ചാപ്പൽ ഹിൽ (അമേരിക്ക)  / 2026  / സെപ്റ്റംബർ 07 

ജി20 ഇന്നൊവേഷൻ മന്ത്രിമാരുടെ യോഗത്തിൽ കേന്ദ്ര ഇലക്ട്രോണിക്സ്-വിവരസാങ്കേതിക, വാണിജ്യ-വ്യവസായ സഹമന്ത്രി ജിതിൻ പ്രസാദ ഇന്ത്യയെ പ്രതിനിധീകരിച്ചു. അമേരിക്കയിലെ നോർത്ത് കരോലിനയിലെ ചാപ്പൽ ഹില്ലിൽ സെപ്റ്റംബർ ഒന്ന്, രണ്ട് തീയതികളിലായിരുന്നു യോഗം. അമേരിക്കൻ വാണിജ്യ വകുപ്പും വൈറ്റ് ഹൗസ് ശാസ്ത്ര-സാങ്കേതിക നയ ഓഫീസും ചേർന്നാണ് യോഗം സംഘടിപ്പിച്ചത്. നിർമിതബുദ്ധി, സെമികണ്ടക്ടറുകൾ, ഡിജിറ്റൽ സാങ്കേതികവിദ്യ, ഗവേഷണം, ഇന്നൊവേഷൻ തുടങ്ങിയ മേഖലകളിലെ ആഗോള സഹകരണം ശക്തമാക്കുന്നതായിരുന്നു പ്രധാന ചർച്ച. ജി20 മന്ത്രിമാർ ഇന്നൊവേഷൻ മന്ത്രിതല പ്രസ്താവനയിൽ സമവായത്തിലെത്തി. യൂറോപ്യൻ യൂണിയൻ, ഫ്രാൻസ്, ജർമനി, ആഫ്രിക്കൻ യൂണിയൻ, അമേരിക്ക എന്നിവയുമായും ജിതിൻ പ്രസാദ ഉഭയകക്ഷി ചർച്ചകൾ നടത്തി.

ഇന്ത്യയെ പ്രതിനിധീകരിച്ച് ജിതിൻ പ്രസാദ

ഇലക്ട്രോണിക്സ്-വിവരസാങ്കേതിക മന്ത്രാലയ ജോയിന്റ് സെക്രട്ടറി അജിത് കുമാറും ജിതിൻ പ്രസാദയ്ക്കൊപ്പമുണ്ടായിരുന്നു. ഇലക്ട്രോണിക്സ്-വിവരസാങ്കേതിക മന്ത്രാലയം, ശാസ്ത്ര-സാങ്കേതിക വകുപ്പ്, വ്യവസായ-ആഭ്യന്തര വ്യാപാര പ്രോത്സാഹന വകുപ്പ് എന്നിവയിലെ മുതിർന്ന ഉദ്യോഗസ്ഥരും അമേരിക്കയിലെ ഇന്ത്യൻ എംബസി ഉദ്യോഗസ്ഥരും ഇന്ത്യൻ സംഘത്തിലുണ്ടായിരുന്നു.

യോഗത്തിന്റെ സമാപനത്തിൽ ജി20 മന്ത്രിമാർ ഇന്നൊവേഷൻ മന്ത്രിതല പ്രസ്താവന പുറത്തിറക്കി. വളർന്നുവരുന്ന സാങ്കേതികവിദ്യകൾക്ക് സമൃദ്ധി സൃഷ്ടിക്കാനും ഉൽപ്പാദനക്ഷമത ഉയർത്താനും എല്ലാവർക്കും കൂടുതൽ അവസരങ്ങൾ തുറക്കാനും കഴിയുമെന്ന് പ്രസ്താവന അംഗീകരിച്ചു.

