ദുഷാൻബെ (താജിക്കിസ്ഥാൻ) / 2026 / ഒക്ടോബർ 21
സമൃദ്ധിയും അറിവും കരുത്തും കൈവരിക്കുന്നതിനൊപ്പം ലോകസമാധാനത്തിനും മനുഷ്യരാശിയുടെ ക്ഷേമത്തിനും പ്രതിബദ്ധമായ രാജ്യമായി ഇന്ത്യയെ മാറ്റാനാണ് കേന്ദ്രസർക്കാർ ശ്രമിക്കുന്നതെന്ന് പ്രതിരോധമന്ത്രി രാജ്നാഥ് സിങ്. ഒക്ടോബർ 20ന് താജിക്കിസ്ഥാൻ തലസ്ഥാനമായ ദുഷാൻബെയിൽ ഇന്ത്യൻ സമൂഹത്തെ അഭിസംബോധന ചെയ്യുകയായിരുന്നു അദ്ദേഹം. ‘വസുധൈവ കുടുംബകം’ എന്ന ആശയമാണ് ഇന്ത്യയ്ക്ക് വഴികാട്ടുന്നത്. പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള സാമ്പത്തിക പരിവർത്തനവും ഭരണപരിഷ്കാരങ്ങളും സാങ്കേതിക മുന്നേറ്റവും വർധിച്ചുവരുന്ന ആഗോള സ്വാധീനവും ഈ ലക്ഷ്യത്തിലേക്കുള്ള വഴിയൊരുക്കുകയാണെന്നും അദ്ദേഹം പറഞ്ഞു.
ആഗോള വളർച്ചയിൽ ഇന്ത്യയുടെ പങ്ക് ഉയരുന്നു
ലോകത്തെ പ്രധാന സമ്പദ്‌വ്യവസ്ഥകളിൽ പലതും മാന്ദ്യം നേരിടുമ്പോഴും ഇന്ത്യ ഏകദേശം 7.8 ശതമാനം വളർച്ച കൈവരിക്കുകയാണെന്ന് രാജ്നാഥ് സിങ് പറഞ്ഞു. ആഗോള സാമ്പത്തിക വളർച്ചയിൽ ഇന്ത്യയുടെ സംഭാവന 16 ശതമാനത്തിലേറെയാണ്. ആഗോള വ്യാപാരരംഗം മാറുന്നതിനിടെ 38 രാജ്യങ്ങളുമായി ഇന്ത്യ സ്വതന്ത്ര വ്യാപാര കരാറുകളിൽ ഏർപ്പെട്ടു. ഇതിലൂടെ ഇന്ത്യൻ നിർമാതാക്കൾക്കും ഉൽപാദകർക്കും പുതിയ വിപണികൾ തുറന്നുകിട്ടിയെന്നും അദ്ദേഹം വ്യക്തമാക്കി.
ബ്രിട്ടനുമായും യൂറോപ്യൻ യൂണിയനുമായുമുള്ള വ്യാപാര കരാറുകൾ ഈ വിപണികളിലേക്കുള്ള ഇന്ത്യൻ കയറ്റുമതിയുടെ 99 ശതമാനത്തിനും തീരുവ ഒഴിവാക്കുമെന്നാണ് പ്രതീക്ഷ. ഇത് വ്യാപാരസാധ്യതകളും ആഗോള സാമ്പത്തിക പങ്കാളിത്തവും ശക്തിപ്പെടുത്തും. പന്ത്രണ്ട്–പതിമൂന്ന് വർഷം മുമ്പ് മൊത്ത ആഭ്യന്തര ഉൽപാദനത്തിന്റെ നാല് ശതമാനത്തിലധികമായിരുന്ന കറന്റ് അക്കൗണ്ട് കമ്മി കഴിഞ്ഞ സാമ്പത്തികവർഷം 0.61 ശതമാനമായി കുറഞ്ഞു. വിദേശനാണ്യ ശേഖരം 70,000 കോടി അമേരിക്കൻ ഡോളർ കടന്നു. ബാങ്കിങ് സംവിധാനം എക്കാലത്തെയും ശക്തമായ നിലയിലാണെന്നും മന്ത്രി പറഞ്ഞു.
നയസ്തംഭനത്തിൽനിന്ന് പരിഷ്കാരങ്ങളുടെ വേഗത്തിലേക്ക്
കഴിഞ്ഞ പത്തുവർഷത്തിനിടെ ഭരണത്തിലും നയരൂപീകരണത്തിലും വലിയ മാറ്റമുണ്ടായെന്ന് രാജ്നാഥ് സിങ് പറഞ്ഞു. വ്യക്തമായ നയദിശയോടെ, ‘നയസ്തംഭന’ത്തിന്റെ കാലത്തുനിന്ന് ‘പരിഷ്കാരങ്ങളുടെ അതിവേഗ പാത’യിലേക്ക് ഇന്ത്യ മാറി. പരിഷ്കാരങ്ങൾ സർക്കാരിന് നിർബന്ധത്തിന്റെ പേരിലുള്ള നടപടികളല്ലെന്നും ഉറച്ച ബോധ്യത്തിന്റെ ഭാഗമാണെന്നും അദ്ദേഹം വ്യക്തമാക്കി.
