ന്യൂഡൽഹി  2026 /ഓഗസ്റ്റ് 05

ഇന്ത്യയിൽ വൈദ്യുത വാഹനങ്ങളിലേക്കുള്ള മാറ്റം അതിവേഗം മുന്നേറുകയാണ്. 2016-ൽ ഏകദേശം 50,000 വാഹനങ്ങൾ വിറ്റ സ്ഥാനത്ത് 2025-ൽ വിൽപ്പന 23 ലക്ഷമായി. സാമ്പത്തിക വളർച്ച, ഊർജസുരക്ഷ, ശുദ്ധമായ ഗതാഗതം എന്നിവ ലക്ഷ്യമിട്ടുള്ള ഈ മാറ്റത്തിന് കേന്ദ്രസർക്കാരിന്റെ ആനുകൂല്യങ്ങളും സാങ്കേതിക പുരോഗതിയും ജനങ്ങളുടെ പരിസ്ഥിതി ബോധവും കരുത്താകുന്നു. 2020-ൽ 12 ലക്ഷം ഡോളറായിരുന്ന വൈദ്യുത വാഹന കയറ്റുമതി 2024-ൽ 8.4 കോടി ഡോളറായി ഉയർന്നു.

യാത്രാരീതികൾ മാറ്റുന്ന വൈദ്യുത മുന്നേറ്റം

തിരക്കേറിയ നഗരങ്ങളിലെ ദൈനംദിന യാത്രയും ചെറുപട്ടണങ്ങളിലെ അവസാനഘട്ട ഗതാഗതവും വൈദ്യുത വാഹനങ്ങൾ മാറ്റിമറിക്കുകയാണ്. ബാറ്ററിയിൽ സംഭരിച്ച വൈദ്യുതി ഉപയോഗിച്ച് മോട്ടോർ പ്രവർത്തിപ്പിക്കുന്ന വാഹനമാണ് വൈദ്യുത വാഹനം. പുറത്തുനിന്നുള്ള വൈദ്യുത സ്രോതസ്സിൽനിന്ന് ഇത് വീണ്ടും ചാർജ് ചെയ്യാം. പൂർണ വൈദ്യുത ബാറ്ററി വാഹനങ്ങൾ, എൻജിനും വൈദ്യുത മോട്ടോറും ചേർന്ന ഹൈബ്രിഡ് വാഹനങ്ങൾ, പുറത്തുനിന്ന് ചാർജ് ചെയ്യാവുന്ന പ്ലഗ്-ഇൻ ഹൈബ്രിഡുകൾ, രാസോർജത്തിൽനിന്ന് വൈദ്യുതി ഉത്പാദിപ്പിക്കുന്ന ഇന്ധനകോശ വാഹനങ്ങൾ എന്നിവയാണ് പ്രധാന വിഭാഗങ്ങൾ.

ഇന്ത്യയുടെ വൈദ്യുത വാഹനയാത്ര 2015-ൽ ദേശീയ വൈദ്യുത ഗതാഗത ദൗത്യപദ്ധതിയും ഫെയിം പദ്ധതിയും ആരംഭിച്ചതോടെയാണ് ശക്തമായത്. പെട്രോളിയം ഇറക്കുമതിച്ചെലവ് കുറയ്ക്കുക, നഗരങ്ങളിലെ വായുമലിനീകരണം നേരിടുക, രാജ്യത്തെ മൊത്തം പുറന്തള്ളലിന്റെ ഏകദേശം ഒമ്പത് ശതമാനം വരുന്ന ഗതാഗതമേഖലയിലെ ഹരിതഗൃഹവാതക പുറന്തള്ളൽ കുറയ്ക്കുക എന്നിവയായിരുന്നു ലക്ഷ്യം. ഫെയിം പദ്ധതിയുടെ ഒന്നാംഘട്ടം 2019 മാർച്ചുവരെയും രണ്ടാംഘട്ടം 2024 ഏപ്രിൽവരെയും നടപ്പാക്കി. വാങ്ങുന്നവർക്ക് ആനുകൂല്യം, ചാർജിങ് സൗകര്യം, നിർമാണപിന്തുണ എന്നിവ പദ്ധതി നൽകി.

