ന്യൂഡൽഹി, 2026 സെപ്റ്റംബർ 14 –

ഇന്ത്യ-ചൈന ബന്ധം മെച്ചപ്പെടുന്നതിനിടെ യഥാർത്ഥ നിയന്ത്രണ രേഖയായ എൽഎസിക്ക് സമീപമുള്ള ചൈനീസ് സൈനിക വിന്യാസത്തിൽ 2025ൽ ഗണ്യമായ കുറവുണ്ടായതായി പ്രതിരോധ മന്ത്രാലയം. വടക്കൻ അതിർത്തിക്ക് എതിർവശത്ത് ചൈനീസ് പീപ്പിൾസ് ലിബറേഷൻ ആർമിയുടെ 10 കംബൈൻഡ് ആംസ് ബ്രിഗേഡ് വലുപ്പത്തിലുള്ള സേനയാണ് 2025ൽ വിന്യസിച്ചിരുന്നത്. പരമ്പരാഗത പരിശീലന മേഖലകളിലും വിന്യാസം കുറഞ്ഞതായി മന്ത്രാലയത്തിന്റെ റിപ്പോർട്ട് വ്യക്തമാക്കുന്നു.

2024ൽ കിഴക്കൻ ലഡാക്കിലെ ഡെപ്സാങ്, ഡെംചോക് മേഖലകളിൽ സൈനിക പിന്മാറ്റത്തിന് ഇന്ത്യയും ചൈനയും ധാരണയിലെത്തിയതിന് പിന്നാലെയാണ് വിന്യാസത്തിൽ കുറവുണ്ടായത്. രാഷ്ട്രീയ, നയതന്ത്ര, സൈനിക തലങ്ങളിൽ നടന്ന ചർച്ചകൾ അതിർത്തിയിലെ സാഹചര്യം സ്ഥിരപ്പെടുത്താൻ സഹായിച്ചെന്നാണ് പ്രതിരോധ മന്ത്രാലയത്തിന്റെ വിലയിരുത്തൽ. അതേസമയം, എൽഎസിയിലെ സാഹചര്യം സ്ഥിരതയുള്ളതാണെങ്കിലും ഇപ്പോഴും അതീവ ജാഗ്രത ആവശ്യമുള്ളതാണെന്നും റിപ്പോർട്ട് പറയുന്നു.

ഇന്ത്യൻ സൈനിക വിന്യാസം ശക്തമായി തുടരും

ചൈനീസ് സൈനിക സാന്നിധ്യം കുറഞ്ഞെങ്കിലും ഇന്ത്യ എൽഎസിയിലെ സൈനിക ജാഗ്രത കുറച്ചിട്ടില്ല. എല്ലാ മേഖലകളിലും ഇന്ത്യൻ സൈന്യം ശക്തമായ നിലയിൽ തുടരുകയാണെന്നും ഏത് അടിയന്തര സാഹചര്യവും നേരിടാൻ സജ്ജമാണെന്നും പ്രതിരോധ മന്ത്രാലയം വ്യക്തമാക്കി. രുദ്ര ബ്രിഗേഡുകൾ, ദിവ്യാസ്ത്ര ബാറ്ററികൾ, ഭൈരവ് ബറ്റാലിയനുകൾ തുടങ്ങിയ പുതിയ സംവിധാനങ്ങളും വടക്കൻ അതിർത്തിയിൽ വിന്യസിച്ചിട്ടുണ്ട്.

മോദി-ഷി ചർച്ചകൾക്കിടെ പുതിയ സൂചന

2024 ഒക്ടോബറിൽ കസാനിൽ പ്രധാനമന്ത്രി നരേന്ദ്ര മോദിയും ചൈനീസ് പ്രസിഡന്റ് ഷി ജിൻപിങ്ങും നടത്തിയ കൂടിക്കാഴ്ചയ്ക്ക് ശേഷം ഉഭയകക്ഷി ബന്ധം ക്രമേണ മെച്ചപ്പെട്ടു. 2025 ഓഗസ്റ്റിൽ ടിയാൻജിനിൽ ഇരുവരും വീണ്ടും കൂടിക്കാഴ്ച നടത്തി. അതിർത്തിയിൽ സമാധാനം നിലനിർത്തുന്നത് ഇന്ത്യ-ചൈന ബന്ധത്തിന്റെ തുടർവളർച്ചയ്ക്ക് നിർണായകമാണെന്ന് മോദി അന്ന് വ്യക്തമാക്കിയിരുന്നു.

സൈനിക-നയതന്ത്ര ചർച്ചകൾ തുടർന്നു

2025ൽ ഇന്ത്യയും ചൈനയും അതിർത്തി വിഷയത്തിൽ നയതന്ത്ര, സൈനിക ചർച്ചകൾ തുടർന്നു. മാർച്ചിലും ജൂലൈയിലും WMCC യോഗങ്ങളും ഓഗസ്റ്റിൽ പ്രത്യേക പ്രതിനിധികളുടെ ചർച്ചയും നടന്നു. ഒക്ടോബറിൽ കിഴക്കൻ ലഡാക്കിൽ കോർ കമാൻഡർ തല യോഗവും നടത്തി. അതിർത്തിയിലെ പ്രശ്നങ്ങൾ പരിഹരിക്കാൻ ഇരുരാജ്യങ്ങളും സംഭാഷണ സംവിധാനം തുടരുകയാണ്.