം വരുത്തിയത്. വിനോദസഞ്ചാരം, ചികിത്സ, പഠനം, വ്യാപാരം തുടങ്ങിയ ആവശ്യങ്ങൾക്കായി ഇന്ത്യയിലെത്തുന്നവർക്ക് അനുയോജ്യമായ വീസ എളുപ്പത്തിൽ തിരഞ്ഞെടുക്കാൻ സഹായിക്കുകയാണ് ലക്ഷ്യം. നവംബർ 11ന് വൈകിട്ട് 7.39ന് ഡൽഹിയിൽ പുറത്തിറക്കിയ അറിയിപ്പിലാണ് കേന്ദ്ര സർക്കാർ വിശദാംശങ്ങൾ പങ്കുവെച്ചത്.
2025 ഒക്ടോബറിലും വീസ വിഭാഗങ്ങൾ വെട്ടിക്കുറച്ചിരുന്നു. അന്ന് പ്രധാന വിഭാഗങ്ങൾ 22ൽ നിന്ന് 13 ആയും ഉപവിഭാഗങ്ങൾ 63ൽ നിന്ന് 49 ആയും കുറച്ചു. പുതിയ പരിഷ്‌കാരത്തിന് മുന്നോടിയായി വികസിത രാജ്യങ്ങളിലെ വീസ സംവിധാനങ്ങളും ആഗോള മാനദണ്ഡങ്ങളും സർക്കാർ പഠിച്ചു. സമാന യാത്രാ ആവശ്യങ്ങൾ ഒരേ വിഭാഗത്തിൽ ഉൾപ്പെടുത്തി ആശയക്കുഴപ്പം കുറയ്ക്കാനാണ് ശ്രമം. നിലവിൽ ഇലക്ട്രോണിക് യാത്രാനുമതി വഴി 13 ഉപവിഭാഗങ്ങളിലാണ് ഇ വീസ നൽകുന്നത്. 172 രാജ്യങ്ങളിലെ പൗരന്മാർക്ക് ഈ സൗകര്യം ലഭ്യമാണ്.
ടൂറിസ്റ്റ് വീസ ഇനി വിസിറ്റർ വീസ; ഹ്രസ്വസന്ദർശനങ്ങൾക്ക് കൂടുതൽ അവസരം
ടൂറിസ്റ്റ് വീസയുടെ പേര് വിസിറ്റർ വീസ എന്നാക്കി. സാധാരണ വിനോദസഞ്ചാരത്തിനപ്പുറമുള്ള സന്ദർശന ആവശ്യങ്ങളും ഇതിൽ ഉൾപ്പെടുത്തി. യാത്രയുടെ സ്വഭാവവും കാലാവധിയും അനുസരിച്ച് തിരഞ്ഞെടുക്കാൻ വി ഒന്ന്, വി രണ്ട് എന്നിങ്ങനെ രണ്ട് ഉപവിഭാഗങ്ങളുണ്ട്. മറ്റ് അനുവദനീയ സന്ദർശന ആവശ്യങ്ങൾക്കൊപ്പം ബിസിനസ് കൂടിക്കാഴ്ചകൾ, ഡോക്ടറുടെ ഉപദേശം തേടൽ, ആരോഗ്യപരിപാലന പരിപാടികൾ, ഹ്രസ്വകാല ചികിത്സ എന്നിവ വി ഒന്ന് വീസയിൽ ഉൾപ്പെടും. ഇന്ത്യൻ ഭാഷകൾ, സംഗീതം, കല, കരകൗശലം എന്നിവയിലെ ഹ്രസ്വകാല കോഴ്‌സുകൾക്കും ഇത് ഉപയോഗിക്കാം. 30 ദിവസമാണ് കാലാവധി. ഈ കാലയളവിൽ ഒന്നിലധികം തവണ രാജ്യത്ത് പ്രവേശിക്കാം.