2015-16 സാമ്പത്തികവർഷത്തിൽ 0.08 ശതമാനമായിരുന്ന വൈദ്യുത വാഹനസ്വീകരണം 2025-26ൽ 8.26 ശതമാനമായി. കോവിഡ് കാലത്തിനു പിന്നാലെ 2021-22 സാമ്പത്തികവർഷത്തിൽ കൂടുതൽ ആനുകൂല്യങ്ങളും വാഹനലഭ്യതയും ലഭിച്ചതോടെ വളർച്ച വേഗത്തിലായി. തുടക്കത്തിൽ ഇ-റിക്ഷകളായിരുന്നു മുന്നിൽ. പിന്നീട് വൈദ്യുത ഇരുചക്രവാഹനങ്ങൾ സ്വകാര്യ, വാണിജ്യ ഗതാഗതത്തിന്റെ പ്രധാന ഭാഗമായി മാറി.

വിൽപ്പനയിലും കയറ്റുമതിയിലും വലിയ കുതിപ്പ്

ആഗോളതലത്തിൽ വൈദ്യുത വാഹനങ്ങളുടെ വിൽപ്പന 2016-ലെ 9.18 ലക്ഷത്തിൽനിന്ന് 2024-ൽ 1.878 കോടിയായി, ഏകദേശം ഇരുപത് മടങ്ങ് ഉയർന്നു. ഇന്ത്യയിൽ ഇതേ കാലയളവിൽ വളർച്ച 46 മടങ്ങായിരുന്നു. 2025-ൽ നാലുലക്ഷത്തിലധികം വാഹനങ്ങളുമായി ഉത്തർപ്രദേശ് രാജ്യത്തെ ഏറ്റവും വലിയ വിപണിയായി. ദേശീയ വിൽപ്പനയുടെ 18 ശതമാനമാണിത്. 2.66 ലക്ഷം വാഹനങ്ങളുമായി മഹാരാഷ്ട്രയും രണ്ടുലക്ഷം വാഹനങ്ങളുമായി കർണാടകയും പിന്നാലെയുണ്ട്.

2020-ൽ ആഗോള ശരാശരിയുടെ അഞ്ചിലൊന്ന് മാത്രമായിരുന്ന ഇന്ത്യയുടെ വൈദ്യുത വാഹനവ്യാപനം 2024-ൽ അഞ്ചിൽ രണ്ടിലേറെയായി. 2025-ൽ വിറ്റ 12.8 ലക്ഷം മോട്ടോർ ഇരുചക്രവാഹനങ്ങളും എട്ടുലക്ഷം മുച്ചക്രവാഹനങ്ങളുമാണ് വളർച്ചയിൽ പ്രധാന പങ്കുവഹിച്ചത്. കഴിഞ്ഞ പത്തുവർഷത്തെ വൈദ്യുത വാഹന രജിസ്ട്രേഷനിൽ വാർഷിക സംയോജിത വളർച്ചാനിരക്ക് 62 ശതമാനത്തിലേറെയാണ്. നയപിന്തുണ, സാങ്കേതിക മുന്നേറ്റം, ഉപഭോക്താക്കളുടെ വിശ്വാസം എന്നിവയാണ് ഇതിന് പിന്നിൽ.

