കേപ് ടൗൺ (ദക്ഷിണാഫ്രിക്ക)  / 2026 /  സെപ്റ്റംബർ 15

രാജ്യസഭാ ഉപാധ്യക്ഷൻ ഹരിവംശിന്റെ നേതൃത്വത്തിലുള്ള ഇന്ത്യൻ പാർലമെന്ററി സംഘം ദക്ഷിണാഫ്രിക്കയിലെ കേപ് ടൗണിൽ നടക്കുന്ന 69-ാമത് കോമൺവെൽത്ത് പാർലമെന്ററി സമ്മേളനത്തിൽ പങ്കെടുക്കുകയാണ്. സെപ്റ്റംബർ 12 മുതൽ 19 വരെയാണ് സമ്മേളനം. പാർലമെന്ററി ജനാധിപത്യവും നിയമനിർമാണ സഹകരണവും ശക്തിപ്പെടുത്തുകയാണ് ഇന്ത്യയുടെ പങ്കാളിത്തത്തിന്റെ ലക്ഷ്യം.

സംഘത്തിൽ ഏഴ് പ്രതിനിധികൾ

രാജ്യസഭാംഗം സി. സദാനന്ദൻ മാസ്റ്റർ, ലോക്‌സഭാംഗങ്ങളായ ഡി. പുരന്ദേശ്വരി, വിഷ്ണുദത്ത് ശർമ, സുധീർ ഗുപ്ത, കൃഷ്ണപ്രസാദ് തെന്നേറ്റി, രചന ബാനർജി, രാജ്യസഭാ സെക്രട്ടറി ജനറൽ പി. സി. മോദി എന്നിവരാണ് ഇന്ത്യൻ സംഘത്തിലുള്ളത്. കോമൺവെൽത്ത് പാർലമെന്ററി അസോസിയേഷനിൽ അംഗങ്ങളായ ഇന്ത്യയിലെ സംസ്ഥാന, കേന്ദ്രഭരണപ്രദേശ നിയമസഭകളിൽനിന്നുള്ള 32 അധ്യക്ഷന്മാരും 18 സെക്രട്ടറിമാരും സമ്മേളനത്തിൽ പങ്കെടുക്കുന്നുണ്ട്.

ദക്ഷിണാഫ്രിക്കൻ നേതാക്കളുമായി കൂടിക്കാഴ്ച

സെപ്റ്റംബർ 15ന് കേപ് ടൗണിലെത്തിയ ഹരിവംശ് ദക്ഷിണാഫ്രിക്കൻ നാഷണൽ അസംബ്ലി സ്പീക്കർ ഏഞ്ചല തൊക്കോസിലേ ദിദിസ, നാഷണൽ കൗൺസിൽ ഓഫ് പ്രൊവിൻസസ് ഉപാധ്യക്ഷൻ പൂബാലൻ ഗോവേന്ദർ, നാഷണൽ അസംബ്ലി ഡെപ്യൂട്ടി സ്പീക്കർ അനെലി ലോട്രിയറ്റ് എന്നിവരുമായി ഉഭയകക്ഷി കൂടിക്കാഴ്ച നടത്തി. പരസ്പര പാർലമെന്ററി താൽപര്യമുള്ള വിഷയങ്ങളിൽ അഭിപ്രായങ്ങൾ പങ്കുവെച്ചു. ഇന്ത്യയും ദക്ഷിണാഫ്രിക്കയും തമ്മിലുള്ള ദീർഘകാല പാർലമെന്ററി ബന്ധം കൂടുതൽ ശക്തിപ്പെടുത്തുന്നതും ചർച്ചയായി.

ഇന്ത്യയുടെ നിലപാട് അവതരിപ്പിച്ചു

ലോക്‌സഭാംഗം ഡി. പുരന്ദേശ്വരി കോമൺവെൽത്ത് പാർലമെന്ററി അസോസിയേഷൻ നിർവാഹകസമിതി യോഗത്തിൽ പങ്കെടുത്തു. അസോസിയേഷനുമായി ബന്ധപ്പെട്ട വിവിധ വിഷയങ്ങളിൽ ഇന്ത്യയുടെ നിലപാടുകളും കാഴ്ചപ്പാടുകളും അവർ അവതരിപ്പിച്ചു. കോമൺവെൽത്ത് നിയമസഭകൾക്ക് പ്രസക്തമായ സമകാലിക വിഷയങ്ങളിൽ ആറ് പ്രധാന ശിൽപ്പശാലകളും സമ്മേളനത്തിന്റെ ഭാഗമായി നടക്കും.

ജനാധിപത്യവും രാജ്യാന്തര നിയമവും ചർച്ചയാകും

“കോമൺവെൽത്തിനായുള്ള പുതിയ നേതൃത്വ അവസരങ്ങൾ: ജനാധിപത്യവും രാജ്യാന്തര നിയമവും ശക്തിപ്പെടുത്താനുള്ള പാർലമെന്ററി നടപടി” എന്ന വിഷയത്തിൽ 69-ാമത് സമ്മേളനത്തിന്റെ പൊതുസഭയെ ഹരിവംശ് അഭിസംബോധന ചെയ്യും. ഇന്ത്യൻ സംഘാംഗങ്ങളും സംസ്ഥാന, കേന്ദ്രഭരണപ്രദേശ നിയമസഭാ പ്രതിനിധികളും ശിൽപ്പശാലകളിലും സമ്പൂർണ സമ്മേളനങ്ങളിലും പൊതുസഭാ ചർച്ചകളിലും പങ്കെടുക്കും. വരും ദിവസങ്ങളിലും പൊതുസഭയിലും സമകാലിക ആഗോള, പാർലമെന്ററി വിഷയങ്ങൾ ചർച്ചചെയ്യുന്ന വിവിധ ശിൽപ്പശാലകളിലും സംഘം സാന്നിധ്യം തുടരും. കോമൺവെൽത്തിനുള്ളിലെ പാർലമെന്ററി ജനാധിപത്യം, നിയമനിർമാണ സഹകരണം, പാർലമെന്റുകൾ തമ്മിലുള്ള ഇടപെടൽ എന്നിവ ശക്തിപ്പെടുത്താനുള്ള ഇന്ത്യയുടെ പ്രതിബദ്ധതയാണ് ഈ പങ്കാളിത്തം വ്യക്തമാക്കുന്നത്. ഇന്ത്യയും ദക്ഷിണാഫ്രിക്കയും തമ്മിലുള്ള ശക്തമായ പാർലമെന്ററി ബന്ധം കൂടുതൽ ആഴത്തിലാക്കുകയും ചെയ്യുന്നു.

.