ആറ് മേഖലകളിൽ പൊതുധാരണ

ഇന്നൊവേഷൻ അനുകൂല നയചട്ടക്കൂടുകൾ, അവസരത്തിനും സമൃദ്ധിക്കും വേണ്ടിയുള്ള സാങ്കേതികവിദ്യ, സാങ്കേതിക വൈദഗ്ധ്യമുള്ള തൊഴിലാളികളുടെ വികസനം, നിർമിതബുദ്ധിയുമായി ബന്ധപ്പെട്ട ബൗദ്ധിക സ്വത്തവകാശ നയങ്ങൾ, നിർമിതബുദ്ധിക്കുള്ള മാനദണ്ഡങ്ങളും മാനദണ്ഡങ്ങൾക്കായുള്ള നിർമിതബുദ്ധിയും, വ്യാവസായിക ഇന്നൊവേഷനും വിതരണശൃംഖലയിലെ നിക്ഷേപവും എന്നീ ആറ് മേഖലകളിലാണ് പൊതുധാരണ രൂപപ്പെട്ടത്.

വളർന്നുവരുന്ന സാങ്കേതികവിദ്യകൾക്കായുള്ള കരോലിന തത്വങ്ങളിലും മന്ത്രിമാർ സമവായത്തിലെത്തി. അടിസ്ഥാന ഗവേഷണത്തിൽ രാജ്യങ്ങൾ നിക്ഷേപം നടത്തുക, ഗവേഷണ നേട്ടങ്ങളെ വാണിജ്യരംഗത്തേക്ക് എത്തിക്കുന്ന വഴികൾ ശക്തിപ്പെടുത്തുക, വിശ്വസനീയമായ സാങ്കേതികവിദ്യയുടെ സ്വീകാര്യതയും വിന്യാസവും സാധ്യമാക്കുക എന്നിവയാണ് ഇതിൽ പ്രധാനമായി മുന്നോട്ടുവച്ചത്.

നിർമിതബുദ്ധി സമൃദ്ധി ലക്ഷ്യങ്ങളും നിർമിതബുദ്ധി സമൃദ്ധി ഉടമ്പടിയും യോഗത്തിലെ മറ്റ് പ്രധാന ഫലങ്ങളായിരുന്നു. ജി20 രാജ്യങ്ങളിലെ സാങ്കേതിക തൊഴിലാളികളുടെ വൈദഗ്ധ്യ വികസനം കൂടുതൽ ശക്തമാക്കാനും സ്വകാര്യ മേഖലയുമായുള്ള പങ്കാളിത്തത്തിനുള്ള അവസരങ്ങൾ വർധിപ്പിക്കാനും ഇവ ലക്ഷ്യമിടുന്നു.

യൂറോപ്പുമായും ആഫ്രിക്കയുമായും ചർച്ച

യോഗത്തിനിടെ യൂറോപ്യൻ കമ്മീഷൻ എക്സിക്യൂട്ടീവ് വൈസ് പ്രസിഡന്റ് ഹെന്ന വിർക്കുനനുമായി ജിതിൻ പ്രസാദ കൂടിക്കാഴ്ച നടത്തി. ഇന്നൊവേഷൻ സഹകരണം ശക്തമാക്കുന്നതിന്റെയും സാങ്കേതികവിദ്യയെ അടിസ്ഥാനമാക്കിയുള്ള വളർച്ചയ്ക്കും പൊതുസമൃദ്ധിക്കും സഹായിക്കുന്ന വിശ്വസനീയ ഡിജിറ്റൽ സംവിധാനങ്ങൾ ഒരുക്കുന്നതിന്റെയും പ്രാധാന്യം ഇരുവരും ചർച്ച ചെയ്തു.

ഫ്രാൻസിന്റെ നിർമിതബുദ്ധി-ഡിജിറ്റൽ കാര്യങ്ങളുടെ മന്ത്രി ഡെലിഗേറ്റ് ആൻ ലെ ഹെനാഫുമായുള്ള കൂടിക്കാഴ്ചയിൽ നിർമിതബുദ്ധിയിലും ഡിജിറ്റൽ സാങ്കേതികവിദ്യകളിലും സഹകരണം മുന്നോട്ടുകൊണ്ടുപോകുന്നതിനെക്കുറിച്ച് ചർച്ച ചെയ്തു. സാങ്കേതികവിദ്യയെ അടിസ്ഥാനമാക്കിയുള്ള ഇന്നൊവേഷൻ ശക്തിപ്പെടുത്താനും വിശ്വസനീയ ഡിജിറ്റൽ ഭാവിക്കായി പങ്കാളിത്തം വളർത്താനും ഇന്ത്യയും ഫ്രാൻസും പ്രതിജ്ഞാബദ്ധമാണെന്ന് വ്യക്തമാക്കി.