ഇന്ത്യൻ വൈദ്യുത വാഹനങ്ങൾ വിദേശവിപണിയിലും ശക്തമായ സാന്നിധ്യം നേടുന്നു. 2020-ലെ 12 ലക്ഷം ഡോളറിൽനിന്ന് 2024-ൽ കയറ്റുമതി 8.4 കോടി ഡോളറായി. നേപ്പാൾ, ഇന്തോനേഷ്യ, ജപ്പാൻ എന്നിവയാണ് പ്രധാന വിപണികൾ. 2026 ജൂലൈയിലെ കണക്കനുസരിച്ച് രാജ്യത്തെ 52,718 പൊതുചാർജിങ് കേന്ദ്രങ്ങളിൽ 16,561 എണ്ണം അതിവേഗ ചാർജിങ് സൗകര്യമുള്ളവയാണ്. ഇ-അമൃത് സംവിധാനം ഉപയോക്താവിന്റെ സ്ഥാനം അടിസ്ഥാനമാക്കി സമീപത്തെ ചാർജിങ് കേന്ദ്രം കണ്ടെത്താൻ സഹായിക്കുന്നു.

ഹ്യുണ്ടായ് മോട്ടോർ ഇന്ത്യ 2024-ൽ മുംബൈ, പുണെ, അഹമ്മദാബാദ്, ഹൈദരാബാദ്, ഗുരുഗ്രാം, ബെംഗളൂരു എന്നിവിടങ്ങളിലും പ്രധാന ദേശീയപാതകളിലുമായി 11 അതിവേഗ ചാർജിങ് കേന്ദ്രങ്ങൾ സ്ഥാപിച്ചു. സംസ്ഥാനങ്ങളുടെയും കേന്ദ്രഭരണപ്രദേശങ്ങളുടെയും പുരോഗതി വിലയിരുത്താൻ നീതി ആയോഗ് 2025 ഓഗസ്റ്റിൽ ഇന്ത്യ വൈദ്യുത ഗതാഗത സൂചിക പുറത്തിറക്കി. ഗതാഗത വൈദ്യുതീകരണം, ചാർജിങ് സജ്ജത, ഗവേഷണവും നവീകരണവും ഉൾപ്പെടുന്ന 16 സൂചകങ്ങളിലാണ് വിലയിരുത്തൽ. ഡൽഹി, മഹാരാഷ്ട്ര, ചണ്ഡീഗഢ് എന്നിവ മുൻനിര പ്രദേശങ്ങളായി.

നിർമാണകേന്ദ്രമായി മാറുന്ന ഇന്ത്യ

വാഹനങ്ങൾ കൂട്ടിച്ചേർക്കുന്ന വിപണി എന്ന നിലയിൽനിന്ന് സമഗ്ര വൈദ്യുത വാഹന നിർമാണകേന്ദ്രമായി ഇന്ത്യ മാറുകയാണ്. ബാറ്ററി പാക്കുകൾ, മോട്ടോറുകൾ, ഡ്രൈവ്‌ട്രെയിനുകൾ, പവർ ഇലക്ട്രോണിക്സ്, വയറിങ്, ചാർജിങ് ഉപകരണങ്ങൾ എന്നിവ രാജ്യത്തിനകത്ത് നിർമിക്കുന്നു. ടാറ്റ മോട്ടോഴ്സ്, മഹീന്ദ്ര, ടി.വി.എസ്., ബജാജ് ഓട്ടോ തുടങ്ങിയ കമ്പനികൾ ഗവേഷണം, ഗിഗാ ഫാക്ടറികൾ, പ്രത്യേക വൈദ്യുത വാഹന പ്ലാറ്റ്ഫോമുകൾ എന്നിവയിൽ നിക്ഷേപം വർധിപ്പിക്കുന്നു.