എല്ലാവരെയും ഉൾക്കൊള്ളുന്ന വികസനത്തിലൂടെ കഴിഞ്ഞ ദശകത്തിൽ ഏകദേശം 25 കോടി പേർ ദാരിദ്ര്യത്തിൽനിന്ന് പുറത്തുവന്നതായും മന്ത്രി പറഞ്ഞു. ജൻധൻ ബാങ്ക് അക്കൗണ്ടുകൾ, ആധാർ, മൊബൈൽ എന്നിവ ചേർന്ന സംവിധാനവും നേരിട്ടുള്ള ആനുകൂല്യ കൈമാറ്റവും സർക്കാർ സഹായം ഗുണഭോക്താക്കളുടെ അക്കൗണ്ടുകളിൽ നേരിട്ടെത്തിക്കുന്നു. ഇതിലൂടെ അഴിമതി കുറയുകയും സുതാര്യതയും സൗകര്യവും വർധിക്കുകയും ചെയ്തുവെന്നും അദ്ദേഹം വിശദീകരിച്ചു.
പ്രതിരോധ ഉൽപാദനത്തിലും സംരംഭങ്ങളിലും മുന്നേറ്റം
ഇന്ത്യയുടെ പ്രതിരോധ കയറ്റുമതി റെക്കോർഡ് തുകയായ 38,424 കോടി രൂപയിലെത്തിയെന്ന് രാജ്നാഥ് സിങ് അറിയിച്ചു. പ്രതിരോധ ഉൽപാദനം 1.80 ലക്ഷം കോടി രൂപയായി ഉയർന്നു. 2014ന് മുമ്പ് ഏതാനും നൂറുകൾ മാത്രമായിരുന്ന സ്റ്റാർട്ടപ്പുകളുടെ എണ്ണം ഇപ്പോൾ രണ്ടരലക്ഷത്തിലധികമാണ്. ഇവയിൽ പകുതിയോളം ചെറുനഗരങ്ങളിൽനിന്നും പട്ടണങ്ങളിൽനിന്നുമാണ്. 45 ശതമാനത്തിലധികം സ്റ്റാർട്ടപ്പുകളിൽ കുറഞ്ഞത് ഒരു വനിതയെങ്കിലും ഡയറക്ടറായോ പങ്കാളിയായോ ഉണ്ടെന്നും അദ്ദേഹം പറഞ്ഞു.
കുറഞ്ഞ നിരക്കിലുള്ള മൊബൈൽ ഡാറ്റയും വിപുലമായ കണക്റ്റിവിറ്റിയും കൂടുതൽ ഇന്ത്യക്കാർക്ക് അവസരങ്ങൾ ലഭ്യമാക്കി. ഇത് പുതുമകൾക്കും പുതിയ പ്രതിഭകൾക്കും പുതിയ പരിഹാരങ്ങൾക്കും വഴിയൊരുക്കി. പുനരുപയോഗ ഊർജശേഷി 2014ലെ ഏകദേശം 75 ജിഗാവാട്ടിൽനിന്ന് ഏതാണ്ട് 300 ജിഗാവാട്ടായി ഉയർന്നു. സെമിക്കോൺ ഇന്ത്യ പദ്ധതിയിലൂടെയും ഇന്ത്യ സെമികണ്ടക്ടർ മിഷനിലൂടെയും ചിപ്പ് നിർമാണത്തിലേക്ക് രാജ്യം വേഗത്തിൽ മുന്നേറുകയാണ്. കപ്പലുകളും ചിപ്പുകളും നിർമിക്കുന്നതിലൂടെ തന്ത്രപ്രധാന മേഖലകളിലെ സ്ഥാനം ശക്തിപ്പെടുത്തുകയാണെന്നും മന്ത്രി പറഞ്ഞു.
