ഗ്രാമങ്ങളിൽ സംരംഭങ്ങൾക്ക് കരുത്തായി സ്റ്റാർട്ട്-അപ്പ് വില്ലേജ് പദ്ധതി

ന്യൂഡൽഹി/2026 /ജൂലൈ 25

ഗ്രാമീണ മേഖലകളിൽ കൃഷിയേതര ചെറുസംരംഭങ്ങൾ ആരംഭിക്കുന്നവർക്ക് പരിശീലനം, വായ്പ, മാർഗനിർദേശം, സ്ഥാപനപിന്തുണ എന്നിവ നൽകുന്ന സ്റ്റാർട്ട്-അപ്പ് വില്ലേജ് സംരംഭകത്വ പദ്ധതി രാജ്യത്താകെ 4.32 ലക്ഷം സംരംഭങ്ങൾക്ക് സഹായം നൽകി. 2026 ജൂൺ 30 വരെയുള്ള കണക്കാണിത്. സ്വയംസഹായ സംഘങ്ങൾ, ബാങ്കുകൾ, സാമൂഹിക സ്ഥാപനങ്ങൾ, സർക്കാർ പദ്ധതികൾ എന്നിവയെ കൂട്ടിയിണക്കിയാണ് പദ്ധതി നടപ്പാക്കുന്നത്. ദാരിദ്ര്യം കുറയ്ക്കാനും പ്രാദേശിക തൊഴിലവസരങ്ങൾ സൃഷ്ടിക്കാനും ഗ്രാമീണ സമ്പദ്‌വ്യവസ്ഥ ശക്തിപ്പെടുത്താനുമാണ് പദ്ധതി ലക്ഷ്യമിടുന്നത്. പദ്ധതിയുടെ കീഴിലുള്ള സംരംഭകരിൽ ഏകദേശം 86 ശതമാനം പേർ പട്ടികജാതി, പട്ടികവർഗം, ന്യൂനപക്ഷം, മറ്റ് പിന്നാക്കവിഭാഗങ്ങൾ എന്നിവയിൽപ്പെട്ടവരാണ്.

ഗ്രാമങ്ങളിലേക്കും സംരംഭകത്വത്തിന്റെ വഴി

ലോകത്തിലെ മൂന്നാമത്തെ വലിയ സ്റ്റാർട്ട്-അപ്പ് സംവിധാനമാണ് ഇന്ത്യയിലുള്ളത്. സർക്കാർ നയങ്ങളുടെ പിന്തുണയോടെ ഈ മേഖല രാജ്യത്തിന്റെ സാമ്പത്തിക വളർച്ചയ്ക്ക് വലിയ സംഭാവന നൽകിയിട്ടുണ്ട്. എന്നാൽ ഇന്ത്യയിലെ സ്റ്റാർട്ട്-അപ്പ് സംരംഭങ്ങളിൽ ഭൂരിഭാഗവും നഗരങ്ങൾ കേന്ദ്രീകരിച്ചാണ് പ്രവർത്തിക്കുന്നത്. ഇതു മാറ്റി ഗ്രാമപ്രദേശങ്ങളിലും പുതിയ ആശയങ്ങളും സംരംഭങ്ങളും വളർത്തുന്നതിനായാണ് സർക്കാർ വിവിധ പദ്ധതികൾ ആരംഭിച്ചത്.

ഇതിലെ പ്രധാന പദ്ധതികളിലൊന്നാണ് സ്റ്റാർട്ട്-അപ്പ് വില്ലേജ് സംരംഭകത്വ പദ്ധതി. 2016-ൽ ആരംഭിച്ച ഈ പദ്ധതി ദീൻദയാൽ അന്ത്യോദയ യോജന–ദേശീയ ഗ്രാമീണ ഉപജീവന ദൗത്യത്തിന്റെ ഉപപദ്ധതിയാണ്. സ്വയംസഹായ സംഘങ്ങളിലെ അംഗങ്ങൾക്കും അവരുടെ കുടുംബാംഗങ്ങൾക്കും കൃഷിയേതര മേഖലയിൽ ചെറുസംരംഭങ്ങൾ ആരംഭിക്കാൻ പദ്ധതി സഹായിക്കുന്നു.