വിൻഫാസ്റ്റ്, ടെസ്‌ല, കൊറിയൻ-ജാപ്പനീസ് ബാറ്ററി കമ്പനികൾ എന്നിവയും ഇന്ത്യയിൽ വലിയ നിർമാണസാധ്യതകൾ പരിശോധിക്കുന്നു. ഇതിലൂടെ പ്രാദേശിക ഉത്പാദനം കൂടുകയും ചെലവ് കുറയുകയും ആഗോള വിതരണശൃംഖലയിൽ ഇന്ത്യയുടെ സ്ഥാനം ശക്തമാകുകയും ചെയ്യുന്നു. 2025 ഓഗസ്റ്റിൽ സുസുക്കിയുടെ ഇന്ത്യയിൽ നിർമിച്ച ആദ്യ ആഗോള ബാറ്ററി വൈദ്യുത വാഹനമായ ‘ഇ വിറ്റാര’ അവതരിപ്പിച്ചു. യൂറോപ്പും ജപ്പാനും ഉൾപ്പെടെ നൂറിലധികം രാജ്യങ്ങളിലേക്ക് വാഹനം കയറ്റുമതി ചെയ്യാനാണ് ലക്ഷ്യം. ഇതോടെ സുസുക്കിയുടെ ആഗോള വൈദ്യുത വാഹന നിർമാണകേന്ദ്രമായി ഇന്ത്യ മാറി.

രാജ്യത്ത് ഏകദേശം 400 വൈദ്യുത വാഹന സ്റ്റാർട്ടപ്പുകൾ പ്രവർത്തിക്കുന്നു. ചാർജിങ് ശൃംഖല, ബാറ്ററി നവീകരണം, കുറഞ്ഞ ചെലവിലുള്ള നിർമാണം, വിവരാധിഷ്ഠിത സേവനങ്ങൾ എന്നിവയിൽ ഇവ പ്രവർത്തിക്കുന്നു. ശബ്ദനിർദേശമുള്ള ദിശാനിർണയം, തത്സമയ ഗതാഗതവിവരം, ബുദ്ധിപരമായ യാത്രാമാർഗ ആസൂത്രണം, ബന്ധിത സൗകര്യങ്ങൾ, ഭിന്നശേഷിസൗഹൃദ നിയന്ത്രണങ്ങൾ എന്നിവയ്ക്കായി നിർമിതബുദ്ധിയും ഉപയോഗിക്കുന്നു.

2025 സാമ്പത്തികവർഷത്തിൽ ഈ മേഖല 140 കോടി ഡോളറിലധികം നിക്ഷേപം നേടി. മുൻവർഷത്തെക്കാൾ ഏകദേശം 27 ശതമാനം കൂടുതലാണിത്. വൈദ്യുത വാഹന നിർമാതാക്കൾക്ക് മാത്രം ഏകദേശം 120 കോടി ഡോളർ ലഭിച്ചു. നിക്ഷേപത്തിൽ ഡൽഹിയാണ് നഗരങ്ങളിൽ മുന്നിലെത്തിയത്.

പദ്ധതികളും ആനുകൂല്യങ്ങളും കരുത്താകുന്നു

2025 ഡിസംബറോടെ 29 സംസ്ഥാനങ്ങളും കേന്ദ്രഭരണപ്രദേശങ്ങളും വൈദ്യുത വാഹനനയം പ്രഖ്യാപിച്ചു. നാലിടങ്ങളിൽ നയം കരട് ഘട്ടത്തിലായിരുന്നു. 15 മുതൽ 25 ശതമാനംവരെ മൂലധനസഹായം, മുൻഗണനാ ഭൂമിവിതരണം, മുദ്രപ്പത്ര നികുതിയിളവ്, സംസ്ഥാന ചരക്കുസേവന നികുതിയിൽ നൂറുശതമാനംവരെ തിരിച്ചുനൽകൽ തുടങ്ങിയ ആനുകൂല്യങ്ങളുണ്ട്. തമിഴ്നാട്, മഹാരാഷ്ട്ര, കർണാടക, ഗുജറാത്ത്, ഹരിയാന, ഉത്തർപ്രദേശ് എന്നിവ പ്രധാന നിർമാണകേന്ദ്രങ്ങളായി.

