ന്യൂഡൽഹി / 2026 / സെപ്റ്റംബർ 09
സഹാറ ഗ്രൂപ്പിന്റെ സഹകരണ സംഘങ്ങളിലെ അർഹരായ നിക്ഷേപകർക്ക് പണം തിരികെ നൽകുന്നതിനുള്ള സി.ആർ.സി.എസ്–സഹാറ റീഫണ്ട് പോർട്ടൽ കേന്ദ്ര സഹകരണ മന്ത്രാലയം പുനഃസ്ഥാപിച്ചു. 2023 മാർച്ച് 29-ലെ സുപ്രീംകോടതി ഉത്തരവിന്റെ അടിസ്ഥാനത്തിലാണ് സെൻട്രൽ രജിസ്ട്രാർ ഓഫ് കോ-ഓപ്പറേറ്റീവ് സൊസൈറ്റീസ് വഴി റീഫണ്ട് നടപടികൾ നടക്കുന്നത്. ഇതുവരെ 41,56,711 നിക്ഷേപകരുടെ ആധാറുമായി ബന്ധിപ്പിച്ച ബാങ്ക് അക്കൗണ്ടുകളിലേക്ക് ₹9,267 കോടി നേരിട്ട് നൽകിയിട്ടുണ്ട്. ഏകദേശം 20 ലക്ഷം അപേക്ഷകൾ ഇനിയും പരിശോധിക്കാനുണ്ട്. പോർട്ടൽ വീണ്ടും പ്രവർത്തനക്ഷമമായതോടെ ഇവയുടെ പരിശോധനയും റീഫണ്ട് നടപടികളും പുനരാരംഭിച്ചു.
പോർട്ടൽ തടസ്സപ്പെട്ടത് 2025 നവംബറിൽ
സഹാറ സഹകരണ സംഘങ്ങളുമായി നേരിട്ട് ബന്ധമില്ലാത്ത ചില വിഷയങ്ങളെ തുടർന്ന് 2025 നവംബറിൽ അവയുടെ ഓഫീസുകൾ സീൽ ചെയ്തതോടെയാണ് പ്രവർത്തനങ്ങൾ ബാധിച്ചത്. ഹാർഡ്വെയറുമായി ബന്ധപ്പെട്ട കുടിശ്ശികയും വാർഷിക പരിപാലന കരാറുകളുടെ കുടിശ്ശികയും ഉണ്ടായിരുന്നു. അത്യാവശ്യ വിവരസാങ്കേതിക സംവിധാനങ്ങളും ലൈസൻസുകളും പുതുക്കേണ്ടതുണ്ടായിരുന്നു. ജീവനക്കാരുമായി ബന്ധപ്പെട്ട പ്രശ്നങ്ങളും മറ്റ് ഭരണപരമായ തടസ്സങ്ങളും നിലനിന്നു. ഇവയെല്ലാം ചേർന്നതോടെ റീഫണ്ട് അപേക്ഷകൾ പരിശോധിക്കാനും തുടർനടപടി സ്വീകരിക്കാനും ആവശ്യമായ സംവിധാനങ്ങൾ തടസ്സപ്പെട്ടു.
തടസ്സങ്ങൾ നീക്കാൻ മന്ത്രാലയത്തിന്റെ ഇടപെടൽ
റീഫണ്ട് സംവിധാനത്തെ ബാധിച്ച ഭരണപരവും സാമ്പത്തികവും പ്രവർത്തനപരവും സാങ്കേതികവുമായ പ്രശ്നങ്ങൾ പരിഹരിക്കുന്നതിൽ സഹകരണ മന്ത്രാലയം നിർണായക ഇടപെടൽ നടത്തി. ഉത്തർപ്രദേശ് സർക്കാരിലെ ഉദ്യോഗസ്ഥരും ബന്ധപ്പെട്ട അധികാരികളും ഉൾപ്പെടെയുള്ളവരുമായി തുടർച്ചയായി ഏകോപനം നടത്തി. ആവശ്യമായ സംവിധാനങ്ങൾ, അടിസ്ഥാന സൗകര്യങ്ങൾ, ഭരണനടപടികൾ എന്നിവയിലെ തടസ്സങ്ങൾ പരിഹരിക്കാൻ സി.ആർ.സി.എസ് നടപടി സ്വീകരിച്ചു.
ഇതോടെയാണ് പോർട്ടലും അതുമായി ബന്ധപ്പെട്ട പരിശോധനാ സംവിധാനങ്ങളും വീണ്ടും പ്രവർത്തനക്ഷമമായത്. സഹാറ ക്രെഡിറ്റ് കോ-ഓപ്പറേറ്റീവ് സൊസൈറ്റി ലിമിറ്റഡ്, ലഖ്നൗ; സഹാറയൻ യൂണിവേഴ്സൽ മൾട്ടിപർപ്പസ് സൊസൈറ്റി ലിമിറ്റഡ്, ഭോപ്പാൽ; ഹുമാര ഇന്ത്യ ക്രെഡിറ്റ് കോ-ഓപ്പറേറ്റീവ് സൊസൈറ്റി ലിമിറ്റഡ്, കൊൽക്കത്ത; സ്റ്റാർസ് മൾട്ടിപർപ്പസ് കോ-ഓപ്പറേറ്റീവ് സൊസൈറ്റി ലിമിറ്റഡ്, ഹൈദരാബാദ് എന്നീ സഹകരണ സംഘങ്ങളിലെ യഥാർഥ നിക്ഷേപകരുടെ അർഹമായ തുക നൽകുന്നതിനുള്ള നടപടികളാണ് ഇതോടെ വീണ്ടും ആരംഭിച്ചത്.
