ഫരീദാബാദ് // 2026 / സെപ്റ്റംബർ 07 –
ലോക്സഭയിലും സംസ്ഥാന നിയമസഭകളിലും സ്ത്രീകൾക്ക് 33 ശതമാനം സംവരണം നൽകുന്നത് രാജ്യത്ത് സ്ത്രീകളുടെ രാഷ്ട്രീയ നേതൃത്വത്തിന് പുതിയ വഴികൾ തുറക്കുമെന്ന് ലോക്സഭാ സ്പീക്കർ ഓം ബിർള. ദേശീയ വനിതാ കമ്മീഷൻ ഫരീദാബാദിൽ സംഘടിപ്പിച്ച ‘ലിംഗസമത്വം ഉറപ്പാക്കുന്ന ഭരണനിർവഹണം’ എന്ന വിഷയത്തിലെ ദ്വിദിന അഖിലേന്ത്യാ ശേഷിവികസന ശിൽപ്പശാല ഉദ്ഘാടനം ചെയ്യുകയായിരുന്നു അദ്ദേഹം. വിവിധ പൊതുസേവന മേഖലകളിലും തൊഴിലുകളിലും സ്ത്രീകളുടെ സാന്നിധ്യം വർധിക്കുകയാണ്. രാഷ്ട്രീയ, ഭരണ, സാമൂഹിക മേഖലകളിൽ പുതിയ തലമുറ വനിതാ നേതാക്കൾ ഉയർന്നുവരുമെന്നും പൊതുസേവന മേഖലകളിൽ സ്ത്രീകളുടെ പങ്കാളിത്തം 50 ശതമാനം കടക്കുന്ന കാലം വിദൂരമല്ലെന്നും അദ്ദേഹം പറഞ്ഞു.
സഹായം നൽകുന്നതിൽ നിന്ന് നയരൂപീകരണത്തിലേക്ക്
സ്ത്രീകൾക്ക് സഹായവും അവസരങ്ങളും നൽകുന്നതിൽ മാത്രം ശ്രദ്ധ കേന്ദ്രീകരിച്ചാൽ പോരെന്ന് ഓം ബിർള പറഞ്ഞു. നയങ്ങളും പദ്ധതികളും നിയമങ്ങളും രൂപപ്പെടുത്തുന്നതിൽ സ്ത്രീകൾക്ക് സജീവ പങ്കാളിത്തം ഉറപ്പാക്കണം. സ്ത്രീകളുടെ പ്രശ്നങ്ങളും പ്രതീക്ഷകളും പരിഹരിക്കാൻ ആവശ്യമായ നിയമങ്ങൾ എന്തൊക്കെയാണെന്ന് തീരുമാനിക്കുന്നതിലും സ്ത്രീകൾ തന്നെ പങ്കാളികളാകണം. തുല്യത ഉറപ്പാക്കാനുള്ള ഭരണഘടനാപരമായ പ്രതിബദ്ധതയ്ക്കൊപ്പം സ്ത്രീകളുടെ സുരക്ഷയ്ക്കും ശാക്തീകരണത്തിനും സ്വയംപര്യാപ്തതയ്ക്കുമായി നിരവധി നിയമനടപടികൾ രാജ്യത്ത് സ്വീകരിച്ചിട്ടുണ്ടെന്നും അദ്ദേഹം ചൂണ്ടിക്കാട്ടി.