ഡൽഹിയിലെ പഴയതും കൂടുതൽ മലിനീകരണമുണ്ടാക്കുന്നതുമായ ട്രക്കുകളും ബസുകളും മാറ്റാൻ 2026 ജൂണിൽ 9,585 കോടി രൂപയുടെ രണ്ടുവർഷ പദ്ധതി അംഗീകരിച്ചു. ഡൽഹി, ഹരിയാന, രാജസ്ഥാൻ, ഉത്തർപ്രദേശ് എന്നിവ ഉൾപ്പെടുന്ന ദേശീയ തലസ്ഥാനമേഖലയിലെ 1.91 ലക്ഷം ട്രക്കുകളും 16,329 ബസുകളും ഉൾപ്പെടെ ഏകദേശം 2.07 ലക്ഷം വാണിജ്യവാഹനങ്ങൾ മാറ്റാനാണ് ലക്ഷ്യം.

2025-ലെ ദേശീയ നിർമാണദൗത്യം വൈദ്യുത വാഹനങ്ങളെ നവീകരണാധിഷ്ഠിത വളർച്ചയുടെ പ്രധാന മേഖലയായി കണക്കാക്കുന്നു. 2035-ഓടെ മൊത്ത ആഭ്യന്തര ഉത്പാദനത്തിൽ നിർമാണമേഖലയുടെ പങ്ക് 2023-ലെ 12.9 ശതമാനത്തിൽനിന്ന് 25 ശതമാനമാക്കുക, 14.3 കോടി തൊഴിലവസരങ്ങൾ സൃഷ്ടിക്കുക, ചരക്കുകയറ്റുമതി 1.2 ലക്ഷം കോടി ഡോളറാക്കുക എന്നിവയാണ് ലക്ഷ്യങ്ങൾ.

2024-ൽ പ്രഖ്യാപിച്ച പി.എം. ഇ-ഡ്രൈവ് പദ്ധതിക്ക് 10,900 കോടി രൂപയാണ് വകയിരുത്തിയത്. വൈദ്യുത ഇരുചക്ര, മുച്ചക്ര വാഹനങ്ങൾ, ട്രക്കുകൾ, ബസുകൾ, ആംബുലൻസുകൾ എന്നിവയ്ക്ക് പദ്ധതി പിന്തുണ നൽകുന്നു. 28 ലക്ഷത്തിലധികം വാഹനങ്ങളെയാണ് സഹായിക്കാൻ ലക്ഷ്യമിട്ടത്. 2026 ജനുവരിയോടെ 22.12 ലക്ഷം വാഹനങ്ങൾ വിറ്റു. പൊതുഗതാഗത വൈദ്യുതീകരണത്തിനായി 14,028 ബസുകൾക്ക് 4,391 കോടി രൂപ അനുവദിച്ചു. ബെംഗളൂരു, ഡൽഹി, മുംബൈ, ഹൈദരാബാദ്, അഹമ്മദാബാദ്, പുണെ, സൂറത്ത് നഗരങ്ങൾക്ക് 13,800 ബസുകൾ അനുവദിച്ചു. ഒന്നാംഘട്ടത്തിലെ 10,900 ബസുകളുടെ ടെൻഡർ നടപടികൾ പൂർത്തിയായി.

രാജ്യമാകെ പൊതുചാർജിങ് കേന്ദ്രങ്ങൾ സ്ഥാപിക്കാൻ 2,000 കോടി രൂപയും വാഹനപരിശോധനാ സ്ഥാപനങ്ങളുടെ നവീകരണത്തിന് 780 കോടി രൂപയും മാറ്റിവച്ചു. പി.എം. ഇ-ബസ് സേവാ പണമടയ്ക്കൽ സുരക്ഷാപദ്ധതിയിൽ പൊതു-സ്വകാര്യ പങ്കാളിത്തത്തിലൂടെ 10,000 ബസുകൾ നഗരങ്ങളിൽ വിന്യസിക്കും. ഓരോ ബസിനും 12 വർഷംവരെ പണമടയ്ക്കൽ സുരക്ഷ ലഭിക്കും. 2026 ഫെബ്രുവരിയിൽ ഗുജറാത്തിലെ ഭാവ്നഗറിൽ 50 ബസുകൾ നിരത്തിലിറക്കി. നാഗ്പൂർ, ചണ്ഡീഗഢ്, ഗുവാഹത്തി നഗരങ്ങളും ആദ്യഘട്ടത്തിലുണ്ട്.