സാമ്പത്തിക സഹായം, സ്ഥാപനങ്ങളുടെ പിന്തുണ, വ്യാപാര നടത്തിപ്പ് പരിശീലനം, ആശയവിനിമയവും നേതൃത്വവും ഉൾപ്പെടുന്ന വ്യക്തിഗത കഴിവുകളുടെ വികസനം, സംരംഭ വികസന സേവനങ്ങൾ എന്നിവ പദ്ധതിയിലൂടെ ലഭിക്കും. ഗ്രാമങ്ങളിൽ സ്ഥിരമായ വരുമാനമാർഗവും സ്വയംതൊഴിലും സൃഷ്ടിക്കുകയാണ് ലക്ഷ്യം.

ബാങ്കുകളിൽനിന്നുള്ള വായ്പ ലഭ്യമാക്കാനും മറ്റ് സർക്കാർ പദ്ധതികളുമായി ബന്ധിപ്പിക്കാനും പദ്ധതി സഹായിക്കുന്നു. ദീർഘകാല സാമ്പത്തിക വളർച്ചയും സാമൂഹികനേട്ടങ്ങളും ഉറപ്പാക്കുന്നതിലാണ് ശ്രദ്ധ. പ്രാദേശികമായി ഏതൊക്കെ സംരംഭങ്ങൾക്ക് പണം നൽകണമെന്നും പിന്തുണ നൽകണമെന്നും സാമൂഹിക സ്ഥാപനങ്ങൾ ചേർന്ന് തീരുമാനിക്കുന്നതാണ് പദ്ധതിയുടെ പ്രധാന പ്രത്യേകത.

ദീൻദയാൽ അന്ത്യോദയ യോജന–ദേശീയ ഗ്രാമീണ ഉപജീവന ദൗത്യം ലോകത്തിലെ ഏറ്റവും വലിയ ഉപജീവന പദ്ധതികളിലൊന്നാണ്. ഗ്രാമങ്ങളിലെ ദരിദ്ര കുടുംബങ്ങളെ, പ്രത്യേകിച്ച് സ്ത്രീകളെ, സ്വയംസഹായ സംഘങ്ങളിൽ ഒരുമിപ്പിക്കുകയാണ് പദ്ധതി ചെയ്യുന്നത്. സ്ഥിരമായ ഉപജീവനം, സാമ്പത്തിക സേവനങ്ങൾ, തൊഴിൽപരിശീലനം എന്നിവ ലഭ്യമാക്കുന്നതിലും പദ്ധതി ശ്രദ്ധിക്കുന്നു. 2026 ജൂൺ മധ്യത്തോടെ 10.29 കോടിയിലധികം ഗ്രാമീണ കുടുംബങ്ങൾ സ്വയംസഹായ സംഘങ്ങളുടെ ഭാഗമായിട്ടുണ്ട്.

4.32 ലക്ഷം ഗ്രാമീണ സംരംഭങ്ങൾക്ക് സഹായം

സ്ത്രീകൾ, പിന്നാക്കവിഭാഗങ്ങൾ, കുറഞ്ഞ വിദ്യാഭ്യാസമുള്ളവർ എന്നിവരെ ഉൾപ്പെടുത്തുന്ന സമീപനമാണ് സ്റ്റാർട്ട്-അപ്പ് വില്ലേജ് സംരംഭകത്വ പദ്ധതി സ്വീകരിച്ചിരിക്കുന്നത്. പദ്ധതി ആരംഭിച്ചതുമുതൽ 2026 ജൂൺ 15 വരെ 4.32 ലക്ഷത്തിലധികം ഗ്രാമീണ സംരംഭങ്ങൾക്ക് സഹായം ലഭിച്ചു.

അസം, ബിഹാർ, ജാർഖണ്ഡ്, പശ്ചിമബംഗാൾ, മധ്യപ്രദേശ് എന്നീ സംസ്ഥാനങ്ങളിലാണ് പദ്ധതിയുടെ സഹായത്തോടെ ഏറ്റവും കൂടുതൽ സംരംഭങ്ങൾ ആരംഭിച്ചത്.

മഹാരാഷ്ട്രയിലെ ജഹാൻപൂർ സ്വദേശിയായ ഭാഗ്യശ്രീ ലോന്ധെയുടെ ജീവിതം പദ്ധതിയുടെ വിജയത്തിന് ഉദാഹരണമാണ്. 2014-ലാണ് അവർ സ്വയംസഹായ സംഘത്തിൽ അംഗമായത്. സംഘത്തിന്റെയും ഗ്രാമസംഘടനയുടെയും പ്രവർത്തനങ്ങളിൽ പങ്കെടുത്തതോടെ നേതൃത്വശേഷിയും വ്യാപാരപരിചയവും വർധിച്ചു.