കൂടുതൽ കാലത്തേക്കുള്ള സന്ദർശനങ്ങൾക്കാണ് വി രണ്ട് വീസ. നിശ്ചയിച്ച വ്യവസ്ഥകൾക്കനുസരിച്ച് ഒന്ന്, അഞ്ച്, പത്ത് വർഷത്തെ കാലാവധിയിൽ ഇത് ലഭിക്കും. വി ഒന്നിൽ അനുവദിച്ച പ്രവർത്തനങ്ങൾക്കൊപ്പം പർവതാരോഹണവും ഇതിൽ ഉൾപ്പെടും. പർവതാരോഹണത്തിന് ആറുമാസത്തേക്കുള്ള, ഒന്നിലധികം പ്രവേശനം അനുവദിക്കുന്ന വീസയാണ് നൽകുക. വിനോദയാത്രയ്‌ക്കൊപ്പം ബിസിനസ് കൂടിക്കാഴ്ചകൾ, ചികിത്സാ ഉപദേശങ്ങൾ, ആരോഗ്യപരിപാലന പരിപാടികൾ, സാംസ്‌കാരിക പഠനം, ഹ്രസ്വകാല യോഗ പരിപാടികൾ എന്നിവയിൽ പങ്കെടുക്കുന്നവർക്ക് പുതിയ ക്രമീകരണം സഹായകരമാകുമെന്ന് സർക്കാർ പറയുന്നു. ആവർത്തിച്ച് ഇന്ത്യ സന്ദർശിക്കുന്ന അർഹരായ യാത്രക്കാർക്ക് ദീർഘകാല വി രണ്ട് വീസ സൗകര്യമൊരുക്കും.
ചികിത്സയ്ക്ക് ഒരുവർഷത്തെ വീസ; വിദ്യാർഥികൾക്ക് പഠനകാലത്തിനൊത്ത അനുമതി
മെഡിക്കൽ വീസയിൽ ആയുഷ് ചികിത്സയ്ക്കും മറ്റ് ചികിത്സാരീതികൾക്കും പ്രത്യേക വ്യവസ്ഥകൾ തുടരും. ആയുഷ് ഒഴികെയുള്ള ചികിത്സകൾക്ക് എം ഒന്ന് വീസയും ആയുഷ് ചികിത്സയ്ക്ക് എം മൂന്ന് വീസയുമാണ് നൽകുക. ഇവയുടെ ഇ വീസ ഉൾപ്പെടെയുള്ളവ സാധാരണയായി ഒരുവർഷത്തേക്ക്, ഒന്നിലധികം പ്രവേശന സൗകര്യത്തോടെ അനുവദിക്കും. എം ഒന്ന് വീസയുള്ള രോഗിയുടെ സഹായിക്ക് എം രണ്ട് വീസയും എം മൂന്ന് വീസയുള്ള രോഗിയുടെ സഹായിക്ക് എം നാല് വീസയും ലഭിക്കും. പലതവണ ഡോക്ടറെ കാണേണ്ടവർക്കും തുടർപരിശോധനകൾക്കും ഘട്ടംഘട്ടമായ ചികിത്സയ്ക്കും ഇത് സഹായകരമാകുമെന്ന് സർക്കാർ അറിയിച്ചു. ചികിത്സയ്ക്കിടെ ആവർത്തിച്ച് വീസയ്ക്ക് അപേക്ഷിക്കേണ്ട സാഹചര്യം കുറയും. ആയുഷ് ചികിത്സയ്ക്കുള്ള പ്രത്യേക വിഭാഗം അനുയോജ്യമായ വീസ കണ്ടെത്താനും സഹായിക്കും. രോഗിക്കൊപ്പം സഹായിയെ കൊണ്ടുവരാനും സൗകര്യമുണ്ടാകും. പ്രധാനമന്ത്രിയുടെ ‘ഹീൽ ഇൻ ഇന്ത്യ’ കാഴ്ചപ്പാടിനനുസരിച്ച് ഇന്ത്യയിലേക്കുള്ള ചികിത്സാ യാത്രകൾ പ്രോത്സാഹിപ്പിക്കുകയാണ് ലക്ഷ്യം.
സ്റ്റുഡന്റ് വീസ എസ് ഒന്ന്, എസ് രണ്ട് എന്നിങ്ങനെ രണ്ട് പ്രധാന ഉപവിഭാഗങ്ങളാക്കി. സ്‌കൂൾ, ബിരുദ, ബിരുദാനന്തര പഠനങ്ങൾ എസ് ഒന്നിൽ ഉൾപ്പെടും. ഇന്ത്യൻ സർവകലാശാലകളിലെ ഗവേഷണബിരുദ വിദ്യാർഥികൾ, ഗവേഷകർ, സന്ദർശക അധ്യാപകർ, ഗവേഷണത്തിനായി ഇന്ത്യയിലെത്തുന്ന വിദേശ വിദ്യാർഥികൾ എന്നിവർക്കാണ് എസ് രണ്ട്. ശാസ്ത്രീയ, നരവംശശാസ്ത്ര പര്യവേക്ഷണങ്ങൾ, പരിശീലനം, വിദ്യാർഥി കൈമാറ്റം തുടങ്ങിയ നിർദിഷ്ട അക്കാദമിക പ്രവർത്തനങ്ങളും ഇതിൽ ഉൾപ്പെടും. ‘സ്റ്റഡി ഇൻ ഇന്ത്യ’ പോർട്ടൽ വഴി ഇന്ത്യൻ വിദ്യാഭ്യാസ സ്ഥാപനങ്ങളിൽ പ്രവേശനം നേടിയ വിദേശ വിദ്യാർഥികൾക്ക് ഇ എസ് ഒന്ന് വീസ അനുവദിക്കാം. അഞ്ചുവർഷമോ കോഴ്‌സിന്റെ കാലാവധിയോ, ഏതാണോ കുറവ്, അത്രകാലത്തേക്കാണ് അനുമതി. ഒന്നിലധികം പ്രവേശനവും ലഭിക്കും. പഠനപദ്ധതി മുൻകൂട്ടി തയ്യാറാക്കാനും നടപടിക്രമങ്ങൾ മൂലമുള്ള തടസ്സങ്ങൾ കുറയ്ക്കാനും പഠനത്തിനിടെയുള്ള യാത്രകൾ എളുപ്പമാക്കാനും ഇത് സഹായിക്കുമെന്നാണ് സർക്കാർ വിശദീകരണം.