വൈദ്യുത യാത്രാവാഹന നിർമാണ പ്രോത്സാഹനപദ്ധതിയിൽ കുറഞ്ഞത് 4,150 കോടി രൂപ നിക്ഷേപിക്കണം. മൂന്നാംവർഷം 25 ശതമാനവും അഞ്ചാംവർഷം 50 ശതമാനവും ആഭ്യന്തര മൂല്യവർധന കൈവരിക്കണം. വാഹന-വാഹനഘടക ഉത്പാദനബന്ധിത പ്രോത്സാഹനപദ്ധതിയിൽ കുറഞ്ഞത് 50 ശതമാനം ആഭ്യന്തര മൂല്യവർധന വേണം. അംഗീകൃത സ്ഥാപനങ്ങൾക്ക് 2,377.56 കോടി രൂപ വിതരണം ചെയ്തതിൽ 2,319.88 കോടി രൂപ വൈദ്യുത വാഹന നിർമാതാക്കൾക്കാണ് ലഭിച്ചത്.

നൂതന രസതന്ത്ര ബാറ്ററി സംഭരണ ഉത്പാദനബന്ധിത പദ്ധതിക്ക് 18,100 കോടി രൂപയാണ് ചെലവ്. രാജ്യത്ത് 50 ഗിഗാവാട്ട് മണിക്കൂർ ശേഷിയുള്ള ബാറ്ററി നിർമാണം സ്ഥാപിക്കുകയാണ് ലക്ഷ്യം. 2025 ജനുവരി ഒന്നുമുതൽ 2029 ഡിസംബർ 31 വരെയാണ് പ്രവർത്തനഘട്ടം. വാഹനത്തിന്റെ മൊത്തം ചെലവിന്റെ 35 മുതൽ 40 ശതമാനംവരെ ബാറ്ററിക്കായതിനാൽ ആഭ്യന്തര നിർമാണം വില കുറയ്ക്കാനും തൊഴിൽ സൃഷ്ടിക്കാനും ഊർജസുരക്ഷ വർധിപ്പിക്കാനും സഹായിക്കും. വൈദ്യുത കാറുകൾക്കും ഇരുചക്ര-മുച്ചക്ര വാഹനങ്ങൾക്കും അഞ്ചുശതമാനം ചരക്കുസേവന നികുതിയാണ് ഈടാക്കുന്നത്.

2030 ലക്ഷ്യത്തിലേക്ക് അതിവേഗ യാത്ര

ഇറക്കുമതിയെ ആശ്രയിച്ചിരുന്ന വിപണിയിൽനിന്ന് ആഗോളതലത്തിൽ മത്സരിക്കുന്ന വൈദ്യുത വാഹന നിർമാണകേന്ദ്രമായി ഇന്ത്യ മാറുകയാണ്. ഊർജസുരക്ഷ, എണ്ണ ഇറക്കുമതി കുറയ്ക്കൽ, 2070-ലെ കാർബൺ നിഷ്പക്ഷതാ ലക്ഷ്യം എന്നിവയുമായി ഈ മാറ്റം ബന്ധിപ്പിച്ചിട്ടുണ്ട്. ഇന്ത്യയിൽ നിർമിക്കുക പദ്ധതിയിലൂടെ വാഹനത്തിന്റെ എല്ലാ പ്രധാന ഘടകങ്ങളും രാജ്യത്തിനകത്ത് നിർമിക്കാനാണ് ശ്രമം.

2025-ൽ 371 കോടി ഡോളർ മൂല്യമുണ്ടായിരുന്ന ഇന്ത്യൻ വൈദ്യുത വാഹന വിപണി 2034-ൽ 19,104 കോടി ഡോളറിലെത്തുമെന്നാണ് വിലയിരുത്തൽ. വാർഷിക സംയോജിത വളർച്ച 54.94 ശതമാനമായിരിക്കും. ബാറ്ററി വിപണി 2025-ലെ 271 കോടി ഡോളറിൽനിന്ന് 2034-ൽ 1,590 കോടി ഡോളറാകുമെന്നാണ് പ്രതീക്ഷ. വാർഷിക വളർച്ച 21.70 ശതമാനമാണ്.

2030-ഓടെ രാജ്യത്തെ വാഹനവിൽപ്പനയുടെ 30 ശതമാനം വൈദ്യുത വാഹനങ്ങളാക്കുകയാണ് ലക്ഷ്യം. അതേ വർഷത്തോടെ 13.2 ലക്ഷം ചാർജിങ് കേന്ദ്രങ്ങൾ സ്ഥാപിക്കാനും ലക്ഷ്യമിടുന്നു. ഇരുചക്രവാഹനങ്ങൾ, ചെറുകാറുകൾ, ബാറ്ററി പാക്കുകൾ, ഡ്രൈവ്‌ട്രെയിൻ ഘടകങ്ങൾ എന്നിവയുടെ കയറ്റുമതികേന്ദ്രമായി ഇന്ത്യ ഉയരുമെന്നാണ് പ്രതീക്ഷ.

വാഹനനിർമാതാക്കളുടെ ശരാശരി ഇന്ധനക്ഷമതാ മാനദണ്ഡങ്ങളുടെ മൂന്നാംഘട്ടം 2027 മുതൽ 2032 വരെയും നാലാംഘട്ടം 2033 മുതൽ 2037 വരെയും നടപ്പാക്കാനാണ് സർക്കാർ തയ്യാറെടുക്കുന്നത്. മൂന്നാംഘട്ടത്തിൽ ഒരു കിലോമീറ്ററിന് 91.7 ഗ്രാം കാർബൺ ഡൈഓക്സൈഡും നാലാംഘട്ടത്തിൽ 70 ഗ്രാമുമാണ് നിർദേശിച്ച പരിധി. വൈദ്യുത വാഹനവിൽപ്പനയ്ക്ക് അധിക പരിഗണന നൽകുന്ന സംവിധാനവും ഇതിനൊപ്പം വരും. 2017-ൽ ആരംഭിച്ച ഈ മാനദണ്ഡങ്ങൾ കൂടുതൽ ഇന്ധനക്ഷമതയുള്ളതും കുറഞ്ഞ മലിനീകരണമുള്ളതുമായ യാത്രാവാഹനങ്ങളുടെ നിർമാണം പ്രോത്സാഹിപ്പിക്കുന്നു.

വാഹനാവശ്യം, ആഭ്യന്തര നിർമാണം, സാങ്കേതികശേഷി, വായ്പാസൗകര്യം, ജനങ്ങളുടെ ബോധവത്കരണം, വിശ്വസനീയമായ ചാർജിങ് ശൃംഖല, പരിശീലനം നേടിയ തൊഴിലാളികൾ എന്നിവ ഇന്ത്യയുടെ മുന്നേറ്റത്തിന് കരുത്താകുന്നു. ബാറ്ററികളുടെ പ്രാദേശിക നിർമാണവും വിതരണശൃംഖലയുടെ ഏകീകരണവും വിപുലമായ ചാർജിങ് അടിസ്ഥാനസൗകര്യവുമാണ് ഭാവിയിലെ ആഗോള നേതൃത്വത്തെ നിർണയിക്കുക.