മസാല, പപ്പടം, അച്ചാർ എന്നിവ ചെറിയ അളവിൽ നിർമിച്ചായിരുന്നു തുടക്കം. സ്റ്റാർട്ട്-അപ്പ് വില്ലേജ് പദ്ധതിയുടെ സാമൂഹിക സംരംഭക ഫണ്ടിൽനിന്ന് ലഭിച്ച 45,000 രൂപ വായ്പ ഉപയോഗിച്ച് പ്രാദേശികമായി ലഭിക്കുന്ന അസംസ്കൃത വസ്തുക്കൾ വാങ്ങി ഉത്പാദനം വർധിപ്പിച്ചു.

2019–20-ലെ മഹാലക്ഷ്മി സരസ് മേളയിൽ പത്ത് ദിവസത്തിനുള്ളിൽ അഞ്ച് ലക്ഷം രൂപയുടെ വരുമാനം നേടി ഭാഗ്യശ്രീ ശ്രദ്ധിക്കപ്പെട്ടു. സംരംഭം നടത്തുന്നതിനൊപ്പം ഓപ്പൺ സർവകലാശാല വഴി പത്താം ക്ലാസ് വിദ്യാഭ്യാസവും പൂർത്തിയാക്കി.

ദേശീയ ഗ്രാമീണ ഉപജീവന ദൗത്യത്തിന്റെയും കൃഷി വിജ്ഞാന കേന്ദ്രത്തിന്റെയും പരിശീലനം വ്യാപാരപരിചയവും സാങ്കേതിക അറിവും വർധിപ്പിച്ചു. ഇതോടെ പ്രതിദിന ഉത്പാദനം ഉയർന്നു. സ്ഥിരമായ വരുമാനം ലഭിക്കുകയും ഗ്രാമീണ സ്ത്രീകൾക്ക് തൊഴിൽ ലഭിക്കുകയും ചെയ്തു. പഠിക്കാനുള്ള താത്പര്യവും സ്ഥാപനപിന്തുണയും സംരംഭകത്വവും ചേർന്നാൽ ഗ്രാമീണ സ്ത്രീകളെ വിജയകരമായ വ്യാപാരനേതാക്കളാക്കി മാറ്റാനാകുമെന്നാണ് അവരുടെ അനുഭവം കാണിക്കുന്നത്.

പദ്ധതിയുടെ തുടർവികസനത്തിനായി 2026 ഫെബ്രുവരി വരെ കേന്ദ്രസർക്കാർ ആകെ 942.09 കോടി രൂപ അനുവദിച്ചു. 2016-ൽ പദ്ധതി ആരംഭിച്ചതുമുതൽ 2018 ജനുവരി വരെ അനുവദിച്ച 112.39 കോടി രൂപയുമായി താരതമ്യം ചെയ്യുമ്പോൾ ഇത് ഏകദേശം 738 ശതമാനം കൂടുതലാണ്.

ഓരോ ബ്ലോക്കിനും 6.50 കോടി രൂപ

സംസ്ഥാന ഗ്രാമീണ ഉപജീവന ദൗത്യങ്ങളിലൂടെയാണ് പദ്ധതി നടപ്പാക്കുന്നത്. ഓരോ ബ്ലോക്കിനും 6.50 കോടി രൂപയുടെ വകയിരുത്തലുണ്ട്. ഒരു സംരംഭത്തിനായി ശരാശരി 27,083 രൂപയാണ് നിക്ഷേപിക്കുന്നത്.

ബ്ലോക്കുതലത്തിൽ സംരംഭ പ്രോത്സാഹനത്തിനുള്ള ബ്ലോക്ക് റിസോഴ്‌സ് കേന്ദ്രങ്ങളാണ് പദ്ധതി ഏകോപിപ്പിക്കുന്നത്. പരിശീലനം നേടിയ സാമൂഹിക വിഭവ വ്യക്തികൾ സംരംഭങ്ങൾ ആരംഭിക്കാനും വികസിപ്പിക്കാനും ആവശ്യമായ സാങ്കേതിക സഹായം നൽകുന്നു.

അർഹരായ സംരംഭകർക്ക് ബാങ്കുകൾ സാമ്പത്തിക സഹായം നൽകും. സ്വയംസഹായ സംഘങ്ങളും അവയുടെ ഫെഡറേഷനുകളും സംരംഭകശേഷിയുള്ളവരെ കണ്ടെത്തുന്നു. സാമൂഹിക സ്ഥാപനങ്ങൾ സംരംഭം തുടങ്ങാനും മുന്നോട്ടുകൊണ്ടുപോകാനും തുടർച്ചയായ സഹായം നൽകുന്നു.

