ഇന്ത്യ കോഡ് പോർട്ടൽ നവീകരിച്ചു; നിയമങ്ങൾ ഇനി കൂടുതൽ എളുപ്പത്തിൽ തിരയാം

ന്യൂഡൽഹി /2026  / ഓഗസ്റ്റ് 14

കേന്ദ്ര നിയമ-നീതി സഹമന്ത്രി സ്വതന്ത്ര ചുമതലയുള്ള അർജുൻ റാം മേഘ്‌വാൾ നവീകരിച്ച ഇന്ത്യ കോഡ് പോർട്ടൽ 2026 ഓഗസ്റ്റ് 13ന് ന്യൂഡൽഹിയിലെ കർത്തവ്യ ഭവൻ രണ്ടിൽ ഉദ്ഘാടനം ചെയ്തു. രാജ്യത്തെ നിയമങ്ങൾ കൂടുതൽ ലളിതമായും വേഗത്തിലും പൊതുജനങ്ങൾക്ക് ലഭ്യമാക്കുകയാണ് നവീകരണത്തിന്റെ പ്രധാന ലക്ഷ്യം.

.കൃത്രിമബുദ്ധി തിരച്ചിലും ശബ്ദസൗകര്യവും

അറ്റോർണി ജനറൽ ആർ. വെങ്കടരമണി, നിയമനിർമാണ വകുപ്പിന്റെയും നിയമകാര്യ വകുപ്പിന്റെയും സെക്രട്ടറി ഡോ. രാജീവ് മണി, അഡീഷണൽ സെക്രട്ടറി ഡോ. മനോജ് കുമാർ തുടങ്ങിയവർ ചടങ്ങിൽ പങ്കെടുത്തു. നാഷണൽ ഇൻഫർമാറ്റിക്സ് സെന്റർ ഡയറക്ടർ ജനറൽ പ്രിയങ്ക് ഭാരതി, ഇന്ത്യഎഐ മിഷൻ ചീഫ് ഓപ്പറേറ്റിങ് ഓഫീസർ സുദീപ് ശ്രീവാസ്തവ എന്നിവരും സന്നിഹിതരായിരുന്നു. കൃത്രിമബുദ്ധി സഹായമുള്ള തിരച്ചിൽ, അർഥാധിഷ്ഠിത തിരച്ചിൽ, ശബ്ദത്തിലൂടെയുള്ള തിരച്ചിൽ, മെച്ചപ്പെട്ട നാവിഗേഷൻ, ബഹുഭാഷാ സൗകര്യം എന്നിവയാണ് പുതിയ പോർട്ടലിന്റെ പ്രധാന സവിശേഷതകൾ.

.നിയമങ്ങൾ കണ്ടെത്തുന്നതും മനസ്സിലാക്കുന്നതും എളുപ്പമാകും

ഭരണഘടനയും കേന്ദ്ര നിയമങ്ങളും ചട്ടങ്ങളും മറ്റ് നിയമനിർമാണ വിവരങ്ങളും ജനങ്ങൾക്ക് എളുപ്പത്തിൽ ലഭ്യമാക്കുന്ന വിശ്വസനീയ വേദിയാണ് ഇന്ത്യ കോഡ് പോർട്ടലെന്ന് അർജുൻ റാം മേഘ്‌വാൾ പറഞ്ഞു. നിയമത്തിലേക്കുള്ള പ്രവേശനം നീതിയിലേക്കുള്ള ആദ്യപടിയാണെന്ന് ഡോ. മനോജ് കുമാറും ചൂണ്ടിക്കാട്ടി. നിയമങ്ങൾ ലഭ്യമാകുന്നതിന് പുറമേ അവ കണ്ടെത്താനും പരിശോധിക്കാനും മനസ്സിലാക്കാനും ഉപയോഗിക്കാനും എളുപ്പമാകണമെന്നതാണ് നവീകരണത്തിന്റെ ലക്ഷ്യം.

.ഭേദഗതികളും നിയമചരിത്രവും ഒരിടത്ത്

കേന്ദ്ര നിയമങ്ങളും അനുബന്ധ ചട്ടങ്ങളും സംസ്ഥാന നിയമങ്ങളും കേന്ദ്രഭരണ പ്രദേശങ്ങളിലെ നിയമങ്ങളും ഉൾക്കൊള്ളുന്ന ഏകീകൃത ഡിജിറ്റൽ ശേഖരമാണ് ഇന്ത്യ കോഡ്. പുതിയ സംവിധാനത്തിൽ നിയമഭേദഗതികളും നിയമനിർമാണ ചരിത്രവും പരിശോധിക്കാം. പ്രധാന നിയമങ്ങളുമായി ബന്ധപ്പെട്ട അനുബന്ധ ചട്ടങ്ങളിലേക്കും നേരിട്ട് എത്താം. ഇ-ഗസറ്റ് സംവിധാനവുമായി ബന്ധിപ്പിക്കൽ, മെച്ചപ്പെട്ട രേഖാ കാഴ്ച, ക്യുആർ അധിഷ്ഠിത പ്രവേശനം, പൊതുജന അഭിപ്രായം അറിയിക്കാനുള്ള സംവിധാനം എന്നിവയും ഉൾപ്പെടുത്തിയിട്ടുണ്ട്.

.22 ഭാഷകളിലേക്ക് പ്രവേശനം ലക്ഷ്യം

ഭരണഘടനയുടെ എട്ടാം പട്ടികയിലുള്ള 22 ഭാഷകളിലും കൃത്രിമബുദ്ധിയുടെ സഹായത്തോടെ നിയമവിവരങ്ങൾ ലഭ്യമാക്കുകയാണ് അടുത്ത ലക്ഷ്യം. വെറും നിയമരേഖകളുടെ ശേഖരമെന്ന നിലയിൽ നിന്ന് പൊതുജനങ്ങൾക്ക് ഉപയോഗിക്കാവുന്ന സമഗ്ര ഡിജിറ്റൽ നിയമകവാടമായി ഇന്ത്യ കോഡിനെ മാറ്റാനാണ് ശ്രമം. സുതാര്യതയും നിയമബോധവും പൊതുജന പങ്കാളിത്തവും നിയമ-പൊതുസേവനങ്ങളുടെ കാര്യക്ഷമതയും ഇതിലൂടെ മെച്ചപ്പെടുമെന്നാണ് കേന്ദ്രസർക്കാരിന്റെ വിലയിരുത്തൽ.

.