ന്യൂഡൽഹി, 2026 ജൂൺ 27 –

നിരോധിത ഭീകരസംഘടനയായ ജമാഅത്തുൽ മുജാഹിദീൻ ബംഗ്ലാദേശിന്റെ അനുബന്ധ സംഘടനയിലൂടെ ഇന്ത്യയിൽ ഭീകരശൃംഖല വ്യാപിപ്പിക്കാൻ ഗൂഢാലോചന നടത്തിയെന്ന കേസിൽ 11 പേർക്കെതിരെ ദേശീയ അന്വേഷണ ഏജൻസി കുറ്റപത്രം സമർപ്പിച്ചു. ഗുവാഹത്തിയിലെ പ്രത്യേക എൻഐഎ കോടതിയിലാണ് കുറ്റപത്രം നൽകിയത്. പശ്ചിമ ബംഗാൾ, അസം, ത്രിപുര എന്നിവിടങ്ങളിൽ ഭീകരസംഘടനയുടെ ശൃംഖല വികസിപ്പിക്കാനാണ് ഗൂഢാലോചന നടത്തിയതെന്നാണ് അന്വേഷണ ഏജൻസിയുടെ കണ്ടെത്തൽ.

യുവാക്കളെ തീവ്രവാദത്തിലേക്ക് ആകർഷിച്ചെന്ന് കണ്ടെത്തൽ

അന്വേഷണത്തിൽ, ഇമാം മഹ്മൂദ് ഹബീബുള്ള സ്ഥാപിച്ച ഇമാം മഹ്മൂദർ കാഫില എന്ന സംഘടനയിലൂടെയാണ് നിരോധിത ഭീകരസംഘടനയുടെ പ്രവർത്തനങ്ങൾ മുന്നോട്ടുകൊണ്ടുപോയതെന്ന് എൻഐഎ വ്യക്തമാക്കി. രഹസ്യയോഗങ്ങൾ, മതപ്രബോധന പരിപാടികൾ, തീവ്രവാദ ആശയങ്ങൾ പ്രചരിപ്പിക്കുന്ന പ്രസിദ്ധീകരണങ്ങൾ, ഡിജിറ്റൽ പ്ലാറ്റ്ഫോമുകൾ എന്നിവ ഉപയോഗിച്ച് യുവാക്കളെ തീവ്രവാദ ആശയങ്ങളിലേക്ക് ആകർഷിക്കാനും സംഘടനയുടെ ശൃംഖല വിപുലീകരിക്കാനുമാണ് പ്രതികൾ ശ്രമിച്ചതെന്നാണ് കുറ്റപത്രത്തിലുള്ള ആരോപണം. അസമിൽ നസീമുദ്ദീനും ത്രിപുരയിൽ ജഗീർ മിയയും സംഘടനയുടെ പ്രവർത്തനങ്ങൾക്ക് നേതൃത്വം നൽകിയിരുന്നതായും എൻഐഎ പറഞ്ഞു.

അന്വേഷണം തുടരുന്നു

അന്വേഷണത്തിനിടെ നിരവധി രേഖകളും ഇലക്ട്രോണിക് ഉപകരണങ്ങളും ഡിജിറ്റൽ തെളിവുകളും എൻഐഎ പിടിച്ചെടുത്തതായി അറിയിച്ചു. ഭാരതീയ ന്യായ സംഹിതയിലെയും നിയമവിരുദ്ധ പ്രവർത്തനങ്ങൾ തടയൽ നിയമത്തിലെയും വിവിധ വകുപ്പുകൾ പ്രകാരമാണ് കുറ്റപത്രം സമർപ്പിച്ചിരിക്കുന്നത്. കേസിൽ കൂടുതൽ അന്വേഷണം തുടരുകയാണെന്നും എൻഐഎ വ്യക്തമാക്കി.