സാമൂഹിക സംരംഭക ഫണ്ടിൽനിന്നുള്ള വായ്പകളും ഈ സ്ഥാപനങ്ങളാണ് കൈകാര്യം ചെയ്യുന്നത്. സംരംഭങ്ങളുടെ പ്രവർത്തനവും വളർച്ചയും പതിവായി പരിശോധിക്കും. വ്യാപാര പദ്ധതി തയ്യാറാക്കൽ, വായ്പാ വിലയിരുത്തൽ, സംരംഭങ്ങളുടെ പുരോഗതി നിരീക്ഷിക്കൽ എന്നിവയ്ക്ക് ഡിജിറ്റൽ സംവിധാനങ്ങളും ഉപയോഗിക്കുന്നു.

സാമൂഹിക വിഭവ വ്യക്തികളെ സംസ്ഥാന ഗ്രാമീണ ഉപജീവന ദൗത്യങ്ങളും പദ്ധതി നടപ്പാക്കുന്ന ഏജൻസികളും ചേർന്നാണ് തിരഞ്ഞെടുക്കുന്നത്. പരീക്ഷ, പരിശീലനം, അംഗീകാരം എന്നിവയ്ക്ക് ശേഷമാണ് നിയമനം. അടിസ്ഥാന വ്യാപാരപരിചയവും കണക്കുകൂട്ടാനുള്ള കഴിവുമുള്ള പ്രദേശവാസികൾക്കാണ് മുൻഗണന.

ഇവരിൽ കുറഞ്ഞത് 90 ശതമാനം പേരും സ്വയംസഹായ സംഘങ്ങളിലുള്ള കുടുംബങ്ങളിൽനിന്നായിരിക്കണം. കുറഞ്ഞത് 60 ശതമാനം സ്ത്രീകളായിരിക്കണമെന്നും വ്യവസ്ഥയുണ്ട്. ഒരാൾക്ക് പരമാവധി 50 സംരംഭങ്ങൾക്ക് മാർഗനിർദേശം, പരിശീലനം, വായ്പ ലഭ്യമാക്കാനുള്ള സഹായം എന്നിവ നൽകാം.

പൂനം പിന്തുണയ്ക്കുന്നത് നാൽപ്പതോളം സംരംഭങ്ങളെ

ഉത്തർപ്രദേശിൽ നിന്നുള്ള പൂനം സാമൂഹികവും സാമ്പത്തികവുമായ തടസ്സങ്ങൾ മറികടന്നാണ് വിജയകരമായ സാമൂഹിക വിഭവ വ്യക്തിയായത്. സ്വയംസഹായ സംഘത്തിൽ ചേർന്നതിന് പിന്നാലെയാണ് സ്റ്റാർട്ട്-അപ്പ് വില്ലേജ് സംരംഭകത്വ പദ്ധതിയെക്കുറിച്ച് അറിയുന്നത്.

തുടർന്ന് 54 ദിവസത്തെ സംരംഭ പ്രോത്സാഹന പരിശീലനം പൂർത്തിയാക്കി. സംരംഭങ്ങൾ വളർത്താനും ഉപജീവനമാർഗങ്ങൾ വികസിപ്പിക്കാനുമുള്ള കഴിവുകൾ പരിശീലനത്തിലൂടെ ലഭിച്ചു.

പരിശീലനം പൂർത്തിയാക്കിയ ശേഷം നാൽപ്പതോളം സംരംഭങ്ങൾക്കാണ് പൂനം സഹായം നൽകുന്നത്. വ്യാപാര പദ്ധതി തയ്യാറാക്കൽ, വായ്പ ലഭ്യമാക്കൽ, വിപണിയുമായി ബന്ധിപ്പിക്കൽ, തുടർച്ചയായ മാർഗനിർദേശം എന്നിവയാണ് അവർ നൽകുന്നത്.

