ആലപ്പുഴ, സെപ്റ്റംബർ 6 –

കരുവാറ്റയിൽ ശിവൻകുട്ടി ചെട്ടിയാരെ കൊലപ്പെടുത്തിയ കേസിൽ കൂടുതൽ വെളിപ്പെടുത്തലുമായി പ്രതികളായ ആൺകുട്ടികൾ. കൊലപാതകത്തിന് ശേഷം വീട്ടിൽനിന്ന് പെർഫ്യൂം ബോട്ടിലും മേക്കപ്പ് കിറ്റും മോഷ്ടിച്ചെന്നാണ് പൊലീസിന് നൽകിയ മൊഴി. പ്രതീക്ഷിച്ചത്ര പണം കിട്ടാതിരുന്നതിനെ തുടർന്നാണ് ഇവയും എടുത്തതെന്നാണ് മൊഴി. അലമാരയിൽ നിന്ന് നാലരപ്പവൻ സ്വർണവും 4,800 രൂപയും ലഭിച്ചതായും പ്രതികൾ പറഞ്ഞു.

പ്രതീക്ഷിച്ചത് കൂടുതൽ പണം

ശിവൻകുട്ടിയുടെ വീട്ടിൽനിന്ന് കൂടുതൽ പണം ലഭിക്കുമെന്നാണ് പ്രതികൾ കരുതിയിരുന്നതെന്ന് പൊലീസ് പറയുന്നു. എന്നാൽ അലമാരയിൽനിന്ന് ലഭിച്ചത് 4,800 രൂപയും നാലരപ്പവൻ സ്വർണവുമാണ്. പണം പ്രതികൾക്കിടയിൽ വീതംവച്ചു. കൊച്ചുമകളുടെ ആൺസുഹൃത്താണ് തുക പങ്കിട്ടത്. ഒപ്പമുണ്ടായിരുന്ന രണ്ട് പേർക്ക് 800 രൂപ വീതം നൽകി ബാക്കി തുക ഇയാൾ എടുത്തെന്നാണ് മൊഴി.

65,000 രൂപ ലക്ഷ്യമിട്ടോ?

ശിവൻകുട്ടിയുടെ വിദേശത്തുള്ള മകൾ വീട് പണിക്കായി 65,000 രൂപ അയച്ചിരുന്നു. എന്നാൽ ഈ പണം ശിവൻകുട്ടി അന്നുതന്നെ കരാറുകാരന് കൈമാറിയിരുന്നു. ഈ തുക വീട്ടിൽ ഉണ്ടാകുമെന്ന പ്രതീക്ഷയിലാണോ കവർച്ച ആസൂത്രണം ചെയ്തതെന്ന് പൊലീസ് പരിശോധിക്കുന്നുണ്ട്.

കൊലപാതകത്തിന് പിന്നിൽ മറ്റൊരു കാരണവും

കവർച്ച ലക്ഷ്യമിട്ടാണ് വീട്ടിലെത്തിയതെങ്കിലും ശിവൻകുട്ടി കൊച്ചുമകളോട് മോശമായി പെരുമാറിയതാണ് കൊലപാതകത്തിന് കാരണമെന്നാണ് ആൺകുട്ടികൾ മൊഴി നൽകിയിരിക്കുന്നത്. കവർച്ചയും കൊലപാതകവും സംബന്ധിച്ച മൊഴികളിലെ വിവരങ്ങൾ പൊലീസ് പരിശോധിച്ചുവരികയാണ്. നേരത്തെ, കൊച്ചുമകളുടെ ആൺസുഹൃത്തുമായി ചേർന്നാണ് കൊലപാതകം ആസൂത്രണം ചെയ്തതെന്നാണ് അന്വേഷണത്തിൽ കണ്ടെത്തിയിരുന്നത്.

കസ്റ്റഡി അപേക്ഷയിൽ നാളെ തീരുമാനം

കേസിലെ മുഖ്യ ആസൂത്രകയെന്ന് പൊലീസ് പറയുന്ന 13കാരിയെയും ആൺകുട്ടികളെയും കസ്റ്റഡിയിൽ വേണമെന്ന അന്വേഷണ സംഘത്തിന്റെ അപേക്ഷ ജുവനൈൽ ജസ്റ്റിസ് ബോർഡ് പരിഗണിക്കുകയാണ്. ആൺകുട്ടികളുടെ മൊഴിയിലെ വൈരുദ്ധ്യങ്ങളിൽ വ്യക്തത വരുത്താൻ പെൺകുട്ടിയെ കസ്റ്റഡിയിൽ ചോദ്യം ചെയ്യണമെന്നാണ് പൊലീസിന്റെ ആവശ്യം. അപേക്ഷയിൽ ബോർഡ് നാളെ തീരുമാനം എടുക്കും.