ജർമനിയിലെ പാർലമെന്ററി സ്റ്റേറ്റ് സെക്രട്ടറിമാരായ തോമസ് ജാർസോംബെക്, ഡോ. സിൽക്കെ ലൗനെർട്ട് എന്നിവരുമായുള്ള ചർച്ചയിൽ സാങ്കേതികവിദ്യ, ഇന്നൊവേഷൻ, ഗവേഷണം എന്നിവയിൽ ഇന്ത്യ-ജർമനി സഹകരണം കൂടുതൽ ആഴത്തിലാക്കാനുള്ള സാധ്യതകൾ പരിശോധിച്ചു. ഇരുരാജ്യങ്ങൾക്കും ഒരുപോലെ പുരോഗതി നൽകുന്നതും ഭാവിക്കായി സജ്ജമായതുമായ പങ്കാളിത്തമാണ് ലക്ഷ്യം.

ആഫ്രിക്കൻ യൂണിയൻ വിദ്യാഭ്യാസം, ശാസ്ത്രം, സാങ്കേതികവിദ്യ, ഇന്നൊവേഷൻ കമ്മീഷണർ പ്രൊഫ. ഗാസ്പാർഡ് ബന്യാൻകിംബോണയുമായും ചർച്ച നടത്തി. ഡിജിറ്റൽ പൊതു അടിസ്ഥാനസൗകര്യം ഉൾപ്പെടെയുള്ള ഇന്ത്യ സ്റ്റാക്ക് ഡിജിറ്റൽ സംവിധാനങ്ങൾ ആഫ്രിക്കൻ രാജ്യങ്ങൾക്ക് ലഭ്യമാക്കി പങ്കാളിത്തം കൂടുതൽ ശക്തമാക്കാനും പൊതുവളർച്ചയ്ക്കും സമൃദ്ധിക്കും പുതിയ അവസരങ്ങൾ സൃഷ്ടിക്കാനുമുള്ള പ്രതിബദ്ധത ചർച്ചയിൽ വ്യക്തമാക്കി.

അമേരിക്കയുമായി സെമികണ്ടക്ടർ-നിർമിതബുദ്ധി സഹകരണം

അമേരിക്കൻ വാണിജ്യ സെക്രട്ടറി ഹോവാർഡ് ലുട്നിക്കുമായുള്ള ഉഭയകക്ഷി ചർച്ചയിൽ സെമികണ്ടക്ടറുകൾ, നിർമിതബുദ്ധി, ഡാറ്റാ സെന്ററുകൾ എന്നിവയിലെ സഹകരണം ശക്തമാക്കുന്നതിനെക്കുറിച്ച് ഇരുപക്ഷവും അഭിപ്രായങ്ങൾ പങ്കുവച്ചു. ഐഎസ്എം 2.0 പദ്ധതിയിൽ കൂടുതൽ അമേരിക്കൻ നിക്ഷേപത്തിനുള്ള സാധ്യത ജിതിൻ പ്രസാദ മുന്നോട്ടുവച്ചു. നിർമിതബുദ്ധി സാങ്കേതിക പങ്കാളിത്തം ശക്തമാക്കണമെന്നും നിർമിതബുദ്ധിയുടെ സുരക്ഷാ സംവിധാനങ്ങൾക്കായി പൊതുവായ സംവിധാനം രൂപപ്പെടുത്തണമെന്നും അദ്ദേഹം നിർദേശിച്ചു.