സാമ്പത്തികമായി സ്വതന്ത്രയാകാൻ പദ്ധതി സഹായിച്ചതായി പൂനം പറയുന്നു. മറ്റുള്ളവർക്ക് സംരംഭങ്ങൾ തുടങ്ങാനും വളർത്താനും സഹായിക്കാനുള്ള അവസരം ലഭിച്ചതും അവർ വലിയ നേട്ടമായി കാണുന്നു. സാമൂഹിക സ്ഥാപനങ്ങളും സംരംഭകത്വ സഹായവും ഗ്രാമീണ ഉപജീവനവും സ്ത്രീകളുടെ സാമ്പത്തികശാക്തീകരണവും ശക്തിപ്പെടുത്തുമെന്നാണ് അവരുടെ അനുഭവം വ്യക്തമാക്കുന്നത്.

ആവശ്യം, ദാരിദ്ര്യനില, സംരംഭകശേഷി എന്നിവ പരിശോധിച്ചാണ് സാമൂഹിക സ്ഥാപനങ്ങൾ സംരംഭകരെ തിരഞ്ഞെടുക്കുന്നത്. സംരംഭം വിജയകരമായി പ്രവർത്തിക്കാനുള്ള സാധ്യത പരിശോധിച്ചശേഷം പരിശീലനം, മാർഗനിർദേശം, സാമ്പത്തിക സഹായം എന്നിവ നൽകും. വായ്പ അനുവദിക്കുന്നതിൽ അന്തിമതീരുമാനം സാമൂഹിക സംഘടനകളുടേതാണ്.

ഗുണഭോക്താക്കളിൽ കുറഞ്ഞത് 60 ശതമാനം സ്ത്രീകളായിരിക്കണം. ഭിന്നശേഷിക്കാർക്കും പട്ടികജാതി, പട്ടികവർഗം, ന്യൂനപക്ഷ വിഭാഗങ്ങൾക്കും അർഹമായ പ്രാതിനിധ്യം ഉറപ്പാക്കണം.

സംസ്ഥാന, കേന്ദ്ര തലങ്ങളിൽ മൂന്നുമാസത്തിലൊരിക്കൽ അവലോകനം നടത്തും. ഇടയ്ക്കിടെ പ്രത്യേക വിലയിരുത്തലുകളും നടക്കും. സംരംഭങ്ങളുടെ പ്രകടനം, ഫണ്ടിന്റെ വിനിയോഗം, പദ്ധതിയുടെ പുരോഗതി എന്നിവ നിരീക്ഷിക്കുന്നതിന് കേന്ദ്രീകൃത വിവരനിർവഹണ സംവിധാനവും പ്രവർത്തിക്കുന്നുണ്ട്.

99 ശതമാനം സംരംഭങ്ങളും ലാഭത്തിൽ

കേന്ദ്ര ഗ്രാമവികസന മന്ത്രാലയത്തിനായി ക്വാളിറ്റി കൗൺസിൽ ഓഫ് ഇന്ത്യയാണ് പദ്ധതിയുടെ ഇടക്കാല വിലയിരുത്തൽ നടത്തിയത്. 2019-ൽ പ്രധാന സ്ഥലപരിശോധനകൾ നടത്തി. ഗ്രാമീണ സംരംഭങ്ങൾ, ഉപജീവനമാർഗങ്ങൾ, സാമൂഹിക ഉൾപ്പെടുത്തൽ എന്നിവയിൽ പദ്ധതി വരുത്തിയ മാറ്റമാണ് പരിശോധിച്ചത്.

പദ്ധതിയുടെ സഹായം ലഭിച്ച സംരംഭങ്ങളിൽ 99 ശതമാനവും ലാഭകരമാണെന്ന് വിലയിരുത്തലിൽ കണ്ടെത്തി. കുടുംബങ്ങളുടെ ആകെ വരുമാനത്തിൽ 57 ശതമാനവും ഈ സംരംഭങ്ങളിൽനിന്നാണ് ലഭിച്ചത്.

സംരംഭങ്ങളുടെ ശരാശരി പ്രതിമാസ വരുമാനം ഏകദേശം 39,000 രൂപയായിരുന്നു. ഉത്പാദന മേഖലയിലെ സംരംഭങ്ങൾക്കാണ് ഏറ്റവും ഉയർന്ന വരുമാനം ലഭിച്ചത്. ഇവയുടെ ശരാശരി പ്രതിമാസ വരുമാനം 47,800 രൂപയായിരുന്നു.

സംരംഭകരിൽ 96 ശതമാനം പേരും സമ്പാദ്യം വർധിച്ചതായി അറിയിച്ചു. 75 ശതമാനം സംരംഭങ്ങളുടെയും ഉടമസ്ഥതയോ നടത്തിപ്പോ സ്ത്രീകൾക്കായിരുന്നു.