നിക്ഷേപത്തിനും സാങ്കേതിക വിദഗ്ധർക്കും വ്യക്തമായ വീസ വ്യവസ്ഥകൾ
ബിസിനസ് വീസ ബി ഒന്ന്, ബി രണ്ട് എന്നീ ഉപവിഭാഗങ്ങളാക്കി. ഇന്ത്യയിൽ വ്യവസായമോ വ്യാപാര സംരംഭമോ തുടങ്ങുന്നതുൾപ്പെടെയുള്ള ദീർഘകാല, ലൈസൻസ് അടിസ്ഥാനത്തിലുള്ള പ്രവർത്തനങ്ങൾക്കാണ് ബി ഒന്ന്. ഹ്രസ്വകാല, കരാർ അടിസ്ഥാനത്തിലുള്ള ബിസിനസ് പ്രവർത്തനങ്ങൾക്കാണ് ബി രണ്ട്. ഉൽപ്പാദന നിക്ഷേപവുമായി ബന്ധപ്പെട്ട ബിസിനസ്, സമ്മേളനങ്ങൾ, കായികമത്സരങ്ങൾ, കലാപ്രകടനങ്ങൾ, സിനിമ എന്നിവ ഇതിൽ ഉൾപ്പെടും. ദീർഘകാല നിക്ഷേപത്തിനും ഹ്രസ്വകാല കരാർ ജോലികൾക്കും അനുയോജ്യമായ വീസ തിരിച്ചറിയാൻ ഈ വേർതിരിവ് സഹായിക്കുമെന്ന് സർക്കാർ പറയുന്നു.
ഇന്ത്യൻ കമ്പനികൾ നിയോഗിക്കുന്ന വിദേശ വിഷയവിദഗ്ധർ, എൻജിനീയർമാർ, സാങ്കേതിക ജീവനക്കാർ എന്നിവർക്കും പ്രത്യേക വ്യവസ്ഥയുണ്ട്. ഉപകരണങ്ങൾ സ്ഥാപിച്ച് പ്രവർത്തനസജ്ജമാക്കൽ, ഗുണനിലവാര പരിശോധന, അനിവാര്യ അറ്റകുറ്റപ്പണി, ഉൽപ്പാദനം, വിവരസാങ്കേതിക സംവിധാനങ്ങളും സ്ഥാപനവിഭവ ആസൂത്രണ സംവിധാനങ്ങളും വിപുലപ്പെടുത്തൽ എന്നിവ ഇതിൽപ്പെടും. പരിശീലനം, വിതരണശൃംഖല വികസനം, പ്ലാന്റ് രൂപകൽപ്പനയും പ്രവർത്തനസജ്ജമാക്കലും, ഉന്നതതല മാനേജ്‌മെന്റ്, സാങ്കേതിക പിന്തുണ എന്നിവയ്ക്കും അനുമതിയുണ്ട്. സാങ്കേതിക പരിജ്ഞാനം, സാങ്കേതികവിദ്യ, സേവനങ്ങൾ എന്നിവ കൈമാറുന്നതും ഉൾപ്പെടും. ഇവർക്ക് ബി രണ്ട് വിഭാഗത്തിൽ ഇ വീസ സംവിധാനത്തിലൂടെ പ്രൊഡക്ഷൻ ഇൻവെസ്റ്റ്‌മെന്റ് ബിസിനസ് വീസ അനുവദിക്കാം. നേരത്തേ ഇ ബി നാല് എന്ന പേരിലാണ് ഇത് നൽകിയിരുന്നത്. വ്യവസായ സ്ഥാപനങ്ങൾ തുടങ്ങാനും പ്രവർത്തിപ്പിക്കാനും ആവശ്യമായ വിദഗ്ധരെ സമയത്ത് എത്തിക്കുക, സാങ്കേതികവിദ്യ കൈമാറുക, ജീവനക്കാരെ പരിശീലിപ്പിക്കുക, ഉൽപ്പാദനത്തിന് പിന്തുണ നൽകുക എന്നിവ എളുപ്പമാക്കുകയാണ് ലക്ഷ്യം.
