ഗുവാഹത്തി, 2026 ജൂലൈ 6 –

ഇന്തോ–മ്യാൻമർ അതിർത്തിയിലൂടെ വൻതോതിൽ അടയ്ക്ക കടത്തിയും അതിലൂടെ ലഭിച്ച പണം കള്ളപ്പണമാക്കി വെളുപ്പിച്ചതുമായ കേസിൽ അസം, മിസോറം, പശ്ചിമ ബംഗാൾ, ഉത്തർപ്രദേശ് എന്നിവിടങ്ങളിലെ 20 കേന്ദ്രങ്ങളിൽ എൻഫോഴ്‌സ്‌മെന്റ് ഡയറക്ടറേറ്റ് റെയ്ഡ് നടത്തി. ജൂലൈ 3-നാണ് ഗുവാഹത്തി സോണൽ ഓഫീസ് ഈ പരിശോധനകൾ നടത്തിയത്. അന്വേഷണത്തിൽ 1,500 കോടി രൂപയിലധികം കുറ്റകൃത്യ വരുമാനം കണ്ടെത്തിയതായി ഇ.ഡി. അറിയിച്ചു.

മ്യാൻമറിൽ നിന്ന് കടത്തിയ അടയ്ക്ക

മിസോറത്തിലെ ചംഫായ്–സോഖാവ്താർ അതിർത്തി വഴിയാണ് വിദേശ ഉത്ഭവമുള്ള അടയ്ക്ക മ്യാൻമറിൽ നിന്ന് കടത്തിയതെന്ന് അന്വേഷണത്തിൽ കണ്ടെത്തി. വ്യാജ ജി.എസ്.ടി. ബില്ലുകൾ, വ്യാജ വ്യാപാര സ്ഥാപനങ്ങൾ, കള്ള ഗതാഗതരേഖകൾ എന്നിവ ഉപയോഗിച്ച് കടത്തിനെ നിയമാനുസൃത വ്യാപാരമെന്ന രീതിയിൽ അവതരിപ്പിച്ചു. പിന്നീട് ഹവാല ഇടപാടുകളിലൂടെയാണ് പണം വീണ്ടും കടത്തുസംഘത്തിലെത്തിച്ചതെന്നും ഇ.ഡി. വ്യക്തമാക്കി.

ഇ.ഡി. അന്വേഷണത്തിൽ, മിസോറം ആസ്ഥാനമായുള്ള വിതരണക്കാരുടെ ഒരു സംഘടിത ശൃംഖലയിലൂടെയാണ് ഈ കടത്തുസംഘം പ്രവർത്തിച്ചിരുന്നതെന്ന് കണ്ടെത്തി. പ്രധാനമായും ചംഫായ് ജില്ല കേന്ദ്രീകരിച്ചാണ് ഇവർ ഇന്തോ–മ്യാൻമർ അതിർത്തിയിലൂടെ അടയ്ക്ക കടത്തിയിരുന്നത്. എം/എസ് ബെകി കുഹ്വ ദൗറിന്റെ ഉടമ ഹ്മിങ്താൻസാമി, എം/എസ് എൽ.ആർ. സ്റ്റോറിന്റെ ഉടമ ലാൽറിൻഛാനി, എം/എസ് കെ.എൽ. സ്റ്റോറിന്റെ ഉടമ ലാലെൻകൗലി എന്നിവരാണ് മിസോറത്തിലെ പ്രധാന വിതരണക്കാർ. അസമിൽ അബൂബ് അഹമ്മദ് മസുംദർ (മുഴുവൻ ശൃംഖലയുടെയും പ്രധാന ഏകോപകരിലൊരാൾ), എം/എസ് ശരദ ട്രേഡേഴ്സിന്റെ ഉടമ പ്രദീപ് കുമാർ പോൾ എന്നിവർ പ്രവർത്തനം ഏകോപിപ്പിച്ചു. പശ്ചിമ ബംഗാളിലെയും ഉത്തർപ്രദേശിലെയും എം/എസ് ജയ് മാതാജി എന്റർപ്രൈസസ് (ഫലകട്ട), എം/എസ് നബദ്വീപ് അരേക്കനട്ട് പ്രോസസിങ് പ്രൈവറ്റ് ലിമിറ്റഡ് (നബദ്വീപ്), എം/എസ് ശുഭ് ട്രേഡിങ് കമ്പനി (വാരാണസി), എം/എസ് ചിമേര ഇൻഫ്രാസ്ട്രക്ചർ പ്രൈവറ്റ് ലിമിറ്റഡ് (വാരാണസി) എന്നിവയാണ് ചരക്ക് സ്വീകരിക്കുകയും ധനസഹായം നൽകുകയും ചെയ്ത സ്ഥാപനങ്ങൾ. കൊൽക്കത്തയിലെ എം/എസ് എസ്.കെ. എന്റർപ്രൈസസിന്റെ ഉടമ ശശി കുമാർ ചൗധരിയാണ് വ്യാജ ഇൻവോയിസുകൾ ഉപയോഗിച്ചുള്ള കൃത്രിമ വ്യാപാര ഇടപാടുകൾക്ക് സൗകര്യമൊരുക്കിയത്. ഗുവാഹത്തി ആസ്ഥാനമായുള്ള എം/എസ് ബിക്കാനേർ അസം റോഡ്‌ലൈൻസ് ഇന്ത്യ ലിമിറ്റഡാണ് ചരക്ക് ഗതാഗതത്തിന് സഹായം നൽകിയിരുന്നത്.

1.30 കോടി രൂപയും 33 ബാങ്ക് അക്കൗണ്ടുകളും പിടിച്ചെടുത്തു

റെയ്ഡിൽ അടയ്ക്ക വ്യാപാരവുമായി ബന്ധപ്പെട്ട രേഖകൾ, ഡയറിയുകൾ, മൊബൈൽ ഫോണുകൾ, ലാപ്ടോപ്പുകൾ, ഹാർഡ് ഡിസ്കുകൾ, 1.30 കോടി രൂപയുടെ കണക്കിൽപ്പെടാത്ത പണം എന്നിവ പിടിച്ചെടുത്തു. കടത്തുസംഘവുമായി ബന്ധപ്പെട്ട 33 ബാങ്ക് അക്കൗണ്ടുകൾ മരവിപ്പിക്കുകയും ചെയ്തു.

ആഡംബര സ്വത്തുക്കളിലും നിക്ഷേപം

കുറ്റകൃത്യത്തിൽ നിന്നുള്ള പണം ചംഫായ്, സിൽച്ചർ, ഗുവാഹത്തി, നബദ്വീപ്, ഫലകട്ട, കൊൽക്കത്ത, വാരാണസി എന്നിവിടങ്ങളിൽ ആഡംബര വില്ലകളും ബഹുനില കെട്ടിടങ്ങളും ഉൾപ്പെടെയുള്ള സ്ഥാവര സ്വത്തുക്കളിൽ നിക്ഷേപിച്ചതായും ഇ.ഡി. കണ്ടെത്തി. കേസിൽ കൂടുതൽ അന്വേഷണം പുരോഗമിക്കുകയാണ്.