മുംബൈ, ജൂലൈ 8-

ശരദ് പവാറിന്റെ നേതൃത്വത്തിലുള്ള എൻസിപി (എസ്‌പി) ബിജെപിയുമായി കൈകോർക്കുന്നുവെന്ന വാർത്തകളാണ് മഹാരാഷ്ട്ര രാഷ്ട്രീയത്തിൽ ഇപ്പോൾ പുതിയ ചർച്ചകൾക്ക് വഴിതുറന്നിരിക്കുന്നത്. എൻസിപി (എസ്‌പി) മുതിർന്ന നേതാവ് ജയന്ത് പാട്ടീലും ബിജെപി ജനറൽ സെക്രട്ടറി വിനോദ് താവ്ഡെയും രഹസ്യ കൂടിക്കാഴ്ച നടത്തിയെന്ന റിപ്പോർട്ടുകൾ പുറത്തുവന്നതോടെയാണ് ഈ രാഷ്ട്രീയ അഭ്യൂഹങ്ങൾ ശക്തമായത്.

സഖ്യസാധ്യതയും സമാന്തര ചർച്ചകളും

ഭാവിയിലെ രാഷ്ട്രീയ ധാരണകളെക്കുറിച്ചാണ് ഇരുനേതാക്കളും ചർച്ച നടത്തിയതെന്നാണ് സൂചന. ഒരു വശത്ത് കോൺഗ്രസുമായുള്ള ലയന സാധ്യതകൾ പരിശോധിക്കുമ്പോൾ തന്നെ, മറുവശത്ത് ബിജെപി നയിക്കുന്ന എൻഡിഎ മുന്നണിക്ക് നിയമസഭയിൽ പിന്തുണ നൽകുന്ന കാര്യം ശരദ് പവാർ സമാന്തരമായി ആലോചിക്കുന്നുണ്ടെന്ന വിവരവും പുറത്തുവരുന്നുണ്ട്. പാർലമെന്റിൽ നിർണായക നിയമനിർമാണങ്ങൾ സുഗമമായി പാസാക്കിയെടുക്കാൻ എൻസിപി (എസ്‌പിയുടെ) പിന്തുണ ബിജെപിയും ആഗ്രഹിക്കുന്നുണ്ടെന്നാണ് രാഷ്ട്രീയ വൃത്തങ്ങൾ നൽകുന്ന സൂചന.

കേന്ദ്ര-സംസ്ഥാന മന്ത്രിസ്ഥാനങ്ങൾ ലക്ഷ്യം?

നിലവിൽ എൻസിപി (എസ്‌പി)ക്ക് ലോക്സഭയിൽ എട്ട് എംപിമാരും മഹാരാഷ്ട്ര നിയമസഭയിൽ പത്ത് എംഎൽഎമാരുമുണ്ട്. പുതിയ രാഷ്ട്രീയ ധാരണയുടെ ഭാഗമായി ലോക്സഭാ എംപി സുപ്രിയ സുലെയ്ക്ക് കേന്ദ്ര കാബിനറ്റ് പദവിയും, ജയന്ത് പാട്ടീൽ, ജിതേന്ദ്ര അവ്ഹാദ് എന്നിവർക്കായി മഹാരാഷ്ട്ര സർക്കാരിൽ രണ്ട് മന്ത്രിസ്ഥാനങ്ങളും പാർട്ടി ആവശ്യപ്പെട്ടതായാണ് ഉയരുന്ന ആരോപണം. വികസന ഫണ്ടുകൾ ഉറപ്പാക്കാനും രാഷ്ട്രീയ നിലനിൽപ്പിനും അധികാരത്തിന്റെ ഭാഗമാകേണ്ടത് അനിവാര്യമാണെന്ന് പാർട്ടിയിലെ ഭൂരിഭാഗം ജനപ്രതിനിധികളും കരുതുന്നതായും സൂചനയുണ്ട്.

വാർത്തകൾ നിഷേധിച്ച് എൻസിപി (എസ്‌പി)

അതേസമയം, ബിജെപിയുമായി യാതൊരുവിധ കൂടിക്കാഴ്ചയോ സഖ്യചർച്ചകളോ നടന്നിട്ടില്ലെന്ന് ജയന്ത് പാട്ടീലും സുപ്രിയ സുലെയും വ്യക്തമാക്കി. രാഷ്ട്രീയത്തിൽ വിവിധ പാർട്ടികളിലെ നേതാക്കൾ പരസ്പരം കാണാറുണ്ടെന്നും അതിൽ അസ്വാഭാവികതയൊന്നുമില്ലെന്നും ജയന്ത് പാട്ടീൽ പറഞ്ഞു. സർക്കാർ രൂപീകരിക്കുന്ന വിവിധ സമിതികളിൽ പല പാർട്ടികളിലെ എംപിമാർ ഒരുമിച്ച് പ്രവർത്തിക്കാറുണ്ടെന്നും, അതിന്റെ പേരിൽ രാഷ്ട്രീയ സഖ്യമുണ്ടെന്ന് വ്യാഖ്യാനിക്കാൻ കഴിയില്ലെന്നുമായിരുന്നു സുപ്രിയ സുലെയുടെ പ്രതികരണം.

കോൺഗ്രസിലും ആശങ്ക; ലയന ചർച്ചകൾ സജീവം

ഇതിനിടെ, എൻസിപി (എസ്‌പി) കോൺഗ്രസിൽ ലയിക്കുന്നതിനെക്കുറിച്ചുള്ള ചർച്ചകൾ കോൺഗ്രസ് ക്യാമ്പിലും സജീവമായിട്ടുണ്ട്. രാഹുൽ ഗാന്ധിയും കെ.സി. വേണുഗോപാലും മഹാരാഷ്ട്രയിലെ മുതിർന്ന കോൺഗ്രസ് നേതാക്കളുമായി ഇത് സംബന്ധിച്ച് ആശയവിനിമയം നടത്തിക്കഴിഞ്ഞു. എന്നാൽ, ഇരു പാർട്ടികളും തമ്മിൽ ലയനം സാധ്യമായാൽ സംസ്ഥാനത്തെ സംഘടനാ പദവികളിലും നിർണായക തീരുമാനങ്ങളിലും ശരദ് പവാർ പക്ഷം മേൽക്കൈ നേടുമോ എന്ന ആശങ്ക ചില മുതിർന്ന കോൺഗ്രസ് നേതാക്കൾ പങ്കുവെക്കുന്നുണ്ട്.