വനിതാ കമ്മീഷന് നിർണായക പങ്ക്
സ്ത്രീകൾ നേരിടുന്ന പുതിയ വെല്ലുവിളികൾ കണ്ടെത്താനും അവയ്ക്ക് പരിഹാരം ഒരുക്കാനും ദേശീയ വനിതാ കമ്മീഷൻ പോലുള്ള സ്ഥാപനങ്ങൾക്ക് പ്രധാന പങ്കുണ്ടെന്ന് സ്പീക്കർ പറഞ്ഞു. ലോക്സഭ, സംസ്ഥാന നിയമസഭകൾ, പഞ്ചായത്തുകൾ, നഗരസഭകൾ എന്നിവയിലെ വനിതാ ജനപ്രതിനിധികൾക്ക് സ്ത്രീകളുടെ പ്രശ്നങ്ങൾ ബന്ധപ്പെട്ട വേദികളിൽ ശക്തമായി ഉന്നയിക്കാനാകും. താഴെത്തട്ടിലെ യാഥാർഥ്യങ്ങൾ പരിഗണിക്കുന്ന നിയമങ്ങൾ ഉറപ്പാക്കുന്നതിലും ഇവർക്ക് നിർണായക പങ്കുവഹിക്കാനാകുമെന്നും അദ്ദേഹം വ്യക്തമാക്കി.
വികസിത ഇന്ത്യയ്ക്ക് സ്ത്രീശാക്തീകരണം അനിവാര്യം
രാജ്യത്തെ ജനസംഖ്യയുടെ പകുതിയോളം വരുന്ന സ്ത്രീകളുടെ സാമ്പത്തികവും സാമൂഹികവുമായ ശാക്തീകരണം ഉറപ്പാക്കാതെ വികസിത രാഷ്ട്രമെന്ന ലക്ഷ്യത്തിലേക്ക് ഇന്ത്യയ്ക്ക് മുന്നേറാനാകില്ലെന്ന് ഓം ബിർള പറഞ്ഞു. ഓരോ സ്ത്രീക്കും തൊഴിൽ അവസരവും സാമ്പത്തിക സ്വാതന്ത്ര്യവും സാമൂഹിക ശാക്തീകരണവും ലഭിക്കണം. പ്രത്യേകിച്ച് പിന്നാക്കാവസ്ഥയും ബുദ്ധിമുട്ടുകളും നേരിടുന്ന സ്ത്രീകളെ സാമ്പത്തികമായും സാമൂഹികമായും ശക്തിപ്പെടുത്താൻ കഴിയുന്ന നയങ്ങൾ, പദ്ധതികൾ, നിയമനടപടികൾ എന്നിവയെക്കുറിച്ച് വനിതാ നിയമസഭാംഗങ്ങൾ ചർച്ച ചെയ്യണമെന്നും അദ്ദേഹം ആവശ്യപ്പെട്ടു.
വിവിധ നിയമനിർമാണ സഭകളിലെ വിജയകരമായ പ്രവർത്തനങ്ങളും അനുഭവങ്ങളും പരസ്പരം പങ്കുവയ്ക്കണം. മികച്ച മാതൃകകൾ രാജ്യവ്യാപകമായി നടപ്പാക്കാൻ ഇത് സഹായിക്കും. സ്ത്രീകളുടെ പ്രശ്നങ്ങൾ പരിഹരിക്കാൻ നിലവിലുള്ള നിയമങ്ങളെക്കുറിച്ചും സ്ഥാപന സംവിധാനങ്ങളെക്കുറിച്ചും അവർക്കിടയിൽ കൂടുതൽ അവബോധം സൃഷ്ടിക്കണം. പ്രത്യേകിച്ച് കൂടുതൽ വെല്ലുവിളികൾ നേരിടുന്ന മേഖലകളിലെ സ്ത്രീകളിലേക്ക് ഇത്തരം വിവരങ്ങൾ എത്തിക്കണമെന്നും അദ്ദേഹം പറഞ്ഞു.