അപേക്ഷയിലെ വിവരങ്ങൾ 65 മുതൽ 70 ശതമാനം വരെ കുറച്ചു
23 വീസ വിഭാഗങ്ങളിലെയും ഉപവിഭാഗങ്ങളിലെയും അപേക്ഷാഫോമുകൾ ആഭ്യന്തര മന്ത്രാലയം സമഗ്രമായി ലളിതമാക്കി. പൂരിപ്പിക്കേണ്ട വിവരക്കോളങ്ങൾ 65 മുതൽ 70 ശതമാനം വരെ കുറച്ചു. വീസ പരിശോധിക്കാൻ ആവശ്യമായ അടിസ്ഥാന വിവരങ്ങൾ നിലനിർത്തിയാണ് മാറ്റം. അപേക്ഷകന്റെ സമയവും പ്രയത്‌നവും കുറയ്ക്കാനും അപേക്ഷ കൂടുതൽ വേഗത്തിലും എളുപ്പത്തിലും പൂർത്തിയാക്കാനും ഇതിലൂടെ കഴിയുമെന്ന് സർക്കാർ അറിയിച്ചു. ആവശ്യമായ വിവരങ്ങളിൽ ശ്രദ്ധ കേന്ദ്രീകരിച്ച് പരിശോധനയും നടപടികളും നടത്താനാകുന്നതിനാൽ ഭരണപരമായ കാര്യക്ഷമതയും മെച്ചപ്പെടുമെന്നാണ് വിശദീകരണം. സന്ദർശകർ, രോഗികൾ, വിദ്യാർഥികൾ, ഗവേഷകർ, നിക്ഷേപകർ, ബിസിനസ് രംഗത്തുള്ളവർ എന്നിവർക്ക് വീസ വിഭാഗങ്ങൾ തമ്മിലുള്ള ആവർത്തനവും ആശയക്കുഴപ്പവും കുറയും. ബാധകമായ അർഹതാ മാനദണ്ഡങ്ങൾക്കും വ്യവസ്ഥകൾക്കും വിധേയമായി നിയമാനുസൃത യാത്ര, വിദ്യാഭ്യാസം, ആരോഗ്യപരിചരണം, സാമ്പത്തിക ഇടപെടലുകൾ എന്നിവ പ്രോത്സാഹിപ്പിക്കുകയാണ് ലക്ഷ്യം. വിദേശ വിനോദസഞ്ചാരികളുടെയും ചികിത്സയ്ക്കെത്തുന്നവരുടെയും വിദ്യാർഥികളുടെയും വരവ് വർധിപ്പിക്കാനും പരിഷ്‌കാരം ഉദ്ദേശിക്കുന്നു. മാറ്റങ്ങൾ നടപ്പാക്കാൻ ആഭ്യന്തര മന്ത്രാലയം വിവരസാങ്കേതിക സംവിധാനങ്ങൾ പുതുക്കുകയാണ്. വർഷാവസാനത്തോടെ പുതിയ ക്രമീകരണമനുസരിച്ച് വീസകൾ നൽകും.
പുതിയ സംവിധാനത്തിലെ ഒൻപത് പ്രധാന വീസ വിഭാഗങ്ങളും അവയുടെ ആവശ്യങ്ങളും ഇങ്ങനെയാണ്:
- ബിസിനസ് വീസ: വ്യവസായ, വ്യാപാര സംരംഭങ്ങൾ സ്ഥാപിക്കുന്നതുൾപ്പെടെയുള്ള ദീർഘകാല ബിസിനസ് പ്രവർത്തനങ്ങൾക്കും ഹ്രസ്വകാല ബിസിനസ് പ്രവർത്തനങ്ങൾക്കും. കായികമത്സരങ്ങൾ, സാംസ്‌കാരിക, വാണിജ്യ കലാപ്രകടനങ്ങൾ, ഉൽപ്പാദന നിക്ഷേപ ബിസിനസ്, സമ്മേളനങ്ങൾ, ഡോക്യുമെന്ററികളും പരസ്യചിത്രങ്ങളും ഉൾപ്പെടെയുള്ള ചിത്രീകരണം എന്നിവയും ഉൾപ്പെടും.