സംരംഭകർ ആദ്യം പ്രതീക്ഷിച്ചതിനേക്കാൾ കൂടുതൽ വരുമാനം നേടാൻ പദ്ധതി സഹായിച്ചു. സാമ്പത്തിക സഹായം എളുപ്പത്തിൽ ലഭിച്ചതോടെ പുതിയ സംരംഭങ്ങൾ ആരംഭിക്കാനും നിലവിലുള്ളവ വികസിപ്പിക്കാനും കഴിഞ്ഞു. തുടർച്ചയായ മാർഗനിർദേശം സംരംഭങ്ങളുടെ നടത്തിപ്പും നിലനിൽപ്പും ശക്തമാക്കി.

സ്ത്രീകളെയും പിന്നാക്കവിഭാഗങ്ങളെയും കുടുംബത്തിലെ ആദ്യതലമുറ സംരംഭകരാകാൻ പദ്ധതി പ്രോത്സാഹിപ്പിച്ചു. ആത്മവിശ്വാസവും ഉപജീവനസുരക്ഷയും വർധിച്ചതായി ഗുണഭോക്താക്കൾ അറിയിച്ചു.

പല കുടുംബങ്ങളിലും വിദ്യാഭ്യാസം, പോഷകാഹാരം, ആരോഗ്യം, ശുചിത്വം എന്നിവ മെച്ചപ്പെട്ടു. സംരംഭകരുടെ വ്യാപാരനടത്തിപ്പും സാമ്പത്തികകാര്യങ്ങൾ കൈകാര്യം ചെയ്യാനുള്ള കഴിവും വർധിച്ചു. സമ്പാദ്യം കൂട്ടുകയും പണം വീണ്ടും സംരംഭങ്ങളിൽ നിക്ഷേപിക്കുകയും ചെയ്തത് ദീർഘകാല വളർച്ചയ്ക്ക് സഹായിച്ചു. സമൂഹത്തിൽ സംരംഭകരുടെ സ്ഥാനവും മെച്ചപ്പെട്ടു.

ശക്തമായ സാമൂഹിക സ്ഥാപനങ്ങളുടെ പിന്തുണ ലഭിച്ചാൽ ഗ്രാമീണ സംരംഭകത്വത്തിന് എല്ലാവരെയും ഉൾക്കൊള്ളുന്ന സാമ്പത്തിക വളർച്ചയുടെ പ്രധാന ശക്തിയാകാനാകുമെന്ന് പദ്ധതി തെളിയിച്ചു. സ്ത്രീകൾ, പട്ടികജാതി-പട്ടികവർഗ വിഭാഗങ്ങൾ, ആദ്യതലമുറ സംരംഭകർ എന്നിവരെ ശാക്തീകരിച്ചതിലൂടെ ഗ്രാമങ്ങളിലെ ആശയങ്ങളെ സ്ഥിരതയുള്ള സംരംഭങ്ങളാക്കി മാറ്റി.

ഇതിലൂടെ വരുമാനവും സമ്പാദ്യവും കുടുംബങ്ങളുടെ ജീവിതനിലവാരവും ഉയർന്നു. ശരിയായ സാഹചര്യം ഒരുക്കിയാൽ എല്ലാ ഗ്രാമങ്ങളിലും സംരംഭകശേഷി വളരുമെന്നും പദ്ധതി തെളിയിച്ചു.

ആഗോള സ്റ്റാർട്ട്-അപ്പ് കേന്ദ്രമാകാനുള്ള ഇന്ത്യയുടെ മുന്നേറ്റത്തിൽ ഇത്തരം പദ്ധതികൾ ശക്തമായ ഗ്രാമീണ സ്റ്റാർട്ട്-അപ്പ് സംവിധാനത്തിന് അടിത്തറ ഒരുക്കുകയാണ്. തൊഴിലവസരങ്ങൾ സൃഷ്ടിക്കാനും പ്രാദേശിക സമ്പദ്‌വ്യവസ്ഥ ശക്തിപ്പെടുത്താനും ലക്ഷക്കണക്കിന് ഗ്രാമീണ കുടുംബങ്ങൾക്ക് പുതിയ അവസരങ്ങൾ തുറക്കാനും പദ്ധതി സഹായിക്കുന്നു. സ്വയംപര്യാപ്തവും വികസിതവുമായ ഇന്ത്യ എന്ന ലക്ഷ്യത്തിലേക്കും പദ്ധതി സംഭാവന നൽകുന്നു.