ഡിജിറ്റൽ ഇടപാടുകളിൽനിന്ന് ബഹിരാകാശത്തേക്കും കുതിപ്പ്
തത്സമയ ഡിജിറ്റൽ ഇടപാടുകളുടെ ആഗോള കേന്ദ്രമായി ഇന്ത്യ മാറിയെന്ന് രാജ്നാഥ് സിങ് പറഞ്ഞു. യൂപിഐ ഇടപാടുകളുടെ മൂല്യം 2016–17ലെ 7,000 കോടി രൂപയിൽനിന്ന് 2025–26ൽ 314 ലക്ഷം കോടി രൂപയായി ഉയർന്നു. കടലാസിന്റെയും പണത്തിന്റെയും ഉപയോഗം കുറച്ച് ഇടപാടുകൾ തടസ്സമില്ലാതെ നടത്താവുന്ന സമ്പദ്‌വ്യവസ്ഥയിലേക്കുള്ള മാറ്റത്തിന്റെ വ്യാപ്തിയാണ് ഇത് കാണിക്കുന്നത്. റെയിൽവേ, റോഡുകൾ, വിമാനത്താവളങ്ങൾ, തുറമുഖങ്ങൾ, ബ്രോഡ്ബാൻഡ് കണക്റ്റിവിറ്റി എന്നിവയിലും അഭൂതപൂർവമായ വികസനമുണ്ടായെന്നും അദ്ദേഹം പറഞ്ഞു.
ശാസ്ത്രത്തിലും ബഹിരാകാശ സാങ്കേതികവിദ്യയിലും ഇന്ത്യ നേടിയ നേട്ടങ്ങൾ വിശദീകരിച്ച മന്ത്രി ചന്ദ്രയാൻ, ആദിത്യ എൽ വൺ ദൗത്യങ്ങളുടെ വിജയങ്ങൾ എടുത്തുപറഞ്ഞു. മനുഷ്യരെ ബഹിരാകാശത്തെത്തിക്കുന്ന ഗഗൻയാൻ ദൗത്യത്തിന്റെ തയ്യാറെടുപ്പുകളിലെ പുരോഗതിയിൽ അദ്ദേഹം ആത്മവിശ്വാസം പ്രകടിപ്പിച്ചു. ലോകമെമ്പാടുമുള്ള രാജ്യങ്ങൾ ശക്തവും അനുകൂലവുമായ ബന്ധം സ്ഥാപിക്കാൻ ആഗ്രഹിക്കുന്ന ആത്മവിശ്വാസമുള്ള രാജ്യമാണ് ഇന്നത്തെ ഇന്ത്യയെന്നും അദ്ദേഹം പറഞ്ഞു.
ഇന്ത്യ–താജിക്കിസ്ഥാൻ സൗഹൃദത്തിന് പ്രവാസികളുടെ കരുത്ത്
ഇന്ത്യൻ വംശജർ രാജ്യത്തിന്റെ മൂല്യങ്ങളും പാരമ്പര്യങ്ങളും ലോകമെങ്ങും എത്തിക്കുന്ന സാംസ്കാരിക അംബാസഡർമാരാണെന്ന് രാജ്നാഥ് സിങ് പറഞ്ഞു. താമസിക്കുന്ന രാജ്യങ്ങളുടെ വികസനത്തിനും അവർ സംഭാവന നൽകുന്നു. ഇന്ത്യയും താജിക്കിസ്ഥാനും തമ്മിലുള്ള സാംസ്കാരിക ബന്ധവും ജനങ്ങൾ തമ്മിലുള്ള അടുപ്പവും വർധിപ്പിക്കാനുള്ള ശ്രമങ്ങളെ അദ്ദേഹം അഭിനന്ദിച്ചു. ഇന്ത്യൻ പാട്ടുകൾ, സംഗീതം, സാഹിത്യം, സിനിമ എന്നിവയ്ക്ക് താജിക് ജനങ്ങൾക്കിടയിലുള്ള ജനപ്രീതി ഇരുരാജ്യങ്ങളുടെയും സൗഹൃദം കൂടുതൽ ഉറപ്പിക്കുന്നു. ദീർഘകാലമായി നിലനിൽക്കുന്ന ഊഷ്മളബന്ധത്തിൽ ഇന്ത്യൻ സമൂഹത്തിന്റെ സംഭാവന പ്രധാന കണ്ണിയാണെന്നും അദ്ദേഹം വ്യക്തമാക്കി.
താജിക്കിസ്ഥാനിൽനിന്ന് ആദ്യമായി പത്മശ്രീ നേടിയ പ്രമുഖ ഭാരതപഠന വിദഗ്ധൻ പ്രൊഫസർ ഹബീബുല്ലോ റജബോവിനെ ചടങ്ങിൽ മന്ത്രി ആദരിച്ചു. ഹിന്ദി സാഹിത്യത്തിനും വിദ്യാഭ്യാസത്തിനും അദ്ദേഹം നൽകിയ സംഭാവനകളും ഭാഷാശാസ്ത്രത്തിൽ നടത്തിയ ആഴത്തിലുള്ള പഠനവും രാജ്നാഥ് സിങ് എടുത്തുപറഞ്ഞു. ഇന്ത്യൻ, താജിക് കലാകാരന്മാരുടെ സാംസ്കാരിക പരിപാടികളും ചടങ്ങിന്റെ ഭാഗമായി നടന്നു.