ആന്ത്രോപിക് സഹസ്ഥാപകൻ ടോം ബ്രൗണുമായും ജിതിൻ പ്രസാദ കൂടിക്കാഴ്ച നടത്തി. അതിവേഗം മാറുന്ന നിർമിതബുദ്ധി രംഗവും പുതിയ മുന്നേറ്റങ്ങളിലൂടെ ഉയർന്നുവരുന്ന അവസരങ്ങളും ചർച്ചയായി. ഇന്ത്യൻ സാഹചര്യത്തിന് അനുയോജ്യമായ മാനദണ്ഡങ്ങൾ വികസിപ്പിക്കുന്നതിനുള്ള സഹകരണ സാധ്യതയും പ്രധാന ചർച്ചകളിലൊന്നായിരുന്നു.

ഡ്യൂക്ക് സർവകലാശാലയിൽ ഗവേഷകരുമായി കൂടിക്കാഴ്ച

ജി20 പരിപാടികൾക്കുശേഷം ജിതിൻ പ്രസാദ ഡ്യൂക്ക് സർവകലാശാല സന്ദർശിച്ചു. സർവകലാശാലയിലെ മുതിർന്ന നേതൃത്വവുമായും അധ്യാപകരുമായും അദ്ദേഹം ആശയവിനിമയം നടത്തി. സാങ്കേതികവിദ്യ, ഗവേഷണം, എൻജിനീയറിങ്, നിർമിതബുദ്ധി, കമ്പ്യൂട്ടർ സയൻസ്, ആരോഗ്യപരിചരണം തുടങ്ങിയ മേഖലകളിലെ പൊതുതാൽപര്യമുള്ള വിഷയങ്ങൾ ചർച്ചയായി.

പ്രാറ്റ് സ്കൂൾ ഓഫ് എൻജിനീയറിങ്ങിലെ റോബോട്ടിക്സ് ലബോറട്ടറിയും അദ്ദേഹം സന്ദർശിച്ചു. റോബോട്ടിക്സ്, ബയോമെഡിക്കൽ സിമുലേഷൻ, നിർമിതബുദ്ധി അധിഷ്ഠിത സെൻസിങ്, ബയോമെഡിക്കൽ ഡാറ്റ, മെഷീൻ ലേണിങ് എന്നിവ സംയോജിപ്പിച്ച് പ്രവർത്തിക്കുന്ന ഗവേഷകരുമായും വിദഗ്ധരുമായും അദ്ദേഹം സംസാരിച്ചു. വളർന്നുവരുന്നതും വലിയ മാറ്റങ്ങൾ സൃഷ്ടിക്കുന്നതുമായ സാങ്കേതികവിദ്യകളിൽ ഇന്ത്യയും അമേരിക്കയും തമ്മിലുള്ള അക്കാദമിക-ഗവേഷണ സഹകരണം കൂടുതൽ ആഴത്തിലാക്കാൻ വലിയ സാധ്യതയുണ്ടെന്ന് കൂടിക്കാഴ്ചകൾ ചൂണ്ടിക്കാട്ടി.

ആഗോള സാങ്കേതികവിദ്യ-ഇന്നൊവേഷൻ അജൻഡ രൂപപ്പെടുത്തുന്നതിൽ ഇന്ത്യയുടെ പങ്ക് വളരുന്നതാണ് സന്ദർശനത്തിലെ വിവിധ കൂടിക്കാഴ്ചകൾ വ്യക്തമാക്കിയതെന്ന് കേന്ദ്രസർക്കാർ അറിയിച്ചു. നിർമിതബുദ്ധി, സെമികണ്ടക്ടറുകൾ, ഡിജിറ്റൽ പൊതു അടിസ്ഥാനസൗകര്യം, റോബോട്ടിക്സ് തുടങ്ങിയ വളർന്നുവരുന്ന സാങ്കേതികവിദ്യകളിലെ മുന്നേറ്റങ്ങളെ ഇന്നൊവേഷനും സാമ്പത്തിക വളർച്ചയ്ക്കും ജനങ്ങളുടെ മെച്ചപ്പെട്ട ജീവിതനിലവാരത്തിനുമുള്ള അവസരങ്ങളാക്കി മാറ്റുന്ന തന്ത്രപരമായ പങ്കാളിത്തങ്ങൾ കെട്ടിപ്പടുക്കാനുള്ള ഇന്ത്യയുടെ പ്രതിബദ്ധതയും ആവർത്തിച്ചു.

.