ഓക്‌ലൻഡ്, ജൂലൈ 11-

ഇന്ത്യയും ന്യൂസിലൻഡും തമ്മിലുള്ള ഉഭയകക്ഷി ബന്ധം തന്ത്രപ്രധാന പങ്കാളിത്തമായി (Strategic Partnership) ഉയർത്താൻ ഇരു രാജ്യങ്ങളും തീരുമാനിച്ചു. പ്രധാനമന്ത്രി നരേന്ദ്ര മോദിയും ന്യൂസിലൻഡ് പ്രധാനമന്ത്രി ക്രിസ്റ്റഫർ ലക്സണും തമ്മിൽ നടത്തിയ കൂടിക്കാഴ്ചയിലാണ് നിർണായക പ്രഖ്യാപനമുണ്ടായത്. അടുത്ത അഞ്ച് വർഷത്തിനുള്ളിൽ ഉഭയകക്ഷി വ്യാപാരം 35,000 കോടി രൂപയായി ഉയർത്തുകയാണ് ലക്ഷ്യം. പ്രതിരോധം, സുരക്ഷ, വ്യാപാരം, നിക്ഷേപം, സമുദ്ര സഹകരണം, ജനങ്ങൾ തമ്മിലുള്ള സമ്പർക്കം എന്നിവ ശക്തിപ്പെടുത്തുന്നതിനുള്ള ‘റോഡ്മാപ്പ് 2030’-നും ഇരുരാജ്യങ്ങളും അംഗീകാരം നൽകി.

കൂടുതൽ അടുക്കാൻ ഇരുരാജ്യങ്ങളും

രാഷ്ട്രീയ-നയതന്ത്ര സഹകരണം കൂടുതൽ ശക്തമാക്കാനും പ്രതിരോധ, സമുദ്ര സുരക്ഷാ മേഖലകളിൽ സ്ഥിരമായ സഹകരണ സംവിധാനം രൂപീകരിക്കാനും ധാരണയായി. ഇതിന്റെ ഭാഗമായി വിദേശകാര്യ മന്ത്രിമാരുടെ സ്ഥിരം സംവാദവും ഉന്നത ഉദ്യോഗസ്ഥതല വാർഷിക യോഗങ്ങളും ആരംഭിക്കും. അന്താരാഷ്ട്ര കുറ്റകൃത്യങ്ങൾ, സൈബർ ഭീഷണികൾ, മയക്കുമരുന്ന്-മനുഷ്യക്കടത്ത് എന്നിവയെ സംയുക്തമായി പ്രതിരോധിക്കും.

വ്യാപാര മേഖലയിൽ വലിയ കുതിപ്പ്

അടുത്ത അഞ്ച് വർഷത്തിനുള്ളിൽ ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാരം 35,000 കോടി രൂപയിലെത്തിക്കുകയാണ് പ്രധാന ലക്ഷ്യം. അടുത്തിടെ ഒപ്പുവെച്ച സ്വതന്ത്ര വ്യാപാര കരാർ (FTA) ഫലപ്രദമായി നടപ്പാക്കാനും, വ്യാപാര തടസ്സങ്ങൾ ലഘൂകരിച്ച് നിക്ഷേപവും സാമ്പത്തിക സഹകരണവും വർധിപ്പിക്കാനും ഇരുരാജ്യങ്ങളും തീരുമാനിച്ചു.

കരയും കടലും കാക്കാൻ സംയുക്ത നീക്കം

സമുദ്ര മേഖലയിലെ സംയുക്ത സൈനിക അഭ്യാസങ്ങൾ വിപുലീകരിക്കാനും വാർഷിക സമുദ്ര സുരക്ഷാ സംവാദം ആരംഭിക്കാനും ധാരണയായിട്ടുണ്ട്. ഇൻഡോ-പസഫിക് മേഖലയിലെ സ്ഥിരതയും സുരക്ഷയും ഉറപ്പാക്കുന്നത്തിൽ ഇരു രാജ്യങ്ങളും കൂടുതൽ ഏകോപനത്തോടെ പ്രവർത്തിക്കുമെന്ന് ഇരു നേതാക്കളും വ്യക്തമാക്കി.

എന്താണ് ‘റോഡ്മാപ്പ് 2030’?

2030 വരെയുള്ള ഇന്ത്യ-ന്യൂസിലൻഡ് ഉഭയകക്ഷി ബന്ധത്തിന് വ്യക്തമായ ദിശാബോധം നൽകുന്ന നയരേഖയാണിത്. പ്രതിരോധം, സാമ്പത്തികം, വിദ്യാഭ്യാസം, നൂതന സാങ്കേതികവിദ്യ, ഇരുരാജ്യങ്ങളിലെയും ജനങ്ങൾ തമ്മിലുള്ള സമ്പർക്കം എന്നിവയിൽ ദീർഘകാല സഹകരണം ഉറപ്പാക്കുകയാണ് ഇതിന്റെ ലക്ഷ്യം. ഇരു രാജ്യങ്ങളും തമ്മിലുള്ള നയതന്ത്ര ബന്ധത്തെ പുതിയ തലത്തിലേക്ക് ഉയർത്തുന്ന നിർണായക ചുവടുവയ്പ്പായാണ് ഇത് വിലയിരുത്തപ്പെടുന്നത്.