പൂർണമായും ഡിജിറ്റൽ, കടലാസ് രഹിത സംവിധാനം
സി.ആർ.സി.എസ്–സഹാറ റീഫണ്ട് പോർട്ടൽ വഴിയാണ് മുഴുവൻ നടപടികളും സി.ആർ.സി.എസ് കൈകാര്യം ചെയ്യുന്നത്. സുതാര്യവും ഡിജിറ്റലും കടലാസ് രഹിതവും പരിശോധന അടിസ്ഥാനമാക്കിയുള്ളതുമായ സംവിധാനമാണിത്. 2023 ജൂലൈ 18-നാണ് സർക്കാർ പ്രത്യേക ഓൺലൈൻ പോർട്ടൽ ആരംഭിച്ചത്. നേരിട്ട് രേഖകൾ സമർപ്പിക്കാതെ തന്നെ നിക്ഷേപകർക്ക് ഓൺലൈനായി റീഫണ്ട് അപേക്ഷ നൽകാം. ഇതിലൂടെ അപേക്ഷാ നടപടികളുടെ വ്യക്തമായ ഡിജിറ്റൽ രേഖയും നിലനിർത്താനാകും.
ആധാർ ഇ-കെവൈസി വഴിയാണ് അപേക്ഷകളുടെ പരിശോധന. നിക്ഷേപകന്റെ വിവരങ്ങൾ, അംഗത്വ വിവരങ്ങൾ, അക്കൗണ്ട് വിവരങ്ങൾ എന്നിവ അതത് സഹകരണ സംഘങ്ങൾ നൽകിയ വിവരങ്ങളുമായി ഒത്തുനോക്കും. നിക്ഷേപ സർട്ടിഫിക്കറ്റുകളോ രസീതുകളോ മറ്റ് നിർദേശിച്ച രേഖകളോ പരിശോധിക്കും. സുപ്രീംകോടതി നിർദേശിച്ച മേൽനോട്ട സംവിധാനത്തിന് കീഴിൽ അംഗീകരിച്ച സ്റ്റാൻഡേർഡ് ഓപ്പറേറ്റിങ് പ്രൊസീജർ അനുസരിച്ചാണ് ഈ പരിശോധന. പരിശോധന വിജയകരമായി പൂർത്തിയായാൽ അർഹമായ റീഫണ്ട് തുക നിക്ഷേപകന്റെ ആധാറുമായി ബന്ധിപ്പിച്ച ബാങ്ക് അക്കൗണ്ടിലേക്ക് നേരിട്ട് എത്തും.
ഔദ്യോഗിക പോർട്ടലുകൾ മാത്രം ഉപയോഗിക്കണം
ആവശ്യമായ വിവരസാങ്കേതിക അടിസ്ഥാന സൗകര്യങ്ങൾ ശക്തിപ്പെടുത്താനും സംവിധാനങ്ങളും ലൈസൻസുകളും പുതുക്കാനും പ്രവർത്തന തടസ്സങ്ങൾ നീക്കാനും ജീവനക്കാരുടെയും ഭരണത്തിന്റെയും പ്രശ്നങ്ങൾ പരിഹരിക്കാനും സഹകരണ മന്ത്രാലയവും സി.ആർ.സി.എസും ഏകോപിത നടപടി സ്വീകരിച്ചു. യഥാർഥ നിക്ഷേപകരുടെ താൽപര്യം സംരക്ഷിച്ചുകൊണ്ട് ശേഷിക്കുന്ന അപേക്ഷകളുടെ പരിശോധനയും റീഫണ്ട് നടപടികളും സുഗമമാക്കുകയാണ് ലക്ഷ്യം.
പുതിയ റീഫണ്ട് അപേക്ഷ നൽകാൻ ഔദ്യോഗിക സി.ആർ.സി.എസ്–സഹാറ റീഫണ്ട് പോർട്ടൽ മാത്രമേ ഉപയോഗിക്കാവൂ എന്ന് നിക്ഷേപകർക്ക് നിർദേശം നൽകിയിട്ടുണ്ട്. ഇതിനകം നൽകിയ അപേക്ഷകളിൽ പിഴവുകളുണ്ടെന്ന് അറിയിപ്പ് ലഭിച്ചാൽ അവ തിരുത്തി വീണ്ടും സമർപ്പിക്കുന്നതിനുള്ള ഔദ്യോഗിക റീസബ്മിഷൻ പോർട്ടലാണ് ഉപയോഗിക്കേണ്ടത്. അപേക്ഷ നൽകുമ്പോഴും വീണ്ടും സമർപ്പിക്കുമ്പോഴും നിർദേശിച്ച നടപടിക്രമങ്ങളും ആവശ്യമായ രേഖകളും കൃത്യമായി പാലിക്കണം. ഇതിലൂടെ പരിശോധന വേഗത്തിലാക്കാനും അനധികൃത മാർഗങ്ങളിലൂടെയോ തെറ്റിദ്ധരിപ്പിക്കുന്ന അവകാശവാദങ്ങളിലൂടെയോ നിക്ഷേപകർ വഞ്ചിക്കപ്പെടുന്നത് ഒഴിവാക്കാനും കഴിയുമെന്ന് മന്ത്രാലയം വ്യക്തമാക്കി.
.