- ഡിപ്ലോമാറ്റിക് വീസ: ഇന്ത്യയിൽ നിയമിതരാകുന്നവരോ സന്ദർശനത്തിനെത്തുന്നവരോ ആയ നയതന്ത്ര ഉദ്യോഗസ്ഥർക്കും ആശ്രിതർക്കും. ഐക്യരാഷ്ട്രസഭയുടെ നയതന്ത്ര ഉദ്യോഗസ്ഥരും ഇതിൽ ഉൾപ്പെടും.
- വർക്ക് വീസ: ഇന്ത്യൻ കമ്പനികളിലും സ്ഥാപനങ്ങളിലും ദീർഘകാല ജോലി ചെയ്യുന്നതിനും സർക്കാരിതര സംഘടനകളിൽ പ്രവർത്തിക്കുന്നതിനും മിഷനറി പ്രവർത്തനങ്ങൾക്കും.
- ജേണലിസ്റ്റ് വീസ: ഇന്ത്യയിൽ അംഗീകാരമുള്ള മാധ്യമപ്രവർത്തകർക്ക്.
- മെഡിക്കൽ വീസ: ആയുഷ് ഉൾപ്പെടെയുള്ള ചികിത്സാരീതികളിൽ തീവ്രചികിത്സയ്ക്കോ കിടത്തിച്ചികിത്സയ്ക്കോ ഇന്ത്യയിലെത്തുന്ന വിദേശികൾക്കും അവർക്കൊപ്പം വരുന്ന സഹായികൾക്കും.
- ഒഫീഷ്യൽ വീസ: ഇന്ത്യയിൽ നിയമിതരാകുന്നവരോ സന്ദർശനത്തിനെത്തുന്നവരോ ആയ നയതന്ത്രേതര ഉദ്യോഗസ്ഥർക്കും ആശ്രിതർക്കും. ഐക്യരാഷ്ട്രസഭയിലെ നയതന്ത്രേതര ഉദ്യോഗസ്ഥരും ഉൾപ്പെടും.
- സ്റ്റുഡന്റ് വീസ: സ്‌കൂൾ, ബിരുദ, ബിരുദാനന്തര പഠനങ്ങൾക്കും യോഗ, വേദസംസ്‌കാരം, ഇന്ത്യൻ സംഗീതം, നൃത്തം, ബുദ്ധമത പഠനം, ഇന്ത്യൻ ഭാഷകൾ, ഇന്ത്യൻ വിജ്ഞാന സംവിധാനങ്ങൾ എന്നിവയിലെ പഠനത്തിനും. ഗവേഷണം, പരിശീലനം, വിദ്യാർഥി കൈമാറ്റം എന്നിവയും ഉൾപ്പെടും.
- വിസിറ്റർ വീസ: വിനോദസഞ്ചാരം, ബിസിനസ് കൂടിക്കാഴ്ചകൾ, ചികിത്സാ ഉപദേശം തേടൽ, ആരോഗ്യപരിപാലന പരിപാടികൾ തുടങ്ങിയ ഹ്രസ്വകാല ആവശ്യങ്ങൾക്ക്. മറ്റൊരു സ്ഥലത്തേക്കുള്ള യാത്രയ്ക്കിടെ ഇന്ത്യയിലൂടെ കടന്നുപോകുന്നതിനും പർവതാരോഹണത്തിനും ഇത് ബാധകമാണ്.
- മറ്റ് ആവശ്യങ്ങൾക്കുള്ള വീസ: ഇന്ത്യൻ വംശജർക്കും അവരുടെ ജീവിതപങ്കാളികൾക്കും കുട്ടികൾക്കും. ഓറോവിൽ ഫൗണ്ടേഷൻ പോലുള്ള നിർദിഷ്ട സ്ഥാപനങ്ങളിൽ ചേരാനെത്തുന്നവർ, വിവിധ ദീർഘകാല വീസകളിൽ വരുന്ന വിദേശികളുടെ ആശ്രിതർ, അഫ്ഗാനിസ്ഥാൻ പൗരന്മാർക്കുള്ള താമസ വീസ എന്നിവയും ഇതിൽപ്പെടും. അയൽരാജ്യങ്ങളിലെ ചില വിഭാഗം പൗരന്മാർക്കുള്ള ദീർഘകാല വീസയും മറ്റ് വീസ വിഭാഗങ്ങളിൽ ഉൾപ്പെടാത്ത ആവശ്യങ്ങളും ഈ വിഭാഗത്തിലാണ്.
.