സ്ത്രീകളുടെ നേതൃത്വത്തിന് കരുത്താകണം
സ്വാതന്ത്ര്യസമരം മുതൽ രാഷ്ട്രനിർമാണത്തിലും ജനാധിപത്യ സ്ഥാപനങ്ങളെ ശക്തിപ്പെടുത്തുന്നതിലും സ്ത്രീകൾ മുൻനിരയിൽ ഉണ്ടായിരുന്നുവെന്ന് ഓം ബിർള ചൂണ്ടിക്കാട്ടി. വിവിധ സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമുള്ള വനിതാ നിയമസഭാംഗങ്ങൾക്ക് അനുഭവങ്ങളും ആശയങ്ങളും കാഴ്ചപ്പാടുകളും പങ്കുവയ്ക്കാനുള്ള പ്രധാന വേദിയാണ് ഈ ശിൽപ്പശാല. നിയമനിർമാണ വേദികളിലൂടെ സ്ത്രീകളുടെ പ്രതീക്ഷകൾക്ക് ശബ്ദം നൽകുന്ന വനിതാ ജനപ്രതിനിധികൾ അവരുടെ കഴിവുകൾ കൂടുതൽ മെച്ചപ്പെടുത്തണമെന്നും അദ്ദേഹം ആവശ്യപ്പെട്ടു.
ഊർജസ്വലമായ ജനാധിപത്യത്തിൽ തുടർച്ചയായ ചർച്ചകൾക്കും കൂടിയാലോചനകൾക്കും വലിയ പ്രാധാന്യമുണ്ട്. ജനങ്ങളുടെ പ്രശ്നങ്ങളും പ്രതീക്ഷകളും മനസ്സിലാക്കി പരിഹാരം കണ്ടെത്തുന്നതിന് ഇത് സഹായിക്കും. സ്ത്രീ നേതൃത്വത്തിന്റെ പ്രധാന കരുത്തുകളിലൊന്ന് സംവേദനക്ഷമതയാണ്. ജനങ്ങളുടെ ആശങ്കകൾ കൂടുതൽ ആഴത്തിൽ മനസ്സിലാക്കാനും ഫലപ്രദമായ പരിഹാരങ്ങൾ കണ്ടെത്താനും ഇത് സഹായിക്കുമെന്ന് ഓം ബിർള പറഞ്ഞു. സംവേദനക്ഷമവും പ്രതികരണശേഷിയുള്ളതുമായ പ്രവർത്തന സംസ്കാരം സാമൂഹിക വെല്ലുവിളികൾ പരിഹരിക്കാനും ജനാധിപത്യ സ്ഥാപനങ്ങളെ ശക്തിപ്പെടുത്താനും സഹായിക്കുമെന്നും അദ്ദേഹം വ്യക്തമാക്കി.
നേതൃത്വസ്ഥാനങ്ങളിൽ കൂടുതൽ സ്ത്രീകൾ എത്തണം
രാജ്യത്തിന്റെ എല്ലാ മേഖലകളിലും കൂടുതൽ സ്ത്രീകൾ നേതൃത്വസ്ഥാനങ്ങളിലെത്തണമെന്നത് കൂട്ടായ ലക്ഷ്യമായി തുടരണമെന്ന് ഓം ബിർള പറഞ്ഞു. തുടർച്ചയായ ശ്രമങ്ങളിലൂടെ ദേശീയ ജീവിതത്തിന്റെ എല്ലാ മേഖലകളിലും സ്ത്രീകൾ കൂടുതൽ നേതൃത്വസ്ഥാനങ്ങളിലേക്ക് എത്തുമെന്ന് അദ്ദേഹം പ്രത്യാശ പ്രകടിപ്പിച്ചു.
ദേശീയ വനിതാ കമ്മീഷൻ അധ്യക്ഷ വിജയ രഹത്കർ, ഹരിയാന ഭക്ഷ്യ-പൊതുവിതരണ-ഉപഭോക്തൃകാര്യ സ്വതന്ത്ര ചുമതലയുള്ള സഹമന്ത്രി രാജേഷ് നഗർ എന്നിവരും ചടങ്ങിൽ പങ്കെടുത്തു. 20 സംസ്ഥാനങ്ങളിൽ നിന്നും രണ്ട് കേന്ദ്രഭരണ പ്രദേശങ്ങളിൽ നിന്നുമായി ഏകദേശം 200 വനിതാ നിയമസഭാംഗങ്ങളും ശിൽപ്പശാലയിൽ പങ്കെടുത്തു.
.
