ദുബായ്, 2026 ജൂലൈ 3 –
പാസ്പോർട്ട് സേവനങ്ങൾക്ക് പുതിയ ഫീസ് ഘടന
യുഎഇയിൽ താമസിക്കുന്ന ഇന്ത്യൻ പൗരന്മാർക്കുള്ള പാസ്പോർട്ട് അപേക്ഷാ ഫീസ് കേന്ദ്ര സർക്കാർ വർധിപ്പിച്ചു. പാസ്പോർട്ട് പുതുക്കൽ, റീ-ഇഷ്യൂ, തത്കാൽ സേവനങ്ങൾ, നഷ്ടപ്പെട്ടതോ കേടായതോ ആയ പാസ്പോർട്ടുകൾ മാറ്റിയെടുക്കൽ തുടങ്ങിയ എല്ലാ പ്രധാന സേവനങ്ങളുടെയും ഫീസിലാണ് വർധനവ് വരുത്തിയിട്ടുള്ളത്. പുതുക്കിയ പുതിയ നിരക്കുകൾ ജൂലൈ 1 മുതൽ പ്രാബല്യത്തിൽ വന്നു. ദുബായിലെ ഇന്ത്യൻ കോൺസുലേറ്റും അബുദാബിയിലെ ഇന്ത്യൻ എംബസിയും പുതുക്കിയ നിരക്കുകൾ ഔദ്യോഗികമായി പുറത്തുവിട്ടു.
നിരക്കുകൾ ഉയർന്നത് ഇങ്ങനെ
പുതിയ നിരക്കുകൾ പ്രകാരം പ്രായപൂർത്തിയായവർക്കുള്ള 36 പേജിന്റെ സാധാരണ പാസ്പോർട്ട് ഫീസ് 285 ദിർഹത്തിൽ നിന്ന് 450 ദിർഹമായി ഉയർന്നു. 60 പേജുള്ള പാസ്പോർട്ടിന് ഇനി മുതൽ 630 ദിർഹം നൽകണം. അടിയന്തിരമായി പാസ്പോർട്ട് ലഭിക്കുന്നതിനുള്ള തത്കാൽ നിരക്കുകളും വർധിപ്പിച്ചിട്ടുണ്ട്; 36 പേജ് തത്കാൽ പാസ്പോർട്ടിന് 900 ദിർഹവും 60 പേജിന് 1,080 ദിർഹവുമാണ് പുതിയ ഫീസ്. ഇതിന് പുറമെ പോലീസ് ക്ലിയറൻസ് സർട്ടിഫിക്കറ്റ് (PCC), സറണ്ടർ സർട്ടിഫിക്കറ്റ് എന്നിവയുടെ ഫീസ് 145 ദിർഹമായി പുതുക്കി. എട്ട് വയസ്സിന് താഴെയുള്ള കുട്ടികളുടെ പുതിയ പാസ്പോർട്ട് അപേക്ഷകൾക്ക് പത്ത് ശതമാനം ഇളവും പ്രഖ്യാപിച്ചിട്ടുണ്ട്.
അൽ ഹിന്ദ് പുതിയ സേവനദാതാവ്
ഇന്ത്യൻ വിദേശകാര്യ മന്ത്രാലയം പാസ്പോർട്ട് നിയമങ്ങളിൽ വരുത്തിയ പരിഷ്കാരങ്ങളുടെ ഭാഗമായാണ് ആഗോളതലത്തിൽ ഈ ഫീസ് വർധനവ് നടപ്പിലാക്കിയത്. യുഎഇയിൽ ഈ മാറ്റം വരുന്നത് പാസ്പോർട്ട് സേവനങ്ങളുടെ ഔട്ട്സോഴ്സിങ് ഏജൻസി മാറുന്നതിനൊപ്പമാണ് എന്നതും ശ്രദ്ധേയമാണ്. ജൂലൈ 1 മുതൽ യുഎഇയിലെ പാസ്പോർട്ട്, വിസ, കോൺസുലർ അപേക്ഷകൾ സ്വീകരിക്കുന്നതിനുള്ള പുതിയ ഔദ്യോഗിക സേവനദാതാവായി അൽ ഹിന്ദ് ടൂർസ് ആൻഡ് ട്രാവൽസ് ചുമതലയേറ്റു. ഇതോടെ മുൻപ് ഈ സേവനങ്ങൾ നൽകിയിരുന്ന ബി.എൽ.എസ് ഇന്റർനാഷണൽ, എസ്.ജി.ഐ.വി.എസ് ഗ്ലോബൽ എന്നിവയുടെ കാലാവധി അവസാനിച്ചു.
