ന്യൂഡൽഹി /2026 / ഓഗസ്റ്റ് 3
പ്രതിരോധ മന്ത്രാലയത്തിലെ സൈനിക വിഭാഗങ്ങളും സിവിൽ വിഭാഗങ്ങളും തമ്മിലുള്ള ഏകോപനം കൂടുതൽ ശക്തമാക്കണമെന്ന് പ്രതിരോധ മന്ത്രി രാജ്നാഥ് സിങ് പറഞ്ഞു. ന്യൂഡൽഹിയിൽ നടന്ന 85-ാമത് സായുധസേനാ ആസ്ഥാന സിവിലിയൻ സർവീസ് ദിനാഘോഷത്തിൽ സംസാരിക്കുകയായിരുന്നു അദ്ദേഹം. മാറിവരുന്ന സുരക്ഷാ, സാങ്കേതിക വെല്ലുവിളികളെ നേരിടാൻ ഇരു വിഭാഗങ്ങളും ഒരേ ലക്ഷ്യത്തോടെ പ്രവർത്തിക്കണം. സ്ഥാപനപരമായ അറിവും സ്ഥിരതയും നിയമങ്ങളുടെ ഫലപ്രദമായ നടത്തിപ്പും ഇതിലൂടെ ഉറപ്പാക്കാനാകുമെന്നും അദ്ദേഹം പറഞ്ഞു.
ലക്ഷ്യം ഒന്നായാൽ രാജ്യത്തിന്റെ ശക്തിയാകും
യൂണിഫോം ധരിച്ച് സേവനം ചെയ്യുന്നവർക്കും സിവിൽ ഉദ്യോഗസ്ഥർക്കും ‘രാജ്യം ആദ്യം’ എന്ന ഒരേ പ്രതിബദ്ധതയാണുള്ളതെന്ന് രാജ്നാഥ് സിങ് പറഞ്ഞു. ലക്ഷ്യം ഒന്നാകുമ്പോൾ സംവിധാനത്തിലെ ഓരോ ഘടകവും രാജ്യത്തിന്റെ ശക്തിയായി മാറും. സംയുക്തവും ഏകീകൃതവുമായ പ്രതിരോധ സംവിധാനങ്ങൾ വികസിക്കുമ്പോൾ നയം, ഭരണനിർവഹണം, മനുഷ്യവിഭവശേഷി, ധനകാര്യ നടപടികൾ, ചരക്കുനീക്കം, സ്ഥാപനപരമായ അറിവ് എന്നിവയിൽ തുടർച്ചയും വൈദഗ്ധ്യവും ആവശ്യമാണ്. സൈനിക ഏകീകരണവും ഭരണപരമായ ഏകീകരണവും രണ്ടുവഴികളിലൂടെ മുന്നോട്ടുപോകാനാവില്ലെന്നും അദ്ദേഹം വ്യക്തമാക്കി.
സൈനികർക്കും സിവിൽ ഉദ്യോഗസ്ഥർക്കും സംയുക്ത പരിശീലനം
സൈനിക ഉദ്യോഗസ്ഥരും സിവിൽ ഉദ്യോഗസ്ഥരും പരസ്പരം അനുഭവങ്ങൾ മനസ്സിലാക്കാൻ സംയുക്ത പരിശീലന പരിപാടികളും വികസന ചുമതലകളും ഒരുക്കണമെന്ന് മന്ത്രി നിർദേശിച്ചു. സൈനിക ഉദ്യോഗസ്ഥർ പ്രവർത്തനപരിചയം, നേതൃത്വ കാഴ്ചപ്പാട്, യുദ്ധത്തെക്കുറിച്ചുള്ള അറിവ് എന്നിവ കൊണ്ടുവരുന്നു. സിവിൽ ഉദ്യോഗസ്ഥർ ഭരണത്തിന്റെ തുടർച്ച, നയപരിചയം, സർക്കാർ നടപടികളെക്കുറിച്ചുള്ള ധാരണ, സ്ഥാപനപരമായ ഓർമ എന്നിവ നൽകുന്നു. ഈ ശക്തികൾ ഒന്നിക്കുമ്പോൾ തീരുമാനങ്ങൾ കൂടുതൽ അറിവോടെയും സന്തുലിതമായും ഫലപ്രദമായും എടുക്കാനാകുമെന്ന് അദ്ദേഹം പറഞ്ഞു.
സൈബർ യുദ്ധത്തിന്റെ ഉദാഹരണം ചൂണ്ടിക്കാട്ടിയ മന്ത്രി, സായുധസേനാ ആസ്ഥാന സിവിലിയൻ സർവീസ് ഉദ്യോഗസ്ഥർ പ്രതിരോധ മേഖലയ്ക്കായി പൊതുവായ സൈബർ ഉപകരണങ്ങൾ വികസിപ്പിച്ചാൽ സേനകൾക്ക് ഗുണകരമാകുമെന്ന് പറഞ്ഞു. ഇന്ത്യൻ സൈനിക ചരിത്രത്തെ സിവിൽ കാഴ്ചപ്പാടിൽ പഠിക്കുന്നതിനായി പ്രത്യേക വേദി രൂപീകരിക്കാം. ഇതിലൂടെ പുതിയ ആശയങ്ങളും വ്യത്യസ്ത കാഴ്ചപ്പാടുകളും ലഭിക്കും. ഇത്തരം മേഖലകളിലെ വൈദഗ്ധ്യം ഉപയോഗിച്ച് സിവിലിയൻ സർവീസിന് പ്രതിരോധ മേഖലയിൽ കൂടുതൽ അർഥവത്തായ സംഭാവനകൾ നൽകാനാകുമെന്നും അദ്ദേഹം പറഞ്ഞു.
പ്രതിരോധ ഭരണത്തിന്റെ തന്ത്രപരമായ ബുദ്ധികേന്ദ്രമാകണം
സായുധസേനാ ആസ്ഥാന സിവിലിയൻ സർവീസ് ഇന്ത്യയുടെ പ്രതിരോധ ഭരണസംവിധാനത്തിന്റെ ‘തന്ത്രപരമായ ബുദ്ധികേന്ദ്രമായി’ മാറണമെന്ന് രാജ്നാഥ് സിങ് ആവശ്യപ്പെട്ടു. പ്രതിരോധ മേഖലയെക്കുറിച്ച് സമഗ്രമായ അറിവ് നേടുകയും സംയുക്ത സംവിധാനത്തിൽ ഫലപ്രദമായി പ്രവർത്തിക്കുകയും പുതിയ വെല്ലുവിളികൾ നേരിടാൻ വൈദഗ്ധ്യം തുടർച്ചയായി വർധിപ്പിക്കുകയും വേണം. ആധുനിക യുദ്ധം അതിവേഗ സാങ്കേതിക മാറ്റങ്ങളാൽ നിയന്ത്രിക്കപ്പെടുന്ന സാഹചര്യത്തിൽ സേവനനിയമങ്ങളും ഉത്തരവുകളും നടപ്പാക്കുന്നതിൽ മാത്രം സിവിലിയൻ സർവീസ് ഒതുങ്ങരുതെന്നും അദ്ദേഹം പറഞ്ഞു.
ആയുധങ്ങളും വെടിക്കോപ്പുകളും മാത്രമല്ല സൈന്യത്തിന്റെ ശക്തിയെന്ന് മന്ത്രി പറഞ്ഞു. സൈന്യത്തെ പിന്തുണയ്ക്കുന്ന, പൊതുജനങ്ങൾക്ക് മുന്നിൽ കാണപ്പെടാത്ത ആയിരക്കണക്കിന് ആളുകളും അതിന്റെ കരുത്താണ്. അത്തരത്തിലുള്ള നിർണായക ശക്തിയാണ് സായുധസേനാ ആസ്ഥാന സിവിലിയൻ സർവീസ്. ഗവേഷണം, ഭൗമതന്ത്ര ചിന്ത, പുതിയ ആശയങ്ങൾ എന്നിവയിലൂടെ രാജ്യത്തിന്റെ സുരക്ഷാസംവിധാനം ശക്തിപ്പെടുത്തണം. പ്രതിരോധ മന്ത്രാലയത്തിലെ സ്ഥിരം ഉദ്യോഗസ്ഥവിഭാഗമായതിനാൽ പ്രതിരോധ മേഖലയെക്കുറിച്ച് ആഴത്തിലുള്ള അറിവ് ഇവർക്കുണ്ടെന്നും പ്രധാന പ്രതിരോധ വിഷയങ്ങളിൽ സജീവ പങ്കാളിത്തം അനിവാര്യമാണെന്നും അദ്ദേഹം പറഞ്ഞു.
പുതിയ ഡിജിറ്റൽ സംവിധാനങ്ങൾ തുടങ്ങി
ആഘോഷത്തിന്റെ ഭാഗമായി ജോയിന്റ് സെക്രട്ടറിയുടെയും ചീഫ് അഡ്മിനിസ്ട്രേറ്റീവ് ഓഫീസറുടെയും കാര്യാലയത്തിലെ നിരവധി ഡിജിറ്റൽ പദ്ധതികൾ രാജ്നാഥ് സിങ് ഉദ്ഘാടനം ചെയ്തു. കാര്യാലയത്തിന്റെ പുതുക്കിയ ലക്ഷ്യപ്രഖ്യാപനവും ദൗത്യപ്രഖ്യാപനവും പുറത്തിറക്കി. ഇന്റർനെറ്റ് അടിസ്ഥാനത്തിലുള്ള താമസസൗകര്യ പരിപാലന സംവിധാനമായ ഐബാംസ് പോർട്ടൽ, അവകാശവാദങ്ങൾ പരിശോധിക്കുന്നതിന് ഇ-എച്ച്.ആർ.എം.എസ് സംവിധാനത്തെ ട്യൂലിപ് 2.0-യുമായി ബന്ധിപ്പിക്കൽ, ശമ്പളവും ആനുകൂല്യങ്ങളും കൈകാര്യം ചെയ്യാൻ ചീഫ് അഡ്മിനിസ്ട്രേറ്റീവ് ഓഫീസിനെ ട്യൂലിപ് 2.0-യുമായി ബന്ധിപ്പിക്കൽ, സ്പാരോ ഓൺലൈൻ പ്രവർത്തനവിലയിരുത്തൽ സംവിധാനത്തിൽ ഉൾപ്പെടുത്തൽ എന്നിവയാണ് പദ്ധതികൾ.
സർവീസ് ആസ്ഥാനങ്ങളിലും വിവിധ സേനകളുടെ സംയുക്ത സ്ഥാപനങ്ങളിലും ജോലി ചെയ്യുന്ന ജീവനക്കാർ എഴുതിയ യാത്രാവിവരണങ്ങൾ, ലേഖനങ്ങൾ, കവിതകൾ തുടങ്ങിയവ ഉൾപ്പെടുത്തിയ ‘സംവാദ്’ മാസികയുടെ 34-ാമത് ലക്കവും മന്ത്രി പുറത്തിറക്കി. കായികരംഗം ഉൾപ്പെടെ വിവിധ മേഖലകളിൽ നേട്ടം കൈവരിച്ച സായുധസേനാ ആസ്ഥാന ജീവനക്കാർക്കും പഠനത്തിൽ മികവ് തെളിയിച്ച ജീവനക്കാരുടെ കുട്ടികൾക്കും പുരസ്കാരങ്ങൾ നൽകി.
മുതിർന്ന സൈനിക–സിവിൽ ഉദ്യോഗസ്ഥർ പങ്കെടുത്തു
പ്രതിരോധ സഹമന്ത്രി സഞ്ജയ് സേത്ത്, സംയുക്ത സേനാ മേധാവി ജനറൽ എൻ.എസ്. രാജ സുബ്രഹ്മണി, നാവികസേനാ മേധാവി അഡ്മിറൽ കൃഷ്ണ സ്വാമിനാഥൻ, കരസേനാ മേധാവി ജനറൽ ധീരജ് സേത്ത്, പ്രതിരോധ സെക്രട്ടറി രാജേഷ് കുമാർ സിങ്, പ്രതിരോധ ഉൽപ്പാദന സെക്രട്ടറി സഞ്ജീവ് കുമാർ, പ്രതിരോധ ധനകാര്യ സെക്രട്ടറി വിശ്വജിത് സഹായ്, വ്യോമസേനാ ഉപമേധാവി എയർ മാർഷൽ അശുതോഷ് ദീക്ഷിത്, അഡീഷണൽ സെക്രട്ടറി മനീഷ് ത്രിപാഠി, ജോയിന്റ് സെക്രട്ടറിയും ചീഫ് അഡ്മിനിസ്ട്രേറ്റീവ് ഓഫീസറുമായ അമിതാഭ് പ്രസാദ് തുടങ്ങിയവർ ചടങ്ങിൽ പങ്കെടുത്തു.
മൂന്ന് ഏകീകൃത സേനാ ആസ്ഥാനങ്ങൾ, സംയുക്ത പ്രതിരോധ സേനാ ആസ്ഥാനം, പ്രതിരോധ മന്ത്രാലയത്തിന് കീഴിലുള്ള 24 സംയുക്ത സേനാ സ്ഥാപനങ്ങൾ എന്നിവിടങ്ങളിൽ സൈനികർക്കൊപ്പം പ്രവർത്തിക്കുന്ന ജീവനക്കാരുടെ സേവനം അംഗീകരിക്കാനാണ് എല്ലാ വർഷവും ഓഗസ്റ്റ് ഒന്നിന് സായുധസേനാ ആസ്ഥാന ദിനം ആചരിക്കുന്നത്. വിവിധ സേനാ ആസ്ഥാനങ്ങളിലും പ്രതിരോധ, ധനകാര്യ സെക്രട്ടേറിയറ്റുകളിലുമായി ചിതറിക്കിടന്ന സിവിൽ തസ്തികകളെ ചീഫ് അഡ്മിനിസ്ട്രേറ്റീവ് ഓഫീസറുടെ നിയന്ത്രണത്തിൽ പ്രത്യേക വിഭാഗങ്ങളാക്കി ക്രമീകരിച്ചതോടെയാണ് 1942 ഓഗസ്റ്റ് ഒന്നിന് ഈ ഉദ്യോഗസ്ഥവിഭാഗത്തിന് അടിത്തറയിട